1. ?Olsem wanem tingting blong wol i save spolem tingting daon we yumi gat?

?FROM wanem i had blong folem samting we yumi lanem long Baebol? Wan risen hemia se, blong mekem samting we i stret, yumi mas gat tingting daon. Be long “ol las dei” ya, i had blong gat tingting daon from we plante man raonabaot long yumi “oli tingbaot olgeta nomo, oli laekem mane tumas, oli tok flas, tingting blong olgeta i go antap tumas,” mo “oli no save bos long tingting blong olgeta.” (2 Timoti 3:1-3) Yumi ol man blong God, yumi save se ol fasin olsem oli nogud, be maet yumi luk se ol man we oli mekem ol fasin ya, oli glad nomo long laef blong olgeta. (Ol Sam 37:1; 73:3) Ale, maet yumi gat tingting ya se: ‘?I nid blong tingbaot narafala fastaem?. Sipos mi gat tingting daon, ?bambae ol man oli respektem mi yet?’ (Luk 9:48) Hemia tingting blong wol mo i save spolem fasin fren blong yumi wetem ol brata mo sista, mo bambae i mekem i had blong ol narafala oli luksave se yumi ol trufala Kristin. Be taem yumi stadi long fasin blong ol man blong God we oli gat tingting daon, mo yumi folem eksampol blong olgeta, bambae i gat gudfala frut i kamaot long laef blong yumi.

2. ?Yumi save lanem wanem long fasin blong ol gudfala man blong God bifo?

² Long taem bifo, ?wanem i halpem ol gudfala man blong oli frengud wetem God? ?Olsem wanem oli mekem God i glad? ?Olsem wanem oli kasem paoa blong mekem samting we i stret? Taem yumi ridim stori blong olgeta long Baebol mo yumi tingting dip long olgeta, bambae bilif blong yumi i kam strong moa.

3, 4. (1) ?Olsem wanem Jehova i stap i tijim yumi? (2) ?From wanem save nomo i no naf blong mekem bilif i strong?

³ Jehova i givim ol samting we yumi nidim blong mekem bilif blong yumi i strong. Yumi kasem ol gudfala trening mo advaes tru long Baebol, ol buk mo video, websaet blong yumi, JW Brodkasting, ol miting, mo ol asembli blong yumi. Be Jisas i talem se save nomo i no naf, hem i tokbaot samting we i impoten moa, i se: “Kakae blong mi i blong mekem ol samting we hemia we i sanem mi i wantem, mo blong mi finisim wok we hem i givim long mi.”—Jon 4:34.

⁴ Wok blong God, i olsem kakae blong Jisas. Taem yumi kakae gudfala kakae, hemia i mekem yumi harem gud mo bodi blong yumi i strong. Long sem fasin, wok blong God i mekem yumi harem gud mo i mekem bilif blong yumi i strong. Eksampol, maet yu harem se yu taed taem yu go long miting blong prij, be afta we yu go prij mo yu kambak long haos, yu harem se yu glad mo yu gat paoa bakegen.

5. ?Olsem wanem waes i givhan long man?

⁵ Taem yumi glad blong mekem samting we Jehova i askem, yumi soemaot se yumi waes. (Ol Sam 107:43) Waes i givhan long man blong i kasem plante gudfala samting. Baebol i talem se: ‘I no gat wan samting nating we yu save wantem samtaem, we i gud moa winim waes. Ol man we oli holem waes oli glad oltaem nomo, mo waes bambae i mekem oli gat laef.’ (Ol Proveb 3:13-18) Jisas i talem se: “Yufala i save ol samting ya, be sipos yufala i mekem olgeta, bambae yufala i harem gud.” (Jon 13:17) Sipos ol disaepol blong Jisas oli gohed blong mekem samting we Jisas i talem long olgeta, oli save glad. Mo oltaem bambae oli folem ol tijing mo eksampol blong Jisas long laef blong olgeta.

6. ?From wanem yumi mas gohed blong folem samting we yumi lanem long Baebol?

⁶ Tede, yumi mas gohed blong folem ol samting we yumi lanem long Baebol. Traem tingbaot wan man we i skul from mekanik mo i gat ol tul blong mekanik. Sipos hem i yusumgud save blong hem mo ol tul we hem i gat, bambae hem i kam wan gudfala mekanik. Maet hem i gat plante ekspiriens long wok ya, be sipos hem i wantem stap olsem wan gudfala mekanik, hem i mas gohed blong folem samting we hem i lanem. Long sem fasin, taem yumi lanem trutok, yumi glad from se yumi folem samting we yumi ridim long Baebol. Be sipos yumi wantem gohed blong stap glad, yumi mas gohed blong folem ol tijim blong Jehova.

7. ?Yumi mas mekem wanem i bitim we yumi jes ridim ol stori blong Baebol nomo?

⁷ Long stadi ya, bambae yumi tokbaot sam samting we i save mekem i had blong yumi gat tingting daon. Mo bambae yumi lanem olsem wanem ol gudfala man blong God bifo oli gat tingting daon. Mo tu, yumi mas tingting dip long ol samting we yumi lanem mo folem olgeta long laef blong yumi, i bitim we yumi jes ridim ol stori ya nomo.

