1, 2. ?From wanem i waes blong lesin long God taem yu jusum samting we bambae yu mekem long laef blong yu? (Yu luk pija long stat blong stadi.)

SIPOS yu wan yangfala, ating yu kasem plante advaes long saed blong fiuja blong yu. Ol tija, ol man blong givim advaes, o maet ol narafala oli pulum yu blong gat wan hae edukesen, we bambae i mekem yu kasem plante mane. Be Jehova i givim wan defren advaes. I sua se hem i wantem se yu skulgud, blong yu save mekem wan smol wok blong lukaot long yu. (Kolosi 3:23) Mo hem i save se taem yu yang, yu mas mekem ol impoten desisen from fiuja blong yu. Taswe long ol lasdei ya, hem i givim ol rul blong lidim yu mo halpem yu blong gat wan gudfala laef, we i mekem hem i glad.—Matiu 24:14.

² Tingbaot se Jehova i save evri samting. Hem i save fiuja, mo i save wetaem en bambae i kam. (Aesea 46:10; Matiu 24:3, 36) Mo tu hem i savegud yu. Hem i save samting we  bambae i mekem yu glad mo samting we bambae i mekem yu harem nogud. Maet yu harem se advaes we man i talem i naes, be sipos i no laenap wetem Baebol, i no waes nating blong folem.—Ol Proveb 19:21.

3, 4. ?Wanem i kamaot taem Adam mo Iv i lesin long rabis advaes?

³ Setan i faswan blong givim rabis advaes mo hem i mekem olsem longtaem finis i kam. Hem i talem long Adam mo Iv se bambae tufala i glad sipos tufala i jusum samting we tufala nomo i wantem. (Jenesis 3:1-6) !Setan i tingbaot hem wan nomo! Hem i wantem se Adam mo Iv, wetem ol pikinini blong tufala, bambae oli obei long hem mo oli wosipim hem, i no Jehova. Be Setan i no wokem wan samting blong tufala. Jehova nomo i givim evri samting long tufala. Hem i mekem se Adam i gat wan waef, hem i givim wan naesfala garen long tufala, mo i mekem se tufala i save laef blong olwe.

⁴ Sori tumas, Adam mo Iv i no obei long God. I olsem we tufala i katem rop long God. Mo frut we i kamaot i nogud tumas. Tufala i kam olfala mo tufala i ded, olsem flaoa we oli katemaot long branj blong hem, sloslo i kam slak mo i ded. Mo tu, yumi evriwan ol pikinini blong tufala yumi kasem ol trabol we i mekem yumi safa. (Rom 5:12) Plante man tede oli no wantem lesin long God mo oli folem tingting blong olgeta nomo. (Efesas 2:1-3) ?Wanem i kamaot from? Baebol i talem se man we i agensem Jehova “i no save win.”—Ol Proveb 21:30.

5. ?Jehova i savegud wanem, mo samting ya i tru?

⁵ Jehova i savegud se plante man, we hemia i minim tu ol yangfala, bambae oli wantem blong save hem mo mekem wok blong hem. (Ol Sam 103:17, 18; 110:3) !Jehova i tinghae long ol yangfala ya! ?Yu yu wan long olgeta? Sipos yes, i sua se yu stap haremgud long “ol gudgudfala samting” we God i givim, mo hemia i mekem yu glad long laef blong yu. (Ridim Ol Sam 103:5; Ol Proveb 10:22) Bambae yumi tokbaot fo long ol samting ya. Hemia help long saed blong spirit, ol gudfala fren, ol gudfala mak, mo fasin fri we i tru.

6. ?From wanem yu mas lukaotgud long nid blong yu long saed blong spirit, mo Jehova i givim wanem blong halpem yu?

