LAEF STORI
Mi Lego Plante Samting Blong Folem Masta
Taem mi gat 16 yia, papa blong mi i talem se: “Sipos yu go prij, yu no moa kambak long haos. Sipos yu kambak, bae mi brekem tufala leg blong yu.” Ale, mi aot long haos. Hemia fastaem we mi lego samting blong folem Masta blong yumi, Jisas.
?FROM wanem papa blong mi i kros tumas? Bambae mi eksplenem. Mi mi bon long 29 Julae 1929, mo mi gruap long wan vilej long Bulakan provins long Filipin. Mifala i no gat mane mo plante samting. Taem mi pikinini, ol ami blong Japan oli kam insaed long Filipin mo wan bigfala faet i stat. Be vilej blong mifala i stap longwe long faet ya. Mifala i no gat radio, TV, o niuspepa, taswe mifala i harem nius blong faet long ol narafala man nomo.
Mi mi gat seven brata mo sista. Taem mi gat eit yia, mi go stap wetem abu man mo abu woman blong mi. Mifala i Katolik, be abu man i glad blong tokbaot ol skul, mo hem i ridim ol buk blong skul we ol fren oli givim long hem. Mi tingbaot we hem i soemaot long mi ol buklet ya Protection, Safety, mo Uncovered, * mo wan Baebol long lanwis Tagalog. Mi laekem blong ridim Baebol, antap moa ol fo Gospel. Ol stori ya oli mekem se mi wantem folem Jisas.—Jon 10:27.
MI LANEM BLONG FOLEM MASTA
Long yia 1945, ol ami blong Japan oli gobak. Samwe long taem ya, Papa mo Mama i askem long mi blong mi kambak long haos. Abu man i talem long mi blong go, ale mi go.
Long Disemba 1945, ol Witnes blong Jehova we oli stap long taon ya Angat, oli kam prij long vilej blong mifala. Wan olfala man i kam long haos, mo i tokbaot samting we Baebol i talem long “ol las dei.” (2 Timoti 3:1-5) Hem i singaot mifala blong mifala i go long wan Baebol stadi long wan vilej klosap. Papa mo mama blong mi i no go, be mi mi go. I gat samwe long 20 man oli joen wanples, mo samfala oli askem kwestin long Baebol.
Mi no kasem save long samting we oli stap tokbaot, ale mi stanap blong aot. Stret long taem ya oli stat blong singsing. Mi laekem tumas
singsing ya, ale mi sidaon bakegen. Afta we oli singsing mo prea blong finisim stadi, oli singaot mifala evriwan i go long wan miting long Angat, long Sande we i kam.Miting ya i stap long haos blong famle Crus. Sam long mifala i wokbaot eit kilometa blong kasem haos ya. I gat samwe long 50 man oli stap, mo mi mi laekem tumas blong harem ol smol pikinini oli ansa long ol had kwestin long Baebol. Afta we mi go long miting plante taem, Damian Santos, wan olfala brata we i mekem wok blong paenia mo hem i mea bifo, i singaot mi blong mi slip long haos blong hem. Klosap fulnaet, mitufala i tokbaot Baebol.
Long taem ya, ol man oli baptaes taem oli save ol stamba tijing blong Baebol nomo. Afta we mi go long sam miting, ol brata oli askem long mi mo long sam narafala se: “?Yufala i wantem baptaes?” Mi ansa se: “Yes, mi wantem.” Mi save se mi wantem kam “slef blong Masta ya Kraes.” (Kolosi 3:24) Long 15 Februari 1946, mi wetem wan narafala man i baptaes long wan reva.
Mi kasem save se ol Kristin we oli baptaes oli mas prij olsem Jisas. Papa blong mi i ting se mi yang tumas mo mi no nid blong prij, nating se mi baptaes. Mi eksplenem long hem se God nao i wantem we mifala i talemaot gud nius blong Kingdom. (Matiu 24:14) Mo mi talem tu se mi mas holem promes we mi mekem long God. Long taem ya nao, hem i talem ol tok we i stap long stat blong stori ya. Hem i wantem tumas blong blokem mi, blong mi no save prij. Hemia fastaem we mi mas lego sam samting blong mekem wok blong Jehova.
