DIANA i gat bitim 80 yia. Long ol yia we i pas, hem i bin kasem plante traem. Hasban blong hem i kasem sik ya Alzheimer mo i go stap long hospital blong ol olfala, mo sam yia biaen hem i ded. Mo tu, tufala boe blong hem oli ded, mo naoia hem tu i kasem kansa long titi. Nating se i olsem, taem Diana i go long miting o long wok blong prij, oltaem ol brata mo sista oli luk se hem i glad.

Jon i mekem wok blong eria elda blong bitim 43 yia. Hem i laekem wok ya moa i bitim eni narafala wok. Nating se i olsem, hem i stop long wok ya from we hem i mas lukaot long wan famle blong hem we i sik. Plante brata mo sista oli savegud Jon, mo taem oli luk hem long ol asembli, oli luk se hem i gohed nomo blong stap glad.

?Wanem i mekem se Diana mo Jon oli gohed blong stap glad? ?Olsem wanem wan man we tingting blong hem i foldaon i save gohed blong stap glad? ?Olsem wanem wan man i save stap glad nating se hem i lego wok we hem i laekem tumas? Baebol i givim ansa long yumi. I se: “Ol man we oli stret bambae oli glad from ol samting ya we Hae God i mekem.” (Ol Sam 64:10) Blong kasemsave long trutok ya, yumi mas save samting we i mekem yumi glad blong olwe, mo samting we i mekem yumi no glad.

I gat sam samting we klosap oltaem oli mekem yumi glad. Eksampol, taem man mo woman i laeklaekem tufala mo tufala i mared. O taem man mo woman i gat wan pikinini, o taem man i kasem wan niufala wok insaed long ogenaesesen blong Jehova. Hemia ol samting we oli mekem yumi glad, from we oli ol presen we Jehova i givim long yumi. Hem i mekem se yumi save mared, yumi save gat pikinini, mo hem i givim ol wok blong yumi mekem long ogenaesesen.—Jenesis 2:18, 22; Ol Sam 127:3; 1 Timoti 3:1.

Be samtaem ol samting we oli mekem yumi glad, oli stap blong smoltaem nomo. Eksampol, maet hasban o waef blong yu i lego yu, o maet hem i ded. (Esikel 24:18; Hosea 3:1) Maet ol pikinini oli no obei long yu mo long God, ale kongregesen i mas putumaot olgeta. Long taem bifo, Jehova i no glad long ol boe blong Samuel from we oli no obei long Hem, mo taem Deved i mekem sin wetem Batseba, hem i kasem plante problem long famle blong hem. (1 Samuel 8:1-3; 2 Samuel 12:11) Ol samting ya oli no mekem  man i glad, be oli mekem man i harem nogud mo i safa.

Long sem fasin, samtaem yumi no save gohed blong mekem ol wok long ogenaesesen blong Jehova from we maet yumi sik, o yumi mas lukaot long famle blong yumi, o maet from we i gat wan jenis i kamaot long ogenaesesen. Plante brata mo sista we oli bin gotru long samting olsem, oli talem se oli misim wok ya we i givim glad long olgeta.

Yes, yumi luksave se i gat wan kaen glad we i stap blong smoltaem nomo. Taswe, ?yu ting se i gat rod blong man i save gohed blong stap glad nating sipos laef blong hem i jenis i kam had? Yes i gat rod, from we Samuel, Deved, mo ol narafala, oli gohed blong stap glad nating se oli kasem sam bigfala traem.

Jisas i savegud wanem ya trufala glad. Bifo we hem i kamdaon long wol, Baebol i talem se oltaem hem i “harem gud blong stap wetem [Jehova].” (Ol Proveb 8:30) Be taem hem i stap long wol, samtaem hem i fesem sam hadtaem. Nating se i olsem, hem i glad from we hem i mekem wok blong Papa blong hem. (Jon 4:34) ?Olsem wanem long ol laswan aoa we hem i stap safa bifo we i ded? Baebol i talem se: “Hem i tingbaot glad we bambae hem i kasem, taswe hem i stanap strong mo hem i no sem nating se hem i ded long wan pos.” (Hibrus 12:2) Taswe, yumi save lanem plante samting from tufala samting we Jisas i talem long saed blong trufala glad.

Wan taem, afta we ol 70 disaepol oli finis prij mo oli kambak long Jisas, oli glad tumas from ol wok we oli mekem, olsem wok ya blong ronemaot rabis spirit long man. Be Jisas i talem long olgeta se: “Yufala i no mas glad from we ol rabis spirit oli obei long yufala, yufala i mas glad from we God i raetemdaon nem blong yufala finis long heven.” (Luk 10:1-9, 17, 20) Yes i tru, samting we i moa impoten hemia blong mekem Jehova i glad, i bitim we yumi glad from eni spesel wok we yumi mekem.

