1, 2. (1) ?Olsem wanem fasin blong Jehova i defren long fasin blong ol man we oli gat paoa? (2) ?Bambae yumi tokbaot wanem long stadi ya?

OLTAEM ol man we oli gat paoa oli mekem i strong tumas long narafala o spolem olgeta. (Matiu 20:25; Prija 8:9) !Jehova i neva mekem olsem! Nating se hem God ya we i gat Olgeta paoa long heven mo wol, be hem kea long ol sinman. Hem i kaen mo i tingbaot filing blong yumi, mo i givim ol samting we yumi nidim. Hem i save se yumi sinman mo yumi no naf blong mekem sam samting, taswe hem i neva askem wan samting we i strong tumas long yumi.—Ol Sam 103:13, 14.

² Baebol i tokbaot plante eksampol we oli soemaot olsem wanem Jehova i tingbaot ol man blong hem. I gud yumi tokbaot tri eksampol: Faswan se, Jehova i givhan long yangfala Samuel blong i talemaot wan mesej blong jajmen long Hae Pris Ilae. Sekenwan se, Jehova i gat longfala tingting long Moses, taem Moses i harem se hem i no naf blong lidim ol man Isrel oli aot long Ijip. Mo namba tri se, Jehova i tingbaot ol man Isrel taem oli aot long Ijip. ?Ol eksampol ya oli tijim wanem long saed blong Jehova? ?Olsem wanem yumi save folem fasin blong hem?

3. ?Wanem i hapen long yangfala Samuel taem hem i stap slip? ?Wanem kwestin we maet yumi askem? (Yu luk pija long stat blong stadi.)

³ Samuel i yangfala nomo taem hem i stat blong wok long haos tapolen blong Jehova. (1 Samuel 3:1) Wan naet taem hem i stap slip, wan samting we i narakaen i hapen. * (Ridim 1 Samuel 3:2-10.) Hem i harem wan man i singaotem hem. Hem i ting se hemia olfala Hae Pris Ilae, ale hem i girap, i go luk Ilae mo i talem se: “Yu yu stap singaot mi. Mi ya.” Be Ilae i talem se: “Mi no singaot yu.” Sem samting i hapen tu taem bakegen, mo Ilae i luksave se God nao i stap singaot Samuel. Taswe hem i talem samting we Samuel i mas talem sipos man ya i singaot bakegen, mo Samuel i obei. ?From wanem long stat Jehova i no talem long Samuel se hem nao i stap singaot? Baebol i no talem. Be Jehova i mekem olsem from we hem i tingbaot filing blong Samuel.

4, 5. (1) ?Samuel i mekem wanem taem Jehova i talem long hem blong i go talemaot wan mesej long Ilae? (2) ?Stori ya i soemaot wanem long saed blong Jehova?

⁴ Ridim 1 Samuel 3:11-18. Loa blong Jehova i talem se ol pikinini oli mas respektem olgeta we oli olfala moa long olgeta, speseli olgeta we oli gat wan impoten wok. (Eksodas 22:28; Levitikas 19:32) Taswe i no isi long Samuel, we i wan smol boe nomo, blong i gat strong tingting blong go talemaot jajmen blong Jehova long Ilae. Baebol i talem se Samuel i “fraet blong talemaot tok ya long Ilae.” Be God i soemaot finis long Ilae se hem nao i stap singaot Samuel. Taswe, Ilae i talem long Samuel blong i no haedem samting we Jehova i talem. Ale Samuel i obei long Ilae mo i “talemaot olgeta samting ya.”

⁵ Ilae i no sapraes long mesej ya, from we bifo finis “wan profet” i bin talemaot sem mesej olsem long hem. (1 Samuel 2:27-36) Stori ya i soemaot se Jehova i waes mo i tingbaot narafala.

6. ?Yumi lanem wanem long fasin blong God blong halpem yangfala Samuel?

⁶ ?Yu yu wan yangfala? Sipos yes, stori blong yangfala Samuel i soemaot se Jehova i kasemsave long ol problem mo ol filing blong yu. Ating yu faenem i had blong prij long olgeta we oli olfala moa long yu, o blong stap defren long ol fren blong yu. Be yu save sua fulwan se Jehova bambae i givhan long yu. Taswe yu mas prea long hem mo talemaot ol filing blong yu. (Ol Sam 62:8) Tingting dip long eksampol blong ol yangfala long Baebol, olsem Samuel. Mo i gud yu askem ol brata mo sista we oli gat sem problem olsem yu, blong oli tokbaot olsem wanem oli winim ol problem ya. Maet bambae oli tokbaot sam samting we oli neva tingbaot se Jehova bambae i mekem blong givhan long olgeta.

7, 8. ?Olsem wanem Jehova i soemaot se hem i tingbaot filing blong Moses?

