1, 2. ?Wanem tingting we plante man oli gat long wok blong olgeta?

PLANTE man oli ting se wok we oli mekem i soemaot se oli impoten no oli no impoten. Long sam kantri, sipos yu wantem save wan man, yu askem long hem se: “?Wanem wok blong yu?”

² Samtaem, taem Baebol i tokbaot wan man, hem i tokbaot wok we hem i mekem. Eksampol, hem i tokbaot “Matiu, we i man blong tekem mane blong takis,” “Saemon, we hem i man blong wokem ol samting long skin blong buluk,” mo “Dokta Luk, we yumi lavem hem tumas.” (Matiu 10:3; Ol Wok 10:6; Kolosi 4:14) Sam narafala taem, Baebol i tokbaot spesel wok we sam man blong Jehova oli mekem, olsem King Deved, profet Elaeja, mo aposol Pol. Ol man ya oli tinghae long wok we Jehova i givim long olgeta. Long sem fasin, yumi tu yumi mas tinghae long eni wok we Jehova i givim long yumi.

3. ?From wanem ol olfala oli mas trenem ol yangfala? (Yu luk pija long stat blong stadi.)

³ Yumi laekem blong mekem wok blong Jehova mo yumi tinghae long wok blong yumi. Plante long yumi i glad tumas  long wok blong yumi, mo yumi wantem gohed blong mekem wok ya longtaem moa. Be sore tumas, taem man i kam olfala, hem i no moa naf blong mekem ol samting we hem i stap mekem taem hem i yangfala. (Prija 1:4) Hemia wan samting we i traem ol man blong Jehova. Tede, wok blong prij i kam bigwan moa, mo ogenaesesen blong Jehova i stap yusum ol niufala teknoloji blong mekem plante moa man oli kasem gud nius. Be samtaem i no isi blong ol olfala oli lanem ol niufala fasin blong mekem samting. (Luk 5:39) Mo tu, taem man i stap kam olfala, hem i no moa strong mo paoa blong hem i stap godaon. (Ol Proveb 20:29) Taswe, sipos ol olfala oli trenem ol yangfala blong oli mekem moa wok long ogenaesesen blong Jehova, hemia i stret nomo mo i soemaot lav.—Ridim Ol Sam 71:18.

4. ?From wanem i no isi blong ol brata oli pasem wok long ol narafala? (Yu luk bokis ya  “?From Wanem i Had Blong Yumi Pasem Wok Long Ol Narafala?”)

⁴ I no isi oltaem blong pasem wok i go long wan yangfala brata. Maet ol brata oli harem nogud taem oli tingbaot se bambae oli lusum posisen we oli laekem tumas. No maet oli wari se sipos oli no lidim wok ya, bambae ol yangfala oli no mekem gud wok ya. No maet oli harem se oli no gat taem blong trenem ol narafala. Be ol yangfala brata tu oli mas gat longfala tingting sipos oli no kasem eni wok.

5. ?Wanem kwestin we bambae yumi tokbaot long stadi ya?

⁵ ?From wanem i impoten blong ol olfala brata oli givhan long ol yangfala brata blong oli mekem moa wok? ?Oli mekem samting ya olsem wanem? (2 Timoti 2:2) ?Mo from wanem ol yangfala brata oli mas gat stret tingting taem oli wok wetem ol olfala brata we oli gat moa ekspiriens mo oli lanem samting long olgeta? Fastaem, bambae yumi luk olsem wanem King Deved i rerem tingting blong boe blong hem from wan wok we i impoten tumas.

6. ?King Deved i wantem mekem wanem? ?Jehova i talem wanem long hem?

⁶ Blong plante yia, Deved i muv long wan ples i go long narafala ples blong ronwe long ol man we oli wantem kilim hem. Biaen, taem hem i kam king, hem i stap long wan naesfala haos. Ale hem i talem long profet Natan se: “Mi mi stap long wan gudfala haos we oli wokem long wud ya sida, be Bokis ya we i Saen blong Promes blong Hae God, hem i stap long wan haos tapolen nomo.” Deved i wantem tumas blong bildim wan naesfala haos tempol blong Jehova. Natan i talem long hem se: “Sipos yu tingbaot blong mekem wan samting, yu gohed, yu mekem, from we Hae God i stap wetem yu.” Be hemia i no samting we Jehova i wantem. Hem i talem long Natan blong i go talem long Deved se: “I no yu we bambae i wokem wan haos blong mi, blong mi stap long hem.” Nating se Jehova i promes long Deved se bambae hem i stap wetem hem oltaem, be Deved i harem se Solomon nao bambae i wokem haos tempol ya. ?Deved i mekem wanem?—1 Kronikel 17:1-4, 8, 11, 12; 29:1.

7. ?Deved i mekem wanem taem hem i harem samting we Jehova i talem?

