God i promes long profet Ebraham se wan long ol man we i kamaot biaen long hem, bambae i karem blesing i kam long “olgeta nesen long wol.” (Jenesis 22:18, NW) ?Hu ya man ya?

Klosap 2,000 yia bifo, God i givim paoa long Jisas we i kamaot long laen blong Ebraham, blong i mekem ol bigfala merikel. Ol merikel ya oli soem se Jisas nao bambae i mekem blesing i kasem olgeta nesen.—Galesia 3:14.

Ol merikel ya oli soemaot se God i jusum Jisas nao blong blesem ol man, mo God bambae i yusum hem blong blesem ol man blong olwe. Makem olsem wanem ol merikel blong Jisas oli soemaot sam long ol gudfala fasin blong hem.

Kaen—Jisas i hilim ol sikman.

Taem wan man we i gat leprosi i plis long Jisas blong i hilim hem, Jisas i tajem hem mo i se: “!Mi mi wantem!” Wantaem nomo, leprosi ya i lus.—Mak 1:40-42.

Glad blong givim samting—Jisas i fidim olgeta we oli hanggri.

Jisas i no wantem se ol man oli hanggri. Hem i mekem merikel tu taem blong fidim plante taosen man, hemia taem i mekem sam bred mo sam smol fis oli kam plante. (Matiu 14:17-21; 15:32-38) Afta we ol man oli kakae, evriwan oli fulapgud mo i gat plante kakae i stap yet.

Sore—Jisas i mekem dedman i laef bakegen.

Jisas “i sore tumas” long wan wido we i no gat man blong lukaot long hem, nao i mekem wan boe nomo we hem i gat, i laef bakegen.—Luk 7:12-15.