1, 2. (1) ?Yumi lanem wanem long stori blong Gideon mo 300 man blong hem? (Yu luk pija long stat blong stadi.) (2) Folem Luk 21:19, ?from wanem i impoten blong stanap strong?

YU TRAEM tingbaot faet we Jaj Gideon mo ol soldia blong Isrel oli mekem agens long ol enemi blong olgeta. Faet ya i longfala mo i strong tumas. Oli ronem ol man Midian blong 32 kilometa, hemia i tekem wan ful naet. Taem Gideon mo ol man blong hem oli krosem Jodan Reva, Baebol i talem se “oli hanggri tumas, mo oli slak.” Be oli no winim faet ya yet, i gat 15,000 soldia we oli mas gohed blong ronem olgeta. Oli no save lego. Plante yia finis, ol enemi ya oli mekem i strong tumas long ol man Isrel. Taswe, Gideon mo ol man blong hem oli gohed nomo blong ronem olgeta, gogo oli win fulwan.​—Jajes 7:22; 8:4, 10, 28.

² Yumi tu, yumi stap mekem wan strong faet we i gohed longtaem. Ol enemi blong yumi, hemia Setan, wol ya, mo sin we i stap long yumi. Sam long yumi oli mekem faet ya blong plante yia finis, mo Jehova i givhan long yumi blong yumi  winim plante trabol. Be yumi no win fulwan yet. Samtaem yumi kam taed blong mekem faet ya, no yumi taed from we yumi wet longtaem blong en i kam. Jisas i givim woning se long ol las dei, bambae yumi kasem plante trabol, mo ol man bambae oli agensem yumi. Be hem i talem tu, se sipos yumi stanap strong bambae yumi win. (Ridim Luk 21:19.) ?Stanap strong i minim wanem? ?Wanem i save givhan long yumi, blong yumi stanap strong? ?Yumi lanem wanem long olgeta we oli stanap strong finis? ?Olsem wanem yumi save kam “stret gud,” sipos yumi stanap strong?​—Jemes 1:4.

3. ?Stanap strong i minim wanem?

³ Long Baebol, stanap strong i no minim nomo se yumi gotru long wan trabol. Be i minim tingting we yumi gat long trabol ya tu. Stanap strong i min se yumi no fraet, yumi gat strong bilif, mo yumi mekem tingting blong yumi i longfala. Wan buk i talem se man we i stanap strong taem i kasem trabol, i gat hop, mo i no save foldaon. Hem i gat strong tingting blong gohed, nating se hem i fesem bigfala trabol. Mo hem i tingbaot gudfala samting we hem i save kasem, i bitim we i tingbaot se hem i stap harem nogud tumas.

4. ?Olsem wanem lav i pulum yumi blong stanap strong?

⁴ Lav nao i pulum yumi blong yumi stanap strong. (Ridim 1 Korin 13:4, 7.) Sipos yumi lavem Jehova, bambae yumi stanap strong taem yumi fesem enikaen trabol we hem i letem. (Luk 22:41, 42) Sipos yumi lavem ol Kristin brata, bambae yumi stanap strong taem oli mestem, no oli mekem yumi harem nogud. (1 Pita 4:8) Sipos yumi lavem man no woman blong yumi, bambae yumi stanap strong taem yumi kasem “trabol” we olgeta mared man mo woman oli stap kasem, mo mared blong yumi bambae i kamgud moa.​—1 Korin 7:28.

5. ?From wanem Jehova nomo i save givhan long yumi blong stanap strong?

⁵ Yu askem long Jehova blong i mekem yu yu strong. Jehova “i save mekem tingting blong man i longfala, mo i save leftemap tingting blong hem.” (Rom 15:5) Hem nomo i save gud yumi, ol filing blong yumi, mo evri samting long laef blong yumi. Taswe hem i save wanem samting stret we yumi nidim blong stanap strong. Baebol i talem se: “Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta.” (Ol Sam 145:19) ?Be olsem wanem God i ansa, taem yumi askem long hem blong i mekem yumi strong?

6. ?Olsem wanem Jehova i save “mekem rod” blong yumi winim trabol?

