1, 2. ?From wanem sam papa mo mama oli wari taem pikinini i wantem baptaes?

PLANTE taosen man we oli stadi Baebol, oli givim laef blong olgeta i go long Jehova, mo oli baptaes. Plante long olgeta oli ol yangfala we oli gruap long trutok mo oli jusum blong folem nambawan rod ya. (Ol Sam 1:1-3) Sipos yu wan Kristin papa o mama, ating yu wantem tumas blong luk we pikinini blong yu tu i baptaes.—Skelem wetem 3 Jon 4.

² Be maet yu stap wari from we yu luk sam yangfala we oli baptaes, be biaen oli no moa sua se i waes blong folem ol rul blong God. Sam long olgeta oli lego trutok tu. Taswe maet yu wari se pikinini blong yu bambae i stat blong mekem wok blong Jehova, be biaen bambae i no moa laekem trutok. Maet hem i kam olsem sam Kristin long Efesas bifo, we Jisas i talem long olgeta se: “Yu yu no moa gat lav ya we yu gat fastaem.” (Revelesen 2:4) ?Olsem wanem yu save givhan  long pikinini blong yu blong i gohed blong lavem Jehova, mo i waes blong God i sevem hem? (1 Pita 2:2) I gud yumi tokbaot eksampol blong Timoti.

3. (1) ?Olsem wanem Timoti i kam wan Kristin? ?Biaen, hem i mekem wanem? (2) ?Pol i tokbaot wanem trifala samting we Timoti i mekem blong lanem trutok?

³ Fas taem we aposol Pol i go long taon ya Listra long yia 47, maet Timoti i wan yangfala, mo ating long taem ya nao hem i kasem save long ol tijing blong Jisas. Biaen, hem i folem samting we hem i lanem, mo tu yia afta, hem i joenem Pol blong go long ol defren ples blong prij. Samwe long 16 yia afta, Pol i raetem leta long Timoti se: “Yu mas gohed blong folem ol samting we yu lanem finis, mo we yu bilif long olgeta se oli tru, . . . stat taem yu bebi i kam kasem naoia, yu yu savegud ol tabu tok blong Baebol [ol Hibru hanraet]. Tok ya i save mekem yu yu waes, mo i save mekem se God i sevem yu from we yu bilif long Kraes Jisas.” (2 Timoti 3:14, 15) Makem gud tok blong Pol se Timoti (1) i savegud ol tabu tok blong Baebol, (2) i bilif long olgeta, mo (3) i kam waes blong God i sevem hem from we hem i bilif long Kraes Jisas.

4. ?Yu yusum wanem blong tijim smol pikinini blong yu? (Yu luk pija long stat blong stadi.)

⁴ Yu we yu wan Kristin papa o mama, yu wantem se pikinini blong yu i savegud ol tabu tok blong Baebol, we tede hemia Hibru mo Grik haf blong Baebol tugeta. Nating se pikinini i smol nomo, be hem i naf blong kasem save long ol man mo ol samting we Baebol i tokbaot. Ogenaesesen blong Jehova i wokem plante buk, buklet, mo video, we ol papa mo mama oli save yusum blong tijim pikinini. ?Yu yu save olgeta we oli stap long lanwis blong yu? Pikinini blong yu i mas save wanem i stap long Baebol, blong hem i save fren gud wetem Jehova.

5. ?Olsem wanem yumi save se Timoti i kasem tijing we i mekem hem i bilif long Jisas?

⁵ Be i no naf blong tijim pikinini nomo long ol man mo ol samting we Baebol i tokbaot. Tingbaot tu se Timoti i “bilif long olgeta.” ‘Stat taem Timoti i bebi,’ hem i save ol Hibru hanraet, mo biaen, hem i stat blong bilif long Jisas olsem Mesaea. Bilif blong Timoti i kam strong moa, gogo hem i baptaes nao i mekem wok blong misinari wetem Pol.

6. ?Olsem wanem yu save givhan long pikinini blong i gat bilif?

⁶ ?Olsem wanem yu save givhan long pikinini blong i gat bilif olsem Timoti? Yu mas gat longfala tingting. Bambae i tekem taem blong pikinini i bilif strong. Mo yu no mas ting se from we yu yu gat bilif, pikinini blong yu tu bambae i gat bilif. Evri pikinini i mas ‘yusum gud tingting blong hem’ blong i wokem strong bilif long Baebol. (Ridim Rom 12:1.) Yu we yu papa o mama, yu save mekem  plante samting blong givhan long bilif blong pikinini, antap moa taem hem i askem kwestin. I gud yumi tokbaot samting we wan papa i mekem.

7, 8. (1) ?Olsem wanem wan Kristin papa i tijim gel blong hem wetem longfala tingting? (2) ?Wetaem yu yu mas gat longfala tingting long pikinini blong yu?

