TAEM ol narafala oli soem se oli kaen long yumi, hemia i mekem yumi haremgud tumas. Yumi harem se oli kea long yumi. ?Be olsem wanem yumi save soem kaen fasin long narafala?

Man we i kaen i tingbaot narafala, mo i soemaot samting ya long toktok mo aksen blong hem. Hem i soem gudfala fasin long narafala, from we hem i lavem olgeta mo i kasem save filing blong olgeta. Antap moa, kaen fasin i wan frut blong tabu spirit. (Galesia 5:22, 23) Jehova i wantem se yumi kaen long narafala. Taswe i gud yumi luk olsem wanem Jehova mo Jisas i kaen long narafala, mo olsem wanem yumi save folem eksampol blong tufala.

Jehova i kaen long olgeta man, hemia i minim tu “ol rabis man mo long olgeta we oli no stap talem tangkiu long hem.” (Luk 6:35) Eksampol, Jehova i “mekem san blong hem i saen long ol rabis man mo ol gudfala man, mo hem i mekem ren i foldaon long ol stret man mo ol man we oli no stret.” (Matiu 5:45) Mo tu, Jehova i kaen long ol man we oli no bilif se Hem nao i Wokem olgeta samting mo i givim laef long yumi evriwan.

Wan gudfala eksampol we i soemaot se Jehova i kaen long man, hemia eksampol blong Adam mo Iv. Smoltaem afta we tufala i mekem sin, ‘tufala i somap ol lif blong figtri, mo tufala i parpar long hem.’ Be Jehova i save se sipos tufala i go aotsaed long garen blong Iden, bambae tufala i nidim blong werem klos from we naoia graon i kam nogud mo i fulap long “ol ropnil wetem ol narafala rabis gras.” Taswe, Jehova i wokem “klos blong tufala long ol skin blong anamol,” mo i givim long tufala. Yes, Jehova i kaen long tufala.—Jenesis 3:7, 17, 18, 21.

I tru Jehova i kaen long “ol rabis man mo ol gudfala man,” be hem i kaen moa long olgeta we oli mekem wok blong hem. Eksampol, long taem we Sekaraea i mekem wok blong profet, wan enjel i stap wari from we ol man Isrel oli stop bildim haos tempol blong Jehova long Jerusalem. Jehova i lesin long tok we enjel ya i talem, mo long kaen fasin Hem i “leftemap tingting blong hem.” (Sekaraea 1:12, 13) Hemia sem samting we Jehova i mekem long profet Elaeja. I gat wan taem we profet ya i harem nogud tumas mo i askem Jehova blong i tekemaot laef blong hem. Jehova i soemaot se hem i kasemsave long ol filing blong Elaeja, ale hem i sanem wan enjel blong i mekem tingting blong Elaeja i kam strong bakegen. Yes, Elaeja i mekem wok blong profet bakegen, from we Jehova i bin soem kaen fasin long hem. (1 King 19:1-18) Be long olgeta man we oli mekem wok blong Jehova, ?yu ting se hu nao i stap folemgud fasin blong Jehova blong kaen long narafala?

Taem Jisas i stap long wol ol man oli luksave se hem i gat kaen fasin. Hem i neva mekem i strong tumas long narafala, mo i no fosem narafala blong mekem samting we hem i wantem. Hem i kea long ol narafala mo i se: “Yufala evriwan we i stap hadwok tumas mo yufala i stap karem ol hevi samting, yufala i kam long mi, mo bambae mi mi mekem we yufala i spel mo yufala kasembak paoa. . . . From we yok blong mi i  isi nomo blong man i karem.” (Matiu 11:28-30) Jisas i kaen long narafala, taswe ol man oli folem hem long evri ples we hem i go long hem. Jisas i sore long olgeta, ale hem i givim kakae long olgeta, i hilim olgeta, mo i tijim “plante samting” long olgeta, long saed blong Papa blong hem.—Mak 6:34; Matiu 14:14; 15:32-38.

