1, 2. ?From wanem God i no moa wantem Sol? (Yu luk pija long stat blong stadi.)

TAEM Jehova i jusumaot Sol blong i king, Sol i wan man we i gat tingting daon. (1 Samuel 9:1, 2, 21; 10:20-24) Be afta we hem i kam king, fasin blong hem i jenis, mo hem i mekem plante samting we hem i no gat raet blong mekem. Wan taem, ol man Filistia oli kam blong faet agensem ol man Isrel. Profet Samuel i bin talem long King Sol se bambae hem i kam blong mekem sakrefaes long Jehova. Be taem hem i no kamtru yet, ol man Isrel oli fraet mo plante oli ronwe long Sol. Ale Sol i no moa gat longfala tingting blong wet, nao hem wan i mekem sakrefaes. Hem i no gat raet blong mekem samting ya, mo Jehova i no glad nating.—1 Samuel 13:5-9.

² Taem Samuel i kamtru, hem i tok long Sol from we hem i no obei long Jehova. Be Sol i no ting se hem i mekem samting we i rong, ale hem i mekem eskius, mo i blemem ol narafala. (1 Samuel 13:10-14) Stat long taem ya, Sol i gohed blong mekem plante narafala samting we hem i no gat raet blong mekem. Ale Jehova i no moa wantem se hem i king. (1 Samuel 15:22, 23) Long stat, laef blong Sol i gud, be en blong laef blong hem i nogud we i nogud.—1 Samuel 31:1-6.

3. (1) ?Samfala oli tingbaot tingting daon olsem wanem? (2) ?Wanem ol kwestin we bambae yumi ansa long olgeta?

 ³ Plante man tede oli harem se oli no save gat tingting daon, mo long semtaem gat wan gudfala wok mo gudfala laef. Oli tok flas blong soemaot se oli gud moa long ol narafala. Eksampol, wan akta we i joen long politik i talem se: “Tingting daon i no wan fasin blong mi, mo mi hop se bambae mi neva gat fasin ya.” ?Be from wanem i impoten blong ol Kristin oli gat tingting daon? ?Tingting daon i minim wanem? ?Be i no minim wanem? Long stadi ya, bambae yumi ansa long ol kwestin ya. Mo long nekis stadi bambae yumi luk olsem wanem yumi save gat tingting daon, nating se i no isi blong mekem olsem.

4. ?Man we i no gat tingting daon hem i olsem wanem?

⁴ Baebol i soemaot se taem man i mekem wan samting we hem i no gat raet blong mekem, hem i no gat tingting daon nating. (Ridim Ol Proveb 11:2.) Deved i askem long Jehova se: “Plis yu blokem mi blong mi no mekem stronghed blong mi blong mekem ol fasin nogud.” (Ol Sam 19:13) Sam man oli mekem samting we oli no gat raet blong mekem, from we oli no gat longfala tingting mo oli praod. Yumi evriwan yumi mekem olsem samtaem, from we yumi no stret gud olgeta. Be olsem yumi luk long King Sol, sipos hemia i wan samting we yumi stap mekem oltaem, Jehova bambae i no glad long yumi. Ol Sam 119:21 i talem se Jehova bambae i ‘tok long ol praod man.’ ?From wanem hem i mekem olsem?

5. ?From wanem i nogud we i nogud blong mekem samting we yumi no gat raet blong mekem?

⁵ Faswan risen se, sipos yumi mekem wan samting we yumi no gat raet blong mekem, yumi soemaot se yumi no respektem Jehova, we i God mo Rula blong yumi. Sekenwan se, taem yumi mekem samting we yumi no gat raet blong mekem, bambae raorao i kamaot. (Ol Proveb13:10) Mo namba tri se, taem ol narafala oli faenemaot samting we yumi mekem, bambae oli daonem yumi mo bambae yumi sem. (Luk 14:8, 9) Ol samting ya oli soemaot klia nomo from wanem Jehova i wantem se yumi gat tingting daon.

6, 7. ?Olsem wanem fasin blong gat tingting daon i joen wetem fasin blong no flas?

⁶ Tingting daon i joen wetem fasin ya blong no flas. Wan Kristin we i no flas, hem i luk ol narafala se oli gud moa long hem. (Filipae 2:3) Plante taem, man we i gat tingting daon, hem i no flas. Hem i luksave se i gat sam samting we hem i no naf blong mekem, mo hem i rere blong luksave ol mastik blong hem. Hem i rere tu blong lesin long tingting blong narafala mo blong lanem samting long olgeta. Jehova i glad bigwan long man we i gat tingting daon.

⁷ Baebol i soemaot se man we i gat tingting daon i kasem save long hem wan, mo i luksave se i gat sam samting we hem i no naf blong mekem, no i no gat raet blong mekem. Save ya i givhan long hem blong respektem ol narafala mo mekem i gud long olgeta.

8. ?Wanem sam tingting we yumi mas blokem sipos yumi wantem gat tingting daon?

