WOK blong prij i impoten mo i givhan bigwan long ol man. Be sam man nomo we yumi prij long olgeta, oli kasem save long samting ya. Samfala oli intres long wanem we Baebol i talem, be oli no ting se oli mas stadi Baebol wetem yumi.

Yu traem tingbaot Kevin. Hem i stap kam long ol miting long Haos Kingdom, be hem i no wantem stadi Baebol. Hem i no savegud Baebol, be hem i haedem samting ya, from we hem i fraet se wan man bambae i trikim hem blong i joenem wan skul. ?Yu ting se i gat rod blong givhan long Kevin? Yu traem tingbaot olsem wanem ol tijing blong Baebol oli save givhan long wan man. Jehova i talem long ol man Isrel se: “Tok blong mi bambae i folfoldaon olsem ren, mo bambae i stap long graon ya, olsem wota blong naet.” (Dutronome 31:19, 30; 32:2) I gud yumi tokbaot wota blong naet, mo yumi luk olsem wanem hem i sem mak long wok ya blong tijim ol man. Olsem nao, bambae yumi save rod blong givhan long “olgeta man.”​—1 Timoti 2:3, 4.

Wota blong naet i foldaon sloslo. Wota we i stap long win, sloslo i kam ol smosmol drop we oli folfoldaon olsem wota blong naet. ?Olsem wanem ol tok blong Jehova i olsem “wota blong naet”? Hem i toktok kaen long ol man blong hem, mo i soemaot se hem i tingbaot olgeta. Yumi folem fasin blong Jehova taem yumi respektem bilif blong ol man. Yumi givhan long olgeta wanwan blong oli tingting gud, mo oli mekem prapa desisen blong olgeta. Taem yumi intres long ol man olsem, oli glad moa blong lesin long yumi, mo wok blong yumi blong tijim olgeta i save karem frut.

Wota blong naet i mekem ol samting i harem gud. Bambae yumi mekem ol man oli harem gud, sipos yumi tingbaot ol defren rod blong tijim olgeta long trutok. Wan brata we nem blong hem Kris, i askem long Kevin sipos i wantem stadi Baebol, be hem i no fosem Kevin. Hem i traem blong faenem ol defren rod blong mekem Kevin i harem gud blong tokbaot Baebol. Hem i talem long Kevin se, Baebol i gat wan stamba tingting blong hem, mo Kevin i mas save long stamba tingting ya, blong i kasem save gud long miting. Mo tu, Kris i eksplenem se samting we i mekem hem i luksave se Baebol i tru, hemia ol profet tok. From samting ya, tufala i storian plante taem long ol profet tok we oli kamtru finis. Kevin i harem gud long ol storian ya, mo wan dei hem i talem long Kris se i wantem stadi Baebol.

Wota blong naet i mekem ol tri oli laef. Long kantri blong Isrel, maet i no ren blong plante manis long hot taem. Sipos i no gat wota blong naet, ol tri bambae oli ded. Jehova i talem se, taem blong yumi i olsem drae taem. Hemia i min se ol man oli “wantem tumas blong harem tok” blong Jehova, olsem we man we i tosta tumas i wantem dring. (Amos 8:11) Jehova i talem se, ol tabu man oli “olsem wota blong naet,” taem oli joen wetem “ol narafala sipsip” blong talemaot gud nius blong Kingdom. (Maeka 5:7; Jon 10:16) Tok we yumi stap talemaot, i wan gudfala samting we Jehova i givim long ol man we oli tosta from trutok, blong oli save kasem laef. ?Olsem wanem? ?Yu yu tinghevi long ol tok ya?

Wota blong naet i wan blesing we Jehova i givim. (Dutronome 33:13) Wok blong tijim ol man i wan blesing long olgeta we oli wantem kasem save long trutok. Baebol stadi i wan blesing long Kevin, from we i givhan long hem blong i faenem ansa long ol kwestin blong hem. Hem i gohed gud gogo i baptaes, mo naoia hem i harem gud blong joen wetem woman blong hem Jois, blong talemaot gud nius blong Kingdom.

Taem yumi skelem wok blong prij wetem wota blong naet, yumi kasem save se wok we yumi wanwan i mekem i impoten. ?From wanem? Wan drop wota blong naet i no save mekem bigfala wok, be sipos i gat plante milian drop, graon bambae i wetwet. Long sem fasin, maet samting we yumi wanwan i mekem long wok blong prij i smol nomo. Be taem i joen wetem wok blong plante milian narafala man blong Jehova, i mekem se “olgeta man” oli save harem gud nius. (Matiu 24:14) ?Wok we yumi mekem, i wan blesing we Jehova i givim long ol man? Bambae i olsem sipos ol tok blong yumi i olsem wota blong naet, i min se i kaen, i mekem man i harem gud, mo i givim laef.