1, 2. ?Hibrus 13:4 i mas pulum yumi blong mekem wanem?

YUMI evriwan i wantem ona long Jehova. Mo i stret nomo we yumi ona long hem, mo hem tu i promes blong ona long yumi. (1 Samuel 2:30; Ol Proveb 3:9; Revelesen 4:11) Mo tu, hem i wantem se yumi ona long ol narafala man, olsem ol haeman blong gavman. (Rom 12:10; 13:7) Be i gat wan narafala impoten samting we yumi nidim blong soem ona o tinghevi long hem. Hemia mared.

² Aposol Pol i raetem se: “Evri man i mas tinghae long mared. Mo i no mas gat wan samting i mekem mared bed i doti.” (Hibrus 13:4) Pol i no jes givim wan save nomo long saed blong mared. Be hem i talem long ol Kristin se oli mas tinghevi long mared blong olgeta, oli mas luk mared olsem wan samting we i sas. ?Hemia nao lukluk we yu gat long saed blong mared, speseli sipos yu yu wan mared man o woman?

3. ?Wanem impoten advaes we Jisas i talem long saed blong mared? (Yu luk pija long stat blong stadi.)

³ Sipos yu tinghae long mared, yu stap folem wan gudfala eksampol. Jisas tu i tinghae long mared. Taem ol Farisi oli  kwestinim hem long saed blong divos, hem i tokbaot samting we God i bin talem long faswan mared, i se: “From samting ya, man bambae i aot long papa mo mama blong hem, nao bambae tufala i kam wan bodi nomo.” Mo Jisas i talem se: “Samting we God i joenem, man i no mas seraotem.”—Ridim Mak 10:2-12; Jenesis 2:24.

4. ?Wanem stamba tingting blong Jehova long saed blong mared?

⁴ Jisas i soemaot se God nao i stanemap mared mo mared i blong olwe. Taem God i mekem faswan mared, hem i no talem long Adam mo Iv se tufala i save divos. Defren olgeta, stamba tingting blong hem se mared blong “tufala” bambae i stap blong olwe.

5. ?Ded i mekem wanem long mared?

⁵ Taem Adam i mekem sin, plante samting i jenis. Eksampol, taem man i ded, hemia i mekem laef blong mared i jenis. Aposol Pol i eksplenem long ol Kristin se ded i mekem mared i finis, mo patna blong hemia we i ded i fri blong mared bakegen.—Rom 7:1-3.

6. ?Loa blong Moses long saed blong mared i tijim yumi long wanem?

⁶ Long Loa we God i givim long ol man Isrel, hem i tokbaot moa save long saed blong mared. Eksampol, wan man Isrel i save gat plante waef. Fasin ya i stap hapen finis bifo we God i givim Loa long Moses. Be Loa i protektem ol woman mo ol pikinini blong man i no spolem olgeta. Eksampol, sipos wan man Isrel i mared long wan woman slef, mo biaen hem i tekem wan narafala waef bakegen, hem i mas gohed blong givim samting long faswan waef blong hem. God i wantem se man ya i mas gohed blong protektem mo lukaotgud long faswan waef blong hem. (Eksodas 21:9, 10) Tede yumi no moa folem Loa Blong Moses. Be yet, Loa ya i tijim yumi se God i luk mared olsem wan  samting we i sas tumas. Taswe, yumi mas ona o tinghae long mared.

7, 8. (1) Folem Dutronome 24:1, ?Loa i talem wanem long saed blong divos? (2) ?Wanem tingting blong Jehova long saed blong divos?

⁷ ?Loa i talem wanem long saed blong divos? Divos i no stap nating long plan blong Jehova. Nating se i olsem, Loa i talem se wan man Isrel i save divosem waef blong hem sipos hem “i faenem wan samting long hem we i no laekem hem from.” (Ridim Dutronome 24:1.) Loa i no talem wanem ya ‘samting we i no stret’ we man i mas faenemaot. Be hemia i mas wan samting blong sem, o i wan samting we i nogud tumas mo i no wan smol samting. (Dutronome 23:14) Sori tumas, long taem blong Jisas, plante man Jiu oli divosem waef blong olgeta “from eni risen nomo.” (Matiu 19:3) Yumi no wantem nating blong mekem wan samting olsem.

