1. ?From wanem yumi nidim we narafala i leftemap tingting blong yumi?

YUMI evriwan i nidim we narafala i leftemap tingting blong yumi. Maet from we wan famle i ded, yumi wari, yumi sik, yumi kam olfala, o maet narafala i mekem i nogud long yumi. Antap moa, fasin blong ol man raonabaot long yumi i stap kam moa nogud. I tru, “laef bambae i strong tumas” mo hemia i soemaot klia se yumi stap “long ol las dei,” mo evridei yumi stap kam klosap moa long niufala wol. (2 Timoti 3:1) Maet yumi wet longtaem finis blong luk se ol promes blong Jehova bambae oli kamtru, mo evridei laef blong yumi i stap kam had moa. Taswe, ?hu i save leftemap tingting blong yumi?

2, 3. (1) ?Yumi save wanem long saed blong Habakuk? (2) ?Olsem wanem buk blong Habakuk i save halpem yumi?

² I gud yumi stadi long buk blong Habakuk blong faenem  ansa blong kwestin ya. Nating se Baebol i no givim evri smosmol save long saed blong Habakuk, be buk blong hem i save leftemap tingting blong yumi. Maet nem ya Habakuk i minim, “Wantem Blong Putum Han i Goraon.” Hemia i soemaot fasin blong Jehova blong leftemap tingting blong yumi, i olsem we i putum han blong hem i goraon long yumi. O i save min se yumi holemtaet han blong Jehova. Habakuk i toktok long Jehova mo i askem sam kwestin, nao Jehova i yusum Habakuk blong raetemdaon ol samting ya blong givhan long yumi.—Habakuk 2:2.

³ Hemia nomo samting we Baebol i tokbaot long saed blong Habakuk. Be buk blong hem i wan haf blong “olgeta tok we oli raetem bifo” long Tok blong God, blong mekem se “yumi save gat hop from we ol tok blong Baebol oli mekem yumi harem gud mo oli mekem se yumi save stanap strong longtaem.” (Rom 15:4) ?Olsem wanem buk blong Habakuk i save halpem yumi? I save halpem yumi blong luksave se i minim wanem blong trastem Jehova. Mo i mekem yumi sua se yumi save gat pis long tingting nomata wanem problem o traem we yumi gat.

4. ?From wanem Habakuk i harem nogud tumas?

⁴ Ridim Habakuk 1:2, 3. Habakuk i laef long wan taem we i had tumas. Ol man oli mekem plante nogud fasin mo hem i harem nogud tumas. Long evri ples, ol man Isrel oli stap mekem ol narafala oli safa. Hem i stap tingting se: ‘?Wetaem ol nogud fasin ya bambae oli finis? ?From wanem Jehova i tektaem tumas blong stretem ol trabol ya?’ Tingting blong Habakuk i foldaon bigwan. Taswe hem i askem strong long Jehova blong i mekem wan samting. Ating Habakuk i stat blong ting se Jehova i no moa kea long ol man blong hem o se bambae hem i no tekem aksen. ?Yu yu harem olsem tu samtaem?

5. ?Yumi lanem wanem long buk blong Habakuk? (Yu luk pija long stat blong stadi.)

⁵ ?Habakuk i askem ol kwestin ya from we hem i no moa trastem Jehova mo ol promes blong hem? !Nogat! Habakuk i gohed blong trastem Jehova, taswe hem i askem Jehova blong i halpem hem long ol trabol we hem i fesem. Habakuk i wari mo i no kasem save from wanem Jehova i tektaem mo i letem hem i stap safa. Jehova i letem Habakuk blong i raetem daon ol wari blong hem, blong tijim yumi se yumi no mas fraet blong talemaot ol tingting mo ol wari blong yumi long Jehova. Hem i wantem se yumi prea long hem mo talemaot ol filing blong yumi. (Ol Sam 50:15; 62:8) Ol Proveb 3:5 i leftemap tingting blong yumi se: “I nogud yu ting se save ya blong yu naoia,  hem i naf blong givhan long yu. Yu mas trastem Hae God long olgeta tingting blong yu.” Habakuk i folem ol tok ya long laef blong hem.

6. ?From wanem i impoten blong prea?

⁶ Habakuk i trastem Jehova, we i Papa mo Fren blong hem. Ale, hem i tekem janis ya blong kam klosap long Jehova. Hem i no traem blong stretem trabol ya hem wan. Be hem i talemaot olgeta filing blong hem long Jehova. Hemia i wan gudfala eksampol long yumi. Jehova i stap lesin long ol prea mo i wantem se yumi trastem hem, hemia taem yumi prea mo talemaot ol wari blong yumi long hem. (Ol Sam 65:2) Nao bambae yumi luksave se Jehova i stap ansa long ol prea blong yumi. Taem hem i leftemap tingting blong yumi mo i lidim yumi, i olsem we hem i putum han i goraon long yumi. (Ol Sam 73:23, 24) Bambae hem i halpem yumi blong kasem save se hem i stap luk olgeta trabol blong yumi. Prea i wan nambawan rod blong soemaot se yumi trastem Jehova.

