1, 2. (1) ?Jisas i talem wanem long Pita? (Yu luk pija long stat blong stadi.) (2) ?Ansa blong Jisas i soemaot wanem?

OL DISAEPOL oli ting se Jisas nao bambae i mekem ol man Isrel oli fri, be oli sek taem Jisas i talem se i no longtaem bambae hem i safa mo i ded. Nao kwiktaem nomo Pita i talem se: “Masta, yu mas lukaot gud long yu, samting ya i no mas hapen long yu.” Be Jisas i talem se: “!Yu gowe long mi, Setan! Yu yu wan ston we i blokem mi, from we tingting blong yu i no tingting blong God, i tingting blong man nomo.”—Matiu 16:21-23; Ol Wok 1:6.

² Tok ya i soemaot klia se tingting blong Jehova, i defren long tingting blong wol. (1 Jon 5:19) Pita i wantem se Jisas i mekem olsem ol man blong wol we oli tingbaot olgeta nomo. Be Jisas i save se Jehova i wantem we hem i rere from trabol we bambae hem i fesem i no longtaem. Ansa we Jisas i talem i soemaot se hem i folem nomo tingting blong Jehova mo i no laekem nating tingting blong wol.

3. ?From wanem i had blong folem tingting blong Jehova?

³ ?Olsem wanem long yumi? ?Yumi stap folem tingting blong Jehova o tingting blong wol? Yumi ol Kristin, yumi traehad blong mekem samting we God i glad long hem. ?Be olsem wanem long ol samting we yumi stap tingbaot? ?Yumi traehad blong tingbaot ol samting olsem we Jehova tingbaot? Blong mekem olsem, i nidim we yumi mas traehad. Yes, i isi nomo blong folem tingting blong wol, from we spirit blong wol i stap raonabaot long yumi. (Efesas 2:2) Mo tu, plante taem ol man blong wol oli tingbaot olgeta nomo, mo maet hemia i save mekem yumi wantem kam olsem olgeta. Taswe, i had blong folem tingting blong Jehova be i isi blong folem tingting blong wol.

4. (1) ?Wanem bambae i hapen sipos yumi letem tingting blong wol i lidim yumi? (2) ?Bambae yumi tokbaot wanem long stadi ya?

⁴ Sipos yumi letem tingting blong wol i lidim yumi, bambae yumi tingbaot yumi wan mo yumi no wantem we narafala i talem samting long yumi. (Mak 7:21, 22) Taswe i impoten we yumi lanem blong folem “tingting blong God,” i no “tingting blong man.” Stadi ya bambae i halpem yumi blong mekem olsem. Bambae yumi tokbaot from wanem ol tingting blong Jehova oli no strong tumas, be oli blong halpem yumi. Mo tu, bambae yumi tokbaot olsem wanem blong no folem tingting blong wol ya. Long nekis stadi, bambae yumi lanem olsem wanem blong folem tingting blong Jehova long laef blong yumi.

5. ?From wanem sam man oli no wantem se narafala i jenisim tingting blong olgeta?

⁵ Sam man oli no wantem folem tingting blong narafala. Oli talem ol tok olsem: “Mi folem tingting blong mi nomo.” Hemia i soemaot se oli no wantem se narafala i mekem desisen blong olgeta mo se oli gat raet blong mekem olsem. Oli no wantem se narafala i lidim olgeta, o i fosem olgeta blong mekem sem mak olsem ol narafala. *

6. (1) ?Jehova i letem yumi fri blong mekem wanem? (2) ?Hemia i min se yumi fri olgeta?

