RUL BLONG BAEBOL: “I nogud yufala i stap tingting tumas from laef blong yufala.”—Matiu 6:25.

?Wanem mining blong tok ya? Jisas i talem ol tok ya taem hem i tijim ol man antap long hil. Wan diksonari blong Baebol i talem se Grik tok ya we i minim “tingting tumas,” i save minim “samting we man i mekem taem i pua, i hanggri, mo i kasem sam narafala trabol bakegen long laef blong hem.” Plante man oli tingting tumas long samting we i save hapen long fiuja. I stret nomo blong tingbaot ol samting we yumi nidim blong laef mo ol man we yumi lavem olgeta. (Filipae 2:20) Be taem Jisas i talem long ol man blong hem se, “i nogud yufala i stap tingting tumas,” hem i stap talem se oli no mas wari bitim mak. Sipos yumi wari tumas long samting we i save hapen tumora, bambae yumi no glad.—Matiu 6:31, 34.

?Advaes ya i stret yet? I waes blong folem advaes ya blong Jisas. ?From wanem? Sam buk oli talem se taem man i tingting tumas, ol string long bodi blong hem oli taet tumas, nao hem “i save kasem ol sik, olsem soa insaed long bel, sik blong hat, mo sotwin.”

Jisas i talem wan gudfala risen blong no tingting tumas: I blong nating nomo. Hem i talem se: “?Yufala i ting se taem man i stap tingting tumas from laef blong hem we i sotfala nomo, bambae i save mekem laef blong hem i kam longfala moa long fasin ya? !Nogat!” (Matiu 6:27) Taem yumi wari tumas, yumi no mekem se laef blong yumi i kam longfala moa no i kam gud moa. Mo tu, plante taem, ol samting i no kamtru olsem yumi tingbaot. Wan man we i stadi long bisnes ya, i talem se: “Man we i wari long ol nogud samting we i save hapen long fiuja, i westem paoa blong hem, mo plante taem samting we hem i tingbaot i no kamtru.”

?Olsem wanem blong blokem wari? Fas samting, yumi trastem God. God i stap givim kakae long ol pijin mo i stap flasem gud ol flaoa. Taswe, bambae hem i lukaot gud long ol man we oli mekem wosip long hem, mo bambae i givim samting we oli nidim blong laef. (Matiu 6:25, 26, 28-30) Seken samting, yumi tingbaot tede nomo. Jisas i talem se: “I nogud yufala i stap tingting tumas from ol samting blong tumora. Ol bisnes blong tumora i blong tumora.” ?Yu yu agri se “trabol blong wan dei, hem i naf finis blong dei ya”?—Matiu 6:34.

Sipos yumi folem advaes blong Jisas, yumi save blokem plante sik. Mo tu, yumi gat pis long tingting, wan pis we Baebol i talem se God i givim long yumi.—Filipae 4:6, 7.