1-3. ?Wanem samting we maet i hapen long Yuodia mo Sintike? ?Olsem wanem yumi save blokem ol problem olsem? (Yu luk pija long stat blong stadi.)

YUMI tinghae long Baebol from we yumi save se hem i buk blong God. Baebol i fulap wetem ol gudfala advaes we i save givhan long yumi blong winim ol problem, mo i save stretem yumi taem yumi mekem mastik. Taswe, ?yumi mas mekem wanem taem yumi kasem advaes? Tingbaot tu woman long taem blong ol fas Kristin we tabu spirit i makemaot tufala, hemia Yuodia mo Sintike. Baebol i talem se i gat wan problem bitwin tufala, be i no talem risen blong hem. Bambae yumi tokbaot wan samting we maet i hapen, nao i mekem tufala i no joen gud.

² Maet Yuodia i singaot sam brata mo sista blong go kakae long haos blong hem, be hem i no invaetem Sintike. Biaen, taem Sintike i harem ol narafala oli talem se oli glad long kakae ya, hem i harem nogud. Maet hem i stap tingting se: ‘!Mi no save bilivim se Yuodia i no invaetem mi! Mi ting se mitufala i gud fren.’ Sintike i harem olsem se Yuodia i no laekem hem mo i no wantem joen wetem hem. !Ale hem i invaetem ol  semfala brata mo sista ya blong go kakae long haos blong hem, be i no invaetem Yuodia! Maet samting ya i mekem samfala long kongregesen tu oli harem nogud. Baebol i soemaot se Pol i stretem tufala sista ya, mo i leftemap tingting blong tufala blong tufala i joen gud bakegen. Tufala i lesin long Pol, mo tufala i glad nomo blong mekem wok blong Jehova.​—Filipae 4:2, 3.

³ Long ol kongregesen tede tu, yumi save fesem sam problem wetem sam brata mo sista. Be sipos yumi folem ol advaes blong Baebol, yumi save winim ol problem ya, mo yumi save blokem tu. Mo taem yumi obei long samting we Baebol i talem, yumi soemaot se yumi tinghae long Buk blong Jehova.​—Ol Sam 27:11.

4, 5. ?Tok blong God i givim wanem advaes long yumi?

⁴ I no isi oltaem blong kontrolem ol filing blong yumi. Maet yumi harem nogud no yumi kros taem wan narafala i tok nogud long yumi no i mekem i no stret long yumi, from we fasin blong laef blong yumi, no kala blong skin blong yumi, no klos blong yumi i defren. Be sipos wan brata no sista blong yumi i mekem olsem long yumi, yumi save harem nogud moa. ?Wanem advaes blong Baebol i save givhan long yumi?

⁵ Jehova i save samting we i save hapen taem yumi no kontrolem ol filing blong yumi. Taem yumi harem nogud no yumi kros, yumi save talem no mekem sam samting we biaen yumi sore from. Long Baebol, Jehova i tijim yumi blong kontrolem yumi taem yumi kros, mo i talem se: “I nogud yu yu man blong kros kwik.” I gud blong tingbaot se taem yumi obei long advaes ya mo yumi no kwik blong harem nogud, yumi save blokem problem. (Ridim Prija 7:9; Ol Proveb 16:32.) Baebol i talem tu se yumi mas fogivim ol narafala. Jisas i talem se sipos yumi no fogivim ol narafala, Jehova tu bambae i no fogivim yumi. (Matiu 6:14, 15) ?Olsem wanem? ?Yu yu gat longfala tingting mo yu glad blong fogivim ol narafala?

6. ?Wanem i save hapen sipos yumi no kontrolem ol filing blong yumi?

⁶ Sipos yumi no kontrolem ol filing blong yumi, yumi save gohed blong kros, mo yumi save stat blong no laekem nating narafala. Mo maet yumi save pulum ol narafala long kongregesen tu blong oli gat tingting olsem. Mo nating sipos yumi traem haedem se yumi kros mo yumi no laekem nating narafala, be bambae ol narafala oli luksave yet ol filing blong yumi. Ale ol brata mo sista bambae oli stap longwe long yumi. (Ol Proveb 26:24-26) Ol elda bambae oli yusum Baebol blong givhan long yumi, blong yumi lego kros mo fasin ya blong no laekem nating narafala mo no fogivim narafala. (Levitikas 19:17, 18; Rom 3:11-18) Sipos oli mekem olsem, ?bambae yumi glad blong folem advaes we i kamaot long Buk blong Jehova?

