Sipos ol Kristin hasban mo waef oli wantem mekem wan gudfala desisen we tingting blong olgeta i no stikim olgeta from, oli mas save gud olsem wanem IUD i wok, mo tingting blong God long saed ya.

Jehova i talem long Adam mo Iv, mo biaen, long Noa mo famle blong hem, se: “Yufala i mas gat plante pikinini.” (Jenesis 1:28; 9:1) Be Baebol i no talem se yumi ol Kristin yumi mas folem rul ya. Taswe sipos hasban mo waef i ting se tufala i gat naf pikinini finis, maet tufala i wantem blokem pikinini, o maet tufala i wantem jusum wetaem blong gat pikinini. Ale, ?tufala i mas tingbaot wanem?

Taem tufala i mekem desisen olsem wanem blong blokem pikinini, tufala i mas folem tingting blong God long Baebol. Taswe, neva bambae tufala i kilim pikinini long bel. I no stret nating blong kilim pikinini we i jes stat long bel blong mama. Hemia wan laef, mo Baebol i talem se laef i tabu. Taswe sipos tufala i kilim pikinini ya, tufala i go agensem Baebol. (Eksodas 20:13; 21:22, 23, NW; Ol Sam 139:16; Jeremaea 1:5) ?Be olsem wanem sipos tufala i yusum IUD?

Wajtaoa blong 15 Mei 1979, pej 30-31 (Franis mo Inglis), i tokbaot kwestin ya. Long taem ya, oli wokem plante IUD long plastik, mo oli putum insaed long basket blong pikinini, blong blokem woman i no save gat bel. Wajtaoa i talem se i no klia olsem wanem IUD i mekem wok ya. Plante saentis oli talem se IUD i blokem wota blong man i no go kasem eg blong woman. Hemia i min se laef i no save stat.

Be i luk olsem se sam samtaem wota blong man i save kasem eg blong woman, nao laef i stat. Maet pikinini i stat gru long rod we eg i pas long hem blong go long basket blong pikinini (ectopic pregnancy). Sipos eg i go kasem basket blong pikinini, maet IUD i mekem se hem i no fasgud long basket ya, ale pikinini ya bambae i lus. Hemia i sem mak long kilim pikinini long bel. Wajtaoa ya i se: “Taem wan Kristin i wantem save sipos i stret blong yusum IUD, hem i mas skelem gud ol samting ya wetem ol tok blong Baebol we i talem se laef i tabu.”—Ol Sam 36:9.

Be stat long 1979, ol saentis mo dokta oli kasem moa save, nao oli wokem plante niufala samting.

Oli wokem tu narafala IUD, wan i gat bras long hem, mo plante woman Amerika oli stat blong yusum long 1988. Narawan i gat wan homon * long hem, mo oli stat blong salem long 2001. ?Yumi save wanem long saed blong tufala IUD ya?

Bras: Olsem yumi tokbaot finis, IUD i mekem i had blong wota blong man i pastru long basket blong pikinini, mo i kasem eg blong woman. Mo tu, bras we i stap long IUD ya, i kilim paoa blong wota blong man. * Antap long hemia, IUD i mekem se skin insaed long basket blong pikinini i kam tintin.

Homon: Narafala IUD i gat homon long hem, we i klosap sem mak long homon we i stap long meresin we woman i dring blong blokem pikinini. IUD ya i wok long sem fasin olsem ol olfala IUD, be i putum wan homon i go insaed long basket blong pikinini tu. Long sam woman, hemia i mekem se bodi blong olgeta i no wokem wan eg, ale bebi i no save  stat. Mo tu, IUD ya i mekem skin insaed long basket blong pikinini i kam tintin. * Antap long hemia, hem i mekem se wota we i stap long maot blong basket blong pikinini, i kam tik, nao i blokem wota blong man i no pas i go long basket blong pikinini.

Olsem yumi tokbaot finis, i luk olsem se tufala IUD ya oli mekem skin insaed long basket blong pikinini i kam tintin. Hemia i min se sipos bodi blong woman i mekem wan eg mo wota blong man i kasem eg ya nao wan bebi i stat, be maet eg ya i no fasgud long basket blong pikinini, nao pikinini ya i lus. Be ol saentis oli ting se samting ya i hapen sam samtaem nomo, mo maet i save hapen tu, long woman we i dring meresin blong blokem pikinini.

Taswe, i no gat wan man we i save talem stret se, evritaem tufala IUD we oli gat bras o homon long tufala, oli blokem pikinini bifo we laef i stat, o nogat. Be save we ol saentis oli gat finis i soemaot se tufala IUD ya oli wok olsem yumi tokbaot finis, oli mekem se wota blong man i no sud kasem eg blong woman, ale woman i no sud gat bel.

Kristin hasban mo waef we i wantem yusum IUD, i mas tokbaot wetem dokta. Dokta i save talem wanem IUD we tufala i save kasem, mo ol gud saed mo nogud saed blong hem. Be tufala i no mas askem o letem dokta o wan narafala, i mekem desisen blong tufala. (Rom 14:12; Galesia 6:4, 5) Hemia wan desisen we tufala nomo i mas mekem. Tufala i mas wantem mekem wan desisen we God i glad long hem, mo we tingting i no stikim tufala from.—Skelem wetem 1 Timoti 1:18, 19; 2 Timoti 1:3.