1, 2. ?From wanem ol tabu Kristin oli intres long Rom japta 8?

MAET yu ridim Rom 8:15-17 long taem blong Memoriol blong ded blong Jisas. Ol vas ya oli soemaot olsem wanem ol tabu Kristin oli save se bambae oli go laef long heven. Rom 8:1 i talem se ol tabu Kristin ya oli “stap joen long Jisas Kraes.” ?Be ol tok blong Rom japta 8 i go long ol tabu Kristin nomo? ?Japta ya i save givhan long olgeta tu we bambae oli laef long wol ya?

² Ol tok blong Rom japta 8 i go long ol tabu Kristin fastaem. ‘Tabu spirit’ i makemaot olgeta, nao oli ‘stap wet blong God i mekem olgeta oli kam pikinini blong hem, we oli fri olgeta.’ (Rom 8:23) Long fiuja, bambae oli kam pikinini blong God long heven. From we Jisas i ded blong pemaot olgeta, God i save fogivim ol sin blong olgeta. Nao hem i luk olgeta olsem we oli stret man, taswe oli save kam pikinini blong hem.—Rom 3:23-26; 4:25; 8:30.

3. ?From wanem olgeta tu we oli gat hop blong laef long wol oli mas stadi long Rom japta 8?

 ³ Be long Rom japta 4 Pol i talem se, Jehova i luk Ebraham tu olsem wan stret man. Be tabu spirit i no makemaot hem blong i go long heven. Ebraham i laef bifo we Jisas i ded blong pemaot ol man. (Ridim Rom 4:20-22.) Tede, Jehova i save luk ol Kristin we oli gat hop blong laef long wol, olsem we oli stret man. Taswe advaes blong Rom japta 8 i save givhan long olgeta tu.

4. ?Taem yumi ridim Rom 8:21, yumi tingbaot wanem kwestin?

⁴ Long Rom 8:21, Jehova i promes se niufala wol bambae i kamtru, mo ol man bambae oli kamfri long sin mo ded. Vas ya i talem se bambae ‘oli fri olgeta, olsem ol pikinini blong God.’ Vas ya i pulum yumi wanwan blong askem se: ?Mi mi stap tingbaot taem ya we bambae mi laef long niufala wol? Bambae yumi tokbaot samting we yumi mas mekem blong yumi save laef long taem ya.

5. ?Pol i tokbaot wanem long Rom 8:4-13?

⁵ Ridim Rom 8:4-13. Long japta 8 blong Rom, Pol i tokbaot tu defren grup, olgeta we oli mekem ol fasin we ‘tingting blong olgeta nomo i wantem,’ mo olgeta we oli mekem ‘ol fasin we tabu spirit i wantem.’ Samfala oli ting se Pol i stap tokbaot olgeta we oli no stap long trutok mo olgeta we oli stap long trutok. Be Pol i raet i go long ol Kristin we God i ‘singaot olgeta finis blong oli kam man  blong hem.’ (Rom 1:7) Taswe olgeta we oli mekem ol fasin we ‘tingting blong olgeta nomo i wantem’ mo olgeta we oli mekem ‘ol fasin we tabu spirit i wantem,’ olgeta evriwan oli Kristin. ?Be olsem wanem oli defdefren?

6, 7. (1) ?Tok we oli yusum long olfala hanraet blong talem ‘ol fasin we tingting nomo i wantem,’ i minim wanem? (2) ?Pol i minim wanem taem i yusum tok ya long Rom 8:4-13?

⁶ Tok we oli yusum long olfala hanraet blong talem ‘ol fasin we tingting nomo i wantem,’ i save minim plante samting. Samtaem tok ya i save minim prapa bodi blong man. (Rom 2:28; 1 Korin 15:39, 50) Mo tu, tok ya i save minim famle. Baebol i yusum tok ya taem i talem se Jisas i “laen blong King Deved.” Mo tu, Pol i yusum tok ya taem i talem se ol man Jiu oli olsem “ol stret famle” blong hem.—Rom 1:3; 9:3.

⁷ ?Be Pol i minim wanem long Rom 8:4-13, taem i tokbaot ‘ol fasin we tingting blong olgeta nomo i wantem’? Rom 7:5 i givhan long yumi blong faenem ansa. Long vas ya Pol i talem se: “Long taem ya we yumi stap folem ol fasin blong man nomo, Loa ya i stap mekem yumi wantem tumas ol rabis samting we tingting blong yumi i wantem.” Taswe olgeta we oli mekem ‘ol fasin we tingting blong olgeta nomo i wantem,’ oli letem ol rabis samting we tingting i wantem oli kam bos long olgeta.

8. ?From wanem Pol i givim woning long ol tabu Kristin?

