1, 2. (1) ?Olsem wanem lav mo bilif tufala i joen? (2) ?Bambae yumi tokbaot wanem tufala kwestin?

PAPA blong yumi Jehova, i promes blong blesem ol man we oli obei long hem. Long rod ya, Jehova i soemaot se hem i lavem yumi. From we hem “i lavem yumi fastaem,” yumi lavem hem tu. (1 Jon 4:19) Taem yumi lavem Jehova moa, bilif blong yumi i kam strong. Nao yumi sua se bambae hem i blesem ol man we hem i lavem olgeta.—Ridim Hibrus 11:6.

² !Jehova i laekem blong mekem i gud long ol man! Hemia wan fasin blong hem, mo hem i soemaot fasin ya oltaem. Sipos yumi no gat strong tingting se bambae hem i mekem i gud long olgeta we oli stap traem faenem hem, bilif blong yumi i smol nomo. ?From wanem yumi talem olsem? From we “man we i gat bilif, hem i sua se olgeta samting we hem i stap putum tingting blong hem i strong long olgeta, bambae oli mas kamtru.” (Hibrus 11:1, NW) Bilif i min se yumi trastem God fulwan, se bambae hem i blesem olgeta we oli obei long hem. ?Be promes ya se bambae yumi kasem blesing, i givhan long yumi  olsem wanem? ?Olsem wanem Jehova i blesem ol man blong hem bifo mo tede tu? Bambae yumi luk.

3. ?Wanem promes i stap long Malakae 3:10?

³ Jehova i promes blong givim blesing long ol man we oli obei long hem. Hem i askem long yumi blong yumi mekem bes blong yumi, mo blong yumi trastem hem se bambae i blesem yumi. Hem i talem se: ‘Yu traem trastem mi.’ Nao hem i gohed se: “Bambae mi openem skae, mi letem olgeta gudgudfala samting i kam long yufala we i plante we i plante.” (Malakae 3:10) Taem yumi trastem Jehova, i olsem we yumi talem tangkiu long hem from promes ya.

4. ?From wanem yumi save trastem promes blong Jisas long Matiu 6:33?

⁴ Jisas i promes long ol disaepol blong hem se, sipos oli lukaot Kingdom fastaem, God bambae i givhan long olgeta. (Ridim Matiu 6:33.) Jisas i talem olsem, from we hem i save finis se olgeta promes blong God oli stap kamtru. (Aesea 55:11) Taswe, yumi tu yumi save bilif strong se sipos yumi trastem Jehova fulwan, bambae hem i holem promes blong hem, se: “Mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) Promes ya i givhan long yumi, blong yumi trastem tok blong Jisas long Matiu 6:33.

5. ?From wanem ansa we Jisas i givim long Pita i leftemap tingting blong yumi evriwan?

⁵ Aposol Pita i askem long Jisas se:  “Mifala i bin lego evri samting blong mifala, blong kam biaen long yu. ?Bambae mifala i kasem wanem?” (Matiu 19:27) Jisas i no stretem Pita, be hem i talem long ol disaepol se bambae oli kasem blesing from we oli lego plante samting. Ol aposol ya mo plante narafala, bambae oli rul wetem Jisas long fiuja. Be oli save kasem blesing long laef blong olgeta tu. Jisas i talem se: “Man we i lego haos blong hem, no brata no sista blong hem, no papa no mama blong hem, no pikinini blong hem, no graon blong hem from we hem i man blong mi, hem . . . i save kasem ol samting ya wan handred taem antap bakegen, mo bambae hem i gat laef we i no save finis.” (Matiu 19:29) Tede, ol man blong Jisas oli gat ol papa mo mama, brata mo sista, mo pikinini, long kongregesen. Ol blesing ya oli bigfala moa, i bitim samting we oli lego from Kingdom.

6. ?Promes blong Jehova blong blesem ol man blong hem, i mekem wanem long olgeta?

⁶ Antap long ol blesing we yumi kasem naoia, yumi save tingbaot ol blesing we oli bigwan moa long fiuja. (1 Timoti 4:8) Jehova i promes se bambae i blesem ol man we oli obei long hem, mo save ya i mekem se yumi naf blong stanap strong taem yumi kasem trabol. Sipos yumi bilif strong se Jehova i “stap mekem i gud long olgeta we oli stap traem faenem hem,” yumi save holemstrong long hem.—Hibrus 11:6.

7. ?Olsem wanem promes blong laef long fiuja i olsem wan angka?

⁷ Long toktok blong Jisas antap long hil, hem i talem se: “Yufala i mas harem gud yufala i glad, from we i gat bigfala pei blong yufala i stap long heven. Ol profet bifo, ol man oli mekem i nogud long olgeta long sem fasin ya nomo.” (Matiu 5:12) Sam man blong God bambae oli kasem blesing ya blong laef long heven. Plante narafala bambae oli kasem blesing blong laef olwe long paradaes long wol. Hemia i mekem yumi ‘harem gud mo yumi glad.’ (Ol Sam 37:11; Luk 18:30) Promes ya “i olsem wan angka blong holem laef blong yumi. Hem i wan angka we i fas strong, we i no save muf.” (Hibrus 6:17-20) Wan angka i holemtaet sip taem solwota i raf. Long sem fasin, promes blong gudfala laef long fiuja i holem laef blong yumi, taem yumi kasem trabol. Hem i givim paoa long yumi, blong yumi stanap strong.

8. ?Olsem wanem promes blong gudfala fiuja i mekem se yumi no moa wari tumas?

⁸ Taem yumi putum tingting blong yumi i stap strong long ol blesing long fiuja, yumi no moa wari tumas. Olsem meresin we yu putum long soa blong mekem se yu harem gud, ol promes blong God oli save mekem tingting blong yumi i kwaet. Yumi harem gud tumas blong save se Jehova bambae i lukaot gud long yumi, sipos yumi putum ol trabol blong yumi long hem. (Ol Sam 55:22) Yumi save gat strong tingting se God bambae i mekem “ol bigbigfala wok long laef blong yumi we i bitim mak olgeta, mo i antap moa long  olgeta samting we yumi stap askem long hem.” (Efesas 3:20) Yes, Jehova bambae i givhan long yumi, be i no hemia nomo. !Bambae hem i mekem “ol bigbigfala wok long laef blong yumi we i bitim mak olgeta”!

9. ?Blong kasem ol blesing, yumi mas mekem wanem?

⁹ Blong kasem ol blesing ya, yumi mas bilif fulwan long Jehova mo obei gud long hem. Moses i talem long ol man Isrel se: “Taem yufala i stap long kantri ya we [Jehova] bambae i givim long yufala, sipos yufala i obei gud long hem, mo yufala i mekem olgeta samting ya we mi mi stap talem long yufala tede, bambae hem i blesem yufala. . . . Hem bambae i blesem yufala olsem we hem i promes finis.” (Dutronome 15:4-6) ?Yu yu bilif fulwan se, sipos yu holemstrong long Jehova, bambae hem i blesem yu? I gat plante risen from wanem yu save gat strong tingting olsem.

10, 11. ?Jehova i blesem Josef olsem wanem?

¹⁰ Jehova i givim Baebol long yumi, blong i givhan long yumi. Baebol i tokbaot plante man we God i blesem olgeta long taem bifo. (Rom 15:4) Wan long olgeta, hemia Josef. Ol brata blong hem oli salem hem blong i kam wan slef. Biaen, masta blong hem i putum hem long kalabus long Ijip, from giaman toktok we woman blong masta i talem. Taem Josef i stap long kalabus, ?Jehova i lego hem? !Nogat! Baebol i talem se: “Oltaem Hae God i stap wetem hem, i stap blesem hem,” mo “Hae God i stap wetem Josef, mo i stap mekem olgeta wok ya we hem i mekem i gohed gud.” (Jenesis 39:21, 23) Long ol hadtaem ya, Josef i trastem God nomo.

¹¹ Plante yia biaen, Fero i letem Josef i kamaot long kalabus. Bifo, hem i wan slef nomo, be afta, hem i kam namba tu hae man long Ijip. (Jenesis 41:1, 37-43) Josef mo woman blong hem, tufala i gat tu boe. Taem faswan i bon, Josef i putum nem blong hem se Manase, from we i talem se: ‘God i mekem mi mi no moa tingbaot olgeta samting we oli mekem mi mi harem nogud tumas.’ Mo taem sekenwan i bon, hem i putum nem blong hem se Efrem, from we i talem se: ‘Trabol i kasem mi long kantri ya, be God i mekem we mi mi gat pikinini.’ (Jenesis 41:51, 52) Jehova i blesem Josef from we Josef i no lego hem. Nao Josef i mekem wok we i sevem laef blong ol man Isrel mo Ijip taem oli no moa gat kakae. Hem i save se Jehova nao i mekem i gud long hem mo i blesem hem.—Jenesis 45:5-9.

12. ?Wanem i givhan long Jisas blong i stanap strong?

¹² Jisas tu i obei gud long God taem hem i kasem trabol, mo Jehova i blesem hem. ?Wanem i givhan long Jisas blong i stanap strong? Baebol i talem se: “Hem i luksave finis we bambae i save harem gud. Nao from samting ya, hem i no moa tingbaot se [pos] ya bambae i mekem bigfala sem long hem.” (Hibrus 12:2) Jisas i glad tumas long janis ya blong mekem nem blong God i tabu. Mo Jehova i glad long hem tu,  mo i givim plante blesing long hem. Baebol i talem se, “hem i stap sidaon long raet saed blong God.” Mo tu: “God i leftemap nem blong hem i go antap olgeta, i givim nem long hem we i hae moa long ol narafala nem.”—Filipae 2:9.

13, 14. ?Wanem tingting blong Jehova long ol samting we yumi mekem long wok blong hem?

¹³ Yumi save sua se Jehova i tinghae long evri samting we yumi mekem long wok blong hem. Taem tingting blong yumi i no strong mo yumi harem se yumi no naf, hem i kasem save. Hem i tingbaot yumi taem yumi wari long wok mo famle blong yumi. Mo hem i kasem save taem yumi no moa save mekem plante wok, from we yumi sik no tingting i foldaon. Yu save bilif strong se Jehova i tinghae long fasin blong yumi blong holemstrong long hem, nating se yumi kasem trabol.—Ridim Hibrus 6:10, 11.

¹⁴ Yumi save tu se Jehova i “stap ansa long ol prea.” Taem yumi prea, hem i lesin. (Ol Sam 65:2) “Hem i Papa blong yumi we i gat sore, hem i God we i stamba blong fasin blong givhan.” Taswe, sipos yumi stap klosap long hem, bambae hem i givim evri samting we yumi nidim. Plante taem, hem i yusum ol Kristin brata mo sista blong mekem olsem. (2 Korin 1:3) Jehova i glad taem yumi sore long ol narafala. Baebol i talem se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.” (Ol Proveb 19:17; Matiu 6:3, 4) Taswe taem yumi givim samting long ol brata mo sista, Jehova i luk gudfala samting we yumi mekem olsem wan lon we yumi givim long hem. Mo hem i promes blong blesem yumi from.

15. ?Yu yu wantem kasem wanem blesing long fiuja? (Yu luk pija long stat blong stadi.)

¹⁵ Ol tabu Kristin oli wantem tumas we Jisas ‘i talem se oli stret man,’ blong oli save kasem “praes” long heven. (2 Timoti 4:7, 8) Be sipos yu yu putum tingting blong yu long laef long wol, God i no luk yu olsem we yu daon moa long olgeta. Plante milian “narafala sipsip” oli stap wet blong kasem nambawan blesing ya blong laef olwe long paradaes long wol. Long ples ya, “bambae oli harem gud, from we oli stap gud, mo oli gat plante samting.”—Jon 10:16; Ol Sam 37:11.

16. ?Olsem wanem 1 Jon 3:19, 20 i leftemap tingting blong yumi?

¹⁶ Samtaem maet yumi harem se yumi no stap mekem plante wok blong Jehova, no maet yumi ting se Jehova i no glad long wok blong yumi. Samfala oli harem se oli no naf nating blong kasem ol blesing long fiuja. Be yumi no mas fogetem se, “God i hae moa long tingting blong yumi, mo hem i save evri samting.” (Ridim 1 Jon 3:19, 20.) Sipos yumi mekem wok blong Jehova from we yumi bilif long hem mo yumi lavem hem, yumi save se bambae hem i givim blesing long yumi, nating se wok blong yumi i smol nomo.—Mak 12:41-44.

17. ?Wanem ol blesing we yumi stap kasem naoia?

¹⁷ Long ol las dei blong rabis wol ya blong Setan, Jehova i stap blesem ol man blong hem. Hem i stap givim plante save long yumi, mo i mekem se yumi gat pis wetem ol brata mo sista. (Aesea 54:13)  Olsem Jisas i promes finis, Jehova i stap blesem yumi naoia, taem i letem yumi joen long bigfala famle blong ol brata mo sista long fulwol we oli lavem yumi. (Mak 10:29, 30) Mo tu, olgeta we oli stap traehad blong faenem God, oli gat pis long tingting blong olgeta, oli glad, mo oli harem gud long laef blong olgeta.—Filipae 4:4-7.

18, 19. ?Wanem tingting blong ol man blong Jehova long ol blesing we oli kasem?

¹⁸ Ol man blong Jehova long olgeta ples long wol, oli stap kasem ol blesing long Papa blong yumi. Yu traem tingbaot Bianka long Jemani, we i talem se: “I no gat tok we i naf blong talem tangkiu long Jehova, from we hem i stap klosap long mi evri dei, mo i givhan long mi blong mi winim ol wari. Wol ya i olbaot, mo i no save givim wan gudfala samting long yumi. Be taem mi wok klosap long Jehova, mi harem se hem i holemtaet mi, mo mi stap sef. Taem mi lego wan samting blong mekem wok blong hem, hem i givimbak ol blesing we oli handred taem antap long samting we mi lego.”

¹⁹ Yu traem tingbaot Pola long Kanada. Hem i gat 70 yia, mo i gat wan bigfala sik long bun blong baksaed blong hem (spina bifida). Sik ya i mekem we hem i no save muvmuv plante, be hem i faenem rod yet blong prij. Hem i talem se: “Mi yusum plante defren rod blong prij, olsem telefon, mo mi tekem evri janis blong prij. Mi holem wan notbuk we mi raetem ol vas blong Baebol long hem mo sam tingting we oli kamaot long ol buk blong yumi, mo mi ridim bakegen mo bakegen. Mi singaot buk ya se ‘Notbuk Blong Sevem Laef Blong Mi.’ Sipos yumi tingting long ol promes blong Jehova, tingting blong yumi i no save foldaon oltaem. Jehova i stap blong givhan long yumi, nomata wanem trabol yumi gat long laef blong yumi.” Maet trabol we yu yu kasem i defren long hemia blong Bianka mo Pola. Be ating yu tu yu save tingbaot plante blesing we Jehova i givim long yu mo ol fren mo famle blong yu. !I gud tumas blong tingbaot olsem wanem Jehova i stap blesem yu naoia, mo olsem wanem bambae i blesem yu long fiuja!

20. Sipos yumi mekem bes blong yumi long wok blong Jehova, ?bambae yumi kasem wanem?

²⁰ Yu no mas fogetem se Jehova bambae i ansa long ol prea blong yu, mo bambae hem i givim “bigfala pei” long yu. Afta we yu “mekem ol samting we God i wantem,” bambae yu “kasem ol samting ya we hem i promes blong givim.” (Hibrus 10:35, 36) Taswe, yumi mas gohed blong mekem bilif blong yumi i kam strong moa, mo yumi mas mekem bes blong yumi long wok blong Jehova. !Yumi bilif strong se Jehova bambae i givim pei long yumi!—Ridim Kolosi 3:23, 24.