MI MI bon long Wichita, Amerika, long 10 Disemba 1936. Mi mi fasbon long 4 pikinini. Papa mo mama blong mi, William mo Jean, tufala i obei gud long Jehova. Papa i lukaot long “kampani” blong ol brata mo sista, we naoia yumi talem kodineta blong ol elda. Mama i kasem trutok long mama blong hem, Emma Wagner. Emma i tijim plante man long trutok, wan long olgeta hemia Gertrude Steele, we i bin mekem wok blong misinari long Poto Riko. * Taswe i gat plante gudfala eksampol we mi save folem.

Taem mi gat 5 yia, mi mo papa blong mi i stap givimaot Wajtaoa mo Consolation (naoia Wekap!) long ol man long rod, long wan Sarede long sapa. Long taem ya, Amerika i stap joen fulwan long Wol Wo Tu. Be Papa i no joen long faet. Wan dokta we i drong i wokbaot i kam mo i tok nogud long Papa, se hem i wan man blong fraet mo i mekem eskius blong no joen long faet. Hem i kam klosap long Papa, i lukluk stret long fes blong hem, mo i talem se: “!Yu faetem mi! !Yu yu woman stret!” Mi mi fraet, be mi glad long Papa. Hem i no talem wan samting, be i gohed nomo blong givimaot magasin long ol man raonabaot. Nao wan  soldia i wokbaot i kam, mo dokta ya i singaot long hem se: “!Yu kam kilim man ya, hem i woman stret!” Soldia i luk se man ya i drong, nao i talem se: “!Yu no tok, yu go slip fastaem!” Ale tufala tugeta i wokbaot i go. Mi mi talem tangkiu long Jehova we hem i mekem se Papa i no fraet. Papa i gat 2 ples blong katem hea long Wichita, mo dokta ya i wan kastoma blong hem.

Taem mi gat 8 yia, Papa mo Mama i salem haos mo tufala stoa, mo Papa i bildim wan smol haos we i gat wil. Nao mifala i muv i go long Colorado, klosap long Grand Junction, long wan ples we i nidim moa man blong prij. Tufala i mekem wok blong paenia, mo tufala i wok haftaem long plantesen. Jehova i blesem had wok blong tufala, nao kongregesen i stanap. Long 20 Jun 1948, Papa i baptaesem mi long wan reva. Sam narafala, olsem Billie Nichols mo woman blong hem, olgeta tu oli baptaes. Biaen, brata ya i mekem wok blong eria elda, mo boe blong hem tu i mekem wok ya.

Mifala i fren gud wetem plante we oli bisi long wok blong Jehova, antap moa, famle Steele​—Don mo Earlene, Dave mo Julia, Si mo Martha. Mifala i laekem tumas blong tokbaot Baebol wetem olgeta, mo oli gat bigfala paoa long laef blong mi. Oli soemaot long mi se sipos yumi lukaot Kingdom fastaem, yumi save yusum gud laef blong yumi mo kasem glad.

Taem mi gat 19 yia, wan fren blong famle, Bud Hasty, i askem long mi blong mi mekem wok blong paenia wetem hem. Eria elda i askem long mitufala blong go long Ruston, Louisiana. Long ples ya i gat sam Witnes we oli no moa prij. Hem i talem long mitufala blong mekem ol miting evri wik, nating se mitufala nomo. Ale, mitufala i faenem wan ples blong mekem miting. Nating se mitufala nomo i stap long miting, be mitufala i mekem evri haf blong miting, wan i lidim, narawan i ansarem ol kwestin. !Sipos i gat wan pleplei, mitufala tugeta i go antap long stej, be i no gat man blong lesin! Afta, wan olfala sista i kam long miting. Sloslo, samfala we oli stadi Baebol, mo sam Witnes we oli no moa prij, oli stap kam long miting, mo i no longtaem i gat wan kongregesen.

Wan dei, mi mo Bud i prij long pasta blong Jos Blong Kraes, mo hem i tokbaot ol vas we mi mi no save. Mi wari long samting ya, nao mi tingting dip long bilif blong mi. Long wan ful wik, mi stadi evri naet blong faenem ansa blong ol kwestin blong hem. Hemia i givhan long mi bigwan blong fren moa wetem Jehova, nao mi wantem tumas blong prij long wan narafala pasta.

Smoltaem afta, eria elda i askem long mi blong mi muv i go long El Dorado, Arkansas. Sam samtaem mi mas gobak long Colorado, long ofis we i mekem desisen se hu i joen long ami. Wan dei, mi wetem sam narafala paenia i stap mekem trip ya, nao long Texas mifala i gat wan aksiden we i spolem gud trak blong mi. Wan brata i kam tekem mifala i go long haos blong hem mo long miting. Sam brata oli kaen tumas nao oli givim smol mane long mifala. Mo tu, brata i salem trak blong mi blong klosap 2,500 vatu.