Jisas i kasemsave filing blong ol man, mo taem hem i halpem man, hem i mekem wan fasin we i soemaot se hem i kaen. Nating se samtaem hem i taed, be hem i kaen long ol man we oli kam blong luk hem. (Luk 9:10, 11) Traem tingbaot samting we woman ya we i lusum plante blad i mekem. Hem i wantem kamgud bakegen, ale hem i tajem klos blong Jisas. Be folem Loa blong Moses, hem i no klin mo i tabu blong hem i tajem klos blong Jisas. (Levitikas 15:25-28) ?Jisas i mekem wanem long taem ya? Hem i no tok strong long woman ya. Hem i luksave se woman ya i fraet, mo hem i sore long woman ya from we hem i bin safa blong 12 yia. Ale hem i talem long woman ya se: “Pikinini blong mi, bilif blong yu i mekem yu yu kam gud bakegen. Yu go, yu no moa wari, sik blong yu i finis.” (Mak 5:25-34) !Yes, i tru nomo se Jisas i kaen long ol man!

Long ol eksampol ya we yumi tokbaot, yumi lanem se sipos yumi kaen, bambae yumi halpem narafala. Jisas i soemaot se samting ya i impoten, taem hem i talem stori blong gudfala man Sameria. I gat wan man Jiu we ol stilman oli bin tekemaot ol ting blong hem, oli kilim hem, mo oli lego hem i hafded i stap long saed blong rod. Nao i gat wan man Sameria we i pas mo i sore long man ya, nating se ol man Sameria mo ol man Jiu oli no frengud. Kaen fasin i pulum hem blong halpem man ya we i kasem kil. Hem i klinim ol soa blong man ya, mo i tekem hem i go long wan smol hotel. Man Sameria ya i givim mane long man blong hotel blong i lukaot long man Jiu ya ,mo i talem se bambae hem i givim sam moa mane taem hem i kambak.—Luk 10:29-37.

Sipos yumi kaen, bambae yumi tingbaot narafala mo yumi wantem blong halpem olgeta. I no long aksen nomo, be long toktok tu. Baebol i talem se: “Taem man i stap wari, fasin ya i stap mekem tingting blong hem i hevi, be gudfala tok blong fren blong hem i save leftemap tingting blong hem bakegen.” (Ol Proveb 12:25) Taem yumi kaen mo yumi talem ol gudfala tok blong leftemap tingting blong narafala, bambae yumi mekem olgeta oli haremgud moa. * Ol toktok blong yumi we oli kaen, oli soemaot se yumi kea long olgeta. Hemia bambae i mekem i isi moa long olgeta blong oli winim ol problem long laef.—Ol Proveb 16:24.

Yumi evriwan i save soem kaen fasin, from we God i wokem yumi blong tekem fasin blong hem. (Jenesis 1:27) Eksampol, taem oli askem Julias blong i tekem Pol i go long Rom, “Julias i kaen tumas long Pol, nao i letem hem i go luk ol fren blong hem, mo olgeta oli lukaot gud long hem” long taon ya Saedon. (Ol Wok 27:3) Mo taem Pol wetem ol narafala oli stap long sip ya we i rek, ol man Molta oli “kaen tumas” long olgeta. Mo oli mekem faea blong oli save wom long hem. (Ol Wok 28:1, 2) Ol man ya oli mekem wan gudfala samting. Be, blong wan man i mekem Jehova i glad, hem i mas soem kaen fasin oltaem, i no jen wan taem nomo.

Jehova i wantem se oltaem yumi mas kaen long narafala. Taswe, hem i talem long yumi blong “werem” kaen fasin olsem klos blong yumi. (Kolosi 3:12) Be i no isi blong gat kaen fasin oltaem. ?From wanem? Maet yumi no save kaen from we yumi man blong sem, yumi harem se i no sef, o from we yumi tingbaot yumi wan nomo. O maet yumi harem se i had blong soem kaen fasin long olgeta we oli stap mekem i nogud long yumi. Be sipos yumi prea from tabu spirit, mo yumi traem blong folem fasin blong Jehova, hem i save halpem yumi blong gat kaen fasin.—1 Korin 2:12.