 ⁸ Samtaem yumi no luksave, be yumi save stat blong tingting long sam samting we yumi no gat raet blong mekem. ?Hemia i save hapen olsem wanem? Maet yumi stat blong tingting se yumi impoten moa long ol narafala from we yumi gat sam spesel wok long kongregesen. (Rom 12:16) No maet yumi mekem plante samting blong pulum tingting blong ol man i kam long yumi. (1 Timoti 2:9, 10) Maet yumi stat blong talem long ol narafala, samting we oli mas mekem, no samting we oli no mas mekem.—1 Korin 4:6.

9. ?From wanem sam man oli mekem samting we oli no gat raet blong mekem? Talem sam eksampol long Baebol.

⁹ Yumi save stat blong mekem samting we yumi no gat raet blong mekem, sipos yumi no kontrolem ol rabis tingting blong yumi. Plante oli kam olsem from we oli wantem se ol narafala oli leftemap olgeta, no oli jalus long ol narafala, no oli no kontrolem kros blong olgeta. Hemia nao samting we i hapen long sam man long Baebol, olsem Absalom, Usia, mo Nebukadnesa. Jehova i soemaot klia long olgeta se oli mas gat tingting daon.—2 Samuel 15:1-6; 18:9-17; 2 Kronikel 26:16-21; Daniel 5:18-21.

10. ?From wanem yumi no mas jajem narafala? Talem wan eksampol long Baebol.

¹⁰ I gat sam narafala risen we i mekem se samtaem ol man oli no gat tingting daon. Yumi save tingbaot eksampol blong Abimelek mo Pita. (Jenesis 20:2-7; Matiu 26:31-35) ?Olsem wanem? ?Tufala man ya i praod, nao tufala i mekem samting we tufala i no gat raet blong mekem? ?No maet tufala i no gat evri save, nao tufala i kwik blong mekem samting we tufala i no tingting fastaem? Yumi no save samting we i stap long hat blong man, taswe yumi no mas jajem narafala.—Ridim Jemes 4:12.

11. ?Tingting daon i joen olsem wanem wetem wok we God i wantem se yumi mekem?

¹¹ Wan man we i gat tingting daon, hem i luksave wok we God i wantem blong hem i mekem. Jehova i wan God blong oda. Hem i givim wan wok long evri memba blong kongregesen. Kongregesen i nidim yumi evriwan. Jehova i mekem se yumi wanwan yumi gat gudhan blong mekem sam samting, mo hem i givim ol defdefren presen long yumi evriwan, mo hem i letem yumi jusum se bambae yumi yusum ol presen ya olsem wanem. Sipos yumi gat tingting daon, bambae yumi yusum presen ya long fasin we Jehova i wantem. (Rom 12:4-8) Yumi kasem save se Jehova i wantem we yumi yusum ol presen ya blong leftemap nem blong hem, mo blong givhan long ol narafala.—Ridim 1 Pita 4:10.

12, 13. ?Yumi mas tingbaot wanem sipos wok we yumi mekem blong Jehova i jenis?

¹² Taem ol yia oli stap pas, wok we yumi stap mekem blong Jehova i save jenis. Traem tingbaot ol defdefren wok we Jisas i mekem. Fastaem, hem i stap hem wan nomo wetem Papa blong hem. (Ol Proveb 8:22) Biaen, hem i halpem Jehova blong mekem ol enjel, heven mo wol, mo ol man. (Kolosi 1:16) Biaen bakegen, hem i kamdaon long wol, i bon olsem wan bebi mo i gruap i kam wan man. (Filipae 2:7) Afta long ded blong hem, hem i gobak long heven, mo long 1914 hem i kam King long Kingdom blong God. (Hibrus 2:9) Mo long fiuja, afta we hem i rul blong wan taosen yia, bambae hem i givimbak Kingdom i go long han blong Jehova, blong hem i “rul long olgeta samting.”—1 Korin 15:28.

¹³ Yumi tu, yumi luk plante jenis long laef blong yumi. Samtaem, sam desisen blong yumi i mekem se wok we yumi stap mekem i jenis. Traem tingbaot. Maet yumi bin  singel, be biaen yumi mekem desisen blong mared. No maet yumi gat pikinini. Afta we sam yia i pas, maet yumi mekem desisen blong mekem sam jenis long laef blong yumi, blong yumi save prij fultaem. Maet laef blong yumi i jenis, ale yumi mas mekem wan defren wok. Maet yumi naf blong mekem sam moa wok, no maet yumi naf blong mekem smol wok nomo. Be nomata se yumi yangfala no yumi olfala, yumi gat gudfala helt no nogat, be Jehova i save beswan rod we yumi wanwan i save mekem long wok blong hem. Hem i no wantem se yumi mekem moa long wanem we yumi naf blong mekem. Mo hem i glad tumas long wanem we yumi naf blong mekem.—Hibrus 6:10.

14. ?Olsem wanem fasin blong gat tingting daon i save givhan long yumi blong glad long wok blong yumi?

