OL APOSOL oli stap stanap long Hil Blong Oliftri mo oli wajem masta mo fren blong olgeta, Jisas, i go antap long heven mo klaod i kavremap hem. (Ol Wok 1:9, 10) Blong tu yia, Jisas i bin tijim, leftemap tingting, mo lidim olgeta. Be naoia hem i no moa stap. ?Bambae oli mekem wanem?

1, 2. ?Afta we Jisas i go long heven, wanem tingting we maet ol aposol oli gat?

² Bifo we Jisas i go long heven, hem i talem long ol man blong hem se: “Bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Ol Wok 1:8) ?Bambae oli mekem wok ya olsem wanem? Jisas i promes long olgeta se tabu spirit bambae i givhan long olgeta. (Ol Wok 1:5) ?Be hu bambae i lidim olgeta mo i oganaesem wok blong prij long fulwol? Ol aposol oli save se bifo, Jehova i bin yusum ol man blong lidim ol man Isrel. Taswe, oli stap tingting se maet naoia bambae Jehova i jusum wan niufala lida.

3. (1) ?Afta we Jisas i go long heven, wanem impoten desisen we ol aposol oli mekem? (2) ?Bambae yumi ansa long wanem kwestin?

 ³ Afta we Jisas i go long heven, ol disaepol oli ridim Baebol, oli prea long Jehova blong i givhan long olgeta, nao oli jusum Matias blong i tekem ples blong Judas Iskariot, blong i kam namba 12 aposol. (Ol Wok 1:15-26) ?From wanem i impoten long olgeta mo long Jehova blong oli jusumaot wan narafala blong i tekem ples blong Judas? Ol disaepl oli kasem save se i mas gat 12 aposol. * Jisas i jusumaot ol aposol mo i trenem olgeta blong oli mekem wan impoten wok. ?Wanem wok ya, mo olsem wanem Jehova mo Jisas i rerem olgeta from? ?Wanem sem mak plan we i stap tede? ?Mo yumi save mekem wanem blong ‘no fogetem ol man ya we oli stap lidim’ yumi, speseli “gudfala slef we i waes”?—Hibrus 13:7; Matiu 24:45, NW.

4. ?Wanem wok we ol aposol mo ol narafala elda long Jerusalem, oli mekem?

⁴ Ol aposol oli stat blong lidim Kristin kongregesen long Pentekos long yia 33. Baebol i talem se “Pita i stanap wetem ol narafala leven aposol,” nao i tijim wan bigfala hip blong man long ol trutok we i save sevem laef blong olgeta. (Ol Wok 2:14, 15) Plante long olgeta ya oli kam Kristin. Biaen, ol niufala Kristin ya “oli stap lesin long ol tok ya we ol aposol oli stap tijim olgeta long hem.” (Ol Wok 2:42) Ol aposol oli lukaot long mane blong kongregesen mo oli yusum long wok blong Jehova. (Ol Wok 4:34, 35) Mo tu, oli tijim ol man blong God mo oli prea from olgeta, from we oli talem se: “Bambae mifala i save stap oltaem long wok ya nomo blong prea, mo blong talemaot tok blong God.” (Ol Wok 6:4) Mo oli sanem ol Kristin we oli gat moa ekspiriens, blong oli go prij long ol niufala teritori. (Ol Wok 8:14, 15) Biaen, ol elda we tabu spirit i makemaot olgeta, oli joen wetem ol aposol blong lidim kongregesen. Oli wok olsem wan hed kampani we i lidim evri kongregesen.—Ol Wok 15:2.

5, 6. (1) ?Olsem wanem tabu spirit i givim paoa long hed kampani? (Yu luk pija long stat blong stadi.) (2) ?Olsem wanem ol enjel oli givhan long hed kampani? (3) ?Olsem wanem Tok blong God i lidim hed kampani?

⁵ Ol fas Kristin oli save se Jehova i stap lidim hed kampani tru long Jisas. ?Olsem wanem oli save samting ya? Fastaem, tabu spirit i givim paoa long hed kampani. (Jon 16:13) Evri tabu Kristin oli kasem tabu spirit, be spirit ya i givim paoa long ol aposol mo ol elda long Jerusalem, blong oli mekem wok ya blong lukaot long ol kongregesen. Eksampol, long yia 49, tabu spirit i lidim hed kampani blong mekem wan desisen long saed blong sakomsaes. Ol kongregesen oli folem desisen ya, ale “oli stap kam strong  moa long bilif blong olgeta. Mo evri dei, namba blong olgeta i stap kam antap moa.” (Ol Wok 16:4, 5) Leta we ol kongregesen i kasem, i soemaot se spirit blong God i stap lidim hed kampani, mo se hed kampani i gat ol gudfala fasin olsem lav mo bilif.—Ol Wok 15:11, 25-29; Galesia 5:22, 23.

