Mi gruap long Puerto Limón, wan taon long Is blong Kosta Rika. Mi namba 7 long ol 8 pikinini long famle. Papa blong mi i ded taem mi gat 8 yia, mo mama nomo i lukaot long mifala.

Mi laekem blong plei besbol stat taem mi smol, mo taem mi yangfala mi joenem wan tim. Taem mi gat 20 yia, wan tija blong besbol i askem mi blong go long Nikaragwa mo plei long wan tim we bambae oli pem mi. Be from we mama blong mi i sik, mi mas lukaot long hem, ale mi kanselem plan ya. Biaen wan narafala tija blong besbol i askem blong mi kam wan memba blong tim blong Kosta Rika. Long taem ya mi agri, mo mi stat plei long yia 1949 kasem 1952, mo plante taem mi go plei long Kuba, Meksiko, mo Nikaragwa. Mi plei olsem wan besman, mo long 17 defren gem we mi plei long hem, mi no mestem balong nating. !Mi laekem blong harem ol man oli singaot nem blong mi!

Mi sore se mi mekem sam samting we i no stret. Nating se mi gat wan gelfren, be mi stap tekem ol narafala woman, mo mi stap dring bitim mak. !Wan dei mi drong tumas, mo taem mi wekap long nekis dei mi no save olsem wanem mi gobak long haos! Mo tu, mi laekem blong plei laki. Eksampol mi plei domino blong mi save pem lotri.

Long taem ya, mama i kam wan Witnes blong Jehova. Hem i traem tokbaot trutok long mi, be hem i no winim mi from we mi laekem spot tumas. !Sipos mi tren go kasem taem blong kakae, mi no harem se mi hanggri! Tingting blong mi i fas long gem nomo. !Mi laekem besbol tumas!

Be taem mi gat 29 yia, mi kasem wan bigfala kil long wan gem. Afta we mi kamgud bakegen, mi no moa plei blong kasem mane. Be, mi gohed yet blong trenem wan tim klosap long ples blong mi.

Long 1957, mi kasem wan invetesen blong go long wan asembli blong ol Witnes blong Jehova, we i stap long wan stadium we mi bin plei besbol long hem. Long taem ya, mi luk se fasin blong ol Witnes i defren long fasin blong ol man we oli kam wajem besbol. Samting ya, i pulum mi blong stadi Baebol mo go long ol miting blong ol Witnes blong Jehova.

Mi mi sapraes tumas long ol tijing we mi lanem. Eksampol, Jisas i talem se long ol lasdei, ol man blong hem bambae oli talemaot gud nius blong Kingdom long olgeta ples long wol. (Matiu 24:14) Mi lanem tu se ol tru Kristin oli no kasem mane from wok we oli mekem. Jisas i talem se: “Yufala i kasem fri nomo, mo yufala i mas givim fri nomo.”—Matiu 10:8.

Taem mi stadi Baebol, mi skelem samting we Baebol i talem wetem samting we mi luk long ol Witnes. Mi laekem wok we oli mekem blong talemaot gud nius blong Kingdom long olgeta ples long wol, mo mi luk gudfala fasin we Jisas i talem se ol Kristin oli mas mekem. So mi wantem kam wan Witnes taem mi ridim Mak 10:21 mo mi luk tok blong Jisas we i se, “Yu kam, yu biaen long mi.”

I tekem taem blong mi save folem ol samting we mi lanem. Eksampol, blong plante yia mi yusum sem “laki” namba blong mi evri wik long wan ples blong plei lotri we plante man oli save. Be mi lanem long Baebol se God i no laekem ol man we oli wosipim “god blong Laki,” mo ol man blong griri. (Aesea 65:11 NW; Kolosi 3:5) Taswe mi mekem desisen blong no moa plei. !Faswan Sande we mi stop blong plei, “laki” namba blong mi i win! Plante man oli jikim mi from we mi no plei long wik ya, mo oli pulum mi blong go plei bakegen, be mi no wantem. Mi neva gobak blong plei.

Long dei we mi baptaes long wan asembli blong ol Witnes blong Jehova, wan samting i hapen we i traem “niufala fasin” blong laef blong mi. (Efesas 4:24) Long aftenun, taem mi gobak long hotel, gelfren blong mi blong bifo i stap wet afsaed long doa blong rum blong mi. Hem i se: “!Yu kam Sammy, yumi go harem gud!” Be wantaem nomo mi talem “!No!” Mi talem long hem se naoia mi stap folem ol fasin we Baebol i tokbaot. (1 Korin 6:18) Hem i se, “?Wanem?” Mo hem i tok nogud long ol tijing blong Baebol long saed blong fasin blong slip tugeta, mo hem i wantem se mitufala i gohed blong fren bakegen. Be mi aot i go long rum blong mi mo lokem doa. Tede, mi glad blong talem se taem mi kam wan Witnes long 1958, mi holemstrong long ol jenis we mi mekem long laef blong mi.

!Mi harem gud long plante blesing we mi kasem from we mi folem ol rul blong Baebol! Sam long ol blesing ya, hemia se mi gat plante gudfala fren, laef blong mi i gat mining, mo mi kasem trufala glad.

Mi stap plei besbol yet, be i no blong win. Taem mi stap plei besbol, mi kasem haenem mo mane, be ol samting ya oli no stap longtaem. Be fasin fren blong mi wetem God, mo ol brata mo sista bambae i stap blong olwe. Baebol i talem se: “Wol ya wetem evri samting blong hem we ol man oli wantem tumas, oli stap lus. Be man we i mekem samting we God i wantem, hem i no save lus samtaem.” (1 Jon 2:17) !Naoia mi laekem tumas Jehova mo ol man blong hem!