1, 2. (1) ?From wanem yumi gat plante wari? (Yu luk pija long stat blong stadi.) (2) Long stadi ya, ?bambae yumi tokbaot wanem?

TEDE, Setan “i olsem wan laeon we i stap singaot bigwan, i stap lukaot man blong i kakae.” (1 Pita 5:8; Revelesen 12:17) From samting ya, i gat plante wari long laef, mo ol man blong God tu oli wari. Sem samting i hapen long ol man blong God bifo. Baebol i talem se King Deved i wari tumas. (Ol Sam 13:2) Mo aposol Pol i “stap tingting tumas” long ol kongregesen. (2 Korin 11:28) ?Yumi save mekem wanem taem yumi wari tumas?

² Papa blong yumi long heven we i lavem yumi, i givhan long ol man blong hem bifo blong oli no moa wari tumas, mo hem i save givhan long yumi tu. Baebol i talem se: “Yufala we i stap wari tumas, yufala i mas putum ol trabol blong yufala long han blong hem, from we oltaem hem i stap tingbaot yufala.” (1 Pita 5:7) ?Olsem wanem yumi save folem advaes ya? Bambae yumi tokbaot fo rod:  (1) prea, (2) ridim Baebol mo tingting dip long hem, (3) letem tabu spirit blong Jehova i givhan long yu, mo (4) talemaot trabol blong yumi long man we yumi trastem. Taem yumi tokbaot fo rod ya, i gud yu traem luksave wanem rod we yu yu wantem kam gud moa long hem.

3. ?Olsem wanem yu save ‘putum ol trabol blong yu long Jehova’?

³ Fas rod blong putum ol trabol blong yumi long Jehova, hemia prea. Taem yumi wari, Papa blong yumi long heven i wantem we yumi talemaot ol samting we i stap long hat blong yumi. Long wan Sam we Deved i raetem, hem i askem se: “God, plis yu harem prea blong mi.” Long semfala Sam ya, Deved i talem se: “Yufala i mas putum ol trabol blong yufala long [Jehova], nao hem bambae i blokem yufala.” (Ol Sam 55:1, 22) Afta we yu mekem evri samting we yu naf blong mekem blong winim wan problem, i gud yu prea long Jehova wetem fulhat blong yu. I moa gud yu prea i bitim we yu wari. ?Be olsem wanem prea i save daonem wari?—Ol Sam 94:18, 19.

4. ?From wanem i impoten we yumi prea taem yumi wari?

⁴ Ridim Filipae 4:6, 7. ?Jehova i save mekem wanem, blong ansa long man we i prea oltaem wetem fulhat blong hem? Hem i save putum pis long tingting blong hem, mo i givhan long hem blong i blokem ol nogud tingting mo filing. Hem i save tekemaot wari mo fraet, mo i putum wan pis we man i neva kasem bifo long laef blong hem. Plante brata mo sista oli pastru long wan taem long laef blong olgeta we oli kasem pis ya. Samting ya i save hapen long yu tu. !‘Pis ya we God i givim’ i save mekem se yu yu naf blong winim enikaen trabol! Yu save trastem fulwan, promes ya blong Jehova se: “!Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala!”—Aesea 41:10.

5. ?Olsem wanem Tok blong God i putum pis long tingting?

⁵ Seken rod blong gat pis long tingting, hemia blong ridim Baebol mo tingting dip long hem. ?From wanem samting ya i impoten? Baebol i Tok blong God. Ol waes advaes long hem i kamaot long God. Nomata wanem samting i mekem yu yu wari, yu save tingting dip long Tok blong God mo olsem wanem blong folem. Nao bambae yu harem se yu strong moa. Hemia i save givhan long yu blong yu winim no yu daonem wari, no maet yu save blokem fulwan. Jehova i talem se man we i ridim Tok blong hem, tingting blong hem bambae ‘i strong, mo hem i stanap strong  oltaem.’ Hem i no ‘fraet, mo tingting blong hem i no save foldaon.’—Josua 1:7-9.

6. ?Olsem wanem ol tok blong Jisas i save givhan long yu?

⁶ Long Baebol, yumi ridim olsem wanem ol man oli laekem tumas tok blong Jisas, from we hem i leftemap tingting blong olgeta, mo i mekem olgeta oli harem gud, antap moa, olgeta we oli slak mo tingting blong olgeta i foldaon. (Ridim Matiu 11:28-30.) Jisas i tingbaot ol narafala mo samting we oli nidim. (Mak 6:30-32) Hem i promes long ol aposol we oli wokbaot wetem hem, se bambae hem i givhan long olgeta. Mo hem i save mekem sem mak long yumi tede. Yumi no nid blong stap wetem Jisas blong hem i givhan long yumi. Hem i King blong yumi long heven, mo i stap gohed nomo blong soemaot se hem i lavem yumi. Taswe, taem yu wari, yu save bilif strong se hem i stap, mo bambae i givhan long yu long stret taem. Jisas i save mekem se yumi gat hop mo yumi no fraet, hemia ol samting we oli save winim wari.—Hibrus 2:17, 18; 4:16.