Famle Crus i singaot mi mi kam stap long haos blong olgeta long Angat. Mo tu, oli pulum mi mo lasbon gel blong olgeta Nora, blong mitufala i stat long wok blong paenia. Ale, mitufala i stat long 1 Novemba 1947. Nora i paenia long wan narafala taon, mo mi mi stap long Angat nomo.
MI LEGO SAM MOA SAMTING
Afta long tu yia, El Stuat we i kam long Betel, i givim wan tok long 500 man long pablik ples long taon ya Angat. Hem i mekem tok ya long Inglis, mo afta, mi mi talem ol bigfala tingting long Tagalog. Hemia faswan long plante tok we mi tanem. ?Olsem wanem mi mi naf blong mekem wok ya nating se mi skul blong seven yia nomo? Long skul, oltaem ol tija oli toktok Inglis. Mo tu, mi stadi long plante buk long Inglis, from we long taem ya i no gat plante buk long Tagalog. Ol samting
ya i givhan long mi, blong mi naf blong tanem Inglis i go long Tagalog.Brata Stuat i talem long kongregesen se long 1950, ol misinari bambae oli go joen long bigfala asembli ya long Amerika, “Rul Blong God i Stap Kam Bigwan Moa.” Taswe, oli wantem wan o tu paenia blong givhan long Betel. Bakegen, mi lego ol samting we mi lan long olgeta, nao long 19 Jun 1950 mi go wok long Betel.
Betel i wan bigfala olfala haos we i stap long wan hekta graon, mo i gat ol bigbigfala tri raon long hem. Samwe long 12 brata we oli no mared oli wok long ples ya. Long eli moning, mi wok long kijin. Stat long naen klok go kasem aftenun, mi aeanem ol klos. Taem ol misinari oli kambak, mi gohed nomo blong wok long Betel. Mi mekem enikaen wok we oli talem. Mi rerem ol magasin blong sanem long ol kongregesen mo ol man wanwan, mo mi wok long ofis we ol visita oli kam long hem.
MI LEGO FILIPIN BLONG GO LONG GILEAD
Long 1952, oli singaot mi wetem sikis narafala brata blong Filipin, blong mifala i joen long namba 20 klas blong Gilead. !Mi mi glad bitim mak! Long Amerika, mifala i luk mo mekem plante niufala samting. Laef i defren, i no sem mak long smol vilej we mi mi gruap long hem.
Mi wetem samfala long Gilead
Mifala i mas lanem blong yusum ol masin we mifala i neva luk bifo. !Weta tu i defren! Wan moning, mi luk se evri samting afsaed i waet. Hemia fastaem we mi luk sno. !I naes tumas, be mi faenemaot kwiktaem se i kolkol we i kolkol!
Be mi no wari long ol jenis ya, from we mi stap harem gud tumas long trening long Gilead. Ol tija oli tijim gud mifala, mo oli soemaot olsem wanem blong stadi mo mekem risej. Skul blong Gilead i givhan bigwan long mi, blong mi fren moa wetem Jehova.
Taem oli givim stefeket long mifala, oli sanem mi mi go olsem spesel paenia blong smoltaem, long ples ya Bronks long New York. Taswe, long Julae 1953, mi gat janis blong joen long Niu Wol Sosaeti Asembli long Bronks. Afta we asembli ya i finis, oli sanem mi mi gobak long Filipin.
MI LEGO ISI LAEF LONG TAON
Ol brata long Betel oli askem long mi blong mi mekem wok blong eria elda. Hemia i givim plante moa janis blong mi folem Jisas. Hem i wokbaot longwe blong go long ol taon mo vilej blong 1 Pita 2:21) Eria we mi wok long hem, hemia bighaf blong sentrol Luson, we i bigfala aelan blong Filipin. Mi go long ol provins ya Bulakan, Nerva Ekija, Talak, mo Sambales. Sam taon oli stap narasaed blong ol bigfala hil ya Siera Madre. I no gat ol bas mo tren we oli go long olgeta, taswe mi askem long sam man we oli draevem kameong, sipos mi save sidaon antap long ol timba we oli stap karem. !Plante taem oli letem mi, be ol trip ya oli raf bitim mak!
givhan long ol man blong Jehova. (Plante kongregesen oli niu mo oli smol. Taswe ol brata oli glad tumas taem mi givhan long olgeta blong oli folem wan gudfala plan blong ol miting mo wok blong prij.
