Gospel blong Luk i talem se Jisas i openem skrol blong buk blong Aesea, i ridimaot, mo i rolemap bakegen. Jon tu i tokbaot wan skrol. Long en blong Gospel blong hem, hem i talem se hem i no save raetemdaon long skrol blong hem, evri merikel we Jisas i mekem.—Luk 4:16-20; Jon 20:30; 21:25. *

?Olsem wanem oli wokem ol skrol ya? Oli yusum skin blong buluk mo skin blong wan longfala gras blong reva. Oli joenem ol pis wetem glu, blong mekem i kam longfala olsem rolpepa. Nao oli rolem long wan stik, we ol raeting blong hem i stap insaed. Taem man i wantem ridim, hem i yusum wan han blong hem blong openem, mo i yusum narafala han blong rolem, gogo i faenem stret ples we hem i wantem. Oltaem oli raet long ol kolom.

Wan buk (The Anchor Bible Dictionary) i talem se: “Skrol i mas longfala olsem 10 meta blong raetemdaon wan ful buk long hem. Be wan samting we i gud, se taem oli rolemap, hem i kam smol nomo.” Oli ting se maet longfala blong skrol blong Gospel blong Luk, i bitim naen meta. Samtaem oli katem en blong skrol antap mo daon, oli rabem wetem ston blong volkeno gogo i kam smut, mo oli pentem.

Taem neson blong Isrel i gat ol pris, wan man nomo i mekem wok blong hae pris. Mo man ya i mekem wok ya long ful laef blong hem. (Namba 35:25) Eron i fas man blong kam hae pris. Afta, wok ya i pas i go long fasbon boe blong hae pris. (Eksodas 29:9) Plante man long laen blong Eron oli mekem wok blong pris, be smol nomo oli kasem wok blong hae pris.

Taem ol narafala kantri oli rul long ol man Isrel, ol lida blong olgeta oli putumap mo tekemaot ol hae pris blong olgeta olsem oli wantem. Be i luk olsem se klosap oltaem oli jusum ol niuwan long sam famle long laen blong Eron. Tok ya “jif pris” i minim ol pris we oli impoten moa. Maet oli hed blong ol 24 grup blong ol pris, no maet oli ol impoten man long famle blong hae pris. Maet oli olsem man ya Anas, we i mekem wok blong hae pris fastaem, be afta, oli tekemaot hem long wok ya.—1 Kronikel 24:1-19; Matiu 2:4; Mak 8:31; Ol Wok 4:6.