8, 9. Folem Ol Wok 14:8-15, ?yumi lanem wanem long fasin blong Pol blong gat tingting daon? (Yu luk pija long stat blong stadi.)

⁸ God i wantem se olgeta man ‘oli mas kasem laef mo stret save long trutok.’ (1 Timoti 2:4) ?Wanem tingting blong yu long ol man we oli no save trutok yet? Aposol Pol i prij long ol man Jiu we oli save Jehova finis. Mo tu, Pol i prij long ol man we oli wosipim ol giaman god, mo hemia i traem tingting daon blong hem. ?Olsem wanem samting ya i traem tingting daon blong Pol?

⁹ Long faswan misinari trip blong Pol, hem mo Banabas i go long taon ya Listra. Ol man long ples ya oli mekem long Pol mo Banabas olsem se tufala i impoten moa long ol narafala, mo oli singaot tufala long nem blong ol giaman god blong olgeta, hemia Sus mo Heremes. ?Olsem wanem? ?Pol mo Banabas i kam flas from samting ya? ?Tufala i luk samting ya olsem wan rod blong pulum moa man blong lesin long gud nius? ?Naoia tufala i glad, from we bifo ol man oli bin spolem tufala long ol narafala taon? !Nogat! Tufala i no glad long samting we oli mekem, mo tufala i talem se: “?From wanem yufala i stap mekem samting ya? Mitufala i man nomo olsem yufala.”—Ol Wok 14:8-15.

10. ?From wanem Pol mo Banabas i no harem se tufala i impoten moa long ol narafala taem tufala i stap long Listra?

¹⁰ Taem Pol mo Banabas i talem se tufala i man nomo, tufala i wantem soemaot se tufala i sinman. Be hemia i no min se fasin blong wosip blong tufala i sem mak long ol man Listra. Nogat, God nao i sanem tufala olsem misinari blong go long Listra. (Ol Wok 13:2) Tabu spirit i makemaot tufala mo tufala i gat wan gudfala hop. Be tufala i no ting se tufala i impoten moa. Tufala i kasemsave se ol man ya tu oli save gat hop ya blong go long heven, sipos oli akseptem gud nius.

11. ?Olsem wanem blong gat tingting daon taem yumi prij?

¹¹ ?Olsem wanem blong gat tingting daon olsem Pol? Faswan samting se, yumi no mas ting se yumi impoten moa long ol narafala, from we yumi stap prij o from we Jehova i halpem yumi blong mekem sam wok. I gud yumi wanwan i askem se: ‘?Mi mi gat wanem tingting long ol man we mi prij long olgeta? ?Mi mi laekem wan grup blong man, be mi no laekem wan narafala grup?’ Long evri ples long wol, ol Witnes blong Jehova oli traehad blong faenem ol man we oli wantem lesin long gud nius. Sam Witnes oli lanem lanwis mo kastom blong ol man we ol narafala oli luk olgeta se oli no impoten. Be ol Witnes ya, oli no ting se oli impoten moa long ol narafala ya we oli prij long olgeta. Defren olgeta, oli wantem savegud ol wanwan man, nao oli save halpem olgeta blong kasemsave long mesej blong Kingdom.

12. ?Olsem wanem Epafras i soem se hem i tingbaot narafala?

¹² Wan narafala rod blong soemaot se yumi gat tingting daon, hemia blong prea from ol brata mo sista we oli gat semfala bilif olsem yumi. (2 Pita 1:1) Hemia nao samting we Epafras i mekem. Baebol i tokbaot hem tri taem nomo. Taem Pol stap kalabus long wan haos long Rom, hem i raet i go long ol Kristin long Kolosi mo i tokbaot Epafras se: “Evritaem hem i prea strong from yufala.” (Kolosi 4:12) Epafras i savegud ol brata mo sista mo hem i keagud long olgeta. Hem i gotru long sam hadtaem tu, taswe Pol i tokbaot Epafras olsem se ‘hem i stap kalabus wetem hem.’ (Filimon 23) Nating se i olsem, Epafras i tingbaot nid blong ol narafala mo hem i mekem samting blong givhan long olgeta. Hem i prea from ol brata mo sista, mo tu hem i talem nem blong olgeta. Yumi save mekem sem mak. Ol prea olsem, oli gat bigfala paoa.—2 Korin 1:11; Jemes 5:16.

13. ?Olsem wanem blong folem eksampol blong Epafras taem yumi prea?

¹³ Tingbaot man we bambae yu prea from mo talem nem blong hem taem yu prea. Maet yu save ol brata mo sista long kongregesen blong yu o ol famle we oli fesem sam traem. Maet i had blong oli mekem ol desisen o blong winim ol traem. Mo yu save prea from ol brata mo sista we yu neva luk olgeta, be nem blong olgeta i stap long jw.org long haf ya, “Jehovah’s Witnesses Imprisoned for Their Faith.” (Yu luk long NEWSROOM > LEGAL DEVELOPMENTS.) Mo tu, yu save prea from olgeta we oli lusum wan famle o fren long ded, olgeta we oli kasem trabol from ol disasta o faet, mo olgeta we oli gat problem long saed blong mane. I gat plante brata mo sista we yumi mas prea from olgeta. Taem yumi mekem olsem, yumi soemaot se yumi tingbaot nid blong ol narafala. (Filipae 2:4) Mo Jehova i harem ol prea olsem.