7, 8. (1) ?Jehova i lidim ol man blong hem olsem wanem? (2) ?Wanem sam rul we i stap long Baebol? ?From wanem yumi mas obei long olgeta?

⁷ Jehova i stap lidim olgeta we oli stap long ogenaesesen blong hem long wol, mo i stap tijim olgeta. ?Hem i mekem samting ya olsem wanem? Hem i putumap Kraes blong i ‘hed blong kongregesen’, mo Kraes i putumap “slef ya we i stret mo waes” blong tijim ol man blong God mo lidim olgeta. (Efesas 5:23; Matiu 24:45-47, NW) Olsem hed kampani long taem blong  ol fas Kristin, slef ya tu i tinghae long Baebol, from we i Tok blong God. (Ridim 1 Tesalonaeka 2:13.) ?Wanem sam rul we i stap long Baebol?

⁸ Baebol i talem se yumi mas go oltaem long ol miting. (Hibrus 10:24, 25) Hem i leftemap tingting blong yumi blong yumi gat sem bilif long ol samting we Baebol i tijim. (1 Korin 1:10) Mo tu, hem i talem se yumi mas ‘gohed blong lukaot Kingdom fastaem.’ (Matiu 6:33, NW) Baebol i tijim yumi blong prij long ol haos wanwan, long ol pablik ples, mo long eniples we yumi faenem man long hem. (Matiu 28:19, 20; Ol Wok 5:42; 17:17; 20:20) Hem i givim advaes long ol elda blong oli gohed blong mekem se kongregesen i klin. (1 Korin 5:1-5, 13; 1 Timoti 5:19-21) Mo hem i talem se yumi mas gohed blong mekem bodi blong yumi i klin, mo blokem ol nogud tingting mo fasin we Jehova i no laekem nating.​—2 Korin 7:1.

9. ?Wanem grup we Jisas i yusum blong i givhan long yumi blong kasem save long Tok blong God?

⁹ Maet sam man oli harem se oli no nidim narafala blong i eksplenem Baebol long olgeta. Be stat long 1919, Jisas i yusum grup blong “slef ya we i stret mo waes” nomo blong givhan long ol man blong God, blong oli kasem save gud long ol samting we Baebol i tijim, mo oli obei long hem. Sipos yumi obei long Baebol, bambae yumi mekem se kongregesen i klin, i gat pis, mo i joen gud. Taswe, i gud yumi askem se: ‘?Bambae mi mi holemstrong long Jisas, mo mi folem ol rul we i kamaot long slef we i stret mo waes?’

10. ?Buk blong Esikel i tokbaot ogenaesesen blong Jehova long heven olsem wanem?

¹⁰ Baebol i givhan long yumi blong kasem save se ol man blong Jehova long heven tu oli wok folem plan. Eksampol, long wan vison, Esikel i luk we Jehova i stap ron long wan kat we i ron spid i go long eniples we Jehova i wantem. (Esikel 1:4-28) Kat ya i pija blong ogenaesesen blong God long heven we i kwik blong folem ol rul blong hem. Mo hem i gat paoa tu long ogenaesesen blong hem long wol. Yu traem tingbaot ol jenis we i kamaot long ogenaesesen blong God long ol ten yia we i pas. Hemia Jehova we i stap lidim ol jenis ya. I no longtaem, Kraes wetem ol enjel bambae oli spolem rabis wol ya, nao bambae i no moa gat man i daonem Jehova mo nem blong hem, mo i tok nogud long hae rul blong hem.

11, 12. ?Wanem sam long ol samting we ogenaesesen blong Jehova i mekem long ol las dei ya?

¹¹ Traem tingbaot sam samting we ogenaesesen blong Jehova i stap mekem long ol las dei ya. Bildim ol haos. Plante handred brata mo sista oli wokhad blong bildim niufala hedkwota blong ol Witnes blong Jehova long Warwick, New York, Amerika. Plante taosen narafala brata sista long wol oli wok volontia blong bildim ol Haos Kingdom mo ol branj ofis, mo oli wok aninit long Dipatmen blong Worldwide Design/Construction. !Yumi talem tangkiu  tumas long ol brata mo sista we oli wokhad blong bildim ol haos! Mo ol man blong Jehova long evri ples oli givim ol samting we oli naf blong givim, blong pem ol samting we oli nidim blong wokem ol haos ya. Jehova i blesem ol man blong hem from we oli gat tingting daon mo oli holemstrong long hem.​—Luk 21:1-4.