7. ?Jehova i mekem wanem taem Habakuk i talemaot ol wari blong hem?

⁷ Ridim Habakuk 1:5-7. Afta we Habakuk i talemaot ol wari blong hem long Jehova, maet hem i stap tingbaot olsem wanem Jehova bambae i tekem aksen. Jehova i gat lav mo i kasem save long filing blong Habakuk. Hem i save se Habakuk i safa mo i nidim help. Taswe hem i no tok strong long Habakuk, be hem i talemaot panis we ol man Isrel bambae oli kasem. Ating Habakuk i faswan man we Jehova i talemaot panis ya long hem.

8. ?From wanem ansa blong Jehova i no samting we Habakuk i stap tingbaot?

⁸ Jehova i eksplenem long Habakuk se hem i rere blong tekem aksen. Bambae hem i panisim ol man Juda we oli stap mekem ol nogud fasin. Hem i talem long Habakuk se, samting ya bambae i kamtru “long taem blong yufala.” Ansa we Jehova i givim, i no samting we Habakuk i tingbaot. ?From wanem? From we ol man Babilon oli nogat sori mo oli raf moa i bitim ol man Isrel we oli save ol loa blong Jehova. ?From wanem Jehova i yusum ol man Babilon blong panisim ol man Isrel? Hemia bambae i mekem se fasin safa i kam moa bigwan long Juda. Sipos yu yu Habakuk, ?bambae yu harem olsem wanem?

9. ?Wanem sam narafala kwestin we Habakuk i askem?

⁹ Ridim Habakuk 1:12-14, 17. Habakuk i kasemsave se Jehova bambae i yusum ol man Babilon blong panisim ol man raonabaot long hem, be yet tingting blong hem i fasfas. Nating se i olsem, hem i gat tingting daon mo i gohed blong trastem Jehova. Hem i soemaot samting ya, taem hem i talem se Jehova i ‘gudfala ples blong haed blong mi.’ (Dutronome 32:4; Aesea 26:4) Habakuk i savegud se Jehova i gat lav mo i kaen. Taswe hem i askem sam moa kwestin olsem: ?From wanem Jehova i letem laef long Juda i kam mowas, mo i letem ol man oli safa moa? ?From wanem Jehova i no kwik blong tekem aksen? ?From wanem Jehova i  “stap kwaet” mo i letem fasin nogud i gohed? Jehova i “Tabu” mo i “no wantem nating blong luk ol rabis fasin,” ?be from wanem hem i letem ol samting ya oli hapen?

10. ?From wanem samtaem yumi save gat filing olsem Habakuk?

¹⁰ Samtaem yumi save gat filing olsem Habakuk. Yumi lesin long Jehova, yumi trastem hem, yumi stadi Baebol we i mekem hop blong yumi strong, mo yumi harem ol promes blong Jehova long ogenaesesen blong hem we i stap tijim. Be yet yumi stap tingting se: ‘?Wetaem ol samting we oli mekem yumi safa bambae oli finis? Yumi save lanem lesen from nekis wan samting we Habakuk i mekem.

11. ?Habakuk i gat strong tingting blong mekem wanem?

¹¹ Ridim Habakuk 2:1. Habakuk i toktok wetem Jehova, nao hem i gat pis long tingting, mo i gat strong tingting blong wet long Jehova blong i tekem aksen. Taswe hem i se: “Bambae mi mi stap wet gogo taem ya i kamtru.” (Habakuk 3:16) Mo tu, i bin gat sam narafala man blong God we oli wet blong luk Jehova i tekem aksen. Eksampol blong olgeta i tijim yumi blong yumi mekem sem mak.—Maeka 7:7; Jemes 5:7, 8.

12. ?Yumi lanem wanem from strong tingting blong Habakuk?

¹² ?Yumi lanem wanem from strong tingting blong Habakuk? Faswan se, yumi mas gohed blong prea long Jehova nomata wanem problem yumi gat. Namba tu, yumi mas lesin long ol samting we Jehova i talem long yumi, tru long Baebol mo ogenaesesen blong hem. Mo namba tri, yumi mas gat longfala tingting blong wet mo trastem Jehova se long stret taem, bambae hem i karemaot ol trabol blong yumi. Nao bambae yumi gat pis long tingting mo yumi naf blong stanap strong, olsem Habakuk. Mo hop we yumi gat, bambae i halpem yumi blong gat longfala tingting mo stap glad nomata wanem problem yumi gat. Yumi sua se Jehova bambae i tekem aksen.—Rom 12:12.

13. ?Jehova i leftemap tingting blong Habakuk olsem wanem?

¹³ Ridim Habakuk 2:3. Yumi sua se Jehova i glad we Habakuk i wet long hem blong i tekem aksen. Jehova i savegud ol samting we oli mekem Habakuk i safa, taswe hem i leftemap tingting blong Habakuk, mo i talem se i no longtaem bambae hem i finisim olgeta samting ya. I olsem we Jehova i talem se: “Yu gat longfala tingting mo yu trastem mi. Bambae mi ansa long prea blong yu, nating sipos yu luk se i tektaem.” Jehova i mekem Habakuk i tingbaot bakegen se hem i makemaot wan taem finis blong mekem ol promes  blong hem oli kamtru. Taswe hem i leftemap tingting blong Habakuk blong i gohed blong wet, olsem nao bambae hem i no harem nogud.