⁶ Sipos yumi folem tingting blong Jehova, be yet yumi fri blong jusum samting we yumi wantem. Seken Korin 3:17 i talem se: “Long ples we spirit blong Jehova i stap, man i save fri.” Jehova i letem yumi fri blong jusum samting we yumi wantem. Yumi fri blong jusum ol samting we yumi laekem. Jehova i wokem yumi blong mekem olsem, be hemia i no min se yumi fri olgeta. (Ridim 1 Pita 2:16.) Jehova i wantem se yumi yusum Tok blong hem, taem yumi mas mekem desisen blong fanemaot samting we i stret mo samting we i no stret. ?Yu ting se hemia i strong tumas o i blong halpem yumi?

7, 8. ?Ol tingting blong Jehova oli blokem yumi blong mekem samting we yumi laekem? Tokbaot wan eksampol.

 ⁷ Yu traem tingbaot. Ol papa mo mama oli traehad blong tijim pikinini long ol gudfala fasin. Maet oli tijim pikinini blong i tok tru, i wok had, mo i kea long narafala. Hemia i no blokem pikinini blong i mekem samting we hem i laekem. Defren olgeta, tufala i stap rerem pikinini blong i gat wan gudfala laef. Taem pikinini i kam bigman, bambae hem i fri blong mekem ol prapa desisen blong hem. Sipos hem i jusum blong folem ol advaes blong papa mo mama, bambae hem i save mekem ol gudfala desisen, mo bambae hem i no kasem plante problem.

⁸ Jehova i wantem se ol pikinini blong hem oli haremgud long laef blong olgeta. (Aesea 48:17, 18) Taswe, hem i tijim yumi long ol stamba rul blong Baebol we oli halpem yumi blong gat ol gudfala fasin. Hem i wantem se yumi lanem blong folem ol tingting blong hem. Hemia i no blokem yumi long ol samting we yumi laekem, be i mekem yumi kam waes moa, mo i halpem yumi blong mekem ol gudfala desisen. (Ol Sam 92:5; Ol Proveb 2:1-5; Aesea 55:9) Bambae yumi gohed blong mekem samting we yumi laekem, be bambae yumi glad from ol desisen we yumi mekem. (Ol Sam 1:2, 3) !Taem yumi folem tingting blong Jehova, yumi kasem plante blesing!

9, 10. ?Wanem i pruvum se tingting blong Jehova nomo i beswan?

⁹ Wan narafala risen from wanem yumi wantem folem tingting blong Jehova, hemia from we tingting blong Jehova nomo i beswan. Wol i givim advaes olsem wanem blong gat wan hapi famle, gat gudfala fasin, mo kasem wan gudfala wok mo ol narafala samting long laef. Be bighaf blong ol advaes ya oli no folem tingting blong Jehova. Eksampol, plante taem wol i pulum ol man blong oli tingbaot olgeta nomo, mo blong oli agri long ol rabis fasin blong seks. Mo tu samtaem i talem se wan hasban mo waef bambae oli glad moa sipos oli seraot o divos from wan smol trabol nomo. Be advaes ya i agensem wanem we Baebol i talem. Tede, ?advaes we wol i givim i gud moa i bitim advaes blong Baebol?

¹⁰ Jisas i talem se: “Ol gudfala wok blong man we i waes, oli soemaot se waes ya i tru.” (Matiu 11:19) Nating se wol i mekem teknoloji i kam antap, be hem i no naf blong stretem ol samting we i mekem man i harem nogud, olsem ol faet, fasin blong agensem narafala, mo ol trabol we man i mekem. Mo tu, wol i agri long enikaen doti fasin blong seks. Be plante man oli luksave se samting ya i spolem ol famle, i spolem helt blong man, mo i gat rabis frut. ?Olsem wanem long advaes blong Jehova? Ol Kristin we oli folem tingting blong  Jehova, oli gat wan hapi famle, oli helti, mo oli frengud wetem ol brata mo sista long fulwol. (Aesea 2:4; Ol Wok 10:34, 35; 1 Korin 6:9-11) Hemia i pruvum se tingting blong Jehova nomo i beswan.

11. ?Hu i jenisim tingting blong Moses, mo wanem frut i kamaot?