⁶ Sekenwan, ol enjel oli givhan long hed kampani. Eksampol, wan enjel i talem long Konilias blong i faenem aposol Pita. Afta we Pita i prij long Konilias mo ol famle blong hem, olgeta oli kasem tabu spirit, nating se oli no sakomsaes. Long rod ya, Konilias i faswan Kristin we i blong narafala neson mo we i no sakomsaes. Taem ol aposol mo ol brata oli harem nius blong samting ya, oli agri blong folem samting we God i wantem, ale oli glad blong welkamem ol man blong ol narafala neson long Kristin kongregesen. (Ol Wok 11:13-18) Samting ya i soemaot se ol enjel oli wok strong blong sapotem wok blong prij we hed kampani i lidim. (Ol Wok 5:19, 20) Namba tri, Tok blong God i lidim hed kampani. Ol man ya oli yusum Baebol blong i givhan long olgeta blong mekem ol impoten desisen long saed blong Kristin bilif, mo blong lidim kongregesen.—Ol Wok 1:20-22; 15:15-20.

7. ?From wanem yumi talem se Jisas nao i lidim ol fas Kristin?

⁷ Nating se hed kampani i lidim kongregesen, be ol man long kongregesen oli kasem save se Jisas Kraes nao i Lida blong olgeta. ?Yumi save samting ya olsem wanem? Aposol Pol i talem se Kraes nao i jusumaot sam man blong ‘oli aposol.’ Mo tu, hem i talem se Kraes nao i “hed” o Lida blong kongregesen. (Efesas 4:11, 15) Mo oli no karem nem blong wan long ol aposol, be “God i pulum ol man blong oli kolem ol disaepol se ol Kristin.” (Ol Wok 11:26, NW) Pol i save se i impoten blong folem ol tijing blong Baebol we ol aposol mo ol narafala we oli lidim olgeta, oli talem. Nating se i olsem, Pol i talem se: “Mi wantem we yufala i save se Kraes i hed blong man.” Tok ya i go long evri memba blong hed kampani tu. Biaen Pol i gohed se: “God i hed blong Kraes.” (1 Korin 11:2, 3, NW) I klia nomo se Jehova i putumap Pikinini blong hem Jisas Kraes, blong i lidim kongregesen.

8, 9. ?Wanem impoten wok we Brata Russell i mekem?

⁸ Stat long yia 1870, Charles Taze Russell mo sam fren blong hem, oli stat blong wosipim God folem samting we Baebol i talem, mo oli givhan long ol narafala blong oli mekem sem mak. Hemia i minim se oli mas givhan long ol narafala man tu we oli toktok ol narafala lanwis. Taswe long 1884, oli stanemap wan sosaeti we nem blong hem Zion’s Watch Tower Tract Society, mo Brata Russell i kam presiden blong hem. * Hem i stadi gud long Baebol, mo i no fraet blong talemaot long ol narafala se ol tijing blong jos olsem triniti mo sol we i no save ded, oli no stap long Baebol. Hem i lanem se taem Kraes i kambak, bambae man i no save luk hem, mo se ‘taem blong ol neson’ bambae i finis long 1914. (Luk 21:24) Brata Russell i yusum taem, paoa,  mo mane blong hem blong tijim ol man long ol trutok ya. I klia nomo se Jehova mo Jisas i yusum Brata Russell blong lidim ol man long wan impoten taem long histri.

⁹ Brata Russell i no wantem se ol man oli leftemap hem. Taswe long 1896, hem i raetem wan leta blong talem se hem mo ol fren blong hem, oli no wantem se ol man oli leftemap nem blong olgeta blong ona long olgeta. Oli no wantem se oli givim ol spesel taetol long olgeta, no blong nem blong wan long olgeta i stap long eni grup. Biaen, hem i talem se: “Hemia i no wok blong man.”

10. (1) ?Wetaem Jisas i putumap “gudfala slef we i waes”? (2) Tokbaot olsem wanem i kam klia se Hed Kampani i defren long Watch Tower Society.

