?Olsem wanem? ?Yumi rili save trastem se olgeta promes blong God bambae oli kamtru? Jisas i trastem fulwan se bae oli kamtru, mo ol tijing blong hem oli givhan long ol man blong oli bilif long samting ya. Traem tingbaot pijatok we hem i talem long Matiu 5:18, we i talem se: “Tru, mi talem long yufala, maet heven mo wol bambae oli lus samtaem, be bambae i no gat wan smol pis raeting no wan smol haf blong Loa ya i save lus gogo olgeta samting oli kamtru.”

Long lanwis Hibru, alfabet we i smol moa long ol narawan, hemia י (yod), we i faswan long ol fo leta blong tabu nem blong God, Jehova. * Antap long ol toktok mo ol wod long Loa blong God, ol tija blong Loa mo ol Farisi oli tinghae long ol wanwan “pis raeting” long Loa ya.

Jisas i stap talem se maet heven mo wol bae oli lus samtaem, be i no gat wan smol pis raeting blong Loa we i save lus gogo olgeta samting oli kamtru. Be Baebol i talem se prapa heven mo wol bae oli stap blong olwe. (Ol Sam 78:69) Taswe tok ya i soemaot se evri smosmol samting insaed long Loa bambae oli mas kamtru.

?Olsem wanem? ?Jehova God i kea long evri smosmol samting? Yes. Traem tingbaot: Loa i talem long ol man Isrel bifo se oli no mas brekem bun blong smol sipsip we oli kilim long lafet blong Pasova. (Eksodas 12:46) Maet hemia wan smol samting nomo. ?Be olgeta oli save from wanem oli no mas brekem bun blong smol sipsip ya? Maet nogat. Be Jehova God i save se hemia wan haf blong profet tok long saed blong Mesaea, se bambae i no gat wan bun blong hem i brok taem oli hangem hem long pos, blong kilim hem i ded.—Ol Sam 34:20; Jon 19:31-33, 36.

?Yumi lanem wanem long tok blong Jisas? Yumi lanem se yumi tu yumi save trastem fulwan olgeta promes blong Jehova God, se bambae oli kamtru. !Smol alfabet ya long lanwis Hibru i leftemap tingting blong yumi bigwan!