1-3. (1) ?Yumi mas gat wanem tingting long ol trutok blong Baebol? Eksplenem. (Yu luk pija long stat blong stadi.) (2) ?Bambae yumi tokbaot wanem long stadi ya?

TEDE, taem ol man oli pem wan samting long stoa, biaen oli save go givimbak samting ya. Mo taem oli pem samting tru long intenet, plante taem oli sanembak samting we oli pem, from we maet i no stret long tingting blong olgeta o i gat wan samting i rong long hem. Taswe oli save jusum blong jenisim samting ya wetem wan narafala samting, o oli save askem blong tekembak mane blong olgeta.

² Yumi no mas mekem olsem long ol trutok blong Baebol. Taem yumi “pemaot” trutok, yumi no mas “salemaot,” hemia i min se taem yumi lanem trutok, yumi no mas lego trutok. (Ridim Ol Proveb 23:23; 1 Timoti 2:4) Olsem we yumi bin tokbaot long las stadi, yumi spenem plante taem blong lanem trutok. Yumi lego ol samting we oli save mekem yumi kam rijman, yumi jenisim fasin blong yumi blong fren wetem ol narafala, yumi jenisim ol fasin mo tingting blong yumi, mo yumi sakemaot ol kastom we  Jehova i no laekem. Yes, yumi sua se trutok we yumi lanem i moa impoten i bitim evri samting we yumi lego.

³ Jisas i talem wan parabol long saed blong wan bisnesman we i stap lukaotem ol gudfala perel. Taem hem i faenem wan perel we i sas we i sas, wantaem nomo hem i salemaot evri samting blong hem mo i go pem perel ya. Perel ya i minim trutok blong Kingdom blong God. Jisas i yusum parabol ya blong soemaot se, taem man i lukaot trutok mo i faenem, hem i tinghae long trutok. (Matiu 13:45, 46) Taem yumi stat blong lanem trutok long saed blong Kingdom mo ol narafala trutok blong Baebol, yumi rere blong lego eni samting blong yumi kasem ol trutok ya. Nao sipos yumi gohed blong tinghae long ol trutok ya, bambae yumi neva lego trutok. Sore tumas, plante Kristin oli no tinghae long ol trutok ya, nao oli lego trutok. !Yumi no mas mekem olsem! Yumi wantem “gohed blong wokbaot long trutok.” (Ridim 3 Jon 2-4.) Hemia i min se trutok i mas kam impoten samting long laef blong yumi. Long stadi ya, bambae yumi tokbaot ?from wanem man i “salemaot,” o i lego trutok? ?Olsem wanem blong lukaotgud blong no lego trutok? ?Olsem wanem blong gat strong tingting blong “wokbaot long trutok”?

4. Long taem blong Jisas, ?from wanem samfala oli no gohed blong wokbaot long trutok?

⁴ Long taem blong Jisas, samfala we oli akseptem trutok oli no gohed blong wokbaot long trutok. Eksampol, afta we Jisas i mekem wan merikel mo i givim kakae long wan bigfala hip blong man, plante man oli folem hem i go narasaed long lagun blong Galili. Nao Jisas i talem se: “Sipos yufala i no kakae mit blong bodi blong Pikinini blong man, mo yufala i no dring blad blong hem, bambae i no gat laef long yufala.” Ol man ya oli no askem Jisas blong i eksplenem mining blong tok ya, be oli girap oli se: “Tok ya i strong tumas. ?Hu i save harem tok olsem?” From samting ya, “plante disaepol blong hem oli gobak long ol samting we oli lego finis mo oli no moa folem hem.”—Jon 6:53-66.

5, 6. (1) ?From wanem tede samfala oli lego trutok? (2) ?Wanem i save mekem se sloslo man i lego trutok?

⁵ Sore tumas, tede tu samfala oli lego trutok. ?From wanem? Samfala oli no agri long niufala mining blong wan vas blong Baebol o maet wan brata i mekem olgeta oli harem nogud. Sam narafala oli no glad long advaes blong Baebol we narafala i givim long olgeta, o maet oli gat wan problem wetem narafala long kongregesen. Mo sam narafala oli folem ol giaman tijim blong ol apostasi o ol man we oli stap talem ol giaman tok agensem yumi. Hemia sam risen from wanem samfala oli lego Jehova mo kongregesen. (Hibrus 3:12-14) !Olgeta ya, oli sud folem eksampol blong aposol Pita! Taem Jisas i askem long ol disaepol sipos olgeta tu bambae oli lego hem, Pita i ansa se: “?Masta, bambae mifala i go long hu? Yu nomo yu gat ol tok blong laef ya we i no save finis.”—Jon 6:67-69.

⁶ Samfala oli no luksave se sloslo oli stap lego trutok. Man we sloslo i lego trutok, hem i olsem wan bot we sloslo i stap drif i go longwe long wan aelan. Taswe, Baebol i givim woning se yumi mas lukaotgud blong “yumi no drif.” (Hibrus 2:1) Plante taem man we sloslo i lego trutok, hem i no minim blong mekem olsem. Be from we hem i letem fasin blong hem blong fren wetem Jehova i kam slak, ale maet hem i no moa fren wetem Jehova. ?Olsem wanem blong blokem samting ya blong i no hapen long yumi?