⁷ Taem Moses i gat 80 yia, Jehova i givim wan wok long hem we i no isi blong mekem. Hemia blong tekemaot ol man Isrel we oli stap wok slef long Ijip. (Eksodas 3:10) Ating Moses i sek long samting ya, from we hem i neva mekem wan wok olsem. Long ol 40 yia we i pas, hem i stap lukaot long ol sipsip long kantri ya Midian. Taswe hem i talem long Jehova se: “Mi mi olsem nating nomo. Mi mi no naf blong go luk king ya blong tekem olgeta ya oli kamaot long Ijip.” Be Jehova i talem long hem se: “Mi bambae mi stap wetem yu.” (Eksodas 3:11, 12) Mo tu, Jehova i promes long hem se ol elda blong Isrel ‘bambae oli lesin’ long hem. Be yet, Moses i askem se: ‘?Be sipos ol laen blong Isrel oli no save bilif long tok blong mi, no oli no save harem tok blong mi, bambae mi talem wanem long olgeta?’ (Eksodas 3:18; 4:1) !I olsem we Moses i talem se Jehova i rong! Be Jehova i gat longfala tingting long Moses. Hem i givim paoa long Moses blong i mekem ol merikel. Long Baebol, Moses i faswan man blong mekem ol merikel.—Eksodas 4:2-9, 21.

⁸ Jehova i givhan long Moses, be yet hem i mekem eskius. Hem i talem se hem i no save toktok gud. Ale Jehova i talem se: “Bambae mi mi givhan long yu long toktok blong yu, mo bambae mi talem long yu wanem we yu yu mas talemaot.” ?Olsem wanem? ?Naoia Moses i trastem Jehova blong givhan long hem? !Nogat, hem i askem Jehova blong i sanem wan narafala man! Nao Jehova i kam kros, be yet hem i tingbaot filing blong Moses, ale hem i sanem Eron blong i toktok long bihaf blong Moses.—Eksodas 4:10-16.

9. From we Jehova i gat longfala tingting mo i kaen, ?olsem wanem samting ya i givhan long wok blong Moses?

⁹ ?Stori ya i tijim wanem long saed blong Jehova? Jehova i gat Olgeta Paoa mo i save yusum paoa ya blong mekem Moses i fraet mo i obei long hem. Be hem i no mekem olsem, hem i gat longfala tingting, i kaen, mo i talem se bambae hem i stap wetem Moses. ?Olsem wanem? ?Tok ya i kamtru? !Yes! Jehova i mekem Moses i kam bigfala lida blong ol man Isrel. Moses i traehad blong givhan long ol narafala, olsem we Jehova i mekem long hem.—Namba 12:3.

10. ?Wanem i kamaot taem yumi folem fasin blong Jehova blong tingbaot ol narafala?

¹⁰ ?Yumi lanem wanem? Sipos yu wan hasban, wan papa mo mama, o wan elda, yu gat paoa antap long ol narafala. Taswe from samting ya, i impoten tumas we yu folem fasin blong Jehova blong kaen, gat longfala tingting, mo tingbaot waef, ol pikinini blong yu, mo olgeta long kongregesen. (Kolosi 3:19-21; 1 Pita 5:1-3) Sipos yu folem fasin blong Jehova God mo Jisas Kraes, bambae i isi blong ol narafala oli kam toktok long yu, mo bambae yu leftemap tingting blong olgeta. (Matiu 11:28, 29) Mo tu, bambae yu stap olsem wan gudfala eksampol long olgeta.—Hibrus 13:7.

11, 12. ?Olsem wanem Jehova i mekem ol man Isrel oli harem se oli sef taem hem i lidim olgeta oli aot long Ijip?

¹¹ Maet i gat bitim 3 milian man Isrel we oli aot long Ijip long yia 1513 bifo Kraes. Long grup ya i gat ol pikinini, ol olfala, mo maet sam we oli sik o oli handikap. Wan bigfala grup olsem i nidim wan lida we i kea mo i kasemsave long filing blong olgeta. Mo hemia nao fasin blong Jehova, we i yusum Moses blong soem long ol man Isrel. Taswe, ol man Isrel oli harem se oli sef taem oli aot long Ijip.—Ol Sam 78:52, 53.

¹² ?Olsem wanem Jehova i mekem ol man Isrel oli harem se oli sef? Hem i seraotem olgeta long ol grup blong oli “rere oltaem blong faet” taem oli aot long Ijip. (Eksodas 13:18) From we oli seraot long ol grup, naoia i isi blong oli luksave se Jehova nao i stap lidim olgeta. Jehova i mekem tu se ‘long dei, klaod i lidim olgeta’ mo long naet hem i yusum “laet blong faea” blong mekem oli tingbaot se hem i stap wetem olgeta, i stap lidim olgeta, mo i stap protektem olgeta. (Ol Sam 78:14) Samting we i hapen biaen i soemaot gud long ol man Isrel se oli nidim we Jehova i stap wetem.

