1. ?Olsem wanem ol man blong Jehova oli soemaot se oli lavlavem olgeta?

OL WITNES blong Jehova raon long fulwol oli olsem wan famle. Oli ol brata mo sista we oli lavlavem olgeta. (1 Jon 4:16, 21) Samtaem oli mekem sam bigfala samting blong givhan long ol brata mo sista blong olgeta, be oltaem oli mekem plante smosmol samting blong soem se oli lavem olgeta. Eksampol, maet oli talem wan gudfala samting long ol brata mo sista blong olgeta o oli mekem i gud long olgeta. Taem yumi tingbaot narafala, yumi stap folem fasin blong Papa blong yumi long heven.—Efesas 5:1.

2. ?Olsem wanem Jisas i soem lav olsem Papa blong hem?

² Jisas i folemgud fasin blong Papa blong hem. Hem i se: “Yufala evriwan we i stap hadwok tumas mo yufala i stap karem ol hevi samting, yufala i kam long mi, mo bambae mi mi mekem we yufala i spel mo yufala kasembak paoa.” (Matiu 11:28, 29) Taem yumi folem fasin blong Jisas mo yumi soem se yumi “tingbaot ol puaman,” bambae yumi mekem Jehova i glad, mo yumi tu yumi glad. (Ol Sam 41:1) Long stadi ya, bambae yumi luk olsem wanem yumi save soem se yumi tingbaot ol famle blong yumi, ol brata mo sista, mo olgeta we yumi prij long olgeta.

3. ?Olsem wanem ol hasban oli save soem se oli tingbaot waef blong olgeta? (Yu luk pija long stat blong stadi.)

³ Ol hasban oli mas soem gudfala eksampol, mo oli soemaot se oli kea gud long ol famle blong olgeta. (Efesas 5:25; 6:4) Baebol i talem se ol hasban oli mas tingbaot waef blong olgeta mo oli mas kasemsave gud long olgeta. (1 Pita 3:7; futnot) Wan hasban we i kasemsave gud long waef blong hem, i save se hem i defren long waef blong hem long plante rod, be hemia i no min se hem i gud moa long waef blong hem. (Jenesis 2:18) Hem i tingbaot filing blong waef blong hem, i kaen, mo i respektem hem. Wan waef long Kanada i tokbaot hasban blong hem se: “Hem i neva ting nating long ol filing blong mi o talem se, ‘Yu no mas gat filing olsem.’ Hem i lesin gud tu long mi. Taem hem i stap givhan long mi blong jenisim tingting blong mi long wan samting, hem i mekem wetem kaen fasin.”

4. ?Olsem wanem wan hasban i soemaot se hem i tingbaot filing blong waef blong hem?

⁴ Wan hasban we i tingbaot waef blong hem, i no soem se hem i laekem wan narafala woman o i pleplei wetem filing blong narafala woman, we i luk hem stret, o i luk long intenet. (Job 31:1) Mo tu, hem i no go long ol websaet we oli nogud. Yes, hem i stap tru long woman blong hem from we hem i lavem hem, i lavem Jehova, mo i agensem ol rabis fasin.—Ridim Ol Sam 19:14; 97:10.

5. ?Olsem wanem wan waef i save soemaot se hem i tingbaot hasban blong hem?

⁵ Taem wan hasban i folem eksampol blong Jisas Kraes, we i hed blong hem, bambae i isi moa blong waef blong hem i “ona gud” long hem. (Efesas 5: 22-25, 33) Mo waef we i respektem hasban blong hem, bambae i kaen long hasban blong hem mo i traem kasemsave ol filing blong hem, speseli taem hasban i bisi wetem ol wok blong kongregesen o i traem blong stretem wan problem. Wan hasban long Briten i tokbaot waef blong hem se: “Samtaem, waef blong mi i luksave long ol fasin blong mi se wan samting i rong. Nao bambae hem i folem advaes blong Ol Proveb 20:5, nating se hem i mas wet kasem wan stret taem blong i ‘pulumaot’ ol tingting blong mi, sipos i wan samting we mi save tokbaot wetem hem.”

6. ?Olsem wanem yumi save givhan long pikinini blong i tingbaot narafala? ?Wanem gudfala samting we pikinini i save kasem?

