Baebol i tokbaot Golaeat se: “Longfala blong man ya, klosap i kasem tri meta.” (1 Samuel 17:4) Samfala oli talem se i no tru se Golaeat i longfala olsem, be yu traem tingbaot: Tede, i gat wan man we oli makem longfala blong hem se i bitim 2 meta haf. Sipos i olsem, ?yu no ting se long taem bifo i save gat wan man olsem Golaeat, we i longfala lelebet moa? Hem i laen blong Refaem, mo ol man ya oli ol bigbigfala man. Wan hanraet blong ol man Ijip long ol yia 1200 bifo Kraes, i tokbaot sam soldia blong Kenan se oli longfala olsem 2 meta haf, mo ol man oli fraet long olgeta. Taswe, i tru se i no gat plante man we oli longfala olsem Golaeat, be i gat samfala.

Sam man blong hae save oli traem talem se i no tru we King Deved i bin laef long taem bifo. Be naoia oli no moa save talem olsem, from we ol man oli faenem wan ston blong bifo, we i gat ol tok long hem se “haos blong Deved.” Mo tu, Jisas Kraes i tokbaot man ya Deved. (Matiu 12:3; 22:43-45) Sam pruf we i soemaot se Jisas i Mesaea, hemia se 2 taem, nem blong hem i stap wetem ol man long laen blong King Deved. Mo hemia nao laen we Baebol i talem se Mesaea bambae i kamaot long hem. (Matiu 1:6-16; Luk 3:23-31) Yes, i tru se Deved i wan man we i laef long taem bifo.

Baebol i talem se faet ya i stap long bigfala level ples ya Elaha. Mo i talem tu se, ol ami blong Filistia oli mekem kamp blong olgeta long saed blong ol hil, long medel blong tufala taon ya Soko mo Aseka. Ol ami blong Isrel oli stap long narasaed blong level ples ya, long saed blong ol hil. ?Hemia ol prapa ples?

Wan man we i go luk ples ya i talem se: “Man we i soemaot ples long mifala i no wan man blong skul. Hem i tekem mifala i go long bigfala level ples ya Elaha. Mifala i folem wan smol rod we i tekem mifala i go antap long hil. Taem mifala i stap lukluk i godaon long bigfala level ples ya, hem i askem long mifala blong ridim 1 Samuel 17:1-3. Afta, hem i poen i go long narasaed long level ples ya, mo i talem se: ‘Yufala i luk longwe, long lefsaed, taon ya Soko i bin stap ya.’ Hem i tanem hem nao i talem se, ‘Longwe, long raetsaed, taon ya Aseka i bin stap ya. Ol ami blong Filistia oli mekem kamp long medel blong tufala taon ya. Hemia samples long ol hil we yumi stap lukluk olgeta. Taswe maet yumi stap stanap long ples we ol ami blong Isrel oli mekem kamp blong olgeta long hem.’ Mi mi tingbaot Sol mo Deved, se maet tufala i bin stanap stret long ples we mi mi stap long hem. Afta, mifala i godaon kasem level ples ya, mo mifala i krosem wan smol reva we i drae mo i fulap long ol ston. Wantaem nomo mi tingbaot Deved, taem hem i bendaon blong pikimap faef ston we oli raon gud. Wan long olgeta nao i kilim Golaeat i ded.” Man ya i gat sem tingting olsem plante narafala we oli kam long ples ya, se ol samting we Baebol i talem, i tru nomo.

I no gat risen blong talem se stori ya i giaman. Ol man ya oli bin laef bifo, mo ol ples ya oli tru. Samting we i moa impoten, se stori ya i stap long Baebol we i kamaot long God blong trutok. Hem i “no save giaman.”​—Taetas 1:2; 2 Timoti 3:16.