⁶ Jehova i promes se, taem yumi askem long hem blong i givhan long yumi blong stanap strong, “bambae [hem] i mekem rod” blong yumi winim trabol blong yumi. (Ridim 1 Korin 10:13.) ?Hem i mekem samting ya olsem wanem? Samtaem hem i save tekemaot trabol ya. Be plante taem, hem i givim paoa long yumi, blong yumi save stanap  strong, we tingting blong yumi i longfala, mo yumi harem gud. (Kolosi 1:11) From we Jehova i save gud bodi, tingting, mo filing blong yumi, bambae hem i no save letem wan trabol i kam strong tumas, we yumi no naf blong holem bilif.

7. ?From wanem yumi nidim save blong God we i olsem kakae? Yu talem wan pijatok.

⁷ Yu stadi Baebol blong mekem bilif blong yu i strong. ?From wanem yumi mas tekem save blong Baebol we i olsem kakae? Yu traem tingbaot pijatok ya: Man we i wantem klaem wan bigfala hil, i mas kakae plante. Samting we hem i stap kakae long tri dei, hem i mas kakae long wan dei nomo. Olsem nao, hem i save stanap strong mo kasem top blong hil ya. Long sem fasin, yumi mas tekem plante save blong Baebol we i olsem kakae, blong yumi save stanap strong go kasem en blong rod. Yumi mas gat strong tingting blong mekem prapa stadi blong yumi, mo go long ol miting. Long rod ya, bambae yumi kasem evri samting we yumi nidim blong mekem bilif blong yumi i stap strong.​—Jon 6:27.

8, 9. (1) Folem Job 2:4, 5, ?yumi save soemaot wanem taem yumi fesem wan trabol? (2) ?Wanem samting we i stap hapen we yu no save luk?

⁸ Tingbaot se yu mas holemstrong long God. Taem yumi kasem trabol, yumi harem nogud. Be yumi no mas tingbaot samting ya nomo. Yumi tingbaot tu se yumi gat janis blong holemstrong long God. Samting we yumi mekem i soemaot sipos yumi tingbaot Jehova olsem King blong heven mo wol. Setan, we i enemi blong Jehova mo i agensem rul blong hem, i sakem nogud tok long Jehova, se ol man oli mekem wosip long hem blong kasem samting blong olgeta nomo. Setan i talem se man “i save lego olgeta samting we hem i gat blong i sevem laef blong hem.” Nao hem i tokbaot Job, i se: “Sipos yu spolem bodi blong hem, bambae hem i tok nogud long yu, stret long fes blong yu.” (Job 2:4, 5) ?Olsem wanem? ?Setan i jenisim fasin blong hem? !Nogat! Plante yia biaen, taem oli sakemaot Setan long heven, hem i stap tok nogud yet long ol gudfala man blong God. (Revelesen 12:10) Tede, Setan i stap talem yet se ol man oli mekem wosip long God blong kasem samting nomo. Hem i wantem se yumi no moa luksave God olsem Rula blong yumi, mo yumi no moa mekem wosip long hem.

⁹ Taem yu stap harem nogud from wan trabol, i gud yu tingbaot samting we i stap hapen we yu no save luk. Long wan saed, i gat Setan wetem ol rabis enjel blong hem. Oli stap wajem yu blong luk wanem samting we bambae yu mekem, mo oli stap talem se bambae yu foldaon. Long narasaed, i gat Jehova, mo King blong yumi Jisas Kraes, mo ol tabu man we oli stap finis long heven, mo plante taosen gudfala enjel. Olgeta tu oli stap luk we yu traehad blong stanap strong, mo oli stap leftemap tingting blong yu blong yu gohed. Oli glad tumas se yu stap stanap strong mo yu no lego Jehova. Mo yu harem Jehova i talem long yu se: ‘Pikinini blong mi, yu mas waes. Nao bambae mi glad we mi glad, mo mi gat ansa blong givim long man we i faerap long mi.’​—Ol Proveb 27:11.

10. ?Olsem wanem yumi save folem eksampol blong Jisas, taem yumi kasem trabol?