¹¹ Ol gudfala man blong Jehova bifo, oli luksave se tingting blong Jehova nomo i beswan. Eksampol, nating se Moses i kasem “olgeta waes blong ol man Ijip,” be hem i save se Jehova nomo i givim trufala waes. (Ol Wok 7:22; Ol Sam 90:12) Taswe hem i askem Jehova se: “Plis yu tijim mi long ol fasin blong yu.” (Eksodas 33:13) Moses i letem Jehova i jenisim tingting blong hem, nao Jehova i yusum hem blong mekem stamba tingting blong Hem i kamtru. Mo hem i glad tumas long Moses, nao hem i talem se Moses i wan man we i gat bigfala bilif.—Hibrus 11:24-27.

12. ?Pol i folem tingting blong hu taem hem i mekem desisen?

¹² Aposol Pol i wan man we i waes, i skul gud, mo i toktok tu lanwis. (Ol Wok 5:34; 21:37, 39; 22:2, 3) Be hem i no folem waes blong wol, hem i folem Tok blong God blong mekem ol desisen. (Ridim Ol Wok 17:2; 1 Korin 2:6, 7, 13.) From samting ya, hem i glad long wok blong prij mo i tingbaot praes we bambae hem i kasem long fiuja.—2 Timoti 4:8.

13. ?Hu i mas jenisim tingting blong yumi?

¹³ I klia se tingting blong God nomo i beswan. Sipos yumi folem ol rul blong God, bambae laef blong yumi i rongud mo yumi gat trufala glad. Be Jehova i no fosem yumi blong folem tingting blong hem. “Gudfala slef we i waes” mo ol elda tu, oli no bos long ol tingting blong yumi. (Matiu 24:45; 2 Korin 1:24) Yumi wanwan i mas jenisim prapa tingting blong yumi, blong yumi save folem tingting blong Jehova. ?Olsem wanem blong mekem samting ya?

14, 15. (1) ?Yumi mas tingting dip long wanem blong yumi save folem tingting blong Jehova? (2) ?From wanem yumi no mas letem tingting blong wol i gat paoa long yumi? Tokbaot wan eksampol.

¹⁴ Rom 12:2 i se: “Yufala i no mas letem fasin blong yufala i kam olsem fasin blong wol ya, be yufala i mas jenisim tingting blong yufala blong yufala i jenis fulwan, olsem nao bambae yufala i save pruvum se samting we God i wantem i gud, i stret gud, mo hem i glad long hem.” Vas ya i soemaot se nomata wanem tingting yumi folem bifo we yumi lanem trutok, be yet yumi save jenisim mo folem tingting blong God. I tru, maet sam samting we i hapen long laef blong yumi i gat paoa long tingting blong yumi, be tingting blong yumi i save jenis. Mo bambae i jenis folem samting we yumi jusum blong tingbaot. Sipos yumi tingting dip long ol tingting blong Jehova, bambae yumi luksave se tingting blong hem nomo i stret. Nao bambae yumi wantem blong folem tingting blong Jehova.

¹⁵ Be blong folem tingting blong Jehova,  yumi ‘no mas letem fasin blong yumi i kam olsem fasin blong wol ya.’ Hemia i min se yumi mas stop blong wajem, ridim, mo lesin long eni samting we i agensem tingting blong God. Traem tingbaot, sipos wan man i wantem stap helti, maet hem i jusum blong kakae ol gudfala kakae. !Be sipos oltaem hem i stap kakae ol rabis kakae, traehad blong hem blong stap helti i blong nating nomo! Long sem fasin, sipos yumi letem ol tingting blong wol oli gat paoa long tingting blong yumi, traehad blong yumi blong folem tingting blong Jehova i blong nating nomo.

16. ?Yumi mas protektem yumi from wanem samting?

