SIPOS yu wantem save wanem taem, ?yu mekem wanem? Oltaem yu lukluk long hanwaj blong yu o long wan klok. Maet yu luk se hem i 1 aoa mo 30 minit afta long medel dei. Nao wan fren blong yu i askem se: “?Wanem taem?” ?Bambae yu talem wanem?

Ansa blong yu, i dipen long ples we yu gruap long hem. Eksampol, maet long ples blong yu ol man oli talem se: “Hem i 1:30” o “Hem i 13:30.” Long sam ples, maet oli talem se: “Hem i haf 2,” we i minim 30 minit bifo 2 klok.

Long taem bifo, ?olsem wanem ol man oli talem taem? Olgeta tu oli gat plante wei blong talem taem. Hibru haf blong Baebol i yusum ol tok olsem “moning,” “medel dei,” mo “sapa.” (Jenesis 8:11; 19:27; 43:16; 1 King 18:26) Be samtaem Baebol i yusum sam tok we i stret nomo long wan stret taem.

Long taem blong ol man Isrel bifo, i gat ol wajman we oli gad, speseli long naet. Ol man Isrel oli seraotem naet long tri haf mo oli singaot ol defren haf ya se “ol waj.” (Ol Sam 63:6, NW) Jajes 7:19, (NW) i tokbaot “medel naet waj.” Long taem blong Jisas, ol man Jiu oli seraotem naet long fo waj, olsem we ol man Gris mo ol man Rom oli mekem.

Plante taem ol Gospel oli tokbaot ol fo haf blong naet ya. Eksampol, “long namba fo waj,” Jisas i wokbaot antap long wota blong go long bot we ol disaepol blong hem oli stap long hem. (Matiu 14:25, futnot) Jisas i talem wan pijatok se: “Sipos man blong haos i save wanem waj, stilman bambae i kam, bambae hem i stap wekap mo i no save letem stilman i kam insaed long haos blong hem.”—Matiu 24:43, futnot.

Jisas i tokbaot ol fofala waj ya, taem hem i talem long ol disaepol blong hem se oli mas stap wekap from we oli “no save wanem dei Masta blong haos bambae i kambak, maet i kam long sapa, no long medel naet, no long taem we faol i singaot, no long eli moning.” (Mak 13:35) Fas waj hemia long “sapa,” stat long taem we san i godaon i go kasem 9 klok long naet. Seken waj hemia long “medel naet,” we i stat samwe long 9 klok i go kasem 12 klok long naet. Namba tri waj hemia long “taem we faol i singaot,” we i stat long 12 klok i go kasem 3 klok long moning. Hemia nao taem we faol i singaot mo oli arestem Jisas. (Mak 14:72.) Mo namba fo waj hemia long “eli moning,” we i stat long 3 klok i go kasem we i san i kam antap.

Nating se long taem bifo, ol man oli no gat ol klok o hanwaj olsem yumi tede, be oli gat wei blong talem ol taem.