7. ?Tabu spirit blong God i save givhan long yumi olsem wanem?

⁷ Jisas i promes se Papa blong yumi bambae i givim tabu spirit taem yumi askem. (Luk 11:10-13) ?Namba tri rod ya blong daonem wari i save givhan long yumi olsem wanem? Tabu spirit, no paoa blong God, i save givhan long yumi blong yumi wokem ol gudfala fasin we God i gat. (Kolosi 3:10) Baebol i talem se ol fasin ya oli olsem frut blong tabu spirit. (Ridim Galesia 5:22, 23 Yu luk ol not long pej 20.) Taem yumi gat ol gudfala fasin ya, yumi fren gud wetem ol narafala, mo yumi blokem plante trabol we i save mekem yumi wari. Bambae yumi tokbaot sam rod we tabu spirit i save givhan long yumi.

8-12. ?Ol fasin we oli frut blong tabu spirit, oli save givhan long yu olsem wanem?

⁸ “Lav, glad, pis.” Taem yu soemaot respek long narafala, yu daonem wari. ?Olsem wanem samting ya i hapen? Sipos yu lavem narafala olsem we i stret brata blong yu, mo yu kaen, mo yu ona long hem, bambae yu no mekem hem i kros, mo yu tu yu no kros, ale yutufala i no gat problem. Ol fasin ya oli mekem i isi moa blong yu gat pis wetem ol narafala.—Rom 12:10.

⁹ “Longfala tingting, kaen fasin, gud fasin.” Baebol i talem se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala.” (Efesas 4:32) Taem yumi folem advaes ya, yumi gat pis wetem ol narafala, mo yumi blokem ol trabol we i save mekem yumi wari. Mo tu, i isi moa blong winim trabol we i save kamaot, from we yumi mestem no narafala i mestem.

 ¹⁰ “Bilif.” Plante taem yumi wari from mane no from olting blong yumi. (Ol Proveb 18:11) ?Olsem wanem blong blokem wari ya? Yumi mas folem advaes blong aposol Pol, se yumi ‘harem gud long samting we yumi gat.’ Sipos yumi bilif strong long Jehova, bambae yumi trastem hem blong i givim ol samting we yumi nidim. Hem i promes se: “Bambae mi mi no save livim yu yu stap yu wan. Bambae mi mi no save lego yu samtaem.” Taswe yumi save talem olsem Pol se: “[Jehova] i stap givhan long mi, nao bambae mi mi no save fraet. Man i no save mekem wan samting blong spolem mi.”—Hibrus 13:5, 6.

¹¹ ‘Kwaet fasin, bos long tingting.’ Yu traem tingbaot gudfala frut we i save kamaot, taem yumi gat kwaet fasin mo yumi bos long tingting blong yumi. Sipos yumi gat tufala fasin ya, bambae yumi no mekem mo talem ol samting we biaen yumi wari from. Mo tu, yumi save blokem ‘olgeta fasin blong kros, holem kros, kros kwik, sakem tok i go antap, mo yumi no tok nogud.’—Efesas 4:31.

¹² Yu mas mekem tingting blong yu i stap daon, blong yu save trastem “han” blong God, mo yu ‘putum ol trabol blong yu long hem.’ (1 Pita 5:6, 7) Sipos tingting blong yu i stap daon, Jehova bambae i givhan long yu mo i lukaotgud long yu. Taem yu luksave samting we yu naf blong mekem mo samting we yu no naf blong mekem, bambae yu no dipen long yu wan. Bambae yu no wari tumas from we yu trastem God.—Maeka 6:8

13. ?Jisas i minim wanem taem hem i talem se: “I nogud yufala i stap tingting tumas”?

¹³ Long Matiu 6:34 (ridim), yumi faenem waes advaes blong Jisas se: “I nogud yufala i stap tingting tumas.” Maet yu ting se i strong tumas blong folem advaes ya. ?Be Jisas i minim wanem? Yumi tokbaot Deved mo Pol finis, we tufala i wari samtaem. Taswe, Jisas i no min se ol man blong God bambae oli neva wari. Be Jisas i no wantem se ol disaepol oli wari blong nating nomo, no oli wari bitim mak. Hemia i no save winim ol problem blong olgeta. Evri dei, ol Kristin oli kasem problem. Taswe, i no nid blong oli tingbaot ol problem we oli pas finis, mo ol problem we maet oli kamaot long fiuja. Hemia i jes ademap moa wari long laef blong olgeta. ?Olsem  wanem advaes ya blong Jisas i save givhan long yu blong yu daonem wari?

14. ?Olsem wanem yumi save mekem olsem Deved, blong daonem wari?

¹⁴ Samtaem ol man oli wari from ol mastik we oli mekem bifo. Nating se plante yia i pas finis, be oli sem yet from samting we oli mekem. King Deved tu i wari bitim mak long ol mastik blong hem. Hem i talem se: “Tingting blong mi i trabol . . . we mi stap krae from.” (Ol Sam 38:3, 4, 8, 18) Long taem ya, Deved i mekem samting we i waes. Hem i trastem Jehova se bambae i sore long hem mo i fogivim hem. Mo afta, Deved i glad tumas, from we hem i save se God i fogivim hem.—Ridim Ol Sam 32:1-3, 5.