¹⁰ Long 1919, tri yia afta we Brata Russell i ded, Jisas i putumap “gudfala slef we i waes.” ?Blong mekem wanem? Blong oli givim ‘kakae long ol man blong hem long stret taem blong hem.’ (Matiu 24:45, NW) Long ol yia ya, smol grup blong ol tabu brata long hedkwota long Brooklyn, oli rerem mo givimaot kakae long ol man blong Jisas, blong mekem bilif blong olgeta i strong. Afta long 1940, tok ya “hed kampani” i stat blong kamaot long ol buk blong yumi. Long taem ya, oltaem nem blong ol daerekta blong Watch Tower Bible and Tract Society i joen wetem hed kampani. Be long 1971, i kam klia se Hed Kampani i defren long Watch Tower Society. Sosaeti ya i lukaot nomo long evri samting we i joen wetem loa. Stat long taem ya, i no nid blong ol tabu brata oli wok olsem ol daerekta blong Sosaeti, blong oli save kam memba blong Hed Kampani. I no longtaem i pas, ol brata blong “ol narafala sipsip,” oli wok olsem ol daerekta blong Sosaeti mo blong ol narafala smol sosaeti we ol man blong God oli yusum. Long rod ya, Hed Kampani i save lukluk nomo long wok ya blong tijim ol man blong God long Baebol mo lidim olgeta. (Jon 10:16; Ol Wok 6:4) Wajtaoa blong 15 Julae 2013 i eksplenem se “gudfala slef we i waes,” hem i wan smol grup blong ol tabu brata we oli mekemap Hed Kampani.

11. ?Hed Kampani i mekem ol desisen olsem wanem?

¹¹ Evri wik, ol memba blong Hed Kampani oli kam wanples blong mekem miting, blong mekem ol impoten desisen. Ol miting olsem i givhan long olgeta blong oli storiangud mo oli joen gud. (Ol Proveb 20:18) I no gat wan long olgeta we i hae moa long ol narawan, taswe long ol miting blong olgeta, wan brata i mekem jeaman blong wan yia, mo long nekis yia, wan defren wan bakegen. (1 Pita 5:1) Hemia i sem mak long ol sikis komiti blong Hed Kampani. I no gat wan memba blong Hed Kampani we i ting se hem i lida blong ol brata blong hem.  Olgeta evriwan oli man blong Kraes, mo olgeta tu oli kasem kakae we gudfala slef i givim blong mekem bilif blong olgeta i strong, mo oli folem advaes blong hem.

12. ?Wanem ol kwestin we bambae yumi ansa long olgeta?

¹² Hed Kampani i no stret gud olgeta mo God i no toktok stret long hem. Hem i save mekem mastik taem hem i eksplenem Baebol no i givim advaes blong lidim ogenaesesen. Eksampol, long buk ya Watch Tower Publications Index (Franis mo Inglis), i gat wan haf we nem blong hem “Beliefs Clarified.” Long haf ya, i gat lis blong sam save blong Baebol we oli jenisim stat long yia 1870 i kam. Jisas i no talem se gudfala slef ya bambae i givim kakae we i stret gud olgeta. ?So olsem wanem yumi save ansa long kwestin blong Jisas we i talem se: “Hu ya gudfala slef we i waes”? (Matiu  24:45, NW) ?Wanem i pruvum se Hed Kampani i gudfala slef ya? Bae yumi luk ol semfala tri samting we oli givhan long hed kampani long taem blong ol aposol.

13. ?Tabu spirit i givhan long Hed Kampani olsem wanem?

¹³ Tabu spirit i givhan long Hed Kampani. Tabu spirit i givhan long Hed Kampani blong kasem save ol trutok blong Baebol we oli no bin kasem save long hem bifo. Eksampol, tingbaot lis we yumi jes tokbaot we i soemaot ol bilif we oli jenisim. I no gat man i naf blong kasem save long “ol tingting blong God” long prapa save blong hem, mo eksplenem. (Ridim 1 Korin 2:10.) Hed Kampani i gat sem filing olsem aposol Pol, we i raetem se: “Taem mifala i tok, mifala i no save yusum ol tok we mifala i lanem long waes blong man, nogat. Mifala i stap yusum ol tok we Tabu Spirit ya i stap tijim mifala long hem.” (1 Korin 2:13) Ol giaman tijing oli gohed blong plante handred yia mo ol man oli stap long tudak, be stat long 1919, save blong Baebol i kam antap bigwan. ?From wanem i olsem? I gat wan risen nomo: !Hemia se God i yusum tabu spirit blong hem blong givhan long Hed Kampani!

14. ?Folem Revelesen 14:6, 7, olsem wanem ol enjel oli givhan long Hed Kampani mo ol man blong God tede?

¹⁴ Ol enjel oli givhan long Hed Kampani. Hed Kampani i gat bigfala wok ya blong lidim bitim eit milian pablisa long wok blong prij long fulwol. ?From wanem wok ya i karem gudfala frut? Wan risen se ol enjel oli stap sapotem wok ya. (Ridim Revelesen 14:6, 7.) !Plante taem, ol enjel oli lidim ol pablisa i go long wan man we i jes prea blong God i givhan long hem! * Wok blong prij mo tij i stap kam bigwan moa long ol ples ya tu we ol man oli agens bigwan. Samting ya i save hapen nomo from help blong ol enjel.

