Mi mi bon long taon ya Ciudad Mante, wan naesfala ples long provins ya Tamaulipas long Meksiko. Bighaf blong ol man long taon ya oli kaen, mo oli glad blong givim samting long narafala. Be sore tumas, i gat plante man blong kilim man long ples ya.

I gat fo boe long famle, mo mi mi namba tu. Papa mo mama blong mi, tufala i mekem se mi mi baptaes long Katolik Jos, mo mi joen long kwaea blong jos. Mi mi wantem mekem God i glad, from we mi fraet tumas se bambae hem i jajem mi, nao mi go bon long helfaea blong olwe.

Taem mi mi gat faef yia, Papa i lego mifala. Mi mi harem nogud tumas mo mi harem se mi no moa save lavem narafala. Mifala i lavem Papa, taswe mi no kasem save from wanem hem i lego mifala. Naoia, Mama i mas wok had blong lukaot long mifala.

From samting ya, mi mi stap mestem skul mo mi go joen wetem ol pikinini we oli bigwan moa long mi. Oli tijim mi blong tok swea, smok, stil, mo faet. Mi mi wantem bos long narafala, taswe mi lanem boksing, resling, karate, mo mi lanem blong yusum ol naef mo masket. Mi mi kam wan yangfala we i raf we i raf. Plante taem mi yusum masket blong faet, mo samtaem mi hafded long rod we blad i kavremap bodi blong mi. Taem Mama i faenem mi, hem i karem mi mi go long hospital, kwiktaem. !Mi mi mekem hem i harem nogud tumas!

Taem mi mi gat 16 yia, wan yangfala we mi save hem taem mi pikinini, i kam luk mifala. Nem blong hem Jorge, mo hem i talem se hem i wan Witnes blong Jehova. Hem i wantem talem sam impoten save long mifala we i kamaot long Baebol, blong eksplenem bilif blong hem. Mi mi neva ridim Baebol, mo mi glad blong save nem blong God mo plan blong hem. Jorge i talem se hem i glad blong stadi Baebol wetem mifala, mo mifala i glad.

Mi glad tumas blong save se tijing blong helfaea i no kamaot long Baebol. (Ol Sam 146:4; Prija 9:5) Mi no moa harem se mi fraet nogud long God. Be mi kasem save se hem i wan Papa we i lavem ol pikinini blong hem, mo i wantem mekem i gud long olgeta.

 Taem mi gohed blong stadi Baebol, mi luksave se mi mas jenisim fasin blong mi. Mi mas mekem tingting blong mi i godaon mo blokem tingting blong wantem faet. Advaes we i stap 1 Korin 15:33 i givhan long mi. Vas ya i talem se: “Ol stret man nomo, be ol fren blong olgeta we oli no stret, oli save spolem fasin blong olgeta.” Mi luksave se sipos mi wantem jenisim fasin blong mi, mi mas lego ol fren we oli pulum mi blong mekem ol nogud fasin. Taswe, mi faenem ol niufala fren insaed long Kristin kongregesen. Hemia ol man we oli no yusum ol raf fasin blong stretem ol problem, be oli folem ol rul blong Baebol.

Sam narafala vas we oli givhan long mi, oli stap long Rom 12:17-19. Oli talem se: “Sipos wan man i mekem i nogud long yufala, bambae yufala i no givimbak fasin ya long hem. . . . Yufala i mas traehad blong faenem rod blong yufala i gat pis wetem olgeta man. . . . Hae God i talem se, ‘Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.’” Mi stat blong luksave se Jehova bambae i finisim ol fasin we oli no stret, long stret taem blong hem mo long rod we hem i wantem. Sloslo, mi lego ol raf fasin blong mi.

Mi no save fogetem samting we i hapen long wan naet taem mi stap gobak long haos. Wan grup blong ol yangfala we bifo oli enemi blong mi, oli kilim mi. Lida blong olgeta i faetem baksaed blong mi, mo i singaot strong se, “!Ale! !Yu faet!” Kwiktaem nomo mi prea long Jehova, mo mi askem long hem blong i givhan long mi blong stap kwaet. Nating se mi wantem tumas blong givimbak, be mi ronwe long olgeta. Long nekis dei, mi mitim lida blong grup ya. Mi wantem kilim hem, be mi prea bakegen blong Jehova i givhan long mi. Mi mi sapraes tumas taem yangfala ya i kam klosap long mi mo i talem se: “Plis, yu fogivim mi from samting we mi mekem yestede. Blong talem stret, mi mi wantem kam olsem yu. Mi wantem stadi Baebol.” !Mi glad tumas we mi blokem kros blong mi! From samting ya nao, mi gat janis blong stadi Baebol wetem hem.

Sore tumas, famle blong mi i no moa gohed blong stadi Baebol. Be mi mi gat strong tingting blong gohed, mo mi no letem wan samting i blokem mi. Mi save se sipos mi joen oltaem wetem ol man blong God, bambae mi harem gud mo bambae oli kam olsem famle blong mi. Mi gohed gud, mo long 1991 mi baptaes blong kam wan Witnes blong Jehova.

Bifo, mi mi kros oltaem, mi wantem bos long ol narafala, mo mi faet. Be Baebol i jenisim laef blong mi. Naoia mi stap talemaot gud nius blong pis we Baebol i tokbaot, long ol man we oli glad blong lesin. Blong 23 yia nao, we mi gat janis blong mekem wok blong Jehova fultaem.

Mi wok blong smoltaem olsem volontia long branj ofis blong ol Witnes blong Jehova long Meksiko. Long ples ya mi mitim Claudia, wan yangfala Kristin woman we i smat mo i glad oltaem, mo mitufala i mared long 1999. !Mi talem tangkiu long Jehova from bigfala blesing ya blong faenem wan fren olsem!

Mitufala i stap long kongregesen blong olgeta we sora blong olgeta i fas, mo mitufala i yusum saen lanwis blong tijim olgeta long Jehova. Afta, oli askem long mitufala blong muv i go long kantri ya Belis blong tijim ol man long Baebol. Long ples ya, mitufala i no gat plante samting, be mitufala i gat evri samting we mitufala i nidim blong stap glad. Mitufala i no wantem lego wok ya.

Mama i stadi Baebol bakegen, mo afta, hem i baptaes. Mo bigfala brata blong mi, woman blong hem wetem ol pikinini blong tufala oli kam ol Witnes blong Jehova. Sam long ol fren blong mi bifo we mi prij long olgeta, oli kam man blong Jehova tu.

Sore tumas, sam famle blong mi oli ded from we oli no lego raf fasin blong olgeta. Sipos mi bin gohed olsem olgeta, ating mi tu mi ded finis. Mi mi talem tangkiu long Jehova, from we hem i pulum mi mi kam long hem mo ol man blong hem. Olgeta oli tijim mi long kaen fasin mo wetem longfala tingting, blong mi folem ol rul blong Baebol long laef blong mi.