1-3. (1) ?Sam Kristin oli mekem wanem blong soemaot se oli wantem tumas blong joen wanples? (Yu luk pija long stat blong stadi.) (2) ?Long stadi ya, bambae yumi tokbaot wanem?

TAEM Korina i gat 17 yia, oli arestem mama blong hem, mo oli sanem hem i go long wan kalabus we i wok olsem slef nomo. Biaen, oli sanem Korina tu i go long Saebiria, plante taosen kilometa longwe long ples blong hem. Long ples ya, hem i wok olsem slef long wan plantesen. Samtaem oli fosem hem blong i wok afsaed long ples we i kolkol bitim mak, mo i no gat kot blong blokem kolkol. Nating se i olsem, Korina mo wan narafala sista, tufala i mekem desisen se bambae tufala i traem faenem rod blong go long wan miting blong kongregesen.

² Korina i talem se: “Mitufala i aot long plantesen long sapa, mo mitufala i wokbaot 25 kilometa go kasem wan stesen blong tren. Tren i aot long tu klok long moning, mo mitufala i ron 6 aoa long tren. Afta, mitufala i wokbaot 10 kilometa bakegen blong kasem ples blong miting.” Nating se i olsem,  Korina i glad tumas. Hem i talem se: “Long miting, mifala i stadi Wajtaoa mo mifala i singsing ol singsing blong Kingdom. Hemia i leftemap tingting blong mitufala bigwan mo i mekem bilif blong mitufala i strong moa.” Tufala sista ya i aot tri dei long plantesen, be masta i no luksave nating se tufala i no stap.

³ Longtaem finis i kam, ol man blong Jehova oli glad blong joen wanples. Ol fas Kristin oli wantem tumas blong joen wanples blong mekem wosip long Jehova mo kasem tijing blong hem. (Ol Wok 2:42) Ating yu tu yu glad blong go long ol miting. Be maet i no isi blong yu go oltaem long miting. Ating i sem mak nomo long ol narafala brata mo sista tu. Maet yu wok plante aoa evri dei, no yu gat tumas samting blong mekem, no yu taed tumas. Taswe, ?wanem i save givhan long yumi blong yumi traehad blong go long olgeta miting? ^[1] (Yu luk ol not, pej 20.) ?Olsem wanem blong leftemap tingting blong ol Baebol stadi mo ol narafala blong oli go oltaem long miting? Stadi ya i tokbaot tri kwestin: (1) ?Olsem wanem ol miting oli mekem i gud long yumi? (2) ?Olsem wanem yumi givhan long ol narafala taem yumi go long miting? (3) ?Olsem wanem yumi mekem Jehova i glad taem yumi go long miting? ^[2]​—Yu luk ol not, pej 20.

4. ?Olsem wanem yumi kasem save moa long Jehova, taem yumi go long ol miting?

⁴ Oli tijim yumi. Long evri miting, yumi kasem save moa long Jehova. Naoia, yumi stap stadi long buk ya ‘Stap Long Laef Ya We God i Lavem Yu’ long Baebol Stadi Blong Kongregesen. Taem yu kasem save moa long ol fasin blong Jehova, mo yu lesin long ol ansa blong ol brata mo sista, ?yu harem olsem wanem? Ating yu lavem Jehova moa. Taem yumi lesin gud long ol tok, ol pleplei, mo Baebol riding, yumi kasem save moa long Baebol. (Nehemaea 8:8) Mo tu, yu traem tingbaot ol samting we yu lanem evri wik, taem yu rerem Baebol riding mo yu harem samting we ol narafala oli lanem.

5. ?Olsem wanem ol miting oli givhan long yu finis, blong yu folem advaes blong Baebol mo yu kam gud moa long wok blong prij?

⁵ Ol miting oli tijim yumi blong folem ol advaes blong Baebol. (1 Tesalonaeka 4:9, 10) Maet yu go finis long wan Wajtaoa Stadi we i mekem se yu wantem wok strong moa long wok blong Jehova, no yu wantem kam gud moa long ol prea blong yu, no yu wantem fogivim wan brata no sista. Miting we yumi mekem long medel wik, i tijim yumi olsem wanem blong talemaot gud nius mo tijim ol narafala long ol save long Baebol.​—Matiu 28:19, 20.

6. ?Olsem wanem ol miting oli leftemap tingting blong yumi, mo givim paoa?