7. ?Wanem i save halpem yumi blong no salemaot trutok?

⁷ Sipos yumi wantem gohed blong wokbaot long trutok, yumi mas glad blong obei long evri samting we Jehova i talem. Yumi mas mekem trutok i kam impoten samting long laef blong yumi mo yumi folem ol rul blong Baebol long evri samting we yumi mekem. King Deved i prea mo i promes long Jehova se: “Bambae mi wokbaot oltaem long trutok blong yu.” (Ol Sam 86:11, NW) Deved i gat strong tingting blong i gohed blong wokbaot long trutok, mo yumi tu yumi mas mekem sem mak. Sipos no, bambae yumi stat blong tingbaot ol samting we yumi lego finis mo maet yumi wantem gobak long olgeta. Yumi no save jusum weswan trutok yumi laekem mo weswan yumi no laekem. Long las stadi, yumi tokbaot faef samting we yumi lego blong yumi save lanem trutok mo folem long laef blong yumi. Naoia bambae yumi luk olsem wanem blong no gobak long ol samting ya.—Matiu 6:19.

8. ?Wanem i save mekem se wan Kristin i no yusumgud taem blong hem? Tokbaot wan eksampol.

⁸ Taem. Sipos yumi no wantem drif i gowe long trutok, yumi mas yusumgud taem blong yumi. Yumi mas lukaotgud blong no spenem tumas taem blong spel mo pleplei, o mekem ol samting we yumi nomo i wantem, go long intenet, o wajem televisen. I no rong blong mekem ol samting ya, be oli save kakae taem we yumi stap yusum blong stadi mo prij. Hemia nao samting we hapen long Ema. * Stat taem hem i smol, hem i laekem ol hos mo i ron long hos taem i gat janis. Be tingting blong hem i stikim hem from we hem i spenem tumas taem long samting we hem nomo i wantem, ale hem i mekem sam jenis. Mo tu, Ema i luk ekspiriens blong Cory Wells, wan sista we i ron long hos long taem blong rodeo. * Naoia Ema i spenem moa taem long wok blong Jehova, mo hem i gat moa taem blong spenem wetem ol  narafala. Hem i kam klosap long God mo i glad se hem i stap yusumgud taem blong hem.

9. ?Olsem wanem yumi save stat blong laekem ol samting blong wol we yumi lego finis?

⁹ Ol samting blong wol. Sipos yumi wantem gohed blong wokbaot long trutok, yumi no mas putum ol samting blong wol fasples long laef blong yumi. Taem yumi lanem trutok, yumi kasemsave se wok blong Jehova nao i moa impoten, ale yumi glad blong lego ol samting blong wol. Be biaen, maet yumi luk we ol narafala oli pem ol niufala mobaelfon o tablet, no oli pem sam narafala samting bakegen, nao maet yumi save stat blong wantem ol samting ya. Maet yumi no moa glad long ol samting we yumi gat finis, ale yumi traehad from ol samting blong wol mo yumi no moa mekem wok blong Jehova. Hemia nao samting we i hapen long Demas. Hem i laekem tumas “ol samting blong wol ya,” nao hem i no moa folem Pol blong prij. (2 Timoti 4:10) Maet Demas i laekem moa ol samting blong wol i bitim we i lavem God. O maet hem i no wantem lego sam samting blong i wok wetem Pol. ?Yumi lanem wanem? Sipos yumi no lukaotgud, yumi save stat blong laekem ol samting blong wol we yumi lego finis, mo hemia i save mekem se yumi no moa laekem trutok.

10. ?Yumi mas lukaotgud long wanem samting?

¹⁰ Ol fren. Sipos yumi wantem gohed blong wokbaot long trutok, yumi mas lukaotgud blong no letem ol man blong wol oli kontrolem yumi. Taem yumi lanem trutok, fasin blong yumi blong fren wetem ol narafala i jenis. Maet samfala oli respektem niufala bilif blong yumi, be maet samfala oli agensem. (1 Pita 4:4) I tru, yumi wantem frengud wetem ol famle blong yumi, be yumi no mas lego ol rul blong Jehova blong mekem olgeta oli glad. Mo olsem 1 Korin 15:33 i talem, ol besfren blong yumi hemia ol man we oli lavem Jehova.

11. ?Olsem wanem blong blokem ol tingting mo ol fasin we i no stret?

¹¹ Ol tingting mo ol fasin we i no stret. Sipos yumi wantem wokbaot long trutok, yumi mas tabu, o klin, long ae blong Jehova. (Aesea 35:8; ridim 1 Pita 1:14-16.) Taem yumi lanem trutok, yumi mekem laef blong yumi i laenap wetem ol rul blong Baebol. Samfala oli mekem ol bigfala jenis. Be yet, yumi mas lukaotgud blong no gobak long rabis laef ya blong bifo. ?Wanem i save halpem yumi blong no mekem wan nogud samting? Tingbaot samting we Jehova i givim blong mekem yumi stap klin. !Hem i givim laef blong Pikinini blong hem, Jisas Kraes! (1 Pita 1:18, 19) Yes, i impoten blong tingbaot ransom sakrefaes blong Jisas, from we hemia nao samting we i save halpem yumi blong stap klin long ae blong Jehova.