Biaen, mi go wok long bigfala eria blong Bikol. Ol spesel paenia oli statem plante grup long ol ples ya we ol Witnes oli neva go long olgeta bifo. Long wan haos, toelet i wan hol long graon nomo we tu wud i krosem. Taem mi stanap long tufala wud ya, tufala i foldaon long hol, mo mi tu mi foldaon. !I tekem longtaem blong mi swim gud bifo we mi dring ti!
Long taem ya, mi tingbaot Nora, we mitufala i bin stat blong paenia long semtaem. Nora i wok olsem spesel paenia long Damaguete Siti, ale, mi go luk hem. Afta, mitufala i raetem leta long mitufala, gogo mitufala i mared long 1956. Long fas wik blong mared, mitufala i go visitim kongregesen long Rapu Rapu Aelan. Mitufala i klaem long ol bigbigfala hil mo wokbaot long ol longfala rod, be mitufala i glad nomo blong stap tugeta mo givhan long ol brata long ol ples farawe.
MI GO WOK LONG BETEL BAKEGEN
Mitufala i mekem wok blong eria elda blong samwe long 4 yia, nao long Jenuware 1960, mitufala i go wok long branj ofis. Long olgeta yia we mitufala i wok long Betel, ol brata we oli mekem bigfala wok long ogenaesesen blong Jehova oli tijim mi long plante samting. Mo Nora tu i glad long ol defren wok we hem i mekem.
Mi givim wan tok long asembli mo brata i tanem i go long lanwis Sebuano
I wan bigfala blesing blong luk plante moa man oli stap joen blong mekem wok blong Jehova long Filipin. Taem mi mi wan yangfala long Betel, i gat samwe long 10,000 pablisa long ful kantri. Be naoia i gat moa long 200,000 pablisa, mo plante handred brata mo sista oli wok long Betel.
Taem ol yia oli pas, wok long Betel i kam bigwan moa. Ale Hed kampani i wantem se mifala i faenem wan graon blong bildim wan branj ofis we i bigwan moa. Mi mo brata we i lukaot long wok blong printim ol buk, mitufala i go askem long ol man raonabaot sipos oli wantem salem graon blong olgeta, be i no gat wan we i wantem. Wan man i talem se: “Mifala ol Jaenis mifala i no salem graon. Mifala i pem nomo.”
Mi tanem wan tok blong Brata Albert Shroder
Be wan dei wan samting i hapen we i mekem mifala i sek. Wan man we i stap narasaed long Betel i muv i go long Amerika, ale hem i askem sipos mifala i wantem pem graon blong hem. Afta, wan narafala man klosap i wantem salem graon blong hem tu, mo i pulum ol narafala raonabaot blong oli mekem sem mak. Mifala i pem graon blong man ya tu we i talem se: “Mifala ol Jaenis mifala i no salem graon.” Graon blong Betel i dabolem tri taem. Mi sua se Jehova nao i wantem se i olsem.
Long 1950, mi mi yang moa long evriwan long Betel, be naoia mi mo woman blong mi, mitufala i olfala moa long evriwan. Mi no sore se mi bin folem Jisas long evri ples we hem i lidim mi. Nating se papa mo mama blong mi i sakemaot mi long haos, Jehova i givim wan bigfala famle long mi we oli lavem hem. Mi bilif strong se Jehova i stap givim evri samting we yumi nidim, nomata wanem wok yumi mekem. Mi mo Nora i glad tumas long ol gudfala samting we Jehova i givim, mo mitufala i pulum ol narafala tu blong oli traem trastem Jehova.—Malakae 3:10.
Jisas i singaot Matiu Livae we i wan man blong tekem takis, blong i folem hem. ?Matiu i mekem wanem? “Hem i livim olgeta samting blong hem, i girap, i folem hem.” (Luk 5:27, 28) Mi tu mi lego plante samting blong folem Jisas, mo mi pulum ol narafala blong oli mekem sem mak mo kasem plante blesing.
Mi glad blong gohed long wok blong Jehova long Filipin
^ par. 6 Ol Witnes blong Jehova oli wokem ol buklet ya, be naoia oli no moa printim.