“O Man blong harem ol prea, bambae olgeta kaen man oli kam long yu.”—Ol Sam 65:2.

Samfala we oli no bilif se God i stap lesin long prea, oli talem se oli prea from we i mekem olgeta oli harem gud. Be prea i no blong mekem yumi harem gud nomo taem yumi fesem ol problem. Baebol i talem se: “Jehova * i stap klosap long olgeta we oli stap singaot i go long hem, hemia olgeta we oli singaot i go long hem long fasin we i tru. . . . Hem i harem we oli krae from help.”—Ol Sam 145:18, 19.

Taswe, yumi save sua se Jehova God i stap lesin long prea blong ol man we oli wosipim hem. Hem i lavem olgeta, taswe hem i talem se: “Bambae yufala i singaot long mi mo yufala i kam mo yufala i prea long mi, mo bambae mi lesin long yufala.”—Jeremaea 29:12.

“Yufala i mas prea oltaem.”—Rom 12:12.

Baebol i pulum yumi blong “prea oltaem” mo blong “gohed blong prea enitaem.” I klia se Jehova God i wantem we yumi prea long hem.—Matiu 26:41; Efesas 6:18.

?From wanem God i wantem se yumi prea long hem? Traem tingbaot: Ol papa oli glad tumas taem smol pikinini blong olgeta i askem se, “?Papa, yu save givhan long mi?” I tru se maet papa ya i save finis filing blong pikinini mo samting we hem i nidim, be taem hem i harem ol tok blong pikinini ya, hemia i soemaot se pikinini i trastem hem mo i lavem hem. Sem mak, taem yumi prea long Jehova God, yumi soemaot se yumi trastem hem mo yumi wantem kam klosap long hem.—Ol Proveb 15:8; Jemes 4:8.

“Yufala i mas lego ol wari blong yufala long hem, from we hem i kea long yufala.”—1 Pita 5:7.

God i wantem se yumi prea long hem, from we hem i lavem yumi mo i kea long yumi. Hem i save gud ol problem mo ol wari blong yumi, mo hem i wantem givhan.

Oltaem long laef blong King Deved, hem i prea long Jehova God blong i givhan long hem, mo hem i talemaot ol tingting mo ol filing blong hem long God. (Ol Sam 23:1-6) ?Wanem tingting blong God? Hem i lavem Deved mo i lesin long ol prea blong hem. (Ol Wok 13:22) Long sem fasin, God i stap lesin long ol prea blong yumi, from we hem i kea long yumi.

Wan man blong raetem Ol Sam long Baebol i talem ol tok ya. Hem i sua se God i stap lesin long ol prea blong hem, mo hemia i givhan bigwan long hem. Hem i harem se hem i stap klosap nomo long God mo i gat paoa blong stanap strong, taem hem i wari mo i harem nogud.—Ol Sam 116:1-9.

Sipos yumi sua se God i harem ol prea blong yumi, bambae yumi gohed oltaem blong prea long hem. Tingbaot Pedro we i stap long not blong Spen. Boe blong hem we i gat 19 yia, i ded long wan aksiden long trak. Pedro i harem nogud tumas, nao i prea blong talemaot ol filing blong hem long God, mo i askem bakegen mo bakegen long God blong i givhan long hem mo i mekem hem i harem gud. ?Wanem i hapen? Pedro i talem se: “Jehova i ansa long prea blong mi, taem hem i yusum ol narafala Kristin blong givhan long mi mo waef blong mi, mo leftemap tingting blong mitufala.”

I tru se ol prea oli no mekem boe blong Pedro i laef bakegen, be oli givhan bigwan long Pedro mo famle blong hem. Waef blong hem, Maria Kamen, i talem se: “Prea i givhan long mi blong mi stanap strong taem mi harem nogud. Mi harem se Jehova God i kasem save long filing blong mi, from we taem mi prea long hem, mi gat pis mo tingting blong mi i stap kwaet.”

Ol tok blong Baebol mo ol samting we i hapen long laef blong ol man, oli soemaot klia se God i stap harem ol prea. Be i klia tu se God i no ansa long olgeta prea. ?From wanem God i ansa long sam prea nomo?