¹² Tijim ol man. Jehova i wantem tumas blong tijim ol man blong hem. (Aesea 2:2, 3) Traem tingbaot ol skul we yumi gat: Skul Blong Paenia, Skul Blong Ol Man Blong Talemaot Gud Nius, Skul Blong Gilead, Skul Blong Olgeta We Oli Jes Go Wok Long Betel; Skul Blong Ol Eria Elda Wetem Woman Blong Olgeta, Skul Blong Ol Elda, Kingdom Ministri Skul, mo Skul Blong Ol Memba Blong Branj Komiti Wetem Woman Blong Olgeta. Mo long websaet blong yumi, jw.org, i gat Baebol mo plante narafala buk we oli kamaot long plante handred lanwis. Long websaet ya, i gat wan haf blong ol pikinini mo ol famle, mo wan haf blong ol nius. ?Yu yu yusum finis jw.org long wok blong prij mo long famle wosip?

13. ?Ol man blong Jehova oli gat wanem bigfala wok?

¹³ !I wan bigfala ona blong stap insaed long ogenaesesen blong Jehova mo blong save samting we hem i wantem yumi blong mekem! I tru, taem yumi save samting we God i glad long hem, yumi gat bigfala wok ya blong obei long hem mo mekem samting we i stret. Mo nating se plante man oli laekem blong mekem samting we i nogud, be yumi mekem olsem Jehova, yumi “no laekem nating ol rabis fasin.” (Ol Sam 97:10, NW) Yumi no mas mekem olsem ol man ya we oli “stap talem ol fasin we oli nogud, se oli gud nomo, mo ol fasin we oli gud, se oli nogud.” (Aesea 5:20) Yumi wantem mekem Jehova i glad, taswe yumi mas gat strong tingting blong stap klin long evri samting. (1 Korin 6:9-11) Samting we Jehova i talem long Baebol i blong mekem i gud long yumi. Yumi lavem hem mo yumi wantem holemstrong long hem. From samting ya, yumi folemgud ol advaes blong hem taem yumi stap long haos, long kongregesen, long wok, long skul, mo long ol narafala ples tu. (Ol Proveb 15:3) I gat sam taem we yumi mas holemstrong long God. Bambae yumi tokbaot sam long olgeta.

14. ?Olsem wanem ol papa mo mama oli save holemstrong long Jehova?

¹⁴ Taem yumi tijim ol pikinini blong yumi. Long Baebol, Jehova i talem long ol papa mo mama olsem wanem blong tijim ol pikinini blong olgeta. Ol Kristin oli mas lukaot gud se tingting blong wol i no gat paoa long olgeta. (Efesas 2:2) Eksampol, long sam ples, maet wan papa i save tingting se: ‘Long ples blong mi, i wok blong ol woman blong tijim ol pikinini.’ Be Baebol i talem klia se ol papa nao oli mas tijim ol pikinini blong olgeta, blong oli save Jehova. (Efesas 6:4) Ol papa mo mama we oli lavem Jehova, oli wantem se ol pikinini blong olgeta oli fren gud wetem hem, olsem Samuel taem hem i wan smol boe.​—1 Samuel 3:19.

15. ?Taem yumi mekem ol impoten desisen, yumi soemaot olsem wanem se yumi holemstrong long Jehova?

¹⁵ Taem yumi mekem ol desisen. Bifo we yumi mekem ol impoten desisen long laef, yumi mas faenemaot tingting blong Jehova fastaem, long rod ya yumi soemaot se yumi holemstrong long hem. Baebol mo ogenaesesen blong hem i save givhan long yumi. Wan eksampol, tede sam papa mo mama we oli lego kantri blong olgeta, oli stap sanem ol bebi blong olgeta i gobak long kantri blong olgeta, blong ol famle oli lukaot long olgeta. Olsem nao papa mo mama i save gohed blong wok blong winim mane. I tru, hemia i desisen blong wanwan man, be papa mama i mas tingbaot se: ‘?Wanem tingting blong Jehova long desisen blong mitufala?’ (Ridim Rom 14:12.) I waes blong tingbaot fastaem samting we Baebol i talem, bifo we yumi mekem ol impoten desisen long saed blong famle mo wok. Yumi nidim we Papa blong yumi i givhan long yumi, from we yumi no naf blong lidim yumi wan.​—Jeremaea 10:23.

