Yes, i gat sam nogud enjel. ?Oli kam wea? Tingbaot se, taem God i wokem ol enjel, hem i givim fasin fri blong jus long olgeta. Smoltaem afta we Jehova i wokem Adam mo Iv, wan enjel i yusum fasin fri blong hem long wan fasin we i nogud, nao hem i statem fasin rebel long wol ya. Mo hem i pulum Adam mo Iv blong rebel agensem God. (Jenesis 3:1-7; Revelesen 12:9) Baebol i no talem stret nem blong enjel ya, o wok we hem i mekem long heven, bifo we i rebel. Be afta we hem i rebel, Baebol i singaot hem se Setan, we i minim “Man Blong Agens,” mo Devel, we i minim “Man Blong Giaman Blong Spolem Narafala.”—Matiu 4:8-11.

Sore tumas, i gat sam narafala enjel tu we oli rebel. Long taem blong Noa, i gat sam enjel we oli “lego prapa ples blong olgeta” insaed long famle blong God long heven. Oli kam long wol mo oli jenis i kam man, blong oli save mekem ol nogud fasin mo slip wetem ol woman blong wol, be hemia i no samting we God i wokem olgeta from.—Jud 6; Jenesis 6:1-4; 1 Pita 3:19, 20.

?Wanem i hapen long ol nogud enjel ya? Taem God i mekem bigfala wota i ron blong klinim wol ya, ol enjel ya oli jenis bakegen i kam ol enjel, mo oli gobak long ples blong olgeta. Be God i no letem ol nogud enjel ya oli holem “wok blong olgeta” bakegen. Hem i putum olgeta long wan “ples we i tudak we i tudak,” we nem blong hem Tataros. (Jud 6; 2 Pita 2:4) Ol nogud enjel ya oli stap aninit long paoa blong “jif blong ol rabis spirit,” Setan, we i stap “mekem ol man oli luk hem olsem we hem i wan enjel blong laet.”—Matiu 12:24; 2 Korin 11:14.

Baebol i tijim se, Kingdom blong God i wan gavman long heven, we i stanap long yia 1914. * Long taem we Kingdom ya i stanap, oli sakemaot Setan mo ol nogud enjel blong hem oli kamdaon long wol, mo naoia oli gat paoa nomo long wol ya. Taswe, ol nogud fasin blong man mo woman mo ol raf fasin oli stap kam antap long wol tede. Samting ya i soemaot se ol nogud ya oli kros tumas mo oli wantem spolem ol man.—Revelesen 12:9-12.

Ol nogud fasin we oli stap kam antap tede, oli soemaot se klosap nao rul blong ol nogud enjel bambae i finis. I no longtaem, ol nogud enjel ya bambae oli no moa gat paoa blong mekem wan samting. Afta we Kingdom blong God i rul long wol ya blong 1,000 yia, ol nogud enjel ya bambae oli gat smol taem bakegen blong pulum ol man. Be biaen, God bambae i spolem olgeta blong olwe.—Matiu 25:41; Revelesen 20:1-3, 7-10.