Wan narafala man i tekem mifala i go long Wichita. Wan fren i paenia long ples ya, nem blong hem E. F. McCartney, be mifala i singaot hem se Dok. Hem i gat tu boe, Frank mo Francis, we tufala i bes fren blong mi kam kasem tede. Tufala i salem trak blong tufala long mi blong 2,500 vatu, hemia stret mane we mi bin kasem blong olfala  trak blong mi. Long taem ya nao mi jes luksave se, sipos yumi lukaot Kingdom fastaem, Jehova i givim samting we yumi nidim. Famle McCartney i soemaot wan naes sista long mi, nem blong hem Bethel Crane. Mama blong hem, Ruth, i wan strong Witnes long Wellington, Kansas, mo hem i mekem wok blong paenia kasem we hem i gat bitim 90 yia. Long sem yia, 1958, mi mo Bethel i mared, mo mitufala i paenia long El Dorado.

Mitufala i wantem folem ol gudfala eksampol we mitufala i luk finis. Taswe, mitufala i rere blong go long eni ples we ogenaesesen blong Jehova i wantem. Ale, oli sanem mitufala i go mekem wok blong spesel paenia long Walnut Ridge, Arkansas. Long 1962, oli singaot mitufala i go long namba 37 klas blong Gilead. Don Steele tu i stap long klas ya. Long en blong skul ya, oli sanem mitufala i go long Nairobi, Kenya. !Mitufala i sore blong lego New York, be mitufala i glad tumas taem mitufala i luk se plante brata oli stap wet long mitufala long epot long Nairobi!

Kwiktaem nomo, mitufala i laekem Kenya. Faswan long ol Baebol stadi blong mitufala blong kam long trutok, hemia Chris mo Mary Kanaiya, mo kam kasem tede, tufala i mekem wok blong Jehova fultaem long Kenya. Wan yia biaen, oli askem long mitufala blong go long Kampala, Uganda. Mitufala i faswan blong go olsem misinari long kantri ya. Plante man oli wantem save trutok blong Baebol, mo oli kam ol brata mo sista blong yumi. Mitufala i stap tri yia haf long Afrika, nao mitufala i gobak long Amerika mo mitufala i gat pikinini. Mitufala i harem nogud moa blong lego Afrika, i bitim taem ya we mitufala i lego New York. Mitufala i lavem ol man Afrika, mo mitufala i wantem kambak samtaem.

Mitufala i gobak long Colorado, long ples we papa mo mama blong mi i stap long hem. Smoltaem biaen, gel blong mitufala, Kimberly i bon, mo 17 manis biaen, Stephany i bon. Mitufala i wantem kam wan gudfala papa mo mama. Ale mitufala i wok had blong tijim tufala gel blong mitufala long trutok. Mitufala i wantem folem ol gudfala eksampol blong ol narafala. Mitufala i save se gudfala eksampol i gat bigfala paoa long pikinini, be i no min se pikinini bambae i mekem wok blong Jehova taem i kam bigwan. Mi sore tumas se smol brata mo sista blong mi, tufala i lego trutok. Mi hop se wan dei, bambae tufala i folem bakegen gudfala eksampol we tufala i luk.

Mitufala i laekem tumas wok blong papa mo mama, mo oltaem mifala i traem joen wetem pikinini blong mekem ol samting. Mifala i laef klosap long ples ya Aspen, Colorado, taswe ful famle i lanem blong ski long sno. Taem mifala i stap go antap long ol hil, mitufala i gat janis blong storian wetem tufala gel. Mo tu, mifala i stap go slip long haos tapolen long bus, mo long naet, mifala i sidaon klosap long faea mo storian gud. Tufala gel i askem ol kwestin olsem: “?Bambae mi mekem wanem taem mi kam bigwan?” mo “?Bambae mi mared long hu?” Mitufala i traehad blong tijim tufala blong lavem Jehova. Mitufala i leftemap tingting blong tufala blong mekem wok blong paenia, mo blong mared long ol man we oli mekem wok ya. Mitufala i traem mekem tufala i kasemsave se i nogud blong mared taem yu yang tumas. Mitufala i stap talem se: “Stap fri go kasem 23.”

Mitufala i folem eksampol blong papa mo mama blong mitufala, taswe mitufala i tekem tufala gel i go oltaem long ol miting mo long wok blong prij. Sam paenia oli kam stap long haos blong mifala. Mo plante taem mitufala i tokbaot olsem wanem mitufala i laekem wok blong misinari. Mitufala i wantem se wan dei, bambae mitufala i tekem tufala i go long Afrika. Tufala gel tu i wantem go.

Oltaem mifala i mekem famle stadi. Mifala i aktem ol samting we i save hapen long skul, mo tufala gel i traem ansarem ol kwestin. Tufala i harem gud long ol pleplei olsem, mo samting we tufala i lanem i mekem tingting blong tufala i strong. Be taem tufala i kam bigwan moa, i gat sam taem we tufala i no wantem mekem famle stadi. Wan dei, mi harem nogud tumas nao mi talem long tufala blong go long rum blong tufala from we bambae i no moa gat stadi. Tufala i sek, mo tufala i krae. Long taem ya, mitufala i luksave se wok blong mitufala i gat frut, from we fasin blong tufala i soemaot  se tufala i rili laekem stadi. Sloslo, tufala i harem gud long stadi, mo tufala i no fraet blong talemaot ol tingting mo filing blong tufala. I had taem tufala i talem se tufala i no agri long wan tijing blong Baebol. Be i gud blong save wanem i stap long tingting blong tufala. Mitufala i toktok gud long tufala, mo tufala i kasemsave mo agri long ol loa blong Jehova.