¹⁰ Yu tingbaot blesing we bambae yu  kasem. Yu traem tingbaot se yu stap wokbaot i go long wan ples we i longwe. Blong kasem ples ya, yu mas wokbaot fulnaet. Raonabaot long yu, ples i tudak we i tudak. Be yu save se i no longtaem, bambae i delaet, mo sipos yu stap gohed, bambae yu kasem ples we yu wantem go long hem. Laef blong yumi i olsemia. Yumi pastru long ol hadtaem, mo samtaem yumi harem se ol trabol oli hevi tumas. Maet Jisas tu i bin harem olsem. Taem oli nilim hem long pos, oli spolem gud hem, mo hem i harem nogud tumas long bodi blong hem. !I no gat wan narafala taem long laef blong hem we i nogud olsem! ?Wanem i givhan long hem blong i stanap strong? Baebol i talem se “hem i luksave finis we bambae i save harem gud.” (Hibrus 12:2, 3) Jisas i tingbaot blesing we bambae hem i kasem. Samting we i moa impoten, hem i tingbaot se bambae hem i mekem nem blong God i tabu, mo i soemaot se God i gat raet blong rul. Hem i save se trabol ya i blong smoltaem nomo, be blesing we hem i kasem long heven bambae i stap olwe. Tede, ol trabol we yumi kasem oli hevi tumas mo oli mekem yumi harem nogud, be yumi mas tingbaot se oli blong smoltaem nomo.

11. ?From wanem i gud yumi tokbaot stori blong samfala we oli “stanap strong longtaem”?

¹¹ I no yumi nomo we i stap stanap strong. Aposol Pita i leftemap tingting blong ol Kristin we Setan i traem olgeta, blong oli stanap strong, i se: “Yufala i mas stanap strong long bilif blong yufala, blong blokem hem. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.” (1 Pita 5:9) Ol stori blong olgeta we oli “stanap strong longtaem,” oli tijim yumi olsem wanem blong holem strong bilif. Oli mekem tingting blong yumi i strong tu se yumi save win, mo oli mekem yumi tingbaot se bambae yumi kasem blesing sipos yumi holemstrong long Jehova. (Jemes 5:11) Bambae yumi tokbaot sam stori. ^[1]​—Yu luk ol not, pej 14.

12. ?Eksampol blong ol jerubim long Iden, i tijim yumi long wanem?

¹² Ol jerubim, oli gat wok long heven we i hae moa. Be afta we Adam mo Iv tufala i mekem sin, Jehova i givim wan niufala wok long sam jerubim. Wok ya i stap long wol, mo i defren olgeta long wok we oli mekem long heven. Eksampol blong olgeta i save tijim yumi olsem wanem blong stanap strong, taem yumi kasem wan wok we yumi harem se i had. Baebol i talem se Jehova “i putum ol jerubim oli stap gad long gudfala ples ya long Iden, long saed i go long is. Mo hem i putum wan longfala naef blong faet i stap long ples ya tu. . . . Hae God i mekem olsem blong  blokem rod, blong ol man bambae oli no save go klosap long tri ya we frut blong hem i save givim laef.” ^[2] (Yu luk ol not, pej 14.) (Jenesis 3:24) Baebol i no talem se ol jerubim ya oli komplen. Mo oli no harem se wok ya i daon tumas long olgeta. Oli no les mo oli no lego. Maet oli mekem wok ya go kasem taem we Bigfala Wota i ron, hemia i bitim 1,600 yia.

13. ?Wanem i givhan long Job blong i stanap strong?

¹³ Job. Maet samtaem yu harem nogud, from we wan fren no wan famle i talem samting we i daonem yu. Maet yu sik bigwan no yu harem nogud from we wan famle no fren i ded. Nomata wanem samting i hapen, eksampol blong Job i save leftemap tingting blong yu. (Job 1:18, 19; 2:7, 9; 19:1-3) Job i no save from wanem ol bigfala trabol i stap kasem hem, be hem i no lego Jehova. ?Wanem i givhan long hem blong i stanap strong? Hem i lavem Jehova, mo i no wantem mekem hem i harem nogud. (Job 1:1) Long gudtaem mo long taem blong trabol tu, Job i wantem mekem God i glad. Mo tu, Jehova i givhan long Job blong i kasem save bigfala paoa blong Hem. Hem i tokbaot ol nambawan samting we hem i wokem. Hemia i mekem tingting blong Job i strong moa se Jehova bambae i finisim trabol blong hem long stret taem we hem i wantem. (Job 42:1, 2) Mo hemia nao samting we i hapen. “Hae God i mekem hem i kam rijman bakegen, we i givim jenis long hem long olgeta samting we hem i gat fastaem, be i dabolem evriwan.” Job i laef plante moa yia bakegen, “nao hem i ded we i olfala we i olfala.”​—Job 42:10, 17.