?Wanem i save halpem yumi blong gohed blong gat kaen fasin? I gud yu askem yu wan se:  ‘?Mi mi lesingud taem narafala i toktok mo mi traem blong kasemsave filing blong hem? ?Mi mi luksave wetaem ol narafala oli nidim help? ?Wetaem mi bin givhan long wan man we i no famle blong mi o i no wan fren blong mi?’ Ale i gud yu putum sam mak. Yu traem savegud ol neba blong yu, speseli olgeta long kongregesen. Long rod ya, bambae yu faenemaot ol traem we oli stap fesem mo samting we oli nidim. Nekis samting, yu kaen long narafala olsem we yu wantem se narafala i kaen long yu. (Matiu 7:12) Mo laswan samting, yu mas askem Jehova blong i halpem yu, nao bambae hem i blesem yu taem yu traehad blong kaen long narafala.—Luk 11:13.

Taem aposol Pol i tokbaot ol fasin we oli halpem hem blong kam wan gudfala man, hem i talem se kaen fasin tu i halpem hem. (2 Korin 6:3-6) Ol man oli laekem Pol from we hem i kaen long toktok mo long aksen blong hem. (Ol Wok 28:30, 31) Long sem fasin, sipos yumi kaen long ol narafala, maet bambae oli wantem blong lanem trutok moa. Taem yumi kaen long olgeta man, hemia i minim olgeta tu we oli mekem nogud long yumi, samting ya i save tajem hat blong olgeta mo maet oli save jenisim fasin blong olgeta. (Rom 12:20) Maet biaen bambae oli wantem blong stadi Baebol.

Long Paradaes, evriwan bambae oli soem kaen fasin. Bambae oli kaen long ol man we oli laef bakegen. I sua se hemia bambae i pulum olgeta tu blong oli kaen long ol narafala. Be man we i no wantem soem kaen fasin, mo i no wantem halpem narafala, bambae i no save laef aninit Kingdom blong God. Ol man nomo we oli gat lav mo oli kaen, bambae oli laef olwe long paradaes. (Ol Sam 37:9-11) Wol ya bambae i kam wan ples we i sef mo i gat pis. Be bifo we taem ya i kam, yumi save haremgud blong gat kaen fasin naoia. ?Olsem wanem blong mekem samting ya?

Baebol i talem se: “Taem man i kaengud long narafala man, fasin ya i stap mekem i gud long hem tu.” (Ol Proveb 11:17) Ol man oli laekem blong stap wetem wan man we i kaen, mo ol man olsem ol narafala oli kaen long hem tu. Jisas i talem se: “Ol man bambae oli stap mekem long yufala olsem we yufala i stap mekem long olgeta.” (Luk 6:38) Taswe i isi blong wan man we i gat kaen fasin i faenem ol gudfala fren mo oltaem i frengud wetem olgeta.

Aposol Pol i talem long olgeta we oli stap long kongregesen blong Efesas se: “Yufala i mas kaen long yufala, yufala i sore long yufala, mo yufala i fofogivim yufala.” (Efesas 4:32) Taem evriwan long kongregesen oli kaen mo oli gat fasin sore, hemia i mekem kongregesen i kam strong moa, nao evriwan oli joengud. Yumi neva wantem blong tokbaot nogud ol brata blong yumi, o talem ol tok plei we i blong spolem olgeta. Defren olgeta, yumi wantem blong tokbaot samting we bambae i leftemap tingting blong olgeta. (Ol Proveb 12:18) Taem yumi mekem olsem, bambae ol brata mo sista oli glad moa blong mekem wok blong Jehova.

Olsem we yumi bin lanem, yumi kaen long narafala long eni samting we yumi mekem o yumi talem. Mo taem yumi kaen, yumi stap folem fasin blong Jehova, God ya we i gat lav mo i glad blong mekem i gud long olgeta man. (Efesas 5:1) Hemia i mekem kongregesen i kam strong moa, mo tu i pulum ol narafala blong oli mekem wok blong Jehova. Taswe, i gud yumi traem bes blong yumi blong soem long ol narafala se Ol Witnes Blong Jehova, oli ol man we oli kaen long narafala.