Wan smol gel i luk we smok i kamaot long wan faktri mo i go antap gogo i kam bigwan olsem wan bigfala klaod. Nao hem i ting se oli stap wokem ol klaod long faktri ya. Maet yu laf from rong tingting blong pikinini ya, mo yu talem se hemia wan smol samting nomo. Be taem yu gat rong tingting long wan bigfala samting, yu save kasem bigfala trabol. Eksampol, sipos yu no ridimgud nem we i stap long paket blong wan meresin, nao yu dring, yu save kasem bigfala trabol.

Sipos yu gat rong tingting long ol samting we Baebol i talem, hemia wan bigfala problem. Eksampol, sam man oli gat rong tingting long ol tijing blong Jisas. (Jon 6:48-68) Oli no traem blong lanem moa, be oli girap oli sakemaot evri samting we Jisas i tijim. !Oli mestem wan bigfala samting!

?Yu yu ridim Baebol from yu wantem se i lidim yu? Hemia i nambawan. Be taem yu ridim Baebol, ating bambae yu gat rong tingting long sam samting we yu ridim, mo hemia i wan denja. Samting ya hapen long plante man finis. Traem luk tri tijing we plante man oli gat rong tingting long olgeta.

• Sam man oli gat rong tingting long tok ya blong Baebol se: “Yu mas fraet gud long tru God.” Long tingting blong olgeta, God i wantem se ol man oli mas fraet long hem. (Prija 12:13, NW) Be God i no wantem se ol man we oli wosipim hem oli tingbaot hem olsem. Hem i talem se: “!Yufala i no fraet! !Mi mi stap wetem yufala! !Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala!” (Aesea 41:10) Fraet gud long God, i minim nomo se yu ona long hem mo yu respektem hem.

• Sam man oli gat rong tingting long vas ya: ‘Olgeta samting oli stap kamtru long stret taem, i gat taem blong man i bon mo i gat taem blong man i ded.’ Oli ting se God nao i makemaot stret taem blong ol man wanwan bambae oli ded long hem. (Prija 3:1, 2) Be vas ya i blong soemaot ol samting we oli stap hapen long laef blong ol man, mo se ol man oli stap ded. Tok blong God i soemaot se ol prapa desisen blong yumi oli save spolem laef blong yumi. Yumi traem tingbaot vas ya se: “Man we i fraet gud long Jehova, bambae laef blong hem i longfala moa.” (Ol Proveb 10:27, NW; Ol Sam 90:10; Aesea 55:3) ?Olsem wanem samting ya i save hapen? Taem yumi respektem Tok blong God, hemia bambae i blokem yumi long sam nogud fasin olsem drong mo mekem ol doti fasin we oli save spolem helt blong yumi.—1 Korin 6:9, 10.

• Taem sam man oli ridim tok ya se heven mo wol “tufala i stap wet blong bambae faea i kasem tufala,” oli ting se hemia i minim prapa heven mo wol, mo oli ting se God bambae i bonem wol ya. (2 Pita 3:7) Be God i promes se bambae hem i neva spolem wol ya. God i “putum wol ya i stap strong long fandesen blong hem, we bambae hem i no save muf nating.” (Ol Sam 104:5; Aesea 45:18) Yes wol ya bambae i stap nomo, be God bambae i finisim ol rabis fasin we oli stap hapen tede, olsem we i bonem olgeta long faea. Mo tok ya heven i save minim skae, yunives no ples blong God. Olgeta ples ya bambae oli no lus.

Ol eksampol antap oli soemaot se plante taem ol man oli gat rong tingting long samting we oli ridim long Baebol. ?Be from wanem God i letem olsem? Maet sam man oli tingting se: ‘God i waes we i waes mo i gat plante save, hem i naf blong givim wan buk we i klia mo i isi blong yumi evriwan i naf blong kasem save long hem. ?Be from wanem hem i no mekem olsem?’ Traem luk tri risen from wanem plante taem ol man oli gat rong tingting.