⁸ ?From wanem Pol i givim woning long  ol tabu Kristin, se oli no mas mekem ‘ol fasin we tingting blong olgeta nomo i wantem’? ?Mo from wanem ol Kristin tede oli nidim woning ya? From we eni man blong God, i save letem ol samting we hem nomo i wantem, oli kam bos long laef blong hem. Pol i tokbaot sam brata long Rom we “oli stap folem ol rabis tingting blong olgeta nomo.” Maet hem i min se ol samting olsem fasin blong man mo woman blong slip tugeta, kakae, mo pleplei, oli kam bos long laef blong olgeta. (Rom 16:17, 18; Filipae 3:18, 19; Jud 4, 8, 12) Blong smoltaem, i gat wan rabis fasin i gohed long kongregesen blong Korin, taem wan brata “i stap slip wetem seken woman blong stret papa blong hem.” (1 Korin 5:1) I klia se ol Kristin bifo oli nidim woning we Pol i givim, se oli no mas “mekem ol rabis fasin we tingting blong olgeta nomo i wantem.”—Rom 8:5, 6.

9. Long Rom 8:6, ?Pol i no stap talem wanem?

⁹ Woning ya i stret tu long yumi. Nating se wan man i mekem wok blong Jehova plante yia finis, be hem i save stat blong mekem ol ‘rabis fasin we tingting blong hem nomo i wantem.’ ?Olsem wanem? ?Pol i stap talem se yumi no mas tingbaot nating, kakae, wok, pleplei, mo fasin blong slip wetem woman? Hem i no talem olsem. Ol samting ya oli joen long laef blong yumi. Jisas tu i harem gud blong kakae, mo hem i givim kakae long plante man. Mo hem i kasem save se hem i mas spel. Mo tu, Pol i talem se fasin blong man mo woman blong slip tugeta, hem i wan impoten samting long mared.

10. ?Tok ya ‘tingting i fas gud’ i minim wanem?

¹⁰ ?Pol i minim wanem taem hem i talem se ‘tingting i fas gud’ long ol fasin ya? Grik tok we Pol i yusum i min se man i putum olgeta tingting blong hem long ol fasin ya, mo i mekem plan from. Wan man blong hae save i talem se tok ya i stret long ol man we oli tingting oltaem long ol samting we olgeta nomo oli wantem, “oli intres tumas long ol samting ya, mo oli tokbaot oltaem.” Oli letem ol samting ya we oli wantem, oli kam bos long laef blong olgeta.

11. ?Yumi mas jekem wanem?

¹¹ Ol Kristin long Rom oli mas jekem olgeta bakegen blong faenemaot se tingting blong olgeta i fas gud long wanem. ?Oli tingbaot oltaem “ol rabis fasin we tingting blong olgeta nomo i wantem”? Tede tu, yumi mas jekem wanem samting we yumi ting se i moa impoten. ?Yumi laekem tumas blong tokbaot wanem? ?Yumi laekem tumas blong mekem wanem? Maet samfala oli luksave se oli stap tingbaot oltaem ol samting olsem: testem ol defren kaen waen, flasem haos, pem niufala klos, mekem bisnes, mo ol plan blong spel. I no rong blong tingbaot ol samting ya, from we oli joen long laef blong yumi. Jisas i mekem merikel blong givim waen long ol man long wan mared. Mo tu, Pol i givim advaes long Timoti se hem i mas dring “smol waen” from sik blong hem. (1 Timoti 5:23; Jon 2:3-11) Be waen i no bigfala samting long laef blong olgeta. ?Olsem wanem long yumi? ?Yumi intres moa long wanem samting?

12, 13. ?From wanem yumi mas lukaot gud long samting we yumi tingbaot oltaem?

 ¹² Pol i givim woning se: “Sipos tingting blong man i fas gud long ol rabis fasin ya we tingting blong hem nomo i wantem, bambae hem i ded from.” (Rom 8:6) ?Pol i minim wanem? Sipos yumi mekem ‘ol rabis samting we tingting blong yumi nomo i wantem,’ bambae yumi no moa fren gud wetem Jehova, mo yumi no save kasem laef long fiuja. Be yumi save jenisim fasin blong yumi. Yu traem tingbaot man ya long Korin we kongregesen i mas putumaot hem. Hem i jenis mo hem i no moa folem ol rabis tingting we oli pulum hem. Be hem i kam klin bakegen long fes blong Jehova, mo i mekem wok blong hem.—2 Korin 2:6-8.

¹³ Man ya i mekem wan rabis fasin we i bitim mak, be hem i jenis. Taswe, sipos wan Kristin tede i no moa folem ol fasin we Jehova i wantem, be i stat blong folem ‘ol rabis fasin we tingting blong hem nomo i wantem,’ hem tu i save jenis. Sipos yumi tingbaot woning blong Pol, hemia i save pusum yumi blong jenisim enikaen fasin we i no stret.

