Plante milian man raon long wol oli bilif se Krismas i wan dei blong selebretem betde blong Jisas. ?Yu stap tingbaot sipos ol faswan Kristin mo olgeta we oli folem Jisas oltaem, oli selebretem Krismas? ?Yu save samting we Baebol i talem long saed blong ol betde? Sipos yumi save ansa blong ol kwestin ya, bae yumi save sipos Krismas i wan lafet blong ol Kristin o nogat.

Faswan samting we i gud blong save se, Baebol i no tokbaot se ol man oli mekem betde blong Jisas o wan narafala man blong God. Be hem i tokbaot tu man nomo we oli mekem lafet blong betde. Tufala tugeta i no wosipim Jehova, God ya we i givim Baebol. Be long taem ya, sam nogud samting i hapen. (Jenesis 40:20; Mak 6:21) Buk ya Encyclopædia Britannica i talem tu se, ol faswan Kristin oli no laekem “kastom ya blong ol hiten man blong selebretem ol betde.”

Baebol i no talem stret taem we Jisas i bon long hem. Buk ya McClintock and Strong’s Cyclopedia i talem se: “Yumi no save faenem dei we Jisas i bon long hem long N[iu] T[esteman], mo i no gat long eni narafala buk tu.” Sipos Jisas i wantem se ol disaepol blong hem oli selebretem betde blong hem, bae hem i mas meksua se oli save dei we hem i bon long hem.

Namba tu samting we i gud blong save se, Baebol i no talem se Jisas o wan long ol disaepol blong hem oli mekem lafet blong Krismas. Buk ya New Catholic Encyclopedia i talem se, faswan taem we oli tokbaot lafet blong Krismas “hem i long wan klok (Chronograph) blong Philocalus, wan man Rom we i stap raetem ol kalenda long ol yia 336 [K.T.].” Taswe, i klia se lafet ya i kamaot afta we wok blong raetem Baebol i finis, mo plante yia afta we Jisas i laef long wol. Buk ya McClintock and Strong i talem tu se, “lafet blong Krismas i no kamaot long God, mo i no i stap long N[iu] T[esteman].” *

Jisas we i Bigfala Tija, i talemaot klia long ol disaepol blong hem, samting we hem i wantem olgeta blong mekem, mo oli raetem ol samting ya long Baebol. Be i no gat wan long ol save ya we oli raetem we i tokbaot lafet blong Krismas. Wan tija i no wantem se ol studen blong hem oli bitim mak long ol tijing we hem i givim long olgeta, long sem fasin, Jisas tu i no wantem se ol man blong hem oli “go bitim mak blong ol tok ya we oli raetem finis” long Baebol.—1 Korin 4:6.

Be i gat wan impoten lafet we ol fas Kristin oli savegud, hemia lafet blong tingbaot bakegen ded blong Jisas. Jisas hem wan i talem long ol disaepol blong hem wetaem blong mekem lafet ya, mo olsem wanem blong mekem. Ol save ya mo stret dei blong lafet ya we i folem kalenda blong ol man Jiu, i stap long Baebol.—Luk 22:19; 1 Korin11:25.

Olsem we yumi luk finis, Krismas i wan lafet blong betde we ol hiten man oli mekem, mo ol faswan Kristin oli no mekem lafet ya. Mo tu, Baebol i no tokbaot se Jisas o eni narafala man i selebretem Krismas. Ol save ya i mekem se plante milian Kristin raon long Wol oli talem se, Krismas i no blong olgeta.