SARA i stanap long medel blong rum mo i stap lukluk raon. Yu traem tingbaot wan woman Medel Is we i gat wan naesfala ae. Be, i luk olsem se hem i harem nogud. Sipos i olsem, i no had blong kasemsave from wanem. Sera mo gudfala man blong hem Ebraham, i spenem plante taem tugeta long haos ya, mo tufala i gat plante samting. *

Tufala i stap long Uru, wan rij taon we i gat ol bisnes man mo plante man we oli gat gud han blong wokem ol samting. Taswe tufala i mas gat plante samting. Haos blong tufala i no wan ples blong putum ol samting nomo, be i wan haos we hem mo man blong hem tufala i gat plante gudtaem mo sam hadtaem long hem. Long haos ya, tufala i prea plante long God blong tufala, Jehova. Taswe, Sera i mas gat wan gud risen blong laekem haos ya.

Be, Sera i glad nomo blong lego haos ya. Nating se hem i gat samwe long 60 yia, hem i mas go long wan ples we hem i no save, mo laef blong hem i stap long denja. Taem hem i go, hem i no gat janis blong kambak. ?Wanem i mekem se laef blong hem i jenis olsem? ?Mo tede yumi save lanem wanem from bilif blong hem?

I luk olsem se Sera i gruap long Uru. Tede, i no moa gat wan samting i stap long taon ya. Be long taem blong Sera, ol sip blong ol bisnes man we oli stap longwe oli pastru long Yufretes Reva blong kamtru long taon ya mo salem ol samting blong olgeta. I gat plante man oli wokbaot long taon, i gat plante sip long wof, mo ol man oli salem plante kakae long ol smosmol maket. Sera i gruap long taon ya mo i savegud ol man we oli stap long hem. Mo ol man tu oli savegud hem from we hem i naes tumas. Mo tu, hem i gat wan bigfala famle long ples ya.

Baebol i tokbaot se Sera i gat strong bilif, be hem i no bilif long mun god we ol man Uru oli wokem pija blong hem mo oli putum long taon ya. Defren olgeta, Sera i wosipim trufala God ya, Jehova. Baebol i no talem olsem wanem Sera i gat wan strong bilif. Mo bifo, papa blong hem i no wosipim Jehova, be i wosipim ol aedol. Sera i maredem Ebraham, mo Ebraham i olfala moa long Sera. * (Jenesis 17:17) Biaen ol man oli singaot Ebraham se, “papa blong olgeta we oli gat bilif.” (Rom 4:11) Tufala i gat wan gudfala mared from we tufala i respektem tufala, tufala i toktokgud tugeta, mo tufala i rere oltaem blong givhan long tufala taem i gat trabol. Be samting we i mekem se tufala i joen gud moa, hemia lav we tufala i gat long God.

Sera i lavem tumas hasban blong hem, mo tufala i stap wetem ol famle blong tufala long Uru. Be i gat wan problem. Baebol i talem se Sera i “no save  karem pikinini.” (Jenesis 11:30) Sera i harem nogud, from we long kalja blong olgeta, i wan nogud samting taem wan woman i no save bonem pikinini. Be Sera i holemstrong long God mo long hasban blong hem. Mo Lot, we i boe blong wan brata blong tufala we i ded finis, i kam olsem boe blong tufala. Tufala i glad blong stap wetem famle blong tufala. Be wan dei, evri samting i jenis.

Ebraham i glad tumas blong kam luk Sera. Hem i no save bilivim samting we i jes hapen. !God we tufala i stap wosipim, i sanem wan enjel i kam toktok wetem hem! Yu traem tingbaot Sera long taem ya, hem i lukluk hasban blong hem mo i askem se: “?Hem i talem wanem long yu? !Plis yu talem!” Maet Ebraham i sidaon fastaem mo i tingbaot olsem wanem blong talemaot nius ya. Nao hem i talemaot samting we Jehova i talem, i se: “Yu aot long kantri blong yu mo ol famle blong yu, mo yu go long kantri we bambae mi soemaot long yu.” (Ol Wok 7:2, 3) Long taem ya, tufala i tingting plante long samting we Jehova i talem. !Tufala i luksave se tufala i mas lego gudfala laef blong tufala mo go stap long wan narafala ples! ?Wanem tingting blong Sera? Ebraham i wantem tumas blong harem tingting blong hem. ?Olsem wanem? ?Bambae Sera i glad blong sapotem hem long bigfala jenis ya?

Maet yumi harem se yumi no save mekem wan desisen olsem Sera. Maet yumi gat tingting se, ‘!God i neva askem mi, o waef o hasban blong mi, blong aot i go long wan narafala ples!’ Nating se i olsem, yumi evriwan i mas mekem sam impoten desisen long laef. Yumi laef long wan wol we i pulum yumi blong mekem samting we yumi nomo i wantem, mo blong wantem gat plante samting. Be Baebol i talem wan narafala samting we yumi mas mekem, hemia blong putum Kingdom blong Jehova oltaem long fasples long laef blong yumi. (Matiu 6:33) Taem yumi tingbaot samting we Sera i mekem, i gud yumi tingbaot kwestin ya se, ‘?bambae mi mi mekem wanem desisen long laef blong mi?’