14. ?Yumi mas gat strong tingting blong mekem wanem taem yumi kasem trabol?

¹⁴ Tede, yumi mas wet long Jehova blong i tekem aksen mo yumi mas lesingud long ol samting we hem i talem. Nao bambae yumi trastem hem mo yumi gat pis long tingting nomata wanem trabol yumi gat. Jisas i talem se yumi no mas tingbaot “ol dei mo ol taem” we God i no talemaot long yumi. (Ol Wok 1:7) Yumi mas trastem se Jehova i save stret taem blong hem i tekem aksen. Taswe, yumi mas gohed blong gat tingting daon, longfala tingting, mo trastem God. Taem yumi stap wet, yumi mas yusumgud taem blong yumi blong mekem wok blong Jehova.—Mak 13:35-37; Galesia 6:9.

15, 16. (1) ?Wanem ol promes we yumi faenem long buk blong Habakuk? (2) ?Ol promes ya oli tijim yumi long wanem?

¹⁵ Jehova i promes se: “Olgeta ya nomo we fasin blong olgeta i stret, bambae oli save laef, from we tingting blong olgeta i stap strong long mi nomo . . . Long evri ples long wol, olgeta man bambae oli luksave bigfala paoa blong Hae God mo hae nem blong hem.” (Habakuk 2:4, 14) Yes, Jehova i promes blong givim laef we i no save finis long  olgeta we oli gat longfala tingting mo oli trastem hem.

¹⁶ Promes ya long Habakuk 2:4 i impoten tumas, taswe aposol Pol i raetemdaon tri taem bakegen long ol leta blong hem. (Rom 1:17; Galesia 3:11; Hibrus 10:38) Yumi sua se nomata wanem hadtaem yumi kasem, bambae yumi luk ol promes blong Jehova oli kamtru sipos yumi trastem hem. Jehova i wantem we yumi putum tingting blong yumi long hop ya blong fiuja.

17. ?Jehova i promes blong mekem wanem?

¹⁷ Buk blong Habakuk i tijim wan impoten lesen long yumi we yumi laef long ol lasdei ya. Jehova i promes blong givim laef we i no save finis long olgeta we oli trastem hem. Taswe i gud yumi gohed blong trastem God moa nomata wanem trabol yumi gat. Samting we Jehova i talem long Habakuk, i mekem yumi sua fulwan se Hem bambae i sapotem yumi mo i sevem yumi. Hem i askem yumi blong trastem hem, mo gat longfala tingting blong wet long taem ya we Kingdom blong hem bambae i rulum wol. Long taem ya, wol bambae i fulap long ol stret man we oli wosipim Jehova.—Matiu 5:5; Hibrus 10:36-39.

18. ?Ol tok blong Jehova oli mekem wanem long Habakuk?

¹⁸ Ridim Habakuk 3:16-19. Habakuk i kasem save long ol tok we Jehova i talem long hem. Hem i tingting dip long ol nambawan samting we Jehova i mekem long ol man blong hem bifo. Nao hem i trastem Jehova moa. !Hem i sua se Jehova bambae i tekem aksen i no longtaem! Taswe hem i glad, nating se hem i mas safa blong smoltaem. Naoia hem i trastem fulwan se Jehova bambae i sevem hem. Tok we hem i talem long vas 18 i soemaot se hem i rili trastem Jehova. Sam man blong stadi dip long Baebol oli ting se tok ya i minim: “Bambae mi jamjam from we mi glad long Masta. Bambae mi danis from we mi glad long God.” !Hemia wan nambawan lesen blong yumi evriwan! Jehova i no jes talemaot nomo ol nambawan promes blong fiuja, be hem i mekem yumi sua se i no longtaem bambae hem i mekem ol promes ya oli kamtru.

19. ?Yumi mas mekem wanem blong Jehova i leftemap tingting blong yumi?

¹⁹ Impoten lesen we yumi lanem long buk blong Habakuk, hemia blong trastem Jehova. (Habakuk 2:4) Blong gohed blong trastem Jehova, yumi mas frengud moa wetem hem. Taswe, hemia samting we yumi mas mekem. (1) Gohed blong prea mo talemaot olgeta wari mo trabol blong yumi long Jehova. (2) Yumi mas lesingud mo folem ol samting we Jehova i talem, tru long Baebol mo ogenaesesen blong hem. (3) Yumi mas gohed blong gat longfala tingting mo wet blong luk ol promes blong Jehova oli kamtru. Hemia nao ol samting we Habakuk i mekem. !Nating se tingting blong hem foldaon bigwan, be biaen, Jehova i leftemap tingting blong hem mo hem i haremgud bakegen! Sipos yumi mekem olsem Habakuk, Jehova bambae i leftemap tingting blong yumi, olsem we hem i putum han i goraon long yumi. Yes, Jehova nomo i save leftemap tingting blong yumi.