⁶ Yumi ol man yumi defren long ol animol, yumi haremsave se yumi nidim help blong Man ya we i wokem yumi. (Matiu 4:4) Taem yumi lesin long God, yumi kasem waes, save, mo glad. Jisas i talem se: “Olgeta we oli haremsave se oli nidim God long laef blong olgeta, oli glad.” (Matiu 5:3) God i givim Baebol long yumi mo i yusum “gudfala slef we i waes” blong givim ol buk mo magasin we oli halpem yumi blong mekem bilif blong yumi i kam strong. (Matiu 24:45) Yumi singaot ol buk mo magasin ya se ol kakae long saed blong spirit, from we oli fidim bilif blong yumi mo oli mekem se yumi frengud moa wetem Jehova. !Yumi glad tumas from we i gat plante kakae long saed blong spirit!—Aesea 65:13, 14.

7. ?Olsem wanem ol kakae long saed blong spirit we God i givim i save halpem yu?

⁷ Ol kakae long saed blong spirit oli save mekem yu kam waes mo yu gat klia tingting, mo hemia i save protektem yu  long plante rod. (Ridim Ol Proveb 2:10-14.) Eksampol, bambae yu naf blong luksave ol giaman tok, olsem tok ya se i nogat God o se mane mo ol sas samting bambae oli mekem yu glad. Mo tu, bambae yu naf blong stap longwe long ol samting o ol fasin we oli save spolem yu. Taswe, yu mas traehad blong kam waes mo gat klia tingting. Nao bambae yu luksave se Jehova i lavem yu mo i wantem blong halpem long yu.—Ol Sam 34:8; Aesea 48:17, 18.

8. ?From wanem yu mas kam klosap moa long God naoia, mo olsem wanem samting ya bambae i halpem yu long fiuja?

⁸ I no longtaem wol blong Setan bambae i lus. Jehova nomo bambae i protektem yumi mo i givim ol samting we yumi nidim, hemia i save minim tu kakae we yumi nidim long nekis dei. (Habakuk 3:2, 12-19) Taswe naoia i taem blong yu kam klosap moa long God mo yu trastem hem moa. (2 Pita 2:9) Sipos yu mekem olsem, nomata wanem i hapen raon long yu, be bambae yu harem olsem Deved we i talem se: “Oltaem mi mi save we Hae God i stap wetem mi, i stap klosap long mi, nao i no gat wan samting i save muvum mi.”—Ol Sam 16:8.

9. (1) Folem Jon 6:44, ?Jehova i mekem wanem? (2) ?Wanem i defren taem yu mitim wan Witnes?

⁹ Taem yu jes mitim wan man we i no Witnes, ?yu ting se yu savegud hem? Nogat. Maet yu save nem blong hem, mo se hem i luk olsem wanem, be yu no gat evri save long saed blong hem. Be taem yu jes mitim wan man we i Witnes, hemia i defren. Yu save se hem i lavem Jehova. Mo Jehova i luk wan gudfala samting long hem mo i pulum hem i kam insaed long bigfala famle blong Hem. (Ridim Jon 6:44.) Nating se hem i blong wan defren ples o i gat wan defren fasin blong laef, be yu save plante samting finis long saed blong hem, mo hem tu i save plante samting finis long saed blong yu.

10, 11. ?Ol man blong Jehova oli gat sem tingting long wanem? ?Samting ya i givhan long yu olsem wanem?

 ¹⁰ Taem yu mitim wan narafala Witnes, yu save finis se yutufala i gat sem tingting long samting we i impoten. Yu save se yutufala i toktok long “klin lanwis,” nating sipos prapa lanwis blong yutufala i defren. (Sefanaea 3:9, NW) Hemia i min se yutufala i bilif long God, yutufala i folem ol sem rul long laef, mo yutufala i gat semfala hop from fiuja. Ol samting ya oli mekem yutufala i trastem yutufala, mo yutufala i frengud moa.

¹¹ Taswe taem yu wosipim Jehova, yu save sua fulwan se yu gat ol gudfala fren. !Yu gat ol fren long olgeta ples long wol, nating sipos yu no mitim olgeta yet! Yes, i no gat wan grup we i olsem ol man blong Jehova we oli joengud long fulwol.

12. ?Wanem ol gudfala mak we yu save putum?