I wan bigfala wok we Sera i mekem blong fulumap ol samting blong hem, from we hem i mas jusum gud samting we bambae hem karem mo samting we hem i mas lego. Hem i no mas karem ol samting we i hevi tumas blong ol dongki mo ol kamel oli karem, mo ol samting we hem i no nidim. Maet ol samting we oli no save karem, hem i givimaot, o i salemaot. Mo tu, hem i mas lego taon ya we i gat ol smosmol maket long hem we oli salem ol wit, mit, frut, klos, mo ol narafala samting.

Maet i had tu blong Sera i lego haos blong hem. Ol man blong digim graon, oli faenemaot se ol man we oli stap long Uru bifo, oli gat ol gudfala haos. Sipos Sera i gat wan haos olsem, hem i mas harem nogud bigwan blong aot long hem. Sam long ol haos ya oli gat bitim 12 rum, mo i gat ol springwota oli ron  insaed long olgeta. Mo tu, i gat ol smosmol haos we oli gat ol strong ruf, strong wol, mo ol strong doa. Long ol taem bifo, ol haos olsem oli save blokem ol stilman, ol laeon, ol leped, ol bea, mo ol wulf. ?Olsem wanem? ?Wan haos tapolen i strong blong blokem ol samting ya?

?Mo olsem wanem long ol famle blong Sera? ?Hem i mas aot long hu olgeta? God i talem se “yu aot long kantri blong yu mo ol famle blong yu.” Maet i had long Sera blong aot long ol famle blong hem. Maet hem i gat ol brata, ol sista mo ol pikinini blong olgeta, ol anti mo ol angkel we hem i lavem olgeta tumas. Mo sipos hem i aot long olgeta, maet bambae hem i no save luk olgeta bakegen. Be Sera i gat strong tingting blong aot long kantri blong hem.

Nating se i had long Sera, be hem i rere nomo blong aot. Tera i folem Ebraham mo Sera, mo long taem ya hem i gat samwe long 200 yia. (Jenesis 11:31) Sera i mas givhan tu blong kea long hem from hem i olfala. Lot tu i folem olgeta mo oli “aot long Koldia.”—Ol Wok 7:4.

Oli aot long Uru mo oli folem Yufretes Reva i go kasem Haran, we i stap samwe long 960 kilometa long notwes blong Uru. Taem oli kasem Haran, oli stap smoltaem long ples ya, mo tu maet Tera i sik tumas nao oli no save aot i go long wan narafala ples. Oli stap long ples ya gogo kasem we Tera i ded, mo long taem ya hem i gat 205 yia. Biaen, Jehova i toktok bakegen long Ebraham mo i talem long hem blong hem i aot long ples ya, mo i go long kantri we Jehova bambae i givim long hem. Jehova i talem wan nambawan promes long hem se: “Bambae mi mi mekem we yu yu gat plante pikinini.” (Jenesis 12:2-4) Be taem oli aot long Haran, Ebraham i gat 75 yia mo Sera i gat 65 yia, mo long taem ya tufala i no gat pikinini. ?Olsem wanem Ebraham i save gat plante pikinini? ?Bambae hem i maredem wan narafala woman? Long taem ya, ol man oli save maredem plante woman, mo maet Sera i stap tingbaot samting ya mo i wari long mared blong tufala.

Taem oli aot long Haran, oli tekem sam man i go wetem olgeta. Baebol i talem se famle blong Ebraham i aot wetem plante samting, mo wetem “olgeta slef” blong tufala long Haran. (Jenesis 12:5) Ebraham mo Sera i tokbaot bilif blong tufala long ol slef ya. Sam olfala buk blong ol man Jiu i tokbaot vas ya i se, ol man ya oli blong ol narafala kantri be oli joen wetem Ebraham mo Sera blong wosipim Jehova. Maet bilif blong Sera i kam strong taem hem i tokbaot God blong hem mo hop blong hem long ol narafala. I gud yumi tingbaot blong folem fasin blong Sera, from we naoia i gat plante samting we i save spolem bilif mo hop blong yumi. Taem yu lanem wan gudfala samting long Baebol, i gud we yu tokbaot wetem ol narafala.