15. ?Hed Kampani i defren olsem wanem long ol lida blong ol skul we oli talem se oli Kristin? Talem wan eksampol.

¹⁵ Tok blong God i givhan long Hed Kampani. (Ridim Jon 17:17.) Tingbaot samting we i hapen long 1973. Wajtaoa blong 1 Jun i askem sipos “i stret blong ol man we oli no stop blong smok, oli baptaes.” Ansa we i kamaot i stanap long ol rul blong Baebol, mo i talem se !nogat! Wajtaoa i yusum plante vas blong Baebol, mo i eksplenem from wanem kongregesen i mas putumaot wan man we i no stop blong smok. (1 Korin 5:7; 2 Korin 7:1) Magasin ya i talem se strong rul ya i no kamaot long man, be long “God we i talemaot tingting blong hem long Baebol.” I no gat wan narafala jos we i rere blong folemgud olgeta samting we Baebol i talem, nomata se sam memba blong olgeta oli faenem se i had. Wan buk blong jos we i jes kamaot long Yunaeted Stet, i talem se: “Ol Kristin lida oli wantem se ol memba blong olgeta mo ol narafala oli glad long olgeta, ale oltaem oli jenisim ol tijing blong olgeta, blong mekem i laenap wetem bilif mo tingting blong ol man ya.” Hed Kampani i no letem ol man oli lidim hem. Be hem i letem Tok blong God i lidim hem, mo hemia i pruvum se Jehova nao i stap lidim ol man blong hem tede.

16. ?Wanem wan rod blong no fogetem Hed Kampani?

¹⁶ Ridim Hibrus 13:7. Baebol i talem se yumi no mas ‘fogetem ol man ya we oli stap lidim yumi.’ Wan rod blong mekem olsem, hemia blong tokbaot Hed Kampani long ol prea blong yumi. (Efesas 6:18) Olgeta oli gat plante wok blong mekem, olsem givim kakae we yumi nidim blong mekem bilif i strong, lidim wok blong prij long fulwol, mo lukaot long ol presen mane we ogenaesesen i kasem. !Taswe, oli rili nidim we yumi prea from olgeta oltaem!

17, 18. (1) ?Olsem wanem yumi letem Hed Kampani i lidim yumi? (2) ?Taem yu prij, olsem wanem hemia i soemaot se yu sapotem Hed Kampani mo Jisas?

¹⁷ Mo tu, yumi no fogetem Hed Kampani taem yumi folem ol tijing mo ol rul we hem i givim blong lidim yumi. Hed Kampani i givim ol buk, ol miting, mo ol asembli, blong lidim yumi. Mo tu, hem i putumap ol eria elda, mo olgeta ya oli putumap ol elda long ol kongregesen. Taem ol eria elda mo ol elda oli folemgud ol advaes we Hed Kampani i givim, oli soemaot se oli no fogetem hem. Mo taem yumi obei long ol man we Jisas i yusum olgeta tede, yumi soemaot respek long hem we i Lida blong yumi.—Hibrus 13:17.

¹⁸ Wan narafala rod blong no fogetem Hed Kampani, hemia blong mekem bes blong yumi long wok blong prij. Hibrus 13:7 i pulum ol Kristin blong folem fasin blong bilif blong olgeta we oli stap lidim olgeta. Hed Kampani i soemaot strong bilif taem hem i wok strong long wok blong prij, mo i pulum ol narafala blong oli talemaot gud nius. ?Olsem wanem? ?Yumi stap sapotem ol brata ya long wok ya? Sipos yes, bambae yumi glad bigwan blong harem tok we Jisas i talem long yumi, se: “Taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.”—Matiu 25:34-40.

19. ?From wanem yu gat strong tingting blong folem Lida blong yumi Jisas?

¹⁹ Taem Jisas i gobak long heven, hem i no fogetem ol man blong hem. (Matiu 28:20) Hem i save se tabu spirit, ol enjel, mo tok blong God, oli givhan long hem blong lidim ol man taem hem i stap long wol. Taswe tede, hem i givim ol semfala samting ya long gufala slef ya, blong givhan long hem. Hed Kampani i gohed blong “biaen long Smol Sipsip ya” Jisas, “long evri ples we hem i pas long hem.” (Revelesen 14:4) Taswe, taem yumi folem ol advaes blong Hed Kampani, yumi stap folem Lida blong yumi Jisas. I no longtaem, bambae hem i lidim yumi i go long laef we i no save finis. (Revelesen 7:14-17) !I no gat wan narafala lida long wol ya we i save mekem promes olsem!