⁸ Long taem blong profet Malakae, plante man oli divosem waef blong olgeta, mo oli mared wetem ol yang gel we oli no wosipim Jehova. ?Be wanem tingting blong Jehova long saed blong divos? Hem i talem se: “Mi mi no laekem nating fasin ya we man i mekem divos long woman blong hem.” (Malakae 2:14-16) Stat long taem we God i wokem faswan mared, tingting blong hem long saed blong mared i no jenis. Hem i talem se: ‘Man i mas go joen wetem woman blong hem, nao tufala bambae i kam olsem wan bodi nomo.’ (Jenesis 2:24) Mo Jisas tu i sapotem tingting ya taem hem i talem se: “Samting we God i joenem, man i no mas seraotem.”—Matiu 19:6.

9. ?Wanem mining blong ol tok blong Jisas long Mak 10:11, 12?

⁹ Maet samfala oli askem se: ‘?Wan Kristin i save divos mo i mared bakegen?’ Jisas i talem se: “Man we i divosem waef blong hem, nao i go mared long narafala woman, hem i mekem adaltri agens long fas waef blong hem. Mo sipos wan woman i divosem hasban blong hem, nao i go mared long narafala man, hem i mekem adaltri.” (Mak 10:11, 12; Luk 16:18) Jisas i soemaot klia se hem i tinghae long mared, mo hem i wantem se yumi mekem sem mak. Sipos wan man i divosem waef blong hem from wan olbaot risen nomo, mo i maredem wan narafala woman, man ya i mekem sin. From we long lukluk blong God, man ya mo fas waef blong hem tufala i olsem “wan bodi” yet. Mo tu, Jisas i talem se sipos wan man i divosem waef blong hem we i stap tru long hem, bambae i isi blong waef ya i mekem adaltri. ?From wanem? Long taem blong Jisas, wan woman we man blong hem i divosem hem, i save gat filing blong mared bakegen blong hem i save gat mane. Nating se i olsem, Jisas i se hemia i sem mak long fasin blong mekem adaltri.

10. ?Wanem risen blong wan Kristin i save divos mo i mared bakegen?

¹⁰ Jisas i talem wan risen nomo blong  man i divos. Hem i se: “Mi mi talem long yufala se, man we i divosem waef blong hem, we waef ya i no mekem enikaen doti fasin blong seks, nao man ya i go mared long narafala woman, hem i mekem adaltri.” (Matiu 19:9) Long taem we Jisas i mekem tok antap long Bigfala Hil, hem i tokbaot samting ya tu. (Matiu 5:31, 32) Long tufala taem ya, Jisas i yusum tok ya “enikaen doti fasin blong seks.” Hemia i save minim ol fasin olsem adaltri, fasin blong woman blong rod, man i mekem seks wetem man bakegen, mo man i mekem seks wetem animol. Sipos wan man we i mared i mekem wan long ol fasin ya, waef blong hem i save jusum sipos hem i wantem divosem man ya o nogat. Sipos hem i divosem man ya, God bambae i no moa luk tufala olsem se tufala i mared.

11. ?From wanem maet wan waef i no divosem man blong hem we i mekem rabis fasin blong seks?

¹¹ Jisas i no talem se sipos man we i mared i mekem rabis fasin blong seks, woman blong hem i mas divosem hem. Eksampol, maet wan waef i jusum blong stap nomo wetem man blong hem, nating se man ya i bin mekem rabis fasin blong seks. ?From wanem waef ya i mekem olsem? Maet hem i lavem man blong hem yet, mo maet i glad nomo blong fogivim hem mo i traehad blong mekem mared blong tufala i stap gud bakegen. Mo tu, sipos hem i divos be i no mared bakegen, maet bambae hem i fesem sam had taem. Eksampol, ?olsem wanem long nid blong hem long saed blong bodi mo filing blong seks? ?Bambae hem i harem se hem i stap hem wan? ?Olsem wanem divos bambae i spolem tingting blong ol pikinini blong hem? ?Bambae i had blong tijim trutok long ol pikinini? (1 Korin 7:14) I tru, hasban o waef we i jusum blong mekem divos, bambae i faenem i had long plante samting.