⁶ Taem ol papa mo mama oli soem se oli tingbaot narafala, oli soem wan gudfala eksampol long ol pikinini blong olgeta. Be oli mas tijim pikinini tu blong i kaen mo i tingbaot narafala. Eksampol, papa mo mama i save tijim ol pikinini blong olgeta blong oli no ronron long Haos Kingdom. O taem oli go long wan kakae, oli save tijim pikinini blong i letem ol olfala oli go karem kakae blong olgeta fastaem. Be evriwan long kongregesen oli save givhan tu long ol papa mo mama. Taswe, i gud yumi talem gudfala toktok long wan pikinini we i mekem wan samting blong soem se hem i tingbaot yumi, olsem taem hem i openem doa long yumi. Hemia bambae i mekem pikinini i haremgud mo i lanem se, “man i harem gud moa taem hem i givim samting long narafala, i bitim we hem i kasem samting.”—Ol Wok 20:35.

7. ?Olsem wanem Jisas i tingbaot filing blong wan man we sora blong hem i fas? ?Yumi lanem wanem from?

⁷ Wan dei, taem Jisas i stap long Dekapolis, ol man “oli tekem wan man i kam we sora blong hem i fas mo i no save toktok gud.” (Mak 7:31-35) Jisas i mekem man ya i kamgud bakegen, be hem i no mekem long fored blong ol narafala. ?From wanem? From we sora blong man ya i fas, mo maet bambae hem i sem taem i luk fulap man. Jisas i kasemsave long filing blong hem, nao ‘tekem hem i go longwe lelebet’ long wan ples we i no gat man long hem, mo i mekem hem i kamgud bakegen. I tru se, yumi no save mekem merikel, be yumi mas tingbaot filing mo nid blong ol brata mo sista blong yumi mo kaen long olgeta. Aposol Pol i talem se: “I gud yumi stap tingbaot yumi, blong yumi givgivhan long yumi blong yumi lavem ol narafala, mo blong yumi mekem ol gudfala wok.” (Hibrus 10:24) Jisas i kasemsave long filing blong man ya we sora blong hem i fas, nao i kaen long hem. !Hemia wan gudfala eksampol blong yumi folem!

8, 9. ?Olsem wanem yumi save soem se yumi kea long ol olfala mo olgeta we oli handikap? (Tokbaot sam eksampol.)

⁸ Tingbaot ol olfala mo olgeta we oli handikap. Fasin we i impoten moa long ol Kristin, hemia lav, i no gudhan we yumi gat. (Jon 13:34, 35) Lav i pusum yumi blong mekem samting we yumi naf blong mekem blong tekem ol brata mo sista we oli olfala o oli handikap i go long miting o prij wetem olgeta. Yumi givhan long olgeta nating se oli no save mekem plante samting, o i no isi long yumi. (Matiu 13:23) Maekel, we i sidaon nomo long wiljea, i glad tumas from we famle blong hem mo ol brata mo sista long kongregesen blong hem oli givhan long hem bigwan. Hem i se: “From we oli stap givhan long mi, mi go long evri miting mo mi prij oltaem. Mi laekem tumas blong prij long pablik ples.”

⁹ Long plante Betel, i gat ol brata mo sista we oli olfala, o oli handikap. Olgeta we oli lukaot long olfala o ol handikap ya, oli soem lav, taem oli givhan long olgeta blong raetem leta o prij long telefon. Bill, we i gat 86 yia mo i stap raetem leta long ol man we oli stap longwe, i se: “Mifala i glad long blesing ya we mifala i gat blong raetem ol leta.” Nancy, we i gat klosap 90 yia, i se: “Mi no luk ol leta olsem wan samting nomo we mi mas fulumap long envlop. Hemia wok blong prij. !Ol man oli mas save trutok!” Ethel, we i bon long yia 1921, i talem se: “Bodi blong mi i soa oltaem. Samtaem i had blong werem klos.” Nating se i olsem, hem i glad tumas blong yusum telefon blong prij mo hem i gat sam gudfala visit. Barbara, we i gat 85 yia, i talem se: “From mi olfala mo stap siksik, mi faenem i had blong go prij oltaem. Be telefon i givhan long mi blong save toktok wetem ol narafala. !Tangkiu tumas Jehova!” !Blong wan yia nomo, ol gudfala olfala brata mo sista we oli laef long Betel, oli spenem 1,228 aoa long wok blong prij, oli raetem 6,265 leta, oli ring bitim 2,000 taem, mo oli givimaot 6,315 buk! !Yumi sua se traehad blong olgeta blong prij i mekem Jehova i glad tumas!—Ol Proveb 27:11.