⁷ Maet Deved i harem nogud from we hem i wantem tumas blong wokem wan haos tempol blong Jehova. Be nating se i olsem, hem i sapotem wok ya we Solomon  bambae i lidim. Hem i jusum ol man we bambae oli mekem ol defdefren wok, mo hem i hivimap aean, kopa, silva, gol, mo wud we bambae oli yusum blong wokem haos tempol ya. Hem i no wari sipos ol man bambae oli talem se Solomon nao i wokem haos tempol ya, mo i tru, sam yia biaen oli kolem haos ya se tempol blong Solomon. Be hem i leftemap tingting blong Solomon, se: “Pikinini blong mi, prea blong mi we Hae God ya bambae i stap wetem yu, mo bambae i givhan long yu blong yu yu save wokem haos ya blong hem, olsem we hem i promes.”—1 Kronikel 22:11, 14-16.

8. ?From wanem maet Deved i gat tingting se Solomon i no naf blong bildim tempol? ?Be Deved i mekem wanem?

⁸ Ridim 1 Kronikel 22:5. Maet Deved i gat tingting ya se Solomon i no naf blong lidim wan bigfala wok olsem. Haos tempol ya i mas “wan nambawan haos,” mo Solomon i “wan yang man nomo, mo i no mekem wan bigfala wok olsem yet.” Be Deved i save se Jehova bambae i givhan long Solomon blong mekem spesel wok ya. Ale Deved i mekem evri samting we hem i naf blong mekem, blong Solomon i rere from bigfala wok ya.

9. ?Olsem wanem ol olfala oli save harem gud blong givim wok long ol narafala? Talem wan pijatok.

⁹ Ol olfala brata oli no mas harem nogud taem oli mas givim sam wok long ol yangfala brata. Yumi evriwan i luksave se samting we i impoten moa tede, hemia wok blong Jehova. Taem yumi trenem ol yangfala brata blong mekem ol wok, hemia bambae i givhan blong mekem se wok blong Jehova i gohed. Traem tingbaot. Taem yu wan smol pikinini, maet yu wajem papa blong yu taem hem i stap draevem trak blong hem. Taem yu stap gruap, hem i eksplenem samting we hem  i stap mekem. Taem yu kam bigwan, yu nao yu draevem trak. Nating se i olsem, papa blong yu i gohed yet blong givim advaes long yu. Samtaem hem i draev. Be taem hem i stap kam olfala moa, yu nomo yu stap draevem trak. ?Olsem wanem? ?Samting ya i mekem Papa blong yu i no glad? Nogat. I sua se hem i glad tumas we yu nao yu draevem trak blong tekem hem i go long ples we hem i wantem go long hem. Long sem fasin, ol olfala brata oli glad tumas blong luk ol yangfala brata we oli trenem, oli kam naf blong mekem ol wok long ogenaesesen blong Jehova.

10. ?Moses i harem olsem wanem taem narafala i wantem ona long hem?

¹⁰ Yumi mas lukaot se yumi no kam jalus from wok blong ol narafala. Yumi save lanem sam samting long fasin blong Moses, taem sam man Isrel oli mekem olsem se oli profet. (Ridim Namba 11:24-29.) Josua i wantem stopem olgeta, be Moses i talem se: “?Yu wantem blokem olgeta ya from we yu wantem se mi nomo mi nambawan? !Be mi mi wantem blong Hae God bambae i givim Spirit blong hem long olgeta man, i mekem olgeta evriwan oli toktok olsem ol profet!” Moses i save se Jehova i stap lidim wok. Hem i no wantem se ol narafala oli ona long hem, be hem i wantem se evri man blong Jehova oli gat wok. ?Olsem wanem long yumi? ?Yumi glad taem ol narafala oli kasem wok?

11. ?Wan brata i talem wanem long fasin ya blong givim wok long ol narafala?

¹¹ I gat plante brata we oli bin wok had long wok blong Jehova blong plante yia mo oli trenem ol yangfala blong mekem moa wok. Yumi save tingbaot brata Pita we i mekem wok blong Jehova fultaem blong 74 yia. Hem i wok long branj ofis long Yurop blong 35 yia. Mo blong plante yia, hem i lukaot long wok blong Seves Dipatmen. Biaen, oli givim wok ya long Pol, wan yangfala brata we hem i bin trenem. ?Olsem wanem? ?Pita i harem nogud from jenis ya? Nogat. Hem i talem se: “Mi mi glad tumas se i gat sam brata we oli trenem olgeta blong mekem ol wok olsem, mo oli mekem gud ol wok ya.”

12. ?Yumi save lanem wanem long eksampol blong Rehoboam?

¹² Taem boe blong Solomon, Rehoboam, i kam king, hem i wantem save olsem wanem blong mekem wok blong hem, ale hem i askem advaes long ol olfala. !Be biaen hem i sakemaot advaes blong olgeta! Ale hem i folem advaes blong ol yangfala man we hem i gruap wetem olgeta.  Bigfala trabol i kamaot from. (2 Kronikel 10:6-11, 19) ?Hemia i tijim yumi long wanem? I waes blong askem advaes long olgeta we oli olfala moa long yumi mo oli gat moa ekspiriens. Ol yangfala oli save yusum sam niufala rod blong mekem wok blong olgeta. Be nating se i olsem, oli mas respektem tingting blong ol olfala mo oli no mas hareap blong sakemaot advaes blong olgeta.