⁶ Oli leftemap tingting blong yumi. Ol samting long wol blong Setan i save mekem bilif blong yumi i slak, yumi wari, mo tingting  i foldaon. Be ol miting oli leftemap tingting blong yumi mo oli givim paoa. (Ridim Ol Wok 15:30-32.) Long plante miting, yumi tokbaot ol profet tok blong Baebol we oli kamtru finis. Hemia i mekem tingting blong yumi i strong moa se ol promes blong Jehova bambae oli kamtru long fiuja. Taem yumi harem ol brata mo sista oli givim tok, hemia i leftemap tingting blong yumi. Sem mak taem oli givim ansa, mo oli singsing wetem fulhat blong olgeta. (1 Korin 14:26) Mo taem yumi storian wetem olgeta bifo mo afta long miting, yumi harem gud mo yumi luksave se yumi gat plante fren we oli tingbaot yumi.​—1 Korin 16:17, 18.

7. ?From wanem i impoten tumas blong go long ol miting?

⁷ Yumi kasem tabu spirit long miting. Jisas i yusum tabu spirit blong lidim ol kongregesen. Hem i talem se yumi mas “lesin gud long tok we Tabu Spirit i stap talem” long ol kongregesen. (Revelesen 2:7) Tabu spirit i givhan long yumi, blong yumi agensem ol samting we oli pulum yumi, yumi no fraet blong prij, mo yumi mekem ol gudfala desisen. Taswe yumi mas mekem bes blong yumi blong stap long evri miting, mo kasem help we tabu spirit i givim.

8. Taem yumi go long miting, mo yumi ansa mo singsing, ?hemia i givhan olsem wanem long ol narafala? (Yu luk bokis ya, “ Hem i Harem Gud Moa Afta Long Miting.”)

⁸ Yumi gat janis blong soemaot se yumi lavem ol brata mo sista. Plante long kongregesen oli stap traehad blong winim ol bigfala trabol. Aposol Pol i talem se: “I gud yumi stap tingbaot yumi.” (Hibrus 10:24, 25) Taem yumi go long miting mo leftemap tingting blong ol brata mo sista, hemia i soemaot se yumi tingbaot olgeta, yumi intres long olgeta, mo yumi glad blong joen wetem olgeta mo storian. Mo tu, taem yumi ansa mo singsing wetem fulhat blong yumi, yumi leftemap tingting blong olgeta.​—Kolosi 3:16.

9, 10. (1) ?Tok blong Jisas long Jon 10:16 i soemaot olsem wanem se i impoten blong go long ol miting? (2) ?Yumi save givhan olsem wanem long olgeta we oli no gat famle long trutok?

 ⁹ Yumi givhan long kongregesen blong i joen gud. (Ridim Jon 10:16.) Jisas i talem se hem i olsem Man blong lukaot long sipsip, mo ol man blong hem oli olsem wan kampani blong ol sipsip. Yu traem tingbaot sipos tu sipsip i stap long wan hil, mo tu narafala sipsip i stap long krik, mo wan i stap long narafala ples. ?Olsem wanem? ?Ol faef sipsip ya oli joen olsem wan kampani nomo? Nogat. Wan kampani blong ol sipsip i stap wanples oltaem, mo oli folem man we i lukaot long olgeta. Long sem fasin, yumi no mas lego ol miting mo stap longwe long ol brata mo sista. Yumi mas stap wetem olgeta oltaem, olsem “wan kampani nomo” we i gat “wan man nomo blong lukaot” long yumi.

¹⁰ Ol miting oli mekem se yumi joen gud olsem wan famle nomo. (Ol Sam 133:1) I gat sam long kongregesen we ol famle blong olgeta, hemia papa no mama, no ol brata mo sista, oli sakemaot olgeta. Be Jisas i promes se ol Kristin brata mo sista bambae oli kam olsem famle blong olgeta. Bambae oli lavem olgeta mo oli lukaot gud long olgeta. (Mak 10:29, 30) Sipos yu go oltaem long miting, maet yu kam olsem wan papa, wan mama, wan brata, no wan sista, long hemia we i no gat famle long trutok. Taem yumi tingbaot samting ya, yumi wantem joen long olgeta miting.

11. ?Olsem wanem yumi givim ona long Jehova we i stret blong hem i kasem?

¹¹ Yumi givim ona long Jehova we i  stret blong hem i kasem. From we Jehova i mekem yumi, yumi mas talem tangkiu long hem, ona long hem, mo presem hem. (Ridim Revelesen 7:12.) Yumi mekem olsem long miting, taem yumi prea long hem, yumi singsing blong presem hem, mo yumi tokbaot hem. !Yumi gat wan nambawan janis evri wik blong wosipim Jehova!

12. Taem yumi obei long Jehova mo go long miting, ?hem i harem olsem wanem?

¹² From we Jehova i mekem yumi, yumi mas obei long hem. Hem i talem se yumi mas gohed nomo blong joen long miting, mo yumi mas mekem samting ya moa, taem en i kam klosap. Taswe, taem yumi obei long Jehova, hem i glad tumas. (1 Jon 3:22) Hem i luksave se yumi wantem tumas blong stap long miting, mo hem i glad tumas taem yumi traehad blong mekem olsem.​—Hibrus 6:10.