12, 13. (1) ?Wanem i hapen long mared laef blong Hosea? (2) ?From wanem Hosea i tekembak Goma? ?Stori ya i tijim yumi long wanem?

¹² Stori blong profet Hosea i mekem yumi kasemsave tingting we God i gat long saed blong mared. God i talem long Hosea blong i maredem wan woman we nem blong hem Goma, we biaen i kam ‘woman blong rod’ mo i gat ‘ol pikinini blong rod.’ Goma mo Hosea i gat wan pikinini boe. (Hosea 1:2, 3) Biaen, Goma i gat wan gel mo wan boe bakegen, be oli no pikinini blong Hosea. Goma i mekem adaltri plante taem, be Hosea i gohed blong stap wetem hem. Biaen Goma i lego Hosea mo i kam wan slef. Be Hosea i go tekembak hem i kam stap wetem hem. (Hosea 3:1, 2) Jehova i yusum Hosea blong soemaot se Hem i fogivim nesen blong Isrel plante taem, nating se neson ya i lego hem mo i wosipim ol narafala god. ?Yumi lanem wanem long mared laef blong Hosea?

¹³ Sipos hasban blong wan Kristin sista i mekem rabis fasin long saed blong seks, Kristin sista i mas mekem wan desisen. Jisas i talem se hem i mas gat wan gudfala risen blong hem i save divos mo mared bakegen. Be sipos hem i jusum blong fogivim hasban blong hem, hemia i no wan rong samting. Taem Hosea i tekem Goma i kambak, Hosea i talem long Goma se bambae hem i no moa slip wetem eni narafala man. Mo Hosea tu i no slip wetem Goma, hem i letem taem i pas. (Hosea 3:3) Biaen nomo, Hosea i  slip wetem waef blong hem bakegen. Hemia i soemaot olsem wanem God i rere blong tekembak nesen blong Isrel mo i gohed blong fren wetem olgeta. (Hosea 1:11; 3:3-5) ?Stori ya i tijim yumi long wanem? Sipos waef we i no mekem sin i stat blong slip bakegen wetem hasban blong hem we i bin mekem sin, hemia i soemaot se hem i fogivim hasban blong hem. (1 Korin 7:3, 5) Mo naoia i nogat wan risen blong tufala i save divos, be tufala i mas wok tugeta blong tinghae long mared olsem we God i wantem.

14. Folem 1 Korin 7:10, 11, ?wanem i save hapen long wan mared?

¹⁴ Evri Kristin i mas tinghae long mared olsem we Jehova mo Jisas i mekem. Be from we yumi evriwan i sinman, samtaem samfala oli no mekem olsem. (Rom 7:18-23) Yumi no sapraes from we long faswan handred yia, sam Kristin oli fesem sam bigfala problem long mared blong olgeta. Pol i talem se: “Waef i no mas seraot long hasban blong hem.” Be samtaem oli seraot.—Ridim 1 Korin 7:10, 11.

15, 16. (1) ?Hasban mo waef i mas mekem wanem taem i gat problem long mared, mo from wanem? (2) Taem i gat problem, ?i stret blong seraot long hasban o waef we i no wosipim Jehova?

¹⁵ Pol i no talem samting we i mekem ol hasban mo waef oli seraot. Mo yumi save se i no rabis fasin blong seks, from we sipos i olsem, waef i gat raet blong divos mo mared bakegen. Pol i talem se waef we i seraot long hasban blong hem, “i gud hem i stap olsem nomo, i no mared. Sipos no, hem i mas kambak bakegen long hasban blong hem.” From we long lukluk blong God, tufala i olsem hasban mo waef yet. Pol i talem se nomata wanem problem we hasban mo waef i gat, sipos i no joen wetem rabis fasin blong seks, tufala i no mas seraot be tufala i mas stretem problem ya kwiktaem. Tufala i save askem ol elda blong oli halpem tufala. Ol elda bambae oli givim ol nambawan advaes long Baebol blong halpem tufala.

