?Yu Yu Stap Folem Tingting Blong Jehova?
“Yufala i mas jenisim tingting blong yufala blong yufala i jenis fulwan.”—ROM 12:2.
1, 2. Taem save blong yumi long trutok i kam bigwan, ?yumi lanem wanem? Tokbaot wan eksampol.
WAN man i givim presen long wan smol pikinini. Ale papa mo mama blong pikinini ya i talem long pikinini se: “Yu talem tangkiu long hem.” Pikinini i talem tangkiu, hem i mekem from we papa mo mama i talem. Be taem pikinini i kam bigman, hem i stat blong kasemsave from wanem i impoten blong talem tangkiu long man we i mekem wan gudfala samting. Biaen, pikinini i gat fasin ya blong talem tangkiu from we hem i lanem blong talem tangkiu.
2 Long sem fasin, taem yumi stat blong lanem trutok, yumi lanem se i impoten blong obei long ol stamba loa blong Jehova. Be taem save blong yumi long trutok i stap kam bigwan, yumi kasemsave moa ol samting we Jehova i laekem mo ol samting we hem i no laekem. Taem yumi letem ol tingting blong Jehova oli gat paoa long prapa laef blong yumi mo long ol fasin blong yumi, yumi stap folem tingting blong hem.
3. ?From wanem samtaem i had blong folem tingting blong Jehova?
3 Yumi laekem blong folem tingting blong Jehova, be samtaem i had from we yumi sinman. Eksampol, yumi save tingting
blong Jehova long saed blong wok blong prij, klin fasin, fasin blong yusum blad, mo ol narafala samting. Be maet i had blong yumi kasemsave from wanem i hem i gat tingting olsem. Taswe, ?olsem wanem yumi save lanem blong folem tingting blong Jehova? ?Olsem wanem samting ya i save halpem yumi blong mekem i stret naoia mo long fiuja??OLSEM WANEM BLONG FOLEM TINGTING BLONG GOD?
4. ?I minim wanem se yumi mas jenisim tingting blong yumi?
4 Ridim Rom 12:2. Long vas ya, aposol Pol i tokbaot samting we yumi mas mekem blong gat tingting olsem Jehova. Hem i se yumi no mas ‘letem fasin blong yumi i kam olsem fasin blong wol ya.’ Olsem we yumi lanem long las stadi, hemia i min se yumi mas sakemaot ol fasin blong wol. Be Pol i se yumi mas jenisim tingting blong yumi. Hemia i min se yumi mas stadi long Baebol, yumi kasemsave long ol tingting blong God, yumi tingting dip long olgeta, mo yumi traehad blong gat tingting blong God.
5. ?Eksplenem olsem wanem stadi i defren long fasin ya blong rid kwik nomo?
5 Stadi i no minim nomo se yumi rid kwik mo yumi makem ol ansa. Taem yumi stadi, yumi mas traehad blong kasemsave se Jehova hem i hu, wanem ol wok blong hem, mo wanem ol tingting blong hem. Yumi traehad blong kasemsave from wanem Jehova i talem samting we yumi save mekem mo samting we yumi no save mekem. Mo tu, yumi mas luksave ol fasin mo ol tingting we yumi mas jenisim. I tru, yumi no save tingting dip long evri poen we yumi lanem taem yumi stadi. Be i gud blong tekem taem, maet haf blong taem we yumi spenem blong stadi, blong yumi tingting dip long samting we yumi ridim.—Ol Sam 119:97; 1 Timoti 4:15.
6. ?Wanem i hapen taem yumi tingting dip long Tok blong God?
6 Taem yumi tingting dip oltaem long Tok blong God, yumi stap mekem wan impoten samting. Yumi ‘pruvum,’ o yumi bilif fulwan se ol tingting blong Jehova oli stretgud olgeta. Ale yumi stat blong luksave ol tingting we Jehova i gat, mo biaen yumi folem long laef blong yumi. Yes, tingting blong yumi i jenis mo yumi folem wan niufala tingting. Sloslo yumi stap folem tingting blong Jehova.
TINGTING BLONG YUMI I SAVE GAT PAOA LONG FASIN BLONG YUMI
7, 8. (1) ?Wanem tingting blong Jehova long ol samting blong wol? (Yu luk pija long stat blong stadi.) (2) Sipos yumi folem tingting blong Jehova, ?bambae yumi luk wanem se i moa impoten?