10. ?Olsem wanem yumi save givhan long ol brata mo sista blong oli kasem plante samting long miting?

¹⁰ Tingbaot ol narafala long taem blong miting. Taem yumi tingbaot ol narafala, yumi stap givhan long ol brata mo sista blong oli lanem plante samting long ol miting. ?Olsem wanem blong mekem samting ya? Wan rod hemia blong kam long miting long stret taem, olsem nao yumi no distebem olgeta we oli lesin. Samtaem, yumi let from i gat wan samting i hapen we yumi no tingbaot. Be sipos oltaem yumi stap kam let, i gud yumi tingbaot olsem wanem samting ya i save spolem ol brata mo sista, mo olsem wanem yumi save jenisim fasin blong yumi blong soem se yumi kea long olgeta. Mo tu, i gud blong tingbaot se Jehova mo Jisas nao tufala i singaot yumi blong go long ol miting. (Matiu 18:20) !I gud yumi soem se yumi respektem tufala, taem yumi kam long stret taem!

11. ?From wanem i gud we ol brata mo sista we oli gat ol haf long miting oli folem advaes we i stap long 1 Korin 14:40?

¹¹ Sipos yumi tingbaot ol brata mo sista blong yumi, bambae yumi folem advaes ya blong Baebol we i se: “Olgeta samting oli mas hapen long fasin we i stret mo i folem plan.” (1 Korin 14:40) Ol brata mo sista we oli gat ol haf long miting oli folem advaes ya taem oli finis long stret taem. Long rod ya, oli soem se oli tingbaot nekis brata o sista we i gat haf, mo oli tingbaot tu evriwan long kongregesen. Traem tingbaot olsem wanem bambae yu spolem ol narafala sipos miting i finis let. Sam brata mo sista oli mas ron long trak plante aoa blong gobak long haos. Sam narafala oli mas faenem wan bas o tren. Mo hasban o waef blong sam brata mo sista we oli no stap long trutok, oli wantem se brata o sista ya i gobak long haos long wan stret taem.

12. ?From wanem yumi mas respektem mo lavem ol elda? (Yu luk bokis ya “Tingbaot Olgeta We Oli Lidim Yumi.”)

¹² Ol elda oli wok had blong lukaot long kongregesen mo wok blong prij, taswe oli nidim we yumi respektem mo lavem olgeta. (Ridim 1 Tesalonaeka 5:12, 13.) Yumi wantem talem tangkiu long olgeta from ol samting we oli mekem. Yu talem tangkiu, taem yu soem se yu rere blong obei long olgeta mo sapotem olgeta, from we ‘oli stap gohed blong lukaotgud long laef blong yumi, mo oli mas talemaot long God se oli holem wok ya olsem wanem.’—Hibrus 13:7, 17.

13. ?Yumi save lanem wanem long fasin we Jisas i mekem long ol man?

¹³ Aesea i talem wan profet tok long saed blong Jisas, i se: “Hem bambae i no save mekem i strong tumas long ol man we oli no strong, mo bambae i no save spolem olgeta we oli no gat paoa.” (Aesea 42:3) Lav we Jisas i gat long ol man i pusum hem blong gat sore long olgeta. Hem i kasemsave filing blong olgeta we “oli no strong” mo olgeta we “oli no gat paoa,” taswe hem i kaen long olgeta mo i gat longfala tingting long olgeta. Ol pikinini tu oli laekem Jisas from ol gudfala fasin blong hem. (Mak 10:14) I tru se, yumi no save kasemsave long ol man mo tijim olgeta olsem Jisas, be yumi save soem se yumi tingbaot olgeta we yumi prij long olgeta. Yumi mekem olsem taem yumi tingbaot olsem wanem yumi toktok long olgeta, wetaem i stret blong go prij long olgeta, mo storian blong yumi i mas longfala olsem wanem.