⁷ Gel blong Tomas we i gat 11 yia, i askem ol kwestin olsem: “?Yu ting se Jehova i yusum evolusen blong mekem ol laef samting long wol?” mo “?From wanem yumi no joen wetem ol narafala man long vilej long ol samting olsem eleksen, blong traem mekem ples blong yumi i gud moa?” Plante taem, Tomas i mas lukaot gud se hem i no talem long gel blong hem, samting we hem i mas bilivim. Tomas i save se i no wan bigfala trutok nomo we i save mekem hem i bilif, be plante smosmol samting we oli olsem pruf.

⁸ Olgeta Kristin oli mas gat longfala tingting. Tomas i save se hem tu i mas gat longfala tingting blong tijim gel blong hem. (Kolosi 3:12) Hem i luksave se bambae i tekem taem blong gel blong hem i gat bilif. Hem i mas storian plante wetem gel ya, mo mekem hem i tingting long samting we hem i lanem long Baebol. Tomas i talem se: “Mi mo woman blong mi i wantem save sipos gel blong mitufala i rili bilivim ol samting we hem i lanem, mo sipos hem i ting se oli stret, antap moa ol samting we oli impoten tumas. Sipos hem i gat kwestin, mitufala i glad. Blong talem stret, bambae mi wari sipos hem i jes agri nomo.”

9. ?Olsem wanem yu save givhan long pikinini blong i bilif long Baebol?

⁹ Taem papa mo mama i gat longfala tingting blong tijim pikinini, sloslo pikinini bambae i kasem save se trutok i “bigwan olsem wanem, i longfala olsem wanem, i hae olsem wanem, mo i dip olsem wanem.” (Efesas 3:18) I gud yu tijim pikinini long fasin we i stret long yia blong hem mo save we hem i gat. Taem bilif blong hem i kam strong, bambae i isi moa blong hem i eksplenem long ol narafala mo ol fren blong hem long skul tu. (1 Pita 3:15) ?Olsem wanem? ?Pikinini blong yu i naf blong yusum Baebol blong eksplenem wanem i hapen taem man i ded? ?Hem i ting se samting we Baebol i talem i stret? * Tingbaot se, yu mas gat longfala tingting blong givhan long pikinini blong i bilif strong long Baebol. Be bambae i gat gudfala frut i kamaot.—Dutronome 6:6, 7.

10. ?I impoten we yu mekem wanem, blong pikinini i wokem bilif?

¹⁰ I impoten we yu soemaot gudfala eksampol long pikinini. Stefani, we i gat tri gel, i se: “Stat taem ol gel oli smol nomo, oltaem mi tingbaot se: ‘?Mi mi stap tokbaot from wanem mi mi bilif se Jehova i stap mo i lavem yumi, mo from  wanem ol loa blong hem oli stret? ?Ol pikinini blong mi oli luk se mi mi lavem Jehova?’ Oli no save kasem bilif sipos mi mi no bilif.”

11, 12. ?Man we i waes i olsem wanem? ?Man i mas olfala blong kam waes, mo olsem wanem yumi save samting ya?

¹¹ Yumi lanem finis se Timoti (1) i save gud ol tok blong Baebol, mo (2) i bilif long olgeta. ?Be Pol i minim wanem taem hem i talem se ol tok ya i save mekem Timoti i ‘kam waes blong God i sevem hem’?

¹² Buk 2 blong Insight on the Scriptures i eksplenem mining blong ‘waes’ long Baebol. Hem i talem se, man we i waes “hem i naf blong kasem save, mo yusum save ya blong winim trabol, blokem trabol, kasem wan mak, o givim advaes long narafala. Hem i defren olgeta long man we i mekem ol krangke samting.” Baebol i talem se: “Fasin blong pikinini, oltaem i save mekem ol krangke samting we i no save tingbaot.” (Ol Proveb 22:15) Waes i defren olgeta long krangke fasin. Waes i soemaot se wan man i bigman long tingting blong hem. I no yia blong man we i mekem hem i kam bigman long bilif, be hem i kam bigman taem i tinghevi long Jehova mo i obei gud long hem.—Ridim Ol Sam 111:10.

13. ?Olsem wanem ol yangfala oli soemaot se oli kam waes?

¹³ Ol yangfala we oli stap kam bigman long bilif, oli no “olsem wan bot we solwota mo win i stap saksakem hem i go olbaot.” Hemia i min se, oli no letem ol narafala yangfala mo prapa tingting blong olgeta, i pulum olgeta. (Efesas 4:14) Be “oli trenem tingting blong olgeta blong luksave samting we i stret mo samting we i rong.” (Hibrus 5:14) Taswe oli save mekem ol waes desisen, nating se papa mo mama blong olgeta o wan narafala bigman i no stap. (Filipae 2:12) Oli nidim waes ya blong God i sevem olgeta. (Ridim Ol Proveb 24:14.) * ?Olsem wanem yu save givhan long pikinini blong yu, blong i kam waes? Fastaem yu mas talemaot klia long hem, ol rul blong Baebol we yu yu stap folem. Nao samting we yu talem mo yu mekem bambae i soemaot long hem, se yu stap traehad blong folem ol rul ya.—Rom 2:21-23.