14. ?Olsem wanem Jehova i soemaot gudfala eksampol long fasin ya blong lesin long narafala?

¹⁴ Wan narafala rod bakegen blong soemaot se yumi gat tingting daon, hemia taem yumi lesin long wanem we narafala i talem. Jemes 1:19 i talem se yumi mas “rere oltaem blong lesin.” Jehova i soem gudfala eksampol long saed ya. (Jenesis 18:32; Josua 10:14) Traem tingbaot stori we i stap long Eksodas 32:11-14. (Ridim.) Jehova i no nid blong lesin long Moses, be hem i no mekem olsem, hem i letem Moses i talemaot ol filing blong hem. ?Yu yu gat longfala tingting blong lesin mo folem advaes blong wan man we bifo i bin mekem sam rong samting? Jehova i gat longfala tingting blong lesin long ol man we oli prea long hem.

15. ?Olsem wanem yumi save folem fasin blong Jehova blong ona long ol narafala?

¹⁵ Yu traem tingbaot, Jehova i gat tingting daon mo i lesin long ol man olsem Ebraham, Rejel, Moses, Josua, Manoa, Elaeja, mo Hesekia. ?Olsem wanem long yu? Maet yu save askem se: ‘?Mi mi respektem ol brata mo sista, taem oli talemaot ol tingting blong olgeta mo mi folem sipos i stret? ?I gat wan long kongregesen blong mi o long famle blong mi we mi save lesin moa long hem? ?Bambae mi mi mekem wanem blong givhan?’—Jenesis 30:6; Jajes 13:9; 1 King 17:22; 2 Kronikel 30:20.

16. ?Deved i mekem wanem taem Simei i tok nogud long hem?

¹⁶ Tingting daon i givhan long yumi blong bos long tingting, taem narafala i mekem i nogud long yumi. (Efesas 4:2) Baebol i tokbaot wan gudfala eksampol long saed ya, long Seken Samuel 16:5-13 (Ridim.) Simei we i wan famle blong King Sol, i stap tok nogud long Deved mo ol man blong hem. Deved i no blokem hem, be hem i gat longfala tingting mo i stanap strong, nating se Simei i agensem hem. ?Wanem i givhan long Deved blong i bos long tingting blong hem? Sipos yumi ridim Ol Sam 3, bambae yumi fanemaot wanem i givhan long hem.

17. ?Wanem i givhan long Deved blong i bos long tingting blong hem? ?Olsem wanem yumi save folem eksampol blong hem?

¹⁷ Deved i raetem ol toktok blong Ol Sam 3, taem boe blong hem Absalom, i stap traem blong kilim hem. Mo long taem ya tu Simei i stap tok nogud long Deved, be Deved i stap kwaet nomo. ?Wanem i givhan long Deved? Hem i talem long Ol Sam 3:4, se: ‘Oltaem mi stap krae i go long God blong i givhan long mi. Mo hem i stap long tabu hil blong hem, nao i stap ansa long mi.’ Taem ol narafala oli mekem i nogud long yumi, yumi mas prea olsem Deved. Nao bambae Jehova i givim tabu spirit blong hem long yumi, blong yumi save stanap strong. ?Olsem wanem? ?Yu save bos moa long tingting blong yu o fogivim narafala taem oli mekem i nogud long yu? ?Yu yu gat strong tingting se Jehova i kea long yu taem yu safa mo bambae hem i blesem yu?

18. ?Wanem gudfala frut i kamaot taem yumi gohed blong mekem ol samting we Jehova i talem?

¹⁸ Taem yumi mekem samting we yumi save se i stret, bambae yumi kam waes, mo Jehova bambae i blesem yumi. Baebol i talem long Ol Proveb 4:7 se: “Waestok hem i nambawan.” I tru se waes i kamaot from save, be save nomo i no naf. Yumi nidim waes blong mekem ol gudfala desisen. Ol anis tu oli soem se oli waes, hemia taem oli mekemrere kakae blong olgeta from rentaem. (Ol Proveb 30:24, 25) Kraes, we Baebol i singaot hem se “waes blong God,” oltaem hem i mekem ol samting we Papa blong hem i glad long hem. (1 Korin 1:24; Jon 8:29) God bambae i blesem yumi sipos yumi soem se yumi waes, hemia taem yumi gohed blong gat tingting daon mo mekem samting we i stret. (Ridim Matiu 7:21-23.) Taswe, i gud yu gohed blong gat tingting daon. Hemia bambae i givhan long ol narafala long kongregesen blong oli mekem wok blong Jehova wetem tingting daon. Yes, i nidim taem mo longfala tingting blong mekem ol samting we yumi save se i stret. Be taem yumi mekem olsem, yumi stap soemaot tingting daon, mo hemia bambae i mekem yumi glad naoia mo blong olwe.