16. ?Wan mama i mas mekem wanem desisen taem boe blong hem i bon? ?Wanem i givhan long hem blong mekem gudfala desisen?

 ¹⁶ Wan man mo woman blong hem, tufala i muv i go long narafala kantri, mo biaen taem smol boe blong tufala i bon, tufala i mekem plan blong sanem hem i gobak, blong tufala bubu i lukaot long hem. Be long taem ya, woman ya i stat blong stadi Baebol wetem ol Witnes blong Jehova. Hem i lanem se i wok blong hem nao blong tijim boe blong hem blong i save Jehova. (Ol Sam 127:3; Ol Proveb 22:6) Nao woman ya i prea long Jehova, mo i askem strong long hem blong i givhan long hem, blong mekem samting we i stret. (Ol Sam 62:7, 8) Mo tu, hem i tokbaot problem blong hem long sista we i stadi wetem hem, mo i tokbaot long ol narafala tu long kongregesen. Mo nating se ol famle mo ol fren blong hem oli gohed blong talem long hem blong i sanem pikinini ya i go long tufala bubu, be hem i save se i no stret blong mekem olsem. Hasban blong hem i luk se ol brata sista oli givhan bigwan long waef blong hem mo bebi ya. Hem i sapraes tumas nao hem i stat blong stadi Baebol mo i go long miting wetem famle blong hem. !Ating woman ya i glad tumas taem hem i luk se Jehova i ansa long prea blong hem!

17. ?Yumi mas folem wanem rul taem yumi mekem stadi blong wan man?

¹⁷ Taem yumi obei long ol rul. Sipos yumi holemstrong long God, bambae yumi obei long ol rul we ogenaesesen blong hem i talem. Eksampol, ?sipos yumi mekem stadi blong wan man long buk ya ?Wanem Samting We Baebol i Rili Tijim?, yumi mas mekem wanem afta? Yumi kasem advaes se i gud yumi tekem smoltaem blong givhan long man ya blong i kasemsave moa long ogenaesesen blong Jehova. Yumi save yusum video ya ?Wanem i Stap Hapen Insaed Long Haos Kingdom? mo buklet ya ?Hu i Stap Mekem Samting We Jehova i Wantem? Mo taem man i finisim buk ya Baebol Tijim, yumi stadi wetem hem long buk ya ‘Stap Long Laef Ya We God i Lavem Yu,’ blong mekem bilif blong hem i “kam strong moa oltaem.” Mo yumi save mekem olsem tu nomata se hem i baptaes finis. (Kolosi 2:7) ?Yu yu stap obei long rul ya we ogenaesesen blong Jehova i stap talem?

18, 19. ?Wanem sam samting we yumi mas talem tangkiu long Jehova from?

¹⁸ !I gat plante samting we yumi mas talem tangkiu long Jehova from! Wan hemia se “long God nomo, yumi gat laef, yumi stap wokbaot, mo yumi stap mekem evri samting.” (Ol Wok 17:27, 28) Mo tu hem i givim Buk blong hem, Baebol. Olsem ol Kristin long Tesalonaeka, yumi tu yumi laekem tumas presen ya, from we hem i tok blong hem.​—1 Tesalonaeka 2:13.

¹⁹ Baebol i givhan long yumi blong yumi kam klosap long Jehova, nao hem i kam klosap long yumi. (Jemes 4:8) !Yumi glad tumas we Papa blong yumi i singaot yumi i kam long ogenaesesen blong hem! Yumi harem olsem man blong raetem sam we i talem se: “Olgeta. Yumi talem tangkiu long Hae God, from we hem i gud tumas. Oltaem bambae hem i lavem yumi, gogo i no save finis.” (Ol Sam 136:1) Long evri vas blong sam ya, man blong raetem sam i ripitim oltaem tok ya, “oltaem bambae hem i lavem yumi, gogo i no save finis.” Yes, yumi mas holemstrong long Jehova mo yumi folemgud ol rul we ogenaesesen blong hem i givim. !Sipos yumi mekem olsem, bambae hem i givim laef we i no save finis long yumi mo bambae hem i no save lego yumi samtaem!