¹⁴ Jisas i glad nomo long eni wok we Jehova i givim long hem, mo yumi tu yumi save glad long wok blong yumi. (Ol Proveb 8:30, 31) Man we i gat tingting daon i glad nomo long eni wok we hem i kasem long kongregesen. Hem i no putum tingting blong hem long ol samting we ol narafala oli stap mekem, be hem i glad long wok we hem i gat long ogenaesesen blong God, mo hem i tingbaot wok ya se i kamaot long Jehova. Man olsem i respektem ol narafala tu mo i glad blong sapotem olgeta, mo i luksave se Jehova i givim wok long olgeta tu.—Rom 12:10.

15. ?Yumi save lanem wanem long eksampol blong Gideon?

¹⁵ Gideon i soemaot wan gudfala eksampol long fasin blong gat tingting daon. Taem Jehova i askem long hem blong i sevem ol man Isrel long han blong ol man Midian, hem i talem se: “Mifala ya ol laen blong Manase, be long laen ya, famle blong mifala ya we i laen blong Abiesa, hem i smol moa long ol narafala famle blong laen ya. Mo bakegen, mi,  long famle blong mi, oli no kaontem mi nating.” (Jajes 6:15) Be Gideon i trastem Jehova mo i agri blong mekem wok ya. Biaen, hem i mekem sua se hem i kasemsave gud long samting we Jehova i wantem, mo i prea blong Jehova i givhan long hem. (Jajes 6:36-40) Gideon i wan man we i strong mo i no fraet, be hem i waes mo i lukaotgud tu. (Jajes 6:11, 27) Biaen, taem ol man oli wantem putumap hem blong i rulum olgeta, hem i no wantem. Afta we hem i mekem ol samting we Jehova i askem , hem i gobak long ples blong hem.—Jajes 8:22, 23, 29.

16, 17. ?Wan man we i gat tingting daon i save mekem wanem blong i gohed gud?

¹⁶ Sipos wan man i agri blong mekem wan niufala wok long kongregesen, no i wantem mekem moa wok blong givhan long kongregesen, hemia i no min se hem i no gat tingting daon. Baebol i talem se i gud we wan man blong Jehova i wantem mekem moa wok blong givhan long ol brata blong hem, mo blong i gohed gud moa. (1 Timoti 4:13-15) Be ?olsem wanem? ?Yumi mas gat wan niufala wok blong yumi save gohed gud? Nogat. Yumi evriwan i save gohed blong mekem ol fasin blong yumi oli kamgud moa, mo blong mekem se yumi kamgud moa long ol samting we yumi naf blong mekem. Long rod ya, yumi naf blong mekem ol wok blong God mo blong halpem ol narafala.

¹⁷ Taem oli askem wan man blong mekem wan wok long kongregesen, tingting daon bambae i mekem se bifo we hem i agri, hem i faenemaot fastaem wanem samting we bambae hem i mas mekem. Hem i save prea from wok ya, mo i tingting gud blong luk sipos hem i naf blong mekem wok ya no nogat. Hem i save askem se: ‘?Bambae mi gat inaf taem mo paoa yet blong mekem ol narafala impoten wok?’ Sipos hem i luk se nogat, ?ol narafala oli save mekem sam long ol wok ya? Maet wan man we i gat tingting daon i tingting gud, nao i talem se hem i no naf blong mekem wok ya. Sipos yumi gat tingting daon, samtaem yumi mas talem ‘no’ long sam wok.

18. (1) ?Man we i gat tingting daon bambae i mekem wanem taem i kasem wan wok? (2) ?Rom 12:3 i givhan long yumi olsem wanem blong gat tingting daon?

¹⁸ Jehova i wantem se yumi ‘wokbaot wetem hem we yumi gat tingting daon.’ (Maeka 6:8, NW) Taswe taem yumi kasem wan wok, i gud yumi askem long hem blong i lidim yumi mo i givhan long yumi, olsem we Gideon i mekem. Yumi mas tingting dip long ol samting we Jehova i talem long yumi tru long Baebol mo ogenaesesen blong hem. Yumi mas tingbaot se nomata wanem samting we yumi naf blong mekem long wok blong hem, yumi no mekem from prapa paoa blong yumi, be from we Jehova i no flas, nao hem i rere blong givhan long yumi. (Ol Sam 18:35) Man we i gat tingting daon bambae i ‘no letem tingting blong hem i go antap.’—Ridim Rom 12:3.

19. ?From wanem yumi mas gat tingting daon?

¹⁹ Man we i gat tingting daon i save se i stret we ol man oli leftemap nem blong Jehova nomo, from we hem nao i wokem olgeta samting mo hem i Hae moa long olgeta samting long heven mo long wol. (Revelesen 4:11) Sipos yumi gat tingting daon, bambae yumi glad long eni wok we yumi kasem. Bambae yumi respektem tingting mo filing blong ol brata mo sista blong yumi, ale bambae yumi evriwan i joen gud. Man we i gat tingting daon i tingting gud bifo we hem i mekem wan samting, nao bambae hem i no mekem ol bigfala mastik. Jehova i glad tumas long olgeta we oli gat tingting daon. Taswe, i impoten tumas we ol man blong God oli gat tingting daon. Long nekis stadi, bambae yumi luk olsem wanem yumi save gat tingting daon nating se i no isi blong mekem olsem.