14, 15. (1) ?Pol i talem se tingting blong yumi i mas fas gud long wanem? (2) Taem ‘tingting i fas gud long ol fasin we tabu spirit i wantem,’ ?hemia i no minim wanem?

¹⁴ Afta we Pol i tokbaot trabol we i save kamaot taem ‘tingting i fas gud long ol rabis fasin we yumi nomo i wantem,’ hem i talem se: “Sipos tingting blong man i fas gud long ol gudfala fasin ya we Tabu Spirit i wantem, bambae hem i gat laef mo pis.” !Blesing ya i nambawan!

¹⁵ Be taem ‘tingting blong man i fasgud long ol gudfala fasin we tabu spirit i wantem,’ hemia i no min se hem i mas tingbaot mo tokbaot Jehova mo Baebol nomo, nao i no moa intres long ol samting we i hapen raonabaot long hem. Yu traem tingbaot, ol Kristin bifo oli mekem plante samting long laef blong olgeta, we i sem mak long ol narafala man. Oli harem gud blong kakae mo dring, oli mared mo gat pikinini, mo oli holem wan wok.—Mak 6:3; 1 Tesalonaeka 2:9.

16. ?Wanem i moa impoten long laef blong Pol?

¹⁶ Be Pol mo ol narafala Kristin oli no letem ol samting we oli mekem evri dei, oli kam impoten samting long laef blong olgeta. Yu traem tingbaot: Pol i somap haos tapolen blong winim mane. Be hem i no ting se wok ya i moa impoten i bitim ol narafala samting. Samting we i moa impoten long laef blong Pol, hemia blong mekem wok blong God. Hem i putum olgeta tingting blong hem long wok blong prij mo blong tijim ol man. (Ridim Ol Wok 18:2-4; 20:20, 21, 34, 35.) I gud ol brata mo sista long Rom oli folem fasin blong Pol, mo i gud yumi tu yumi folem.—Rom 15:15, 16.

17. ?Yumi kasem wanem blesing, taem ‘tingting i fas gud long ol fasin we tabu spirit i wantem’?

¹⁷ ?Laef blong yumi bambae i olsem wanem, sipos yumi putum olgeta tingting blong yumi long wok blong Jehova? Rom 8:6 i talem se: ‘Sipos tingting blong man  i fas gud long ol gudfala fasin ya we tabu spirit i wantem, bambae hem i gat laef mo pis.’ Taswe, yumi mas letem tabu spirit i lidim tingting blong yumi, nao yumi lanem blong gat sem tingting olsem Jehova. Jehova i promes se bambae yumi gat wan gudfala laef naoia, yumi glad, mo yumi save laef olwe long fiuja.

18. ?Taem ‘tingting i fas gud long ol fasin we tabu spirit i wantem,’ olsem wanem yumi gat pis?

¹⁸ ?Wanem mining blong tok blong Pol se bambae man i gat pis? Yumi evriwan i wantem pis, antap moa, pis long tingting. Be smol man nomo oli gat. Yumi talem tangkiu long Jehova, from we yumi gat pis long tingting blong yumi. Yumi gat pis tu wetem famle blong yumi mo olgeta long kongregesen. I tru, samtaem yumi rao smol wetem wan Kristin brata no sista, from we yumi sinman. Long taem olsem, yumi mas folem advaes ya blong Jisas se: “Yu mas go stretem poen ya wetem brata blong yu blong yutufala i fren gud.” (Matiu 5:24) Yumi mas tingbaot se Kristin brata no sista ya tu i stap mekem wok blong Jehova, “God ya we i stamba blong pis.”—Rom 15:33; 16:20.

19. ?Yumi save gat pis wetem hu bakegen?

¹⁹ Sipos ‘tingting blong yumi i fas gud long ol fasin we tabu spirit i wantem,’ bambae yumi gat pis wetem God tu. Profet Aesea i talem se: “Man we oltaem tingting blong hem i stap strong long yu [Jehova], yu bambae yu mekem tingting blong hem i kwaet gud from we hem i stap trastem yu.”—Aesea 26:3; ridim Rom 5:1.

20. ?From wanem yumi glad long ol advaes blong Rom japta 8?

²⁰ Nating se yumi gat hop blong laef long heven no long wol, be ol waes tok blong Rom japta 8 i save givhan long yumi. Yumi glad se Baebol i tijim yumi blong putum tingting blong yumi i stap fulwan long wok blong Jehova, i bitim we i stap long ol samting we yumi nomo i wantem. Yumi save se sipos ‘tingting i fas gud long ol fasin we tabu spirit i wantem,’ yumi save kasem wan nambawan blesing. Pol i talem se: “Presen we God i stap givim, . . . hemia laef ya we i no save finis.”—Rom 6:23.