Long wan narafala taem, Jisas i stap toktok long wan bigfala hip blong man. Nao i gat wan woman Jiu we i sapraes tumas long ol tijing blong Jisas, mo i talem se ating mama blong Jisas i mas glad tumas long Jisas. Be Jisas i ansa se: “!Nogat! !Ol man we oli harem tok blong God mo oli stap obei long hem, olgeta ya nao oli  glad!” (Luk 11:27, 28) Yes, yumi glad taem yumi luk ol samting we ol pikinini blong yumi oli mekem. Be samting we i givim trufala glad long yumi, hemia taem yumi obei long Jehova mo yumi frengud wetem hem.

Taem yumi save se Jehova i glad long yumi, hemia i mekem yumi glad bigwan. Mo nating se yumi fesem hadtaem, be hemia bambae i no tekemaot glad ya we yumi gat. Blong talem stret, taem yumi stanap strong long ol traem we yumi fesem, yumi stap mekem glad ya i kam strong moa. (Rom 5:3-5) Mo tu, Jehova i stap givim tabu spirit blong hem long olgeta we oli trastem hem, mo glad i wan long ol frut blong tabu spirit. (Galesia 5:22) Hemia i halpem yumi blong kasemsave from wanem Ol Sam 64:10 i talem se: “Ol man we oli stret bambae oli glad from ol samting ya we Hae God i mekem.”

Yes, hemia nao samting we i mekem Diana mo Jon i gohed blong stap glad, nating se tufala i kasem sam hadtaem. Diana i talem se: “Mi mi lukluk i go long Jehova nomo olsem ples blong haed blong mi, olsem wan pikinini we i go haed long papa blong hem.” Mo hem i gohed i se: “Mi luk se hem i blesem mi, nao mi save gohed oltaem blong prij wetem wan smael long fes blong mi.” ?Wanem i halpem Jon blong i gohed blong stap glad mo bisi long wok blong prij, afta we hem i no moa mekem wok blong eria elda? Hem i se: “Stat long 1998, taem oli askem mi blong tijim ol studen long Ministeriol Trening Skul, mi stadi moa i bitim bifo.” Hem i talem se i isi blong hem mo waef blong hem oli folem ol jenis ya, from we tufala i rere blong mekem eni wok we Jehova i askem long tufala. Mo hem i gohed i se: “Mitufala i no rigret se mitufala i mekem wok ya.”

Plante brata mo sista tu oli luksave se samting we Ol Sam 64:10 i talem i tru tumas. Eksampol, traem tingbaot wan kapol we i wok bitim 30 yia long Betel blong Yunaeted Stet. Oli askem tufala blong kam ol spesel paenia. Tufala i talem se: “I nomol blong harem nogud taem yu mas lego wan samting we yu laekem tumas.” Be tufala i talem se: “Yu no save harem nogud blong olwe.” Kwiktaem nomo tufala i stat blong prij wetem kongregesen. Mo tu, tufala i talem se: “Mitufala i prea from sam spesel samting. Noa taem mitufala i luk se Jehova i ansarem prea blong mitufala, hemia i leftemap tingting blong mitufala mo i mekem mitufala i glad tumas. Smoltaem afta we mitufala i kam long kongregesen ya, samfala long kongregesen oli stat blong mekem wok blong paenia. Mo tu, mitufala i haremgud blong gat tu Baebol stadi we oli stap gohed gud.”

Yes i tru, i no isi blong gohed blong stap glad. Samtaem bambae yumi harem nogud. Be Jehova i yusum Ol Sam 64:10 blong leftemap tingting blong yumi. Nating se yumi harem nogud, be yumi save sua se sipos yumi gohed blong stanap strong nomata wanem traem yumi fesem, bambae yumi “glad from samting ya we [Jehova] i mekem” blong halpem yumi. Mo tu, yumi save tingbaot promes blong Jehova we i se, wan dei bambae i gat “niufala heven mo niufala wol.” Long taem ya, bambae i no moa gat sin, mo olgeta man blong God bambae oli glad long ol samting we God i givim long olgeta, mo bambae “oli harem gud gogo i no save finis.”—Aesea 65:17, 18.

Traem tingbaot ol samting we bambae oli hapen long taem ya. Bambae yumi gat gudfala helt mo evridei bambae yumi wekap we yumi gat paoa. Ol samting we oli bin mekem yumi harem nogud, oli lus olgeta. Jehova i talem se: “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.” Bambae yumi welkamem ol fren mo ol famle blong yumi we oli laef bakegen, mo bambae yumi “glad we yumi glad” olsem papa mo mama blong smol gel ya we Jisas i mekem hem i laef bakegen. (Mak 5:42) Biaen olgeta man long wol bambae oli kam stretgud olgeta, mo bambae oli “glad from ol samting ya we [Jehova] i mekem.”