13. ?Olsem wanem ol yangfala oli save wok gud wetem ol olfala?

¹³ Samtaem, ol yangfala oli kasem wok we i mekem se oli mas wok wetem sam brata we oli olfala moa long olgeta, mo oli gat moa ekspiriens. Gudfala samting i save kamaot sipos ol yangfala ya oli lanem samting from waes blong ol olfala ya mo ekspiriens blong olgeta. Pol we yumi tokbaot hem long haf 11, i talem se: “Mi faenem taem blong go askem advaes long Pita, mo mi pulum ol narafala tu blong oli mekem sem mak.”

14. ?Yumi save lanem wanem long fasin blong Pol mo Timoti?

¹⁴ Timoti i yangfala moa long aposol Pol, be tufala i bin wok tugeta blong plante yia. (Ridim Filipae 2:20-22.) Pol i talem long ol Kristin long Korin se: “Mi mi sanem Timoti i go long yufala, from we hem i pikinini blong mi we mi lavem hem tumas, mo oltaem hem i strong long wok ya blong Masta. Hem bambae i tijim yufala bakegen long ol fasin we mi stap folem taem mi stap mekem wok blong Kraes Jisas, hemia ol fasin ya we mi stap tijim long ol kongregesen long evri ples.” (1 Korin 4:17, NW) Tok ya i soemaot klia se Pol mo Timoti i wok gud tugeta mo tufala i givgivhan long tufala. Pol i spenem taem blong tijim Timoti long ‘ol fasin we hem i stap folem taem hem i stap mekem wok blong Kraes Jisas,’ mo Timoti i folem gud ol samting ya. Pol i laekem Timoti tumas, mo i save gud se Timoti i naf blong lukaot gud long ol brata mo sista long Korin. Ol elda oli save folem fasin blong Pol taem oli trenem ol narafala blong lidim ol wok long kongregesen.

15. ?Olsem wanem Rom 12:3-5 i save givhan long yumi taem i gat sam jenis?

¹⁵ Yumi laef long wan taem we i nambawan. Ogenaesesen blong Jehova long wol i stap kam bigwan long plante defren rod. Hemia i min se ol samting bambae oli gohed blong jenis. Maet yumi faenem se sam long ol jenis ya i had, mo maet oli jenisim sam samting long laef blong yumi. Be i gud yumi gat tingting daon mo yumi bisi long ol gudfala samting blong Kingdom, i bitim we yumi bisi long ol samting we yumi nomo yumi wantem. Sipos yumi mekem olsem, bambae yumi gohed blong joen gud. Pol i raet i go long ol Kristin long Rom se: “Mi mi talem long yufala evriwan, se yufala i no mas letem tingting blong yufala i go antap.” Biaen hem i eksplenem se evri haf long bodi blong yumi oli gat ol defdefren wok, mo long sem fasin yumi evriwan long kongregesen i gat ol defdefren wok blong mekem.—Rom 12:3-5.

16. ?Evri Kristin i save mekem wanem blong ogenaesesen blong Jehova i gat pis mo i joen gud?

 ¹⁶ Ol man blong Jehova oli wantem tumas blong sapotem Kingdom blong hem mo mekem samting we hem i talem. Ol olfala brata, yufala i mas trenem ol yangfala brata blong oli mekem wok we yufala i mekem. Ol yangfala brata, yufala i mas rere blong wok, mo yufala i mas gat tingting daon mo respektem ol olfala brata. Mo yufala ol waef, yufala i mas folem fasin blong Prisila we i folem mo i sapotem gud hasban blong hem Akwila, nating se sam samting long laef blong tufala i jenis.—Ol Wok 18:2.

17. ?Jisas i trenem ol disaepol blong oli mekem wanem?

¹⁷ Jisas i rere blong trenem ol narafala, mo hem i soemaot wan nambawan eksampol long saed ya. Hem i save se ol narafala oli mas gohed blong mekem wok blong hem. I tru, hem i save se ol disaepol blong hem oli no stret gud olgeta. Be hem i trastem olgeta se oli naf blong talemaot gud nius i go long plante moa man i bitim hem. (Jon 14:12) Hem i trenem gud olgeta nao oli naf blong prij long evri kantri we oli save go long hem.—Kolosi 1:23.

18. ?Bambae yumi gat wanem wok long fiuja? ?Wanem wok we yumi stap mekem naoia?

¹⁸ Afta we Jisas i ded, Jehova i mekem hem i laef bakegen, mo i givim sam moa wok long hem, mo i mekem hem i ‘hae moa long ol gavman, mo ol haeman, mo ol man we oli gat paoa, mo ol lida.’ (Efesas 1:19-21, NW) Sipos yumi mekem wok blong Jehova gogo yumi ded bifo long Amagedon, bambae yumi laef bakegen mo yumi gat plante gudfala wok blong mekem long niufala wol. Naoia yumi gat nambawan wok ya blong talemaot gud nius mo mekem disaepol. Nating se yumi yangfala no yumi olfala, i gud yumi evriwan i gohed blong “wok strong long ol wok ya blong Masta blong yumi.”—1 Korin 15:58.