¹⁶ ?Olsem wanem? ?Yumi save blokem fulwan ol tingting blong wol? Nogat, yumi no save mekem olsem from we yumi stap long wol ya. (1 Korin 5:9, 10) Taem yumi prij, bambae yumi harem ol man oli talem ol rong tingting mo ol giaman bilif. Be from we yumi no save blokem fulwan ol rong tingting ya, yumi no mas gohed blong tingbaot olgeta. Yumi mas kwik olsem Jisas, blong blokem ol tingting we Setan i wantem se yumi gat. Blong protektem yumi, i impoten blong no tingbaot ol tingting blong wol.—Ridim Ol Proveb 4:23.

17. ?Yumi save mekem wanem blong blokem ol tingting blong wol?

¹⁷ Eksampol, yumi mas jusum gud ol fren blong yumi. Baebol i givim woning se sipos yumi fren tumas wetem ol man we oli no wosipim Jehova, bambae yumi stat blong folem tingting blong olgeta. (Ol Proveb 13:20; 1 Korin 15:12, 32, 33) Mo tu, yumi mas jusum gud ol samting blong spel mo pleplei. Ol samting we i leftemap tijing blong evolusen, raf fasin, mo rabis fasin, oli save ‘blokem yumi blong no save God.’ Taswe, yumi mas blokem ol samting ya.—2 Korin 10:5.

18, 19. (1) ?From wanem yumi mas lukaotgud long ol tingting blong wol we maet i no isi blong luksave? (2) ?Wanem ol kwestin we i gud yumi askem, mo from wanem?

¹⁸ Mo tu yumi mas blokem ol tingting blong wol we maet i no isi blong luksave. Eksampol, sam nius we man i talemaot maet i soemaot se oli sapotem wan grup blong politik. Mo sam stori oli leftemap ol samting we wol i pulum ol man blong mekem. Sam muvi mo ol buk oli leftemap tingting ya se, “mi faswan” mo “famle faswan” mo oli pulum man blong mekem olsem. Be Baebol i agensem fasin ya. Hem i talem se sipos yumi lavem Jehova fastaem, bambae yumi wetem ol famle blong yumi, yumi gat trufala glad. (Matiu 22:36-39) Mo tu sam stori blong ol pikinini, we maet plante man oli laekem, i pulum ol pikinini blong mekem ol fasin we i no stret.

¹⁹ Hemia i no min se i rong blong wajem ol muvi, be i gud yumi askem yumi wan se: ‘?Mi mi naf blong luksave ol tingting blong wol we maet i no isi blong luksave? ?Mi mi lukaotgud se ol pikinini blong mi oli no wajem ol program blong TV mo ridim ol buk we i leftemap tingting blong wol? ?Mi mi halpem ol pikinini blong mi blong oli gat tingting blong Jehova?’ Sipos yumi luksave se tingting blong God i defren long tingting blong wol, bambae yumi no ‘letem fasin blong yumi i kam olsem fasin blong wol ya.’

20. ?Olsem wanem blong faenemaot se yumi stap folem tingting blong hu?

²⁰ Yumi mas tingbaot se i gat tu ples blong kasem ol infomesen. Faswan hemia Jehova, mo nambatu hemia Setan mo wol blong hem. ?Yu yu folem tingting blong hu? Ansa hemia, man we yu go long hem blong kasem infomesen. Sipos yumi folem ol tingting blong wol, bambae yumi gat tingting blong wol mo bambae yumi stat blong tingbaot yumi nomo. Taswe i impoten tumas we yumi jusum gud ol samting we yumi wajem, yumi ridim, yumi lesin long hem, mo yumi tingbaot.

21. ?Long nekis stadi bambae yumi tokbaot wanem?

²¹ Long stadi ya, yumi lanem se blong folem tingting blong Jehova, yumi mas blokem ol tingting blong wol. Mo tu yumi mas tingting dip long ol tingting blong God, olsem nao bambae yumi folemgud ol tingting blong hem. Long nekis stadi, bambae yumi tokbaot samting ya.