¹² Ridim Prija 11:9–12:1. ?Yu yu gat ol mak we yu wantem kasem? Maet yu putum mak blong ridim Baebol evridei o givim ansa long ol miting. O maet yu traem blong yusumgud Baebol long wok blong prij. ?Yu yu harem olsem wanem taem yu luk se yu stap kasem ol mak ya? !Ating yu haremgud tumas, mo i stret nomo we yu harem olsem! ?From wanem? From we yu mekem samting we Jehova i wantem, olsem we Jisas i mekem.—Ol Sam 40:8; Ol Proveb 27:11.

13. ?From wanem i impoten blong mekem wok blong God i bitim we yumi traehad from ol samting blong wol ya?

¹³ Taem yu wok strong long wok blong Jehova, yu stap mekem wan wok we bambae i givim glad long yu, mo laef blong yu bambae i gat mining. Pol i talem se: “Yufala i mas stanap strong we i no gat wan samting i muvum yufala. Oltaem yufala i mas gat plante wok blong mekem long wok blong Masta, from we yufala i save se wok ya we yufala i stap mekem, i mas gat frut blong hem.” (1 Korin 15:58) Be taem ol man oli traehad blong kasem ol samting blong wol ya, olsem mane o haenem, oli no rili glad long laef blong olgeta. Maet oli kasem ol mak ya, be oli no gat hop long laef blong olgeta. (Luk 9:25) Yumi lanem samting ya long eksampol blong King Solomon.—Rom 15:4.

14. ?Yu lanem wanem long stori blong Solomon?

¹⁴ King Solomon i wan rijman mo i wan man we i gat bigfala paoa. Hem i wantem faenemaot wan samting, ale hem i se: ‘Bambae mi traem kasem hapi taem, blong faenemaot se hapi taem ya i olsem wanem.’ (Prija 2:1-10) Solomon i bildim ol bigfala flas haos, i wokem ol naesfala garen mo ples blong spel, mo i mekem eni samting we hem i wantem. ?Yu ting se naoia hem i glad? Taem hem i tingtingbak long olgeta samting we hem i bin mekem, hem i talem se: “Mi luk we ol hadwok ya blong mi i blong nating nomo . . . Mi no faenem wan gud samting nating long hem.” (Prija 2:11) ?Bambae yu folem samting we yu lanem long stori blong Solomon?

15. Folem Ol Sam 32:8, ?from wanem yu nidim bilif, mo olsem wanem bilif bambae i halpem yu?

¹⁵ Sam man oli lanem lesen, taem oli mekem mastik mo oli safa from nogud samting we oli mekem. Jehova i no wantem se yumi mekem olsem. Hem i wantem se yu lesin mo yu obei long hem. Yu nidim bilif blong mekem olsem, be bambae  yu neva rigret from ol desisen we yu mekem from bilif blong yu. Mo Jehova bambae i neva fogetem yu, from “we yufala i lavem nem blong hem.” (Hibrus 6:10) Taswe yu mas wokhad blong gat strong bilif. Nao bambae yu mekem ol gudfala desisen long laef blong yu mo bambae yu luksave se Papa blong yu long heven i wantem halpem yu.—Ridim Ol Sam 32:8.

16. ?From wanem yumi mas tinghae long fasin fri we yumi gat?

¹⁶ Pol i raetem se: “Long ples we spirit blong Jehova i stap, man i save fri.” (2 Korin 3:17) Jehova i laekem fasin ya we man i fri blong mekem samting, mo hem i wokem yu blong yu gat fasin ya. Be hem i wantem se yu yusumgud fasin ya long rod we bambae i protektem yu. Maet sam fren blong yu oli stap luk ol rabis pija, oli mekem enikaen doti fasin blong seks, oli plei ol spot we oli raf, o oli tekem drag mo oli dring bitim mak. Maet long stat, yu luk se ol samting ya oli mekem man i glad, be plante taem i gat ol nogud frut i kamaot, olsem ol rabis sik, slef blong drag o alkol, o maet ded. (Galesia 6:7, 8) Ol yangfala we oli stap mekem ol samting ya oli ting se oli fri, be i no tru.—Taetas 3:3.

17, 18. (1) ?Taem yumi obei long Jehova yumi kasem wanem? (2) ?Olsem wanem Adam mo Iv i fri moa i bitim ol man tede?