14. Folem 2 Korin 1:6, ?olsem wanem eksampol blong Pol i givhan long ol narafala?

¹⁴ Aposol Pol. ?Yu yu stap harem nogud from we samfala oli agensem yu no oli mekem i nogud long yu? ?Yu yu wan elda no eria elda we yu harem se ol wok blong yu oli hevi tumas? Sipos yes, eksampol blong Pol i save givhan long yu. Plante man oli agensem Pol mo oli mekem i nogud tumas long hem. Mo  tu, hem i wari oltaem long ol brata long ol kongregesen. (2 Korin 11:23-29) Be Pol i no lego, mo eksampol blong hem i mekem ol narafala oli strong. (Ridim 2 Korin 1:6.) Sipos yu stanap strong, eksampol blong yu tu i save givhan long ol narafala.

15, 16. (1) ?Olsem wanem yumi kam “stret gud” taem yumi stanap strong? (2) Yu talem wan eksampol.

¹⁵ Tabu spirit i pulum disaepol Jemes blong raetem se: “Yufala i mas stanap strong olwe gogo kasem en blong rod, blong bambae yufala i stret gud, yufala i no sot long wan samting, mo yufala i gat olgeta samting blong Kristin laef blong yufala.” (Jemes 1:4) ?Olsem wanem yumi kam “stret gud” taem yumi stanap strong? Taem yumi gotru long wan trabol, maet yumi luksave se yumi no gat longfala tingting, yumi no glad long samting we yumi gat, no yumi no lavem narafala. Taem yumi stanap strong, yumi lanem ol fasin ya moa. Yumi kam gud moa long ol Kristin fasin.

¹⁶ From samting ya, yumi no mas brekem loa blong Jehova blong finisim wan trabol we i mekem yumi harem nogud. Wan eksampol: Maet oltaem yu stap faet agensem ol tingting we oli pulum yu blong mekem rabis fasin. ?Be sipos yu mekem rabis fasin, samting ya bambae i winim trabol ya? Nogat. Yu mas askem long Jehova blong i givhan long yu blong yu sakemaot ol nogud tingting ya. ?Olsem wanem? ?Wan famle i agensem yu? !Sipos i olsem, yu no mas lego! Yu mas gat strong tingting blong gohed long wok blong Jehova. Sipos yu mekem olsem, bambae yu trastem Jehova moa. Yu no mas fogetem se: Blong mekem Jehova i glad, yumi mas stanap strong.​—Rom 5:3-5; Jemes 1:12.

17, 18. (1) ?Wanem pijatok i soemaot se yumi mas stanap strong go kasem en? (2) Taem yumi kam klosap moa long en, ?yumi save bilif strong long wanem samting?

¹⁷ Yumi mas stanap strong, i no blong smoltaem nomo, be go kasem en blong rod. Yu traem tingbaot wan sip we i stap draon. Ol pasenja oli mas swim i go so. Sipos oli swim blong smoltaem nomo, bambae oli draon. Mo sipos oli swim gogo oli klosap nomo long so, nao oli stop, bambae oli draon tu. Sipos yumi wantem laef long niufala wol, yumi mas stanap strong go kasem en. I gud yumi gat sem tingting olsem aposol Pol, we i talem se: “Mifala i no save foldaon.”—2 Korin 4:1, 16.

¹⁸ Yumi save bilif strong se Jehova bambae i givhan long yumi, blong yumi stanap strong go kasem en. Pol i talem se, God i “stap mekem we yumi winim olgeta samting ya oltaem.” Mo hem i eksplenem se, “i no gat wan samting nating we i save tekemaot yumi” long God ya we i lavem yumi. Ded mo laef, mo ol enjel, mo ol haeman, mo sam narafala paoa long heven, mo samting we i stap finis, mo samting we bambae i kam, oli no save tekemaot yumi. “I no gat wan samting nating long olgeta samting we God i mekem, we i save tekemaot yumi long God.” (Rom 8:37-39) I tru, samtaem yumi taed. Be yumi mas folem fasin blong Gideon mo ol man blong hem. Olgeta tu oli taed, be oli no lego. !Oli gohed nomo “blong ronem ol man Midian” gogo oli win olgeta!​—Jajes 8:4.