LONG Jenesis japta 22, Baebol i talem se God i talem long Ebraham blong i go long wan ples we i stap longwe, blong mekem wan sakrefaes. Hem i se: “[Ebraham] i holem naef mo baket sakol we i laet, mo i givim faeawud long Aesak blong i karem, nao tufala i wokbaot i go.”—Jenesis 22:6.

Baebol i no eksplenem olsem wanem ol man bifo oli stap laetem faea. Wan man blong stadi long Baebol i talem se, sipos Ebraham mo Aesak i laetem faea nao tufala i holem faea ya taem tufala i “wokbaot long longfala rod” ya, faea ya bambae i ded long rod. Be tufala i no mekem olsem, maet tufala i karem evri samting we bambae tufala i nidim, blong laetem wan faea.

Sam narafala man oli talem se long taem ya, i no isi blong laetem faea. Taswe taem i gat rod, ol man oli karem sakol we i laet finis blong laetem faea blong olgeta, no maet oli go askem long wan narafala man klosap. Plante man blong stadi long Baebol oli ting se bifo we Ebraham i aot, hem i karem sam sakol we i laet wetem hem. Maet hem i putum long wan baket, no wan smol sospen we i gat jen blong hem, mo taem hem i wokbaot i go long narafala ples, hem i karem sospen ya wetem hem. (Aesea 30:14) Biaen, hem i save yusum ol sakol ya wetem sam smosmol pis wud, blong laetem faea sipos hem i nidim.