Traem tingbaot tu twin we tufala i sem mak stret. Tufala i gat wan spesel filing we i joenem tufala. Nancy Segal, we hem tu i wan twin, mo i daerekta blong wan grup we i stadi long ol twin, i talem se, plante taem “wan long tufala twin i save gud samting we narawan i wantem talem. I no nid blong narawan i eksplenem.” Wan woman we hem i wan twin, i tokbaot olsem wanem hem mo sista blong hem tufala i sem mak, i se: “Mitufala i save gud tingting blong mitufala long evri samting.”

?From wanem tufala twin i gat spesel fasin ya? Ol man we oli stadi long bisnes ya oli talem se, ol samting we i hapen long laef blong tufala mo fasin blong papa mo mama blong tufala, oli impoten. Be samting we i moa impoten, hemia se ol gene * long bodi blong tufala oli klosap sem mak.

TINGBAOT: God ya we i wokem yu i save gud yu, i bitim we ol narafala man oli save yu. Deved i raetem wan Sam we i talem se: ‘Taem mi mi stap long bel blong mama blong mi, long ples we i haed we i haed, nao ol bun blong mi oli stap joen gud, be yu yu luk mi. Taem mi mi no bon yet, be yu yu luk mi finis.’ (Ol Sam 139:13, 15, 16) God nomo i save gud ol gene long bodi blong yumi, mo tu, hem i save ol samting we oli hapen long laef blong yumi blong jenisim fasin blong yumi. From samting ya, yumi sua se hem i save gud evri samting long saed blong yumi.

Deved i prea se: “Hae God. Yu yu lukluk gud long mi finis, mo yu savegud mi. Yu yu save evri samting we mi stap mekem. Yu stap longwe, be yu save olgeta tingting blong mi. Nating we mi no tok yet, be yu yu save finis ol samting ya we bambae mi talem.” (Ol Sam 139:1, 2, 4) Jehova i save tu ol filing we oli haed long hat blong yumi. “Hem i save olgeta tingting blong yumi, mo olgeta samting we yumi wantem.” (1 Kronikel 28:9; 1 Samuel 16:6, 7) ?Ol vas ya oli soemaot wanem?

Maet i had blong talemaot ol tingting mo filing blong yumi long prea, be God i luk wanem we yumi mekem, mo hem i kasem save tu from wanem yumi mekem olsem. Mo tu, hem i luksave ol gudfala samting long hat blong yumi we yumi wantem mekem, nating se yumi no naf blong mekem. God nao i putum lav long yumi fastaem, taswe hem i glad blong luk we yumi wantem soemaot lav, mo hem i kasem save long ol tingting we oli pulum yumi blong mekem olsem.—1 Jon 4:7-10.

 Baebol i promes se:

• “Ae blong Jehova i stap lukluk ol stret man, mo sora blong hem i stap lesin long olgeta taem oli krae i go long hem.”—1 PITA 3:12.

• God i promes se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.”—OL SAM 32:8.

Yes, God i savegud ol trabol mo filing blong yumi, mo hemia i save givhan long yumi blong stanap strong. Traem tingbaot samting we i hapen long Ana, long Naejiria. Hem i se: “Mi kasem plante bigfala trabol, nao mi stap ting se i moa gud we mi ded nomo. Mi mi wan wido, mo mi stap lukaot long smol gel blong mi we i gat sik ya hydrocephalus (tumas wota long bren). Taem hem i go slip long hospital, mi tu mi faenemaot se mi gat kansa blong titi. Oli katem mi, mo oli givim strong meresin mo tritmen long mi. Mi harem nogud tumas blong slip long hospital long semtaem we gel blong mi tu i slip long hospital.”

?Wanem i givhan long Ana? Hem i se: “Oltaem mi tingbaot ol vas olsem Filipae 4:6, 7, we i talem se ‘pis blong God we i bigwan tumas i bitim olgeta save blong yumi, bambae i lukaot gud long hat mo tingting blong yumi.’ Evri taem we vas ya i kam long tingting blong mi, mi harem se Jehova i stap klosap long mi, mo hem i save gud mi bitim we mi save mi wan. Mo tu, ol brata mo sista long kongregesen oli leftemap tingting blong mi bigwan.

“Naoia laef blong mitufala i kamgud moa, nating se mi sik yet. Mitufala i lanem blong holemtaet gudfala tingting nomata wanem trabol we mitufala i fesem, from we Jehova i stap wetem mitufala. Jemes 5:11 i promes se: “Olgeta we oli stap stanap strong, yumi talem se oli glad. Mo yufala i harem finis stori blong Job we hem i stanap strong mo ol blesing we Jehova i givim long hem. Mo yufala i luk se Jehova i lavem man tumas [“kasem save long samting we i hapen,” futnot] mo i gat sore.” Jehova i save gud trabol blong Job, mo hem i save gud ol hadtaem blong yu tu.