Ol yia we mitufala i tijim tufala gel, oli pas hareap. Ogenaesesen blong Jehova i givhan long mitufala bigwan blong tijim tufala blong lavem Jehova. Taem tufala i finis long hae skul, tufala i lanem wan wok blong kasem mane blong sapotem tufala, nao tufala i mekem wok blong paenia. Mitufala i harem gud tumas. Tufala wetem tu narafala sista, oli muv i go long Cleveland, Tennessee, wan ples we i nidim moa man blong prij. Mitufala i harem nogud from we tufala i no moa stap wetem mitufala, be mitufala i glad se tufala i yusum laef blong tufala long wok blong Jehova. Nao mi mo Bethel i stat blong paenia bakegen. Biaen, mi mekem wok blong eria elda long sam kongregesen, mo mi gat wok long ol asembli.

Bifo we tufala gel i muv i go long Tennessee, tufala i go long London, Inglan, mo tufala i visitim branj ofis. Stephany, we i gat 19 yia, i mitim wan yangfala brata we i wok long Betel, nem blong hem Paul. Long wan narafala trip, Kimberly i mitim wan brata we i wok wetem Paul, nem blong hem, Brian. Taem Stephany i gat 23 yia, hem i mared long Paul. Mo long nekis yia blong hem, Kimberly we i gat 25 yia, i mared long Brian. !Taswe, i tru se tufala i stap fri go kasem 23! Mitufala i glad tumas we tufala i mared long tu gudfala brata.

Tufala gel i talem long mitufala se eksampol blong mitufala mo ol bubu blong tufala, i givhan long tufala blong ‘lukaot Kingdom blong God fastaem,’ nating se samtaem mane i sot. (Matiu 6:33) Long Eprel 1998, Paul mo Stephany i joen long namba 105 klas blong Gilead, mo biaen tufala i go long Malawi. Brian mo Kimberly i go wok long Betel long London, mo biaen, tufala i muv i go long Betel long Malawi. Mitufala i glad tumas, from we hemia nambawan rod blong yusum laef blong olgeta.

Long Jenuware 2001, Brata Marais we i lukaot long Dipatmen Blong Translesen i ring long mi, olsem mi talem long stat blong stori. Hem i talem se ol brata oli rerem wan kos, blong ol transleta long fulwol oli kasemsave moa long Inglis. Nating se mi gat 64 yia, be oli wantem trenem mi blong mi kam wan tija. Mi mo Bethel i prea, mo mitufala i askem advaes long tufala mama blong mitufala. Nating se tufala i olfala mo tufala i nidim help, be tufala i wantem se mitufala i go. Ale, mi ring bak long brata ya, blong talem se mitufala i glad blong mekem nambawan wok ya.

Long taem ya, mama blong mi i faenemaot se hem i gat kansa. Mi mi talem long hem se bambae mitufala i stap blong givhan long sista blong mi Linda, blong lukaot long hem. Be Mama i no wantem, i se: “Bambae mi harem nogud moa sipos yu no go.” Linda i gat sem tingting. Mitufala i talem tangkiu tumas from we tufala i no tingbaot tufala nomo, mo mitufala i glad tu we ol brata mo sista oli givhan long tufala. Long dei afta we mitufala i aot blong go long Wajtaoa Edukesen Senta long Patterson, Linda i ring blong talem se Mama i ded. Mitufala i save  se hem i wantem we mitufala i stap bisi long niufala wok blong mitufala, ale mitufala i mekem olsem.

Mitufala i glad tumas se fastaem mitufala mekem kos wetem ol transleta long Malawi, hemia ples we tufala gel blong mitufala wetem man blong tufala i stap. I gud tumas blong joen wetem olgeta bakegen. Afta, mitufala i go long Simbabwe mo Sambia. Afta we tri yia haf i pas, mitufala i gobak long Malawi blong raetem stori blong ol Witnes we oli safa bigwan, from we oli no joen long politik. *

Long 2005, mitufala i harem nogud bakegen blong lego Afrika. Mitufala i kambak long Basalt, Colorado, mo mitufala i gohed blong paenia. Long 2006, Brian mo Kimberly i muv i kam long haos klosap long mitufala. Tufala i gat tu gel, Mackenzie mo Elizabeth. Paul mo Stephany i stap yet long Malawi mo Paul i stap long Branj Komiti. Klosap mi gat 80 yia naoia, mo mi glad tumas blong luk ol yangfala brata oli mekem wok we mi bin mekem. Mitufala i traehad blong folem gudfala eksampol blong ol olfala blong mitufala, mo givhan long ol pikinini mo ol smol bubu blong mitufala. Taswe, mitufala i glad tumas.