12, 13. (1) ?Yumi mas gat wanem tingting long ol holide? (2) ?Naoia bambae yumi tokbaot wanem?

¹² Ol kastom we God i no laekem. Maet ol memba blong famle, no ol fren long wok o long skul, oli traem pulum yumi blong joen long ol lafet blong olgeta. ?Wanem i save halpem yumi  blong no joen long ol kastom mo ol holide we Jehova i no laekem? Yumi mas save risen from wanem Jehova i no laekem ol holide olsem. Yumi save mekem risej long ol buk blong yumi blong faenemaot stamba blong ol holide ya. Taem yumi tingting dip long ol risen we oli stanap long Baebol, yumi save sua se yumi stap wokbaot long rod we i mekem “Masta i glad.” (Efesas 5:10) Sipos yumi trastem Jehova mo Tok blong hem, bambae yumi no fraet long ol tingting blong man.—Ol Proveb 29:25.

¹³ Yumi wantem gohed nomo blong wokbaot long trutok. ?Wanem i save halpem yumi blong gat strong tingting blong wokbaot long trutok? Naoia bambae yumi tokbaot tri samting we yumi save mekem.

14. (1) ?Olsem wanem fasin blong stadi Baebol oltaem i save halpem yumi blong no lego trutok? (2) ?From wanem yumi nidim fasin luksave, waes, mo fasin stretem?

¹⁴ Faswan samting, yumi mas gohed blong stadi long Baebol mo tingting dip long hem. Yumi mas gat wan program blong mekem samting ya. Moa we yu stadi, moa we bambae yu laekem trutok, mo yu gat strong tingting blong no lego. Ol Proveb 23:23 i talem se yumi mas ‘pemaot trutok’ mo “waestok, mo save, mo fasin blong luksave ol samting.” I no naf nomo we yumi save ol trutok blong Baebol, be yumi mas folem ol trutok ya. Fasin luksave i mekem yumi savegud ol samting we Jehova i tijim yumi long hem. Waes i pusum yumi blong folem samting we yumi lanem. Samtaem trutok i stretem yumi, taem i soem ol fasin we yumi mas jenisim. Yes, yumi mas kwik blong mekem ol samting ya, from we Baebol i se hemia i gud moa i winim silva.—Ol Proveb 8:10.

15. ?Olsem wanem trutok i olsem strap we i protektem yumi?

¹⁵ Nambatu samting, yumi mas gat strong tingting blong folem trutok. Baebol i talem se trutok i olsem strap blong wan soldia. (Efesas 6:14) Long taem bifo, strap i givhan mo i protektem wan soldia long taem blong faet, speseli sipos hem i fasemgud strap ya, sipos no, bambae hem i kasem trabol. ?Olsem wanem trutok i olsem strap we i protektem yumi? Sipos yumi fasem trutok long hat blong yumi, bambae hem i protektem yumi long ol rabis tingting mo i halpem yumi blong mekem ol gudfala desisen. Taem yumi fesem wan bigfala problem o yumi wantem mekem samting we i nogud, trutok bambae i halpem yumi blong mekem samting we i stret. Yumi mas meksua se oltaem yumi folem trutok long laef  blong yumi, sem mak olsem wan soldia we i meksua se oltaem hem i mas werem strap long taem blong faet. Mo tu, wan soldia i mas putum naef blong faet long strap blong hem. I gud yumi luk olsem wanem yumi save mekem sem mak.

16. ?Olsem wanem fasin blong tijim trutok i halpem yumi blong wokbaot long trutok?

¹⁶ Nambatri samting, traehad blong tijim trutok long ol narafala. Baebol i olsem naef blong faet. Wan soldia i mas meksua se oltaem naef blong faet blong hem i stap strong. Long sem fasin, oltaem yumi mas holemstrong long Tok blong God. (Efesas 6:17) Yumi evriwan i save kam ol gudfala tija, mo yumi “tijim ol man long trutok long fasin we i stret.” (2 Timoti 2:15) Taem yumi yusum Baebol blong tijim ol narafala long trutok, bambae yumi savegud ol trutok mo bambae yumi laekem trutok moa. Nao bambae yumi gat strong tingting blong gohed blong wokbaot long trutok.

17. ?From wanem yu luk trutok olsem wan sas presen?

¹⁷ Trutok i wan sas presen we Jehova i givim. Trutok i mekem rod blong yumi save frengud wetem Jehova. Hemia nao impoten samting long laef blong yumi. !Jehova i tijim yumi long plante samting, be i no finis yet! Hem i promes blong tijim yumi blong olwe. Taswe, yu mas luk trutok olsem wan sas perel. Yu mas gohed blong ‘pemaot trutok mo yu no mas salemaot.’ Nao olsem we Deved i promes long Jehova, yu tu bambae yu holem promes ya se: “Bambae mi wokbaot oltaem long trutok blong yu.”—Ol Sam 86:11; NW.