1-3. (1) ?Wanem wan stamba bilif blong yumi? (2) ?From wanem laef bakegen i impoten tumas? (Yu luk pija long stat blong stadi.)

?BAMBAE yu talem wanem sipos wan man i askem long yu se: “?Wanem ol stamba bilif blong yu?”? Ating fastaem bambae yu talem se yu bilif long Jehova we i wokem olgeta samting mo i givim laef. Ating bambae yu talem tu se yu bilif long Jisas Kraes we i ded blong pemaot yumi. Mo bambae yu tokbaot Paradaes long wol, we ol man blong God bambae oli save laef olwe. ?Be bambae yu tokbaot laef bakegen olsem wan stamba bilif blong yu?

² Nating se yu gat hop blong pastru long bigfala trabol mo laef olwe long wol, be i stret nomo we yu tokbaot laef bakegen olsem wan stamba bilif blong yu. Aposol Pol i talem from wanem laef bakegen i impoten, i se: “Sipos i tru se ol dedman oli no save laef bakegen, hemia i min se Kraes i no laef bakegen.” Mo sipos Jisas i no laef bakegen, hem i no stap rul olsem King long heven, taswe i blong nating nomo we yumi stap prij. (Ridim 1 Korin 15:12-19.) Be  yumi save se Jisas i laef bakegen. From we yumi bilif olsem, yumi defren long ol Sadusi bifo, we oli strong blong talem se man i no save laef bakegen. Nating se plante man oli jikim yumi, be bilif blong yumi i strong yet long laef bakegen.—Mak 12:18; Ol Wok 4:2, 3; 17:32; 23:6-8.

³ Pol i talem se “laef bakegen” i wan long “ol stamba tijing we oli tokbaot Kraes.” (Hibrus 6:1, 2) Mo hem i talem klia se laef bakegen i wan bilif blong hem. (Ol Wok 24:10, 15, 24, 25) Nating se laef bakegen i wan stamba tijing blong Baebol we yumi lanem finis, be yumi mas stadi moa yet long hem. (Hibrus 5:12) ?From wanem?

4. ?Wanem tufala kwestin we man i save askem long yu?

⁴ Taem ol man oli stadi Baebol, oli ridim ol stori blong ol man bifo we oli laef bakegen, olsem Lasaros. Oli lanem tu se ol olfala olsem Ebraham, Job, mo Daniel, oli bilif strong se ol dedman bambae oli laef bakegen long fiuja. ?Be olsem wanem sipos wan man i askem long yu, blong yu soemaot long Baebol from wanem yu trastem ol promes blong laef bakegen, we oli talemaot plante handred yia bifo? ?Baebol i talem wetaem ol man bambae oli laef bakegen? Ansa blong tufala kwestin ya bambae i mekem bilif blong yumi i strong moa.

5. ?Bambae yumi tokbaot wanem?

⁵ Ating i no had tumas blong bilif se wan man we i jes ded i save laef bakegen. (Jon 11:11; Ol Wok 20:9, 10) ?Be yumi save trastem wan promes se man bambae i laef bakegen plante handred yia long fiuja? ?Nating se wan man i jes ded no i ded longtaem finis, yumi save bilivim promes ya? Blong talem stret, yu bilif finis long wan man we i laef bakegen plante handred yia afta we oli talemaot se bambae i hapen. ?Hu ya man ya? ?Mo laef bakegen blong hem i joen olsem wanem wetem hop blong laef bakegen long