14, 15. (1) ?Yangfala we i wantem baptaes i mas tingting gud long wanem? (2) ?Olsem wanem blong mekem pikinini i tingting dip long ol blesing we hem i save kasem taem i obei long God?

¹⁴ Be i no naf blong talem nomo long pikinini wanem fasin i stret mo wanem fasin i rong. Yu mas mekem hem i tingting long ol kwestin olsem: ‘?From wanem God i putum tabu long sam samting we tingting blong mi i wantem? ?Olsem wanem mi save se sipos mi obei long Baebol bambae i mekem i gud long mi?’—Aesea 48:17, 18.

¹⁵ Sipos pikinini blong yu i wantem baptaes, traem mekem hem i tingting  gud long ol wok we i joen wetem baptaes. ?Wanem tingting blong hem long ol wok ya? ?Wanem ol blesing we oli kam wetem baptaes? ?Wanem ol trabol we hem i save fesem? ?From wanem ol blesing oli bigwan moa i bitim ol trabol? (Mak 10:29, 30) I impoten tumas we hem i tingting gud long ol samting ya bifo we hem i baptaes. Givhan long hem blong i tingting dip long ol blesing we man i kasem taem hem i obei long God, mo ol nogud frut we hem i kasem taem i no obei. Hemia i save mekem bilif blong pikinini i kam strong se i gud blong folem ol tok blong Baebol oltaem.—Dutronome 30:19, 20.

16. ?Yu save mekem wanem sipos pikinini blong yu we i baptaes finis i stat lusum bilif?

¹⁶ ?Yu save mekem wanem sipos pikinini blong yu we i baptaes finis i no moa sua se hem i bilif long trutok? Maet sam samting blong wol i pulum hem. Maet hem i no moa bilif strong se i gud blong folem ol rul blong Baebol long laef blong hem. (Ol Sam 73:1-3, 12, 13) Samting we yu talem mo yu mekem i save pulum hem blong i gohed, o i save mekem hem i lego. I nogud yu rao long hem, nating se hem i pikinini yet o i kam wan yangfala finis. Be yu mas mekem hem i save se yu  lavem hem mo yu wantem givhan long hem.

17, 18. Sipos yangfala i no moa sua long bilif blong hem, ?papa mo mama i save mekem wanem?

¹⁷ Taem wan yangfala i givim laef blong hem i go long Jehova mo i baptaes, hem i promes blong lavem Jehova bitim ol narafala mo mekem wok blong hem fastaem. (Ridim Mak 12:30.) Jehova i tinghevi long promes ya, mo yumi mas mekem sem mak. (Prija 5:4, 5) Yu mas mekem pikinini blong yu i tingbaot samting ya. Be fastaem, i gud yu stadi long ol save we ogenaesesen blong Jehova i givim long ol papa mo mama. Nao long stret taem, yu toktok kaen long pikinini, blong makem gud long tingting blong hem se desisen blong givim laef blong hem long Jehova mo baptaes, i impoten tumas, mo bambae hem i kasem plante blesing from.

¹⁸ I gat ol gudfala advaes long “Appendix” blong Buk 1 blong Ol Kwestin We Ol Yangfala Oli Askem—Ol Ansa We Oli Wok Gud (Inglis mo Franis), long haf ya “Questions Parents Ask.” Hem i talem se papa mo mama i no mas hareap blong ting se yangfala blong olgeta i lego trutok, be oli mas traem faenemaot stamba blong problem. Maet ol fren oli stap pulum hem, o hem i harem se i no gat fren, o maet hem i ting se ol narafala yangfala oli stap mekem moa i bitim hem long wok blong Jehova. Buk ya i talem tu se ol trabol ya oli no min se pikinini i agensem bilif blong yu. Plante taem, trabol ya nomo i mekem hem i harem nogud. Buk ya i givim advaes olsem wanem blong givhan long pikinini we i no moa sua long bilif blong hem.

19. ?Olsem wanem papa mo mama i save givhan long pikinini blong i kam ‘waes mo God i sevem hem’?

¹⁹ Yu we yu papa o mama, yu gat wan bigfala blesing mo wan impoten wok blong mekem, hemia blong tijim mo stretem pikinini blong yu “folem tingting blong Jehova.” (Efesas 6:4) Olsem we yumi tokbaot finis, hemia i min se yu tijim pikinini long ol tok blong Baebol, mo yu givhan long hem blong i bilif long ol tok ya. Taem bilif blong hem i kam strong, bambae hem i wantem givim laef blong hem long Jehova mo mekem bes blong hem long wok blong Jehova. Tok blong Jehova, spirit blong hem, mo hadwok blong yu, i save givhan long pikinini blong i kam ‘waes mo God i sevem hem.’