Maet long Nisan 14, long yia 1943 bifo Kraes, oli krosem Yufretes Reva mo wokbaot i go long saot long kantri we Jehova i promes blong givim long olgeta. (Eksodas 12:40, 41) Yu traem tingbaot we Sera i stap lukluk raon long hem mo i sapraes blong luk naesfala ples ya, ol gudfala samting we oli stap, mo hem i harem gud long weta blong ples ya. Jehova i kamtru bakegen long Ebraham, klosap long ples ya More, we i stap klosap long Sekem, mo i talem long hem se: “Hemia nao graon ya we mi bambae mi givim long olgeta we bambae oli kamaot biaen long yu.” Tok ya, “olgeta we bambae oli kamaot biaen long yu,” i mekem Ebraham i tingbaot bakegen samting we Jehova i talem long garen blong Iden, se wan pikinini bambae i kamaot long laen blong woman mo i spolem Setan. Jehova i talemaot finis long Ebraham se olgeta we bambae oli kamaot biaen long hem bambae oli karem blesing i go long ol man blong olgeta ples long wol.—Jenesis 3:15; 12:2, 3, 6, 7.

Be famle blong Ebraham i kasem wan bigfala trabol long Kenan. Oli no moa gat kakae, nao Ebraham i lidim olgeta oli aot i go long saot long Ijip. Be hem i luksave se bambae i gat wan trabol i kamaot. So hem i talem long Sera se: “!Yu luk! Yu yu naes tumas, mo sipos ol man Ijip oli luk yu, bambae oli talem se, ‘Woman ya i woman blong man ya,’ nao bambae oli kilim mi mi ded, be oli livim yu yu stap laef. I gud yu talem long olgeta se yu yu sista blong mi, nao bambae oli letem mi mi stap laef, mo bambae oli stap mekem i gud long mi from tok ya.” (Jenesis 12:10-13) ?From wanem Ebraham i talem long Sera blong i mekem olsem?

 Sam man oli talem se Ebraham i wan man blong giaman, o wan man blong fraet, be tingting ya i no tru. Sera i wan sista blong hem. Samting we Ebraham i mekem, i blong sevem laef blong hem. Ebraham mo Sera i luksave se i moa impoten blong lukaotgud long promes we God i talem long tufala. Taswe, Ebraham i mas lukaotgud long laef blong hem. Mo tu, ol man blong digim graon oli faenemaot se ol man Ijip oli stap kilim ded ol man mo tekemaot ol woman blong olgeta. So Ebraham i mekem wan waes desisen, mo Sera i mekem samting we hem i talem.

Samting we i hapen biaen i soemaot se Ebraham i mekem wan waes desisen. Sam hae man blong Fero oli luk se Sera i naes tumas, nao oli talemaot long Fero mo hem i talem blong oli tekem woman ya i go long hem. Long taem ya, maet Ebraham i wari mo Sera tu i fraet. Be i luk olsem se oli lukaotgud long Sera mo oli no spolem hem. Maet Fero i mekem olsem blong pulum Sera blong i laekem hem mo ol gudfala samting we hem i gat. Mo biaen maet Fero i askem long “brata” blong hem blong i maredem woman ya.—Jenesis 12:14-16.

Yu traem tingbaot Sera, hem i stanap insaed long haos blong Fero, mo i stap lukluk i goraon long ol ples long Ijip. ?Yu ting se hem i harem olsem wanem blong stap long wan haos olsem bakegen we i gat ruf antap, i gat ol wol i goraon, mo ol gudfala kakae? ?Hem i wantem tumas blong stap long wan naesfala ples olsem we i gud moa bitim Uru? !Yu traem tingbaot se Setan bambae i glad sipos Sera i lego Ebraham mo i go stap wetem Fero! Be Sera i no mekem olsem. Hem i holemstrong long man blong hem, long mared blong hem, mo long God blong hem. Tede ol man oli no moa soemaot ol gudfala fasin. Taswe i gud tumas sipos olgeta we oli mared, oli gat fasin ya blong holemstrong long man o woman blong olgeta. ?Yu yu save folem fasin blong Sera blong holemstrong long olgeta we yu lavem olgeta?

Jehova i protektem Sera taem hem i mekem Fero mo ol man blong hem oli sik. Taem Fero i faenemaot se Sera i waef blong Ebraham, hem i sanem hem i gobak long man blong hem, mo i talem se oli aot long Ijip. (Jenesis 12:17-20) !Ebraham i glad tumas blong karembak woman blong hem! Tingbaot se hem i bin talem long woman blong hem se: “!Yu luk! Yu yu naes tumas.” Be i gat wan samting we i mekem se Ebraham i laekem Sera tumas. Sera i gat ol gudfala fasin we Jehova i laekem. (1 Pita 3:1-5) Hemia nao gudfala fasin we yumi evriwan yumi mas gat. Sipos yumi gohed blong mekem ol samting we Jehova i wantem, mo no letem samting blong wol i pulum yumi, mo yumi tokbaot Jehova long ol man, mo yumi holemstrong long fasin blong Jehova taem yumi kasem trabol, hemia i soemaot se yumi stap folem fasin blong bilif blong Sera.