JEHOVA i gat fasin blong givim samting long gladhat blong hem. (Jem 1:17) Yumi save luk fasin ya long olgeta samting we hem i wokem. Hem i mekem plante sta long skae mo i mekem plante naesfala tri mo flaoa long wol.—Ol Sam 65:12, 13; 147:7, 8; 148:3, 4.

Man blong raetem Sam 104 i talem bigfala tangkiu long Jehova from ol samting we hem i mekem, nao hem i raetem singsing ya blong presem hem. Taem yu ridim Sam ya, ?yu yu gat tingting olsem man ya we i raetem? Hem i talem se: “Oltaem long laef blong mi, bambae mi stap singsing blong presem Hae God, gogo laef blong mi i finis.” (Ol Sam 104:33) ?Yu yu wantem mekem sem mak?

Jehova i wantem se yumi folem fasin blong hem blong givim presen long gladhat. Mo hem i talem from wanem yumi mas gat gladhat blong givim samting. Hem i pulum aposol Pol blong raetem se: “Yu mas tok strong long olgeta we oli rijman long ol samting blong wol ya, blong oli no letem tingting blong olgeta i go antap tumas. Mo bambae oli no putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo, we hem i stap givim plante samting long yumi, blong yumi harem gud long hem. Yu mas talem long olgeta se oli mas mekem ol gudfala fasin, mo ol gudfala wok, mo oli mas kam rij long fasin ya. Oli mas gat gladhat blong givhan long ol man, mo blong seraot ol samting blong olgeta long ol narafala man. Long fasin ya, i olsem we oli stap putumgud plante gudgudfala samting blong olgeta, we i olsem fandesen blong laef blong olgeta, we i save stap strong oltaem. Nao bambae oli save kasem laef ya we i prapa wan.”—1 Timoti 6:17-19.

Long seken leta we Pol i raetem long ol Kristin long Korin, hem i tokbaot samting we i mas pusum olgeta blong oli givim presen long narafala. Hem i talem se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9:7) ?Taem yumi givim samting long gladhat, yumi givhan long hu? Pol i talem se yumi givhan long narafala we i nidim samting, mo yumi givhan long yumi tu, from we Jehova bambae i blesem yumi.—2 Korin 9:11-14.

Afta, Pol i tokbaot presen we God i givim we i bigwan olgeta, i se: “Yumi mas talem tangkiu long God  from presen ya blong hem we i gud tumas, i bitim mak olgeta, yumi no save makem.” (2 Korin 9:15) Presen ya we i gud tumas, hemia ol gudfala samting we God i givim long yumi tru long Jisas Kraes. I no gat tok we i naf blong eksplenem ol nambawan presen ya.

?Olsem wanem yumi save talem tangkiu long Jehova mo Jisas, from samting we tufala i mekem finis, mo samting we bambae tufala i mekem yet? Wan rod, hemia se yumi glad blong givim taem, paoa, mo ol samting we yumi gat, blong mekem wosip long Jehova, mo blong tijim ol narafala blong oli save hem. Yumi save mekem olsem, nating se yumi gat plante samting no yumi gat smol nomo.—1 Kronikel 22:14; 29:3-5; Luk 21:1-4.