1. Baebol i blong olgeta we oli gat tingting daon mo oli rere blong lanem samting. Jisas i talem long Papa blong hem se: “Papa, yu yu Hae God yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo, blong oli savegud. Yes,  Papa, hemia i wan samting we yu yu wantem.” (Luk 10:21) Oli raetem Baebol long wan fasin we olgeta ya nomo we oli gat gudfala tingting bambae oli naf blong kasem save long hem. Ol man we oli flas, hemia ol man we oli ting se oli ‘waes mo oli skul gud,’ bambae oli no kasem save long Baebol. Be ol man we oli olsem “smol pikinini,” hemia olgeta we tingting blong olgeta i stap daon mo oli rere blong lan, olgeta ya nomo bambae oli naf blong kasem save gud long tok blong God. !God i wokem Baebol long wan fasin we i gud tumas!

2. Baebol i blong ol man we oli rili wantem se God i givhan long olgeta blong kasem save long Baebol. Jisas i soemaot se ol man oli nidim help blong oli kasem save gud long samting we hem i talem. ?Wanem i save givhan long olgeta? Jisas i talem se: “Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting.” (Jon 14:26) God i givim tabu spirit blong hem, hemia paoa blong hem, blong givhan long ol man blong kasem save long samting we oli ridim long Baebol. Be ol man we oli no dipen long God, hem i no save givim spirit ya long olgeta, taswe ol man olsem, oli no naf blong kasem save long Baebol. Mo tabu spirit ya i pulum ol Kristin we oli gat save, blong olgeta tu oli givhan long ol man we oli wantem kasem save long Baebol.—Ol Wok 8:26-35.

3. Ol man oli naf blong kasemsave long sam vas blong Baebol long stret taem blong hem nomo. Yu traem tingbaot profet Daniel. Wan enjel i talem long hem blong i raetemdaon sam save we oli tokbaot fiuja. Hem i talem long hem se: “Daniel. I gud yu satem buk ya, yu putum wan mak long hem blong blokem i stap olsem gogo kasem klosap en blong wol ya.” Plante yia finis, plante man oli ridim buk blong Daniel, be oli no kasem save nating. Daniel tu i no kasem save long samting we hem i stap raetemdaon. Hem i talem se: “Mi harem samting ya we hem i talem, be mi no save mining blong hem nating.” Bambae ol man oli kasem save long mining blong profet tok blong Daniel, be long stret taem we God i jusum. Enjel ya i talem long hem se: “Daniel, i gud yu gohom. Ol toktok ya i tokhaed nomo, mo bambae i stap haed olsem gogo kasem klosap en blong wol ya.” ?Hu bambae i kasem save long tok ya blong God? “Olgeta we oli man nogud bambae oli no save luksave samting ya. . . . Olgeta ya nomo we oli waes bambae oli luksave.” (Daniel 12:4, 8-10) Taswe, God i no talemaot mining blong sam vas blong Baebol gogo kasem stret taem blong hem.

?Olsem wanem? ?Samting ya i mekem ol Witnes blong Jehova oli gat rong tingting samtaem long sam vas blong Baebol? Yes. Be long stret taem we God i mekem wan save i kam klia moa, ol Witnes oli rere nomo blong jenisim tingting we oli gat fastaem long save ya. Oli bilif se oli stap folem fasin blong ol aposol blong Kraes we oli gat tingting daon, mo oli jenisim tingting blong olgeta taem Jisas i stretem olgeta.—Ol Wok 1:6, 7.

Smol gel ya we yumi tokbaot hem long stat, i gat rong tingting long saed blong klaod, be hemia i wan smol samting nomo. Be ol samting we Baebol i tijim oli impoten long yu. Ol tok blong Baebol oli impoten tumas, taswe i gud yumi wanwan i mas traehad blong kasem save long hem taem yumi stap ridim Baebol. From samting ya, i gud yu lukaot help, blong yu kasem save gud long samting we yu stap ridim. Yu lukaotem ol man we oli gat tingting daon mo oli stadi long Baebol, ol man we oli dipen long tabu spirit blong God blong kasem save long Baebol. Mo yu lukaotem ol man we oli bilif strong se yumi laef long wan taem we God i wantem se yumi kasem save long Baebol naoia i bitim bifo. Yu no mas fraet blong toktok wetem ol Witnes blong Jehova, no yu ridim ol buk we i stap long websaet blong olgeta jw.org. Baebol i talem se: ‘Yu mas askem strong long Hae God, blong i mekem yu yu gat save, nao bambae yu savegud hem.’—Ol Proveb 2:3-5.