7 Ol tingting blong yumi oli gat paoa long ol aksen blong yumi. (Mak 7:21-23; Jemes 2:17) Bambae yumi tokbaot sam eksampol. Faswan eksampol, hemia stori blong Jisas taem hem i bon, we i soemaot tingting blong Jehova long saed blong ol samting blong wol. Jehova i jusum Josef mo Meri blong tufala i lukaot long Pikinini blong hem, nating se tufala i nogat plante mane. (Levitikas 12:8; Luk 2:24) Taem Jisas i bon, Meri i “putum hem i slip insaed long bokis we ol anamol oli stap kakae long hem, from we i no moa gat rum long ol geshaos.” (Luk 2:7) Jehova i save mekem se Jisas i bon long wan gudfala ples. Be hem i no mekem olsem, hem i wantem se Jisas i gruap long wan famle we i putum wosip blong God fasples long laef blong olgeta. Hemia nao impoten samting long ae blong Jehova.
8 Stori ya i soemaot tingting blong Jehova long saed blong ol samting blong wol. Sam papa mo mama oli wantem se pikinini blong olgeta i kasem ol beswan samting blong wol, nating sipos hemia i save mekem pikinini i no moa frengud wetem Jehova. Be samting we i impoten long ae blong Jehova, hemia blong frengud wetem hem. ?Yu yu glad blong folem tingting ya blong Jehova? ?Ol aksen blong yu oli soemaot wanem?—Ridim Hibrus 13:5.
9, 10. ?Olsem wanem blong folem tingting blong Jehova blong no mekem narafala i foldaon?
9 Nambatu eksampol, hemia tingting we Jehova i gat long man we i mekem narafala i foldaon long sin, o i mekem se narafala i stop blong mekem wok blong Jehova. Jisas i se: “Man we i mekem wan long ol smolwan ya we i bilif, i foldaon, i moa gud we oli fasem wan bigfala ston long nek blong hem, mo sakem hem i go long solwota.” (Mak 9:42) !Hemia ol strong tok we Jisas i talem! Mo yumi save se Jisas i soemaot tingting blong Papa blong hem. Taswe, yumi sua se Jehova i no glad nating taem narafala i mekem wan man blong Jisas i foldaon long trutok.—Jon 14:9.
10 ?Yumi gat sem tingting olsem Jehova mo Jisas? ?Ol aksen blong yumi oli soemaot wanem? Eksampol, maet yumi laekem wan stael blong klos mo hea. Be, ?bambae yumi mekem wanem sipos yumi luksave se stael ya i save spolem tingting blong ol brata mo sista? Sipos yumi lavem ol brata mo sista, bambae yumi no folem stael ya.—1 Timoti 2:9, 10.
11, 12. ?Sipos yumi agensem samting we Jehova i no laekem bambae yumi mekem wanem?
11 Nambatri eksampol, hemia se Jehova i no laekem nating fasin we i no stret. (Aesea 61:8) Hem i save se samtaem i had blong yumi mekem samting we i stret, from we yumi sinman. Be yet, hem i wantem se yumi agensem fasin we i no stret, olsem we hem i mekem. (Ridim Ol Sam 97:10.) Sipos yumi tingting dip long risen from wanem Jehova i no laekem fasin we i no stret, hemia bambae i halpem yumi blong folem tingting blong Jehova mo no mekem ol nogud fasin.
I gat sam samting we i rong we Baebol i no talem wan stret loa long olgeta
12 Sipos yumi lanem blong no laekem samting we i no stret, bambae yumi naf blong luksave ol samting we i rong, we Baebol i no talem wan stret loa long olgeta. Eksampol, tede plante man oli laekem wan kaen danis we man i sidaon long leg blong narafala mo i mekem. * Hemia wan samting we i no stret. Be sam man oli talem se hemia i no sem mak long fasin blong mekem seks, taswe oli gohed nomo blong mekem danis ya. ?Wanem tingting blong Jehova? Yes, Jehova i no laekem nating eni samting we i no stret. Taswe, sipos yumi lanem blong bos long tingting mo yumi agensem samting we Jehova i no laekem, bambae yumi naf blong stap longwe long ol fasin we oli no stret.—Rom 12:9.
