?I gat man we i no wantem wan laef olsem? !Nogat! Baebol i talem se God i putum tingting ya long hat blong yumi. (Prija 3:11, NW) Mo Baebol i talem tu se “God hem i lav.” (1 Jon 4:8) ?Yu ting se God ya we i gat lav i save wokem yumi wetem tingting blong wantem laef olwe, be i no save mekem i kamtru?

I klia se yumi no wantem ded. Baebol i talem se ded i wan “enemi” blong yumi. (1 Korin 15:26) Samfala oli ded taem oli yang nomo, samfala oli laef kasem we oli olfala. Be i no gat wan long yumi we i save ronwe long ded. Plante man oli fraet long ded mo oli no wantem tingbaot. ?Olsem wanem? ?I gat wan taem we enemi ya bambae i lus? ?Samting ya i save hapen?

I no plan blong God we ol man oli ded. ?Yu yu sapraes long samting ya? Buk blong Jenesis i soemaot plan blong God se man bambae i laef olwe long wol. Jehova God i wokem wol ya wetem evri samting we man i nidim blong laef. Afta, hem i wokem fas man ya Adam, mo i putum hem long garen blong Iden. Nao “taem [God] i luk olgeta wok ya we hem i mekem, hem i luk we oli gud we i gud tumas.”—Jenesis 1:26, 31.

God i wokem Adam i stret gud, we hem i naf blong tekem fasin blong God. (Dutronome 32:4) Iv we i waef blong Adam, hem tu i stret gud long bodi mo tingting. Jehova i talem long tufala se:  ‘I gud yutufala i gat plante pikinini, blong oli save go stap long olgeta ples long wol. Nao bambae evri samting long wol ya oli stap aninit long han blong yufala. Mi mi putum yufala i bos long ol fis, ol pijin, mo ol narafala samting, i stat long olgeta we oli bigbigfala, go kasem olgeta we oli smosmol.’—Jenesis 1:28.

Bambae i tekem taem blong gat plante pikinini, mo blong oli go stap long olgeta ples long wol. Ol pikinini blong tufala oli mas gat pikinini bakegen, gogo wol ya i fulap, olsem God i wantem. (Aesea 45:18) ?Yu ting se Jehova bambae i talem long Adam mo Iv blong mekem olsem, sipos tufala i no save laef longtaem, mo tufala i no save luk ol smol abu blong tufala?

Mo tu, tingbaot wok ya blong lukaot long ol animol. Adam i mas putum nem blong olgeta. Hemia bambae i tekem taem. (Jenesis 2:19) Mo blong mekem olgeta oli stap aninit long han blong hem, hem i mas kasem save long olgeta, mo lanem olsem wanem blong lukaot gud long olgeta. Hemia tu bambae i tekem taem.

Taswe taem God i talem se tufala i mas gat plante pikinini blong fulumap wol mo lukaot gud long ol animol, hemia i soemaot se hem i wokem tufala blong tufala i laef longtaem. Mo i tru se laef blong Adam i longfala.

Baebol i soemaot se ol man bifo oli laef longtaem moa i bitim yumi tede. Long saed blong Adam, Baebol i talem se: “Taem hem i ded, hem i gat naen handred toti yia.” !Biaen, Baebol i talem nem blong sikis narafala man tu, we oli laef bitim 900 yia! Hemia Set, Enos, Kenan, Jared, mo Metusela, we oli laef bifo long Bigfala Wota, mo Noa we i gat 600 yia finis taem Bigfala Wota i ron mo i gohed blong laef afta. (Jenesis 5:5-27; 7:6; 9:29) ?From wanem oli laef longtaem olsem?

Ating ol man ya oli laef longtaem from we oli laef klosap long taem blong Adam mo Iv, we tufala i stret gud olgeta. ?Be olsem wanem bodi mo tingting we i stret gud i joen wetem longfala laef? ?Mo wanem rod blong winim ded? Blong faenem ansa blong tufala kwestin ya, yumi mas kasem save fastaem, ?from wanem yumi kam olfala mo yumi ded?