¹⁶ ?Be olsem wanem long wan Kristin we i mared wetem wan we i no wosipim Jehova? Taem i gat problem long mared blong tufala, ?i stret blong tufala i seraot? Olsem we yumi tokbaot finis, Baebol i talem se wan risen nomo blong divos hemia sipos wan long tufala i mekem rabis fasin blong seks. Be Baebol i no talem ol risen blong wan hasban mo waef i seraot. Pol i talem se: “Sipos wan hasban i no bilif, be hem i glad nomo blong stap wetem waef blong hem, i gud  waef ya i no lego hem.” (1 Korin 7:12, 13) Advaes ya i stret tu long taem blong yumi tede.

17, 18. ?From wanem sam Kristin oli no lego hasban o waef blong olgeta nating se oli kasem hadtaem?

¹⁷ Samtaem wan hasban we “i no bilif,” i mekem sam samting we soem se hem i no ‘glad blong stap wetem waef blong hem.’ Eksampol, maet oltaem hem i stap kilim nogud waef blong hem, go kasem mak ya we laef blong hem i stap long denja. Maet hem i no wantem givim samting we famle i nidim, o i blokem waef blong i no wosipim God. Long taem olsem, Kristin waef nomo bambae i mekem prapa desisen blong hem, nating se hasban i talem sam samting, be hem i no ‘glad blong stap wetem waef blong hem,’ taswe i no rong sipos tufala i seraot. Be sam Kristin waef we oli fesem problem olsem, oli jusum blong stap nomo wetem hasban blong olgeta. Oli stanap strong mo oli traehad blong mekem mared blong olgeta i kamgud. ?From wanem oli jusum blong mekem olsem?

¹⁸ Sipos hasban mo waef i seraot from wan long ol risen ya, be yet tufala i olsem hasban mo waef, mo bambae tufala i gohed blong fesem ol problem we yumi tokbaot finis. Aposol Pol i tokbaot wan narafala risen from wanem hasban mo waef i mas stap tugeta. Hem i se: “Hasban we i no bilif i joen long waef ya, nao mared blong hem i tabu. Mo waef we i no bilif i joen long brata ya, nao mared blong hem i tabu. Sipos i no olsem, ol pikinini blong yufala bambae oli no klin, be naoia oli tabu.” (1 Korin 7:14) Plante Kristin waef oli jusum blong stap nomo wetem hasban blong olgeta we i no wosipim Jehova, nating se oli kasem hadtaem. Nao taem hasban blong olgeta i kam wan Witnes blong Jehova, oli glad tumas from we traehad blong olgeta i karem gudfala frut.—Ridim 1 Korin 7:16; 1 Pita 3:1, 2.

19. ?Wanem i mekem se long kongregesen plante Kristin oli holemstrong long mared blong olgeta?

¹⁹ Jisas i givim advaes long saed blong divos, mo aposol Pol i givim advaes long saed blong fasin seraot. Tufala tugeta i wantem se ol man blong God oli tinghae long mared. Tede long kongregesen, i gat plante Kristin we oli holemstrong long mared blong olgeta. Long kongregesen blong yu, bambae yu luk we plante Kristin hasban oli lavem waef blong olgeta mo ol Kristin waef oli respektem hasban blong olgeta. Yes, olgeta ya oli soem se mared i wan samting we yumi mas ona o tinghae long hem. Mo yumi glad se plante milian hasban mo waef oli pruvum se tok blong God i tru, we i se: “From samting ya, man bambae i aot long papa mo mama blong hem, i go joen wetem waef blong hem, mo bambae tufala i kam wan bodi nomo.”—Efesas 5:31, 33.