Mi mi bon long Paddington, wan eria long London we i gat plante man long hem. Mi laef wetem mama blong mi mo tri bigfala sista. Papa blong mi i man blong drong, taswe hem i no stap oltaem wetem mifala.

Taem mi pikinini, Mama i tijim mi blong prea evri naet. Mi gat wan smol Baebol we i gat Ol Sam nomo long hem, mo taem mi ridim, mi mekemap sam tiun blong miusik, blong mi save singsing long hem. Mi tingbaot wan tok we mi bin ridim long wan buk we i talem se: “Wan dei bambae i no moa gat tumora.” Tok ya i mekem se mi no save slip long naet, mo mi stap tingbaot fiuja. !Mi mi no wantem ded! Taswe mi stap tingting se: ‘Laef i no hemia nomo, i mas gat sam samting moa. ?From wanem mi laef?’

Mi mi intres tumas long wok blong ol kleva. Mi traem blong toktok long ol dedman, mo mi wetem ol fren blong mi long skul mifala i stap go luk ol gref, mo mifala i wajem ol muvi blong fraet. Hemia i mekem mifala i glad mo mifala i fraet tu.

Taem mi gat ten yia nomo, mi stat blong stronghed. Mi stat blong smok tabak, mo kwiktaem nomo mi slef blong hem. Biaen, mi stat blong smokem mariuana. Mo taem mi gat 11 yia, mi stat blong dring alkol. Mi no laekem tes blong hem, be mi laekem taem i mekem mi drong. Mi mi laekem miusik mo mi laekem danis. Enitaem nomo mi stap go long ol pati mo long ol naet klab. Oltaem mi stap aot long naet we i no gat man i luk mi, mo mi kambak bifo we i brok delaet. Long nekis dei mi taed tumas, mo oltaem mi stap ronwe long skul. Be taem mi stap long skul, plante taem mi dring alkol long en blong ol lesen.

Long laswan yia blong mi long skul, ripot blong mi i nogud olgeta. Mama i no save se mi mi stronghed olsem, mo hem i no glad long mi mo i kros tumas long mi. Mitufala i rao bigwan, nao mi ronwe long haos. Blong smoltaem, mi stap wetem boefren blong mi Tony, we i wan rasta man. Hem i wan man blong brekem loa, i stap salem drag, mo ol man oli save se hem i wan rabis man blong faet. I no longtaem, mi gat bel mo mi bonem boe blong mitufala taem mi gat 16 yia nomo.

Faswan taem we mi mitim ol Witnes blong Jehova, hemia taem mi stap long wan spesel haos blong ol mama we oli no mared. Ol haeman long ples ya oli mekem se mi stap long rum ya. Tu woman we tufala i Witnes, tufala i kam oltaem blong visitim ol yang mama long haos ya. Wan dei, mi joen long storian blong olgeta. Mi wantem pruvum se ol Witnes oli rong. Be tufala i yusum Baebol blong ansa long ol kwestin blong mi, mo tufala i mekem long fasin we i kwaet nomo. Tufala i kaen tumas, mo hemia i pulum tingting blong mi. Taswe mi agri blong stadi Baebol wetem tufala.

Mi lanem wan samting long Baebol we i jenisim laef blong mi. Taem mi yangfala, mi fraet blong ded. !Be mi faenemaot long tijing blong Jisas se i gat laef bakegen! (Jon 5:28, 29) Mo tu, mi lanem se God i rili kea long mi. (1 Pita 5:7) Ol tok blong Jeremaea 29:11, oli tajem hat blong mi. Jehova i talem se: “Mi nomo mi save ol plan we mi mekem finis from yufala. Mi mi wantem we bambae yufala i stap gud olwe, trabol bambae i no kasem yufala, mo bambae yufala i stap gogo, yufala i kasem ol samting ya we tingting blong yufala i stap long hem.” Mi mi stat blong bilif se mi save gat wan nambawan hop, hemia blong laef olwe long Paradaes long wol.—Ol Sam 37:29.

Ol Witnes blong Jehova oli soemaot bigfala lav long mi. Faswan taem we mi go long wan miting blong olgeta, mi harem se oli lavem mi mo oli kaen. !Evriwan oli luk mi olsem fren blong olgeta! (Jon 13:34, 35) Fasin blong olgeta i defren olgeta long fasin we wan jos i bin mekem long mi. Ol Witnes oli welkamem gud mi, nating se laef blong mi i nogud. Oli kea long mi, oli spenem taem wetem mi, mo oli givhan gud long mi taem mi nidim. Mi harem olsem se mi stap insaed long wan bigfala famle we i gat lav.

Taem mi stadi Baebol, mi luksave se mi mas jenisim laef blong mi blong mekem i laenap wetem rul blong God. Be i had blong mi stopem smok. Mo long sem taem, mi luksave se i gat sam miusik we oli pulum mi blong smokem mariuana, taswe mi jenisim ol miusik we mi stap lesin long hem. Blong stopem fasin ya blong drong, mi no moa go long ol pati mo long ol naet klab, from we long ol ples ya nao mi stap dring alkol. Mo mi jusum ol gudfala fren we bambae oli givhan long mi blong jenisim laef blong mi.—Ol Proveb 13:20.

Smoltaem biaen, Tony tu i stadi Baebol wetem ol Witnes. Taem ol Witnes oli yusum Baebol blong ansarem ol kwestin blong hem, hem tu i luksave se samting we hem i stap lanem i trutok. Ale hem i jenisim laef blong hem: hem i lego ol nogud fren blong hem, hem i no moa brekem loa, mo hem i no moa smokem mariuana. Mitufala i wantem mekem Jehova i glad, taswe mitufala i wantem stretem laef blong mitufala, blong mekem se boe blong mitufala i gruap long wan laef we i gud. Ale, long 1982, mitufala i mared.

Mi tingbaot se mi stap lukaot sam stori long Wajtaoa mo Wekap! * blong faenemaot olsem wanem samfala oli jenisim ol fasin we mi mi wantem jenisim. !Stori blong olgeta i rili leftemap tingting blong mi! Mo i mekem se mi gohed nomo, mi no stop. Mi prea oltaem long Jehova blong hem i no lego mi. Ale long Julae 1982, mi mo Tony i baptaes.

Taem mi fren gud wetem Jehova, hemia i sevem laef blong mi. Mi mo Tony, mitufala i luksave se Jehova i sapotem gud mitufala taem mitufala i kasem ol trabol. Long ol hadtaem, mitufala i lanem blong dipen long Jehova. Mo mitufala i luksave se Jehova i givhan long mitufala mo i lukaot gud long famle blong mitufala.—Ol Sam 55:22.

Mi mi glad blong givhan long boe mo gel blong mi, blong tufala tu i save gud Jehova olsem mi. Mo naoia mi glad taem mi luk we ol pikinini blong tufala tu oli save God.

Mi mi no moa wekap long naet mo wari long fiuja mo long ded. Naoia evri wik, mi mo Tony i stap goraon long ol kongregesen blong ol Witnes blong Jehova, blong leftemap tingting blong olgeta. Mitufala i joen wetem olgeta blong tijim ol narafala se sipos oli bilif long Jisas, olgeta tu oli save kasem laef we i no save finis.