Olsem yumi tokbaot finis long stori blong Kresus, pris blong Delfi i giaman long hem, nao hem i lusum faet agensem king blong Pesia. Be Baebol i talem wan nambawan profet tok long saed blong Sirus, king blong Pesia, we evri smosmol haf blong hem i kamtru.

Samwe long 200 yia bifo we Sirus i bon, profet Aesea i talemaot nem blong hem mo olsem wanem bambae hem i winim strongfala taon ya Babilon.

Aesea 44:24, 27, 28: “[Jehova] i talem se, . . . ‘long tok blong mi nomo, mi mi save mekem dip solwota i kam drae olgeta. Mi save talem long [King Sirus] se, “Yu nao bambae yu rul long nem blong mi. Yu bambae yu mekem olsem we mi mi wantem. Yu bambae yu talemaot se olgeta oli mas stanemap taon ya Jerusalem bakegen, mo oli mas wokem fandesen blong haos blong mi bakegen.”’”

Wan man blong histri, Herodotus blong Gris, i talem se ol ami blong Sirus oli jenisim rod blong Yufretes Reva we i pastru long Babilon. Hemia i mekem se ol ami blong hem oli save krosem reva ya. Afta we oli winim taon ya, Sirus i letem ol man Jiu oli go fri blong bildim bakegen Jerusalem, we ol ami oli spolem 70 yia bifo.

Aesea 45:1: “[Jehova] i jusumaot King Sirus finis, blong hem i kam wan hae king. Hem i putumap king ya, blong hem i go mekem faet, gogo i winim ol narafala kantri, mo i sanem hem, blong i go tekemaot paoa blong ol narafala king, mo blong i openem ol doa blong bigfala stonwol blong ol taon, blong hem i save go insaed.”

Ol ami blong Pesia oli gotru long tu bigfala doa blong stonwol, we ol man Babilon oli foget blong satem. Sipos oli bin save plan blong Sirus, bambae oli satem ol doa ya long saed blong reva. Be oli no mekem olsem, taswe i isi nomo blong ol ami oli kam insaed mo winim taon ya.

I gat plante narafala profet tok blong Baebol tu we oli kamtru. a Ol profet tok ya oli no olsem ol tok blong ol man blong talemaot fiuja, we plante taem i kamaot long ol giaman god blong olgeta. Ol profet tok blong Baebol oli kamaot long Jehova, we i talem se: “Long stat blong olgeta samting, mi mi talemaot fastaem ol samting we biaen oli hapen. Bifo finis, mi mi talemaot ol samting we biaen oli kamtru.”—Aesea 46:10.

 Tru God ya Jehova, hem nomo i save talem ol tok olsem. Nem blong hem i min se “Hem i Mekem i Kamaot.” Nem ya i soemaot se hem i save fiuja, mo hem i naf blong mekem ol samting i kamtru olsem we hem i wantem. Mo nem ya i wan promes se bambae hem i mekem olgeta samting i kamtru, olsem we hem i talem.

?Yu yu wantem save sam profet tok blong Baebol, long saed blong taem blong yumi? Samwe long 2,000 yia bifo, Baebol i talem se “long ol las dei, laef bambae i strong tumas mo bambae i had blong winim ol trabol.” ?Ol las dei blong wanem? I no ol las dei blong wol mo ol man, be ol las dei blong trabol, hadtaem, mo ol samting we oli mekem man i safa plante taosen yia finis. Bambae yumi tokbaot sam long ol profet tok ya blong “ol las dei.”

2 Timoti 3:1-5: ‘Long ol las dei, bambae ol man oli tingbaot olgeta nomo, oli laekem mane tumas, oli tok flas, tingting blong olgeta i go antap tumas, oli tok nogud long ol narafala, oli no obei long papa mo mama, oli no save talem tangkiu, oli no holemstrong long ol narafala, oli no gat sore, oli no wantem lesin, oli spolem nem blong narafala, oli no save bos long tingting blong olgeta, oli wael olgeta, oli no laekem ol gudfala fasin, oli putum ol fren blong olgeta long han blong ol enemi, oli stronghed, oli flas, oli laekem moa ol samting we oli save harem gud long hem i bitim we oli lavem God. Long fes blong ol man, bambae oli mekem olsem se oli ona long God, be oli no wantem paoa blong hem long laef blong olgeta.’

?Yu ting se ol fasin ya oli stap kam antap tede? ?Yu luksave se fulap man oli tingbaot olgeta nomo, oli laekem mane tumas, mo oli flas? ?Yu luk se fasin blong ol man i strong tumas mo oli no wantem lesin long narafala? Ating yu luk se fulap pikinini oli no moa obei long papa mo mama blong olgeta, mo ol man oli laekem moa ol samting we oli save harem gud long hem, i bitim we oli lavem God. Mo tu, evri dei, fasin blong ol man i stap kam mowas.

Matiu 24:6, 7: “Bambae yufala i harem se i gat faet mo yufala i harem nius blong ol faet. . . . Bambae ol kantri oli faet agensem ol narafala kantri, mo ol kingdom oli faet agensem ol narafala kingdom.”

Samfala oli talem se stat long 1914, bitim 100 milian man oli ded long ol faet. Namba ya i bigwan moa i bitim namba blong ol man long sam kantri. Traem tingbaot olsem wanem ol man ya oli safa, oli sore mo oli krae. ?Be ol kantri tede oli lanem samting from ol mastik ya, mo oli lego faet? Nogat.

Matiu 24:7: “Bambae kakae i sot.”

Wan grup we i wok blong givim kakae long ol man long wol, i talem se: “Nating se i gat naf kakae blong evriwan long wol, be 815 milian man, hemia 11 pesen blong ol man, oli go slip evri naet we oli hanggri nomo. Mo tu, bitim 33 pesen blong ol man oli no kakae gud.” Wan narafala grup i talem se, samwe long 3 milian pikinini oli ded evri yia from we oli hanggri.

Luk 21:11: “Bambae graon i seksek bigwan.”

Evri yia, graon i seksek samwe long 50,000 taem. Klosap 100 taem evri yia, graon i seksek bigwan we i spolem plante haos, mo wan taem evri yia, i bigwan moa. Samfala i talem se, stat long yia 1975 kasem 2000, samwe long 471,000 man oli ded taem graon i seksek.

Matiu 24:14: “Bambae oli talemaot gud nius ya blong Kingdom long olgeta ples long wol, blong oli witnes long olgeta neson, nao biaen en bambae i kam.”

Bitim eit milian Witnes blong Jehova oli stap talemaot gud nius blong Kingdom blong God, long samwe 240 kantri long wol. Oli mekem wok ya long ol bigbigfala taon, ol vilej, antap long ol hil, mo long dakbus. Profet tok i talem se taem oli finisim wok ya olsem God i wantem, “en bambae i kam.” Hemia i min se en blong rul blong ol man. Wan narafala rul bambae i tekem ples blong hem, hemia rul blong Kingdom blong God. ?Wanem ol promes we bambae oli kamtru long taem ya? Plis ridim nekis pej.