OL MAN

Samting We Baebol i Talem: God “i no mekem [wol ya] blong i stap nating nomo, be i wokem blong man i stap long hem.”—AESEA 45:18.

WOL

Samting We Baebol i Talem: “Wan jeneresen i go, mo wan narafala jeneresen i kam, be wol i stap blong olwe.”—PRIJA 1:4.

?I MINIM WANEM?: Baebol i talem se wol bambae i neva lus, mo oltaem bambae i gat man i laef long hem. ?So i minim wanem se wol bambae i lus?

TINGBAOT: Baebol i komperem en blong wol wetem samting we i hapen long taem blong Noa. Long taem ya, wol i “fulap long raf fasin.” (Jenesis 6:13) Be Noa i wan stret man. Taswe God i sevem Noa mo famle blong hem, be hem i distroem ol rabis man long bigfala wota we i ron. Folem samting we i hapen long taem ya, Baebol i talem se: “Oli spolem wol ya we i stap bifo, long wota ya we i ron bigwan.” (2 Pita 3:6) Hemia en blong wol long taem ya. ?Be wanem nao i lus? I no wol, be ol rabis man long wol ya. So taem Baebol i tokbaot en blong wol, hem i no minim se wol ya bambae i lus. Be hem i min se ol rabis man mo ol samting we oli stap mekem bambae oli lus.

OL PROBLEM MO NOGUD FASIN

Samting We Baebol i Talem: “I no longtaem, ol man nogud bambae oli lus. Bambae yu lukluk i go long ples we oli stap long hem, be bambae oli no moa stap. Be ol man we oli gat tingting daon bambae oli tekem wol ya i blong olgeta, mo bambae oli glad tumas from oli gat pis we i bigwan tumas.” —OL SAM 37:10, 11.

?I MINIM WANEM?: Bigfala wota we i ron long taem blong Noa, i no tekemaot fulwan nogud fasin. Afta long taem ya, ol rabis man oli stat bakegen blong spolem ol man. Be i no longtaem, God bambae i finisim ol nogud fasin. Olsem man blong raetem sam i talem: “Ol man nogud bambae oli lus.” God bambae i yusum Kingdom blong hem, hemia wan gavman long heven we i rul long olgeta man we oli obei long God, blong finisim ol nogud fasin.

TINGBAOT: ?Ol man we oli stap rul long wol ya bambae oli sapotem Kingdom blong God? Baebol i talem se nogat. Bambae oli agensem Kingdom blong God. (Ol Sam 2:2) ?Wanem bambae i kamaot from? Kingdom blong God bambae i tekem ples blong olgeta gavman blong man, mo “hem nomo bambae i stanap olwe.” (Daniel 2:44) ?Be yumi nidim wanem, mo from wanem?

Samting We Baebol i Talem: “Man we i stap wokbaot, hem tu i no naf blong lidim step blong hem.”—JEREMAEA 10:23.

?I MINIM WANEM?: God i no krietem man blong oli rul long olgeta bakegen. Oli no naf blong rulum ol man mo stretem ol problem blong olgeta.

TINGBAOT: Buk ya Britannica Academic i talem se ol gavman oli no naf blong stretem ol problem olsem “fasin pua, hanggri, sik, naturol disasta, mo faet o ol narafala trabol olsem.” Mo i gohed se: “Samfala . . . oli bilif se sipos i gat wan gavman nomo long fulwol, hemia bambae i stretem olgeta trabol long fulwol.” Nating se i olsem, sipos olgeta gavman oli joen wanples blong rulum wol, bambae oli no naf yet blong stretem olgeta trabol from we oli sinman. Kingdom blong God, hemia nomo gavman ya we i gat paoa blong stretem olgeta trabol long fulwol blong olwe.

Taswe folem Baebol, en blong wol o sistem blong wol naoia, hem i no wan samting we ol gudfala man oli mas fraet from. !Be i wan gudfala samting we yumi stap wet long hem blong i kamtru, from we God bambae i jenisim olfala wol ya i kam wan niufala wol!

?Olgeta samting ya bambae oli hapen wetaem? Nekis atikol bambae i eksplenem ansa blong Baebol long saed ya.