13, 14. (1) ?Olsem wanem Jehova i lukaotgud long ol man Isrel long Red Si? (2) ?Olsem wanem Jehova i soemaot se hem i gat bigfala paoa i bitim ol ami blong Ijip?

¹³ Ridim Eksodas 14:19-22. Yu traem tingbaot se yu stap wetem ol man Isrel long taem ya. Ol ami blong Ijip oli stap biaen long yu, mo Red Si i stap long fored blong yu. I no gat rod blong yu ronwe. Nao Jehova i tekem aksen. Klaod we i stap go fastaem long yufala i muv i go biaen, i stap bitwin yufala mo ol ami blong Ijip. !Naoia oli stap long tudak, be long ples we yufala i stap long hem i gat bigfala laet! Nao yu luk se Moses i leftemap han blong hem antap long solwota, mo wan strong win i blu i kam long is, i seraotem solwota. Nao yu, wetem ol famle blong yu, ol narafala, ol anamol blong yufala, yufala i wokbaot i go kros. Yu sapraes from we graon i no sofmad mo i no glis, be i drae mo i strong, taswe i isi blong wokbaot long hem. From samting ya, olgeta tu we oli no save wokbaot kwik oli naf blong wokbaot i go kros we i no gat wan samting i blokem olgeta.

¹⁴ Ridim Eksodas 14:23, 26-30. Taem yufala i stap go kros, Fero, we i wan flas man, i stat blong ronem yufala. Be Moses i leftemap han blong hem bakegen antap long solwota, ale solwota i kam kavremap Fero mo ol ami blong hem. !Nao olgeta evriwan oli ded!—Eksodas 15:8-10.

15. ?Stori blong ol man Isrel i tijim wanem long saed blong Jehova?

¹⁵ Stori ya i tijim wan narafala samting long saed blong Jehova. Hem i wan God we i wok folem oda. Fasin ya blong hem i mekem yumi harem se yumi sef. (1 Korin 14:33) Olsem man blong lukaot long sipsip, Jehova i lavem ol man blong hem mo i lukaotgud long olgeta. Hem i sevem olgeta mo i protektem olgeta long ol enemi. Samting ya i leftemap tingting blong yumi mo i mekem yumi haremgud taem yumi stap go klosap long en blong rabis wol ya.—Ol Proveb 1:33.

16. ?Samting we Jehova i mekem blong sevem ol man Isrel i givhan long yumi olsem wanem?

¹⁶ Tede, Jehova i gohed blong lukaotgud long ol man blong hem we oli olsem wan grup. Hem i halpem olgeta blong oli gohed blong frengud wetem hem mo i protektem olgeta long ol enemi. Mo bambae hem i gohed blong mekem olsem long taem blong bigfala trabol, we i bambae i kam i no longtaem. (Revelesen 7:9, 10) Taswe long taem ya, olgeta man blong God bambae oli no fraet, nating se oli pikinini o olfala, oli helti o handikap. * !Bambae oli mekem wan samting we i defren olgeta! Bambae oli tingbaot toktok blong Jisas we i se: ‘Yufala i stanap stret mo leftemap hed blong yufala, from we klosap nao bambae yufala i fri.’ (Luk 21:28) Nating se Gog, hemia wan grup blong ol neson we oli strong moa i bitim Fero, i traem blong spolem ol man blong God, be ol man blong God bambae oli sua fulwan se Jehova bambae i protektem olgeta. (Esikel 38:2, 14-16) ?From wanem? From we oli save se Jehova i no save jenis. Bambae hem i soemaot bakegen se hem i wan God we i lavem ol man blong hem mo i kea long olgeta.—Aesea 26:3, 20.

17. (1) ?Taem yumi tingting dip long ol stori we oli tokbaot Jehova se i kea long ol man blong hem, yumi kasem wanem? (2) ?Bambae yumi tokbaot wanem long nekis stadi?

¹⁷ Long stadi ya, yumi luk sam eksampol we i soem se Jehova i tingbaot mo i kea long ol man blong hem, i lidim olgeta, mo i sevem olgeta. Taem yu tingting dip long ol stori olsem, traem lanem wan niufala samting long saed blong Jehova, we maet yu neva tingbaot bifo. Moa we yu lanem ol nambawan fasin blong Jehova, moa we bambae yu lavem hem. Long nekis stadi, bambae yumi lanem olsem wanem yumi save folem fasin blong Jehova blong tingbaot ol narafala long famle blong yumi, long kongregesen, mo long wok blong prij.