¹⁷ Taem yumi obei long Jehova, yumi glad, yumi gat gudfala helt, mo yumi fri be long wan fasin we i tru. (Ol Sam 19:7-11) Mo taem yu yusum fasin fri ya, blong obei long ol loa mo ol rul blong God, yu stap soemaot long God mo long papa mo mama blong yu, se yu bigman long tingting. Papa mo mama blong yu bambae oli trastem yu moa, mo bambae oli no bos tumas long yu. Jehova i promes se i no longtaem bambae hem i mekem ol man blong hem oli fri fulwan. Baebol i talem se bambae “oli kasem nambawan laef ya we oli fri olsem ol pikinini blong God.”—Rom 8:21.

¹⁸ God i letem Adam mo Iv i fri mo tufala i haremgud long fasin ya. Be i gat wan samting nomo we God i talem se tufala i no mas mekem. Tufala i no mas kakae frut blong wan tri. (Jenesis 2:9, 17) ?Yu ting se loa ya we God i givim long tufala i strong tumas? !Nogat! Traem tingbaot plante loa we ol man oli stanemap tede mo oli stap fosem ol narafala blong obei long ol loa ya. Be Jehova i givim wan loa nomo long Adam mo Iv.

19. ?Olsem wanem Jehova mo Jisas i tijim yumi blong kam fri?

¹⁹ Jehova i lukaotgud long yumi long wan fasin we i waes. Hem i no givim plante loa long yumi, be hem i tijim yumi blong lavem narafala. Hem i tijim yumi blong folem ol rul blong hem, mo agensem ol nogud samting. (Rom 12:9) Tok we Jisas i talem antap long Bigfala hil, i halpem yumi blong kasemsave from wanem ol man oli stap mekem ol nogud samting. (Matiu 5:27, 28) Mo taem Jisas i rul long niufala wol, bambae hem i gohed blong tijim yumi blong luksave ol samting we i  stret mo ol samting we i no stret. (Hibrus 1:9) Mo tu, Jisas bambae i mekem bodi mo tingting blong yumi i kam stretgud olgeta. Yes, bambae i no moa gat ol samting we oli save pulum yumi blong mekem wan nogud samting, mo bambae yumi no moa safa from sin. Nao bambae yumi “kasem nambawan laef ya we yumi fri,” olsem we Jehova i promes.

20. (1) ?Olsem wanem Jehova i yusum fasin fri blong hem? (2) ?Olsem wanem yu save folem fasin blong Jehova?

²⁰ Long niufala wol bambae yumi fri, be i no fri olgeta. ?Hemia i minim wanem? Yumi mas lavem God mo ol narafala. Taem yumi letem lav i lidim yumi, yumi stap folem fasin blong Jehova. Nating se Jehova i fri olgeta, be oltaem hem i letem lav i lidim hem long ol samting we hem i mekem, olsem fasin blong hem blong lukaotgud long yumi. (1 Jon 4:7, 8) Taswe sipos yumi folem fasin blong God, bambae yumi luksave se yumi fri, be long wan fasin we i tru.

21. (1) ?Deved i gat wanem filing long Jehova? (2) ?Bambae yumi tokbaot wanem long nekis stadi?

²¹ ?Yu yu glad long ol gudfala samting we Jehova i stap givim long yu? Hem i givim ol kakae long saed blong spirit, ol gudfala fren, ol gudfala mak we yu save kasem, hop ya blong kam fri long fiuja, mo plante narafala blesing. (Ol Sam 103:5) Maet yu harem olsem Deved taem hem i prea mo i talem ol tok ya long Ol Sam 16:11 se: “Bambae yu soem rod ya long mi we i blong go kasem laef. Nao taem mi mi stap wetem yu, bambae mi harem we mi glad tumas, tingting blong mi bambae i glad oltaem nomo.” Long nekis stadi, bambae yumi tokbaot sam narafala trutok we i stap long buk blong Ol Sam 16. !Hemia bambae i halpem yu blong gat wan laef we i beswan!