TINGBAOT SAMTING WE BAMBAE YU MEKEM LONG FIUJA
13. ?Taem yumi stadi from wanem yumi mas tingbaot tingting blong Jehova?
13 Taem yumi stadi, yumi mas tingbaot tingting blong Jehova, from we hemia i save halpem yumi blong mekem ol gudfala desisen. Nao sipos yumi kasem wan traem, be yumi save finis samting we bambae yumi mekem. (Ol Proveb 22:3) I gud yumi tokbaot sam eksampol long Baebol.
14. ?Yumi lanem wanem long ansa we Josef i talem long waef blong Potifa?
14 Taem waef blong Potifa i traem blong pulum Josef, kwiktaem nomo Josef i kamaot long hem. Hemia from we Josef i bin tingting dip long tingting we Jehova i gat long saed blong mared. (Ridim Jenesis 39:8, 9.) Josef i talem long waef blong Potifa se: ‘Sipos mi kam slip wetem yu, bambae mi mekem sin long fes blong God.’ Hemia i soemaot se Josef i gat tingting blong Jehova. ?Olsem wanem long yumi? ?Bambae yu mekem wanem sipos wan fren long wok i stap pleplei wetem filing blong yu? O ?Bambae yu mekem wanem sipos yu kasem wan rabis pija o doti mesej long mobaelfon blong yu? * Sipos yumi lanem blong folem tingting blong Jehova, bambae yumi mekem desisen finis blong mekem samting we i stret, mo bambae i isi blong yumi holemstrong long Jehova.
15. ?Olsem wanem blong holemstrong long Jehova, olsem ol trifala Hibru ya?
15 Wan narafala eksampol hemia ol trifala Hibru ya, Sedrak, Mesak, mo Abednego. Taem King Nebukadnesa i talem long olgeta blong oli mekem wosip long aedol ya we hem i stanemap, trifala i no wantem nating. Ansa we oli talem long king i soemaot se oli tingbaot finis samting we oli mas mekem, blong oli holemstrong long Jehova. (Eksodas 20:4, 5; Daniel 3:4-6, 12, 16-18) ?Olsem wanem long taem blong yumi tede? ?Bambae yu mekem wanem sipos bos blong yu i askem yu blong givim smol mane from wan lafet we i joen wetem giaman skul? I gud we naoia yumi lanem blong folem tingting blong Jehova long ol kaen samting olsem, i bitim we yumi wet kasem las minit. Nao taem yumi fesem wan traem olsem, bambae i isi nomo blong yumi talem mo mekem samting we i stret, olsem ol trifala Hibru ya.
?Yu yu mekem risej, rerem ol pepa blong tritmen blong yu, mo toktok wetem dokta blong yu? (Haf 16)
16. ?Sipos yumi tingting dip long ol tingting blong Jehova, bambae yumi mekem wanem taem yumi sik?
Ol Wok 15:28, 29) Be i gat sam rod we wan Kristin i save folem blong mekem prapa desisen blong hem long saed blong blad. Desisen ya i stanap long ol rul blong Baebol. ?Be wetaem i stret blong mekem desisen? ?Long taem we yumi slip long hospital, we maet yumi sik bigwan mo yumi wantem mekem wan kwik desisen? Blong talem stret, nogat. Taswe, naoia i taem blong yumi mekem sam risej, yumi rerem ol pepa we oli eksplenem tritmen we yumi wantem kasem, mo yumi toktok wetem dokta blong yumi. *
16 Sipos yumi tingting dip long ol tingting blong Jehova, bambae yumi naf blong holemstrong long Jehova taem yumi kasem wan sik we maet yumi no tingbaot. I tru, bambae yumi no tekem blad o eni long ol fo samting we i joen wetem blad. (17-19. ?From wanem naoia i impoten blong yumi lanem ol tingting blong Jehova? Tokbaot wan eksampol.
17 Pita i talem long Jisas se: “Masta, yu mas lukaot gud long yu.” Nao traem tingbaot ansa we Jisas i talem long Pita. Yes, Jisas i tingting dip long samting we God i wantem se hem i mekem, mo long ol profet tok long saed blong laef blong hem mo ded blong hem long wol. Save ya i givim paoa long hem blong i holemstrong long Jehova mo blong i givim laef blong hem olsem sakrefaes blong pemaot yumi evriwan.—Ridim Matiu 16:21-23.