13, 14. Long miting, ?yumi kam klosap long Jehova mo Jisas olsem wanem?

¹³ Yumi soemaot se yumi wantem kam klosap long Jehova mo Jisas. Long miting, yumi stadi Baebol, mo Jehova i tijim yumi long samting we yumi mas mekem, mo olsem wanem blong folem ol rod blong hem. (Aesea 30:20, 21) Taem samfala we oli no mekem wok blong Jehova oli kam long miting, olgeta tu oli luksave se hem i stap lidim yumi. (1 Korin 14:23-25) Jehova i yusum tabu spirit blong lidim ol miting, mo samting we yumi lanem i kamaot long hem. Taswe, taem yumi go long miting, yumi harem ol tok blong Jehova, yumi haremsave se hem i lavem yumi, mo yumi kam klosap moa long hem.

¹⁴ Jisas, we i Hed blong kongregesen, i talem se: “Long weples we tu no tri man oli joen wanples long nem blong mi, mi mi stap wetem olgeta.” (Matiu 18:20) Baebol i talem tu se Jisas i stap “wokbaot long medel” blong ol kongregesen. (Revelesen 1:20 kasem 2:1) I klia se Jehova mo Jisas tufala i stap wetem yumi long miting, mo tufala i stap mekem yumi strong. ?Yu ting se Jehova i harem olsem wanem, taem yu stap traehad blong kam klosap moa long hem mo Pikinini blong hem?

15. Taem yumi go long miting, ?olsem wanem yumi soemaot se yumi wantem obei long God?

¹⁵ Yumi soemaot long Jehova se yumi wantem obei long hem. Jehova i no fosem yumi blong obei long hem. (Aesea 43:23) Taswe taem yumi obei long hem mo go long miting, yumi soemaot se yumi lavem hem, mo yumi bilif se hem i gat raet blong talem samting we yumi mas mekem. (Rom 6:17) Yu traem tingbaot ol eksampol ya: Maet bos blong yu i wantem se yu wok olwe, nao yu no moa gat taem blong go long ol miting. Maet gavman i putum tabu long ol miting, mo man we i brekem tabu ya, bambae i faen, no i go kalabus, no i kasem panis we i moa nogud. Samtaem, maet yumi nomo yumi wantem mekem wan narafala samting, nao yumi no go long miting. Long ol taem  olsem, yumi mas jus. (Ol Wok 5:29) Be evri taem we yumi jus blong obei long Jehova, yumi mekem hem i glad.​—Ol Proveb 27:11.

16, 17. (1) ?Olsem wanem yumi save se ol miting oli impoten long ol fas Kristin? (2) ?Brata George Gangas i gat wanem tingting long ol miting?

¹⁶ Afta long lafet blong Pentekos long yia 33, ol Kristin oli stap joen wanples oltaem blong wosipim Jehova. “Oli stap lesin long ol tok ya we ol aposol oli stap tijim olgeta long hem, mo oli stap joen” wanples oltaem. (Ol Wok 2:42) Nating se gavman blong Rom mo ol lida blong skul blong ol man Jiu oli mekem i nogud long olgeta, be oli gohed nomo blong mekem miting. I tru se i no isi, be oli mekem bes blong olgeta.

¹⁷ Tede tu, ol man blong Jehova oli tinghevi long ol miting, mo oli harem gud blong stap long miting oltaem. George Gangas, we i memba blong Hed Kampani blong 22 yia, i talem se: “Taem mi joen wetem ol brata mo sista, hemia i leftemap tingting blong mi, mo i mekem mi mi glad moa i bitim ol narafala samting we mi save mekem. Mi traehad oltaem blong kam eli long Haos Kingdom, mo mi stap kasem we ol laswan oli aot. Mi harem gud tumas blong storian wetem ol man blong God. Taem mi stap wetem olgeta, mi harem olsem se mi stap wetem famle blong mi. I olsem se mi stap long wan paradaes.” Hem i gohed se: “Samting we mi tingbaot oltaem mo mi wantem tumas, hemia blong go long ol miting.”

18. ?Wanem tingting blong yu long ol miting, mo yu gat strong tingting blong mekem wanem?

¹⁸ ?Yu yu gat tingting olsem brata ya? Sipos yes, yu mas gohed nomo blong mekem bes blong yu blong joen long ol miting, nating se samtaem i had. Yu mas soemaot long Jehova se yu gat sem tingting olsem King Deved, we i talem se: “Hae God, mi mi laekem haos blong yu tumas.”​—Ol Sam 26:8.