Baebol i soemaot se samtaem ol enjel oli stap protektem ol man blong Jehova, blong mekem samting we God i wantem i kamtru. (Ol Sam 34:7) Eksampol:

• Taem Jehova i spolem tufala nogud taon ya, Sodom mo Gomora, ol enjel oli givhan long gudfala man ya Lot mo famle blong hem blong oli aot long taon ya.—Jenesis 19:1, 15-26.

• Long Babilon bifo, taem oli sakem tri yangfala Hibru i go long wan bigfala faea we i hot we i hot, God i “sanem enjel blong hem i kam, nao hem i sevem trifala ya we trifala i man blong wok blong hem.”—Daniel 3:19-28.

• Afta we gudfala man ya Daniel i spenem wan naet long wan hol we i gat ol nogud laeon, hem i se, hem i laef yet from we “God i sanem enjel blong hem i kam satem maot blong ol laeon ya.”—Daniel 6:16, 22.

I gat samtaem we ol enjel blong God oli givhan long ol wok blong ol fas Kristin, blong mekem samting we Jehova i wantem i kamtru. Eksampol:

• Wan enjel i openem ol doa blong kalabus mo i talem long ol aposol we oli kalabus se oli go long tempol mo oli prij.—Ol Wok 5:17-21.

• Wan enjel i talem long Filip blong go long rod we i pas long draeples we i stat long Jerusalem i go kasem Gasa, blong i prij long wan man Itiopia we i go mekem wosip long Jerusalem.—Ol Wok 8:26-33.

• Taem God i wantem mekem ol man we oli no man Jiu, oli kam Kristin, wan enjel i kamtru long Konilias wan man Rom long wan vison, mo enjel ya i talem long hem blong i singaot aposol Pita i kam long haos blong hem.—Ol Wok 10:3-5.

• Taem aposol Pita i stap long kalabus, wan enjel i kamtru long hem nao i lidim hem i go afsaed long kalabus.—Ol Wok 12:1-11.

Tede, i no gat pruf we i soemaot se God i stap yusum ol enjel blong givhan long man, olsem we hem i mekem bifo. Be Jisas i tokbaot taem blong yumi se: “Ol man bambae oli talemaot gud nius ya blong Kingdom long olgeta ples long wol, blong oli witnes long olgeta neson, nao biaen en bambae i kam.” (Matiu 24:14) ?Yu save se ol enjel oli givhan long ol disaepol blong Kraes blong mekem wok ya?

Buk blong Revelesen i soem se, ol enjel oli wok strong blong halpem ol man long fulwol blong oli save Jehova God, mo ol stamba tingting blong hem long ol man. Aposol Jon i raetem se: “Mi luk wan narafala enjel i stap flae antap long skae, i stap talemaot gud nius ya we i blong stap olwe, long olgeta man we oli stap long wol, long olgeta kantri, long olgeta laen, long olgeta lanwis, mo long olgeta grup blong man. Hem i stap singaot bigwan, i se: ‘Yufala i mas fraet gud long God, mo yufala i mas leftemap nem blong hem, from we taem i kam finis blong hem i jajem ol man, taswe yufala i mas wosipim Man ya we i mekem heven mo wol, mo solwota mo springwota.’” (Revelesen 14:6, 7) Tede, i gat plante ekspiriens we oli soem se ol enjel oli stap sapotem wok blong prij long olgeta ples long wol. Hemia nao from wanem taem wan sin man i tanem tingting blong hem mo i kam long Jehova, “ol enjel blong God oli glad tumas.”—Luk 15:10.

?Wanem bambae i hapen taem wok blong prij i finis? Bambae ol enjel we oli “ol ami long heven” oli sapotem Jisas Kraes, King blong olgeta king, blong “faet long bigfala dei blong God ya we i gat olgeta paoa” long Amagedon. (Revelesen 16:14-16; 19:14-16) Ol enjel bambae oli joen blong spolem ol man long dei blong jajmen, taem Jisas “bambae i kam blong givim panis long olgeta we . . . oli no save obei long gud nius blong Jisas, Masta blong yumi.”—2 Tesalonaeka 1:7, 8.

Yu mas glad se ol enjel oli intres bigwan long yu. Oli wantem mekem i gud long ol man we oli glad blong mekem wok blong God, mo oltaem Jehova i yusum olgeta blong givim paoa mo protektem ol man blong hem long wol ya.—Hibrus 1:14.

Taswe yumi wanwan i gat wan impoten jus blong mekem. ?Bambae yumi lesin mo obei long mesej blong gud nius we i stap goraon long fulwol? Ol Witnes blong Jehova we oli stap long ples blong yu, bambae oli glad blong givhan long yu blong kasem blesing from ol gudfala wok ya we ol enjel blong God oli stap mekem.