14. ?From wanem yumi mas tingting gud long fasin blong yumi blong toktok taem yumi prij long ol man?

¹⁴ ?Olsem wanem yumi toktok wetem olgeta? Tede, ol samting olsem politik, kruked fasin long ol bisnes, mo ol lida blong skul, oli mekem plante milian man oli harem olsem se “ol narafala oli stap spolem olgeta mo oli no lukaot long olgeta.” (Matiu 9:36) From samting ya, plante man oli no moa trastem narafala mo oli no gat hop. !Hemia nao from wanem ol toktok we yumi talem mo fasin blong yumi blong toktok i mas soemaot se yumi kaen mo kea long olgeta! Plante man oli wantem lesin long yumi, i no jes from we yumi save yusum gud Baebol, be from we yumi intres mo yumi respektem olgeta.

15. ?Wanem sam samting we yumi save mekem blong soem se yumi tingbaot ol man we yumi prij long olgeta?

¹⁵ I gat plante rod blong soem se yumi tingbaot ol man we yumi prij long olgeta. Yumi mas askem kwestin long wan fasin we i kaen mo i soem respek. Wan paenia i prij long wan ples we plante man i gat fasin ya blong sem, taswe hem i no askem ol kwestin we oli no save ansa blong hem, from hemia i save mekem oli sem. Bambae hem i no askem se, “?Yu save nem blong God?” o “?Yu yu save se Kingdom blong God hem i wanem?” Be, hem i talem wan samting olsem, “Mi lanem long Baebol se God i gat wan nem. ?I oraet mi soem nem ya long yu?” Rod ya i no wok long evri ples, from ol man mo ol kalja blong yumi oli no sem mak. Be oltaem yumi mas kaen mo respektem ol man we yumi prij long olgeta. Blong mekem olsem, yumi mas save gud olgeta fastaem.

16, 17. (1) ?Olsem wanem blong tingbaot narafala taem yumi jusum stret taem blong prij? (2) ?Storian blong yumi bambae i longfala olsem wanem?

¹⁶ ?Wetaem i stret blong go prij long olgeta? Ol man we yumi go prij long olgeta oli no invaetem yumi blong go luk olgeta. Taswe, i impoten tumas we yumi go prij long olgeta long wan taem we oli glad moa blong toktok. (Matiu 7:12) Eksampol, ?ol man long teritori blong yu oli laekem blong slip let long wiken? Sipos yes, maet i moa gud yu stat blong prij long ol pablik ples fastaem, o mekem ol visit fastaem long ol man we yu save bambae oli glad blong storian.

¹⁷ ?Storian blong yumi i mas longfala olsem wanem? Ol man oli bisi tumas, taswe i gud we yumi no storian longtaem tumas, speseli taem yumi go blong prij long olgeta. I gud se yumi mekem storian blong yumi i sot mo yumi no stap longtaem tumas. (1 Korin 9:20-23) Taem ol man oli luk se yumi kasemsave se oli bisi, oli rere moa blong toktok long yumi nekis taem we yumi go prij long olgeta. Sipos yumi stap wokem ol gudfala fasin we oli kamaot long tabu spirit blong God, yumi stap “joen wetem God blong mekem wok.” !Jehova i save yusum yumi blong givhan long wan man blong i lanem trutok!—1 Korin 3:6, 7, 9.

18. ?Taem yumi soem se yumi tingbaot ol narafala, wanem ol blesing we yumi save kasem?

¹⁸ I gud yumi mekem evri samting we yumi naf blong mekem blong soem se yumi tingbaot ol famle blong yumi, ol brata mo sista, mo olgeta we yumi prij long olgeta. Nao, yumi save kasem plante blesing, naoia mo long fiuja. Olsem Ol Sam 41:1, 2 i talem: “Ol man we oli stap tingbaot ol puaman, oli save harem gud. Sipos oli stap long trabol, Hae God bambae i givhan long olgeta. Hem bambae i blokem olgeta, i lukaot gud long laef blong olgeta. Bambae hem i mekem olgeta oli stap long graon ya, oli harem gud.”