18 Tede, God i wantem se yumi fren wetem hem mo yumi mekem bes blong yumi long wok blong talemaot gud nius. (Matiu 6:33; 28:19, 20; Jemes 4:8) Be maet i gat sam man we oli traem blong spolem gudfala tingting we yumi gat, olsem we Pita i mekem long Jisas. Eksampol, maet bos blong yu i wantem leftemap pei blong yu, be yu save finis se sipos yu akseptem, bambae yu wok plante moa aoa, mo maet bambae yu nogat naf taem blong prij mo go long ol miting. O sipos yu stap long haos mo yu go long skul, ?bambae yu mekem wanem sipos tija i se yu mas muv i go long wan defren ples blong stadi moa? Sipos samting ya i hapen, ?bambae yu prea, yu mekem risej, yu tokbaot long ol famle blong yu o long ol elda, bifo we yu mekem wan desisen? I gud we yu lanem naoia blong save tingting blong Jehova long saed blong ol samting ya, mo yu folem tingting blong hem. Nao taem wan samting olsem i traem yu, be bambae yu naf blong stanap strong from we yu agri finis blong gohed nomo long wok blong Jehova.
19 Maet yu tingbaot wan samting we i traem fasin blong yu blong holemstrong long Jehova. I tru, yumi no save wanem traem bambae yumi kasem. Be sipos yumi tingting dip long ol tingting blong Jehova long taem we yumi mekem prapa stadi blong yumi, bambae i isi blong yumi tingbaot ol samting we yumi lanem. Mo tu, bambae yumi save olsem wanem blong folem tingting blong Jehova long eni samting we yumi fesem. Taswe taem yumi stadi, i gud we yumi faenem tingting blong Jehova, yumi folem, mo yumi tingbaot olsem wanem samting ya bambae i halpem yumi blong mekem ol gudfala desisen naoia mo long fiuja.
TINGTING BLONG JEHOVA MO FIUJA BLONG YU
20, 21. (1) ?Long niufala wol bambae yumi fri long wanem? (2) ?Olsem wanem blong stap glad tede?
20 Yumi evriwan i wantem stap long niufala wol. Bighaf blong yumi i gat hop blong laef olwe long Paradaes long wol. Kingdom blong God nomo bambae i mekem yumi fri long ol trabol we oli stap spolem ol man tede. Mo long niufala wol, bambae yumi fri yet blong jusum samting we yumi wanwan i laekem.
21 Be hemia i no min se bambae yumi fri olgeta. Olgeta we tingting blong olgeta i stap daon, bambae oli gohed blong mekem ol desisen folem ol loa mo ol tingting blong Jehova. Nao bambae ol man oli glad mo oli gat pis. (Ol Sam 37:11) Be tede, yumi save gohed blong stap glad, sipos yumi folem tingting blong Jehova long laef blong yumi.
^ par. 12 Hemia wan danis we maet wan man o woman we i haf neked, i sidaon long leg blong narafala mo i muvmuv long fasin blong mekem seks. Sipos wan Kristin i mekem samting ya, maet ol elda oli mas putumap wan kot komiti blong i lukluk long kes ya, folem samting we hem i mekem, from we hemia i olsem rabis fasin blong seks. Wan Kristin we i mekem fasin ya, i mas askem ol elda blong oli halpem hem.—Jemes 5:14, 15.
^ par. 14 Sipos wan Kristin i sanem ol doti pija blong seks, ol doti mesej, mo ol video, i go long wan narafala, maet ol elda oli mas putumap wan kot komiti blong lukluk long kes ya. Long sam kes olsem, ol haeman blong gavman oli jajem ol yangfala we oli mekem fasin ya se oli brekem loa. Blong save moa, yu go long jw.org mo yu luk atikol ya “Sanem Ol Doti Mesej Long Mobaelfon” we i kamaot long !Wekap! blong Novemba 2013, pej 4-5.
^ par. 16 Blong save moa long saed blong ol rul blong Baebol we oli save halpem yu, yu luk buk ya Stap Long Laef Ya We God i Lavem Yu, pej 215-218.