15. (1) ?Yumi lanem wanem long stori blong Deved? (2) ?Yu save mekem wanem blong daonem wari? (Yu luk bokis ya  “Sam Rod Blong Daonem Wari.”)

¹⁵ Maet yu wari from wan samting long laef blong yu naoia. Taem Deved i wokem Sam 55, hem i stap fraet se bambae narafala i kilim hem i ded. (Ol Sam 55:2-5) Nating se i olsem, hem i no letem wari ya i mekem se hem i no moa trastem Jehova. Deved i plis long Jehova blong i givhan long hem, be hem i save se hem tu i mas mekem wan samting. (2 Samuel 15:30-34) ?Yu lanem wanem? Yu no mas wari bitim mak, be yu mas mekem evri samting we yu naf blong mekem blong winim problem ya, mo yu trastem Jehova se bambae hem i lukaot gud long yu.

16. ?Olsem wanem mining blong nem blong God i save mekem se yumi gat strong bilif?

¹⁶ Wan Kristin i save wari from problem we maet i kamaot long fiuja. Be i no nid blong yumi wari long samting we i no hapen yet. ?From wanem? From we plante taem, problem we yumi stap tingbaot, i no kamaot. Mo tu, yumi mas tingbaot oltaem se i no gat wan samting we God i no save winim. Mining blong nem blong hem se, “Hem i Mekem i Kamaot.” (Eksodas 3:14, NW) Taswe, i no nid blong yumi wari long fiuja. Nem blong God i soemaot se stamba tingting we hem i gat long saed blong ol man, bambae i kamtru. Yu save sua se God bambae i blesem olgeta we oli holemstrong long hem. Bambae hem i givhan long olgeta blong oli no moa wari long samting we i pas finis, ol problem blong laef naoia, mo ol samting we maet oli kamaot long fiuja.

17, 18. ?From wanem i gud blong talemaot wari blong yumi long wan man we yumi trastem?

¹⁷ Namba fo rod blong winim wari, hemia blong toktok long wan man we yu trastem. Yu save toktok long man no woman blong yu, no wan gudfala fren, no wan elda long kongregesen. Maet oli save givhan long yu, blong yu kasem save moa long problem blong yu, nao yu no wari tumas. Baebol i talem se: “Taem man i stap wari, fasin ya i stap mekem tingting blong hem i hevi, be gudfala tok blong fren blong hem i save leftemap tingting blong hem bakegen.” (Ol Proveb 12:25) Mo Baebol i talem se: ‘Man we i stap holem ol gudfala advaes, bambae laef blong hem i gohed gud, be man we i tanem baksaed long ol advaes, ol plan blong hem bambae oli foldaon.’—Ol Proveb 15:22.

¹⁸ Ol miting blong kongregesen tu oli mekem se yumi no wari tumas. Evri wik long miting, yumi spenem taem wetem ol brata mo sista we oli lavem yumi mo oli wantem leftemap tingting blong yumi. (Hibrus 10:24, 25) ‘Bilif blong olgeta i save givhan long yumi, olsem we bilif blong yumi tu i save givhan long olgeta.’ Nao yumi kam strong, mo i isi moa blong winim ol wari.—Rom 1:12.

19. Taem yu fren gud wetem God, ?from wanem yu save sua se bambae yu kasem paoa?

¹⁹ Wan elda long Kanada i luk se i impoten blong putum ol wari blong hem long Jehova. Hem i gat wan bigfala wok olsem tija mo advaesa long skul, mo antap long hemia, hem i gat wan sik we i mekem hem i wari. ?Wanem i givim paoa long hem blong i stanap strong? Hem i wok had blong fren gud oltaem wetem Jehova, mo ol gudfala fren oli givhan long hem taem hem i harem nogud, mo hem i talemaot ol wari blong hem long woman blong hem. Mo ol narafala elda wetem eria elda oli givhan long hem, blong i gat sem tingting olsem Jehova long trabol blong hem. Mo tu, wan dokta i eksplenem gud sik blong hem, nao hem i jenisim program blong hem blong i gat taem blong spel mo eksasaes. Sloslo, hem i winim ol trabol mo wari. Taem hem i gat problem we i bigwan tumas, hem i dipen long Jehova blong i givhan long hem.

20. (1) ?Olsem wanem yumi putum ol wari blong yumi long Jehova? (2) ?Long nekis stadi, bambae yumi tokbaot wanem?

²⁰ Long stadi ya, yumi lanem se yumi mas putum ol wari blong yumi long Jehova. Yumi mekem olsem taem yumi prea, yumi ridim Baebol mo yumi tingting dip long hem. I impoten tu blong letem tabu spirit blong Jehova i givhan long yumi, toktok wetem wan man we yu trastem, mo go long ol miting. Long nekis stadi, bambae yumi tokbaot olsem wanem promes blong Jehova blong givim blesing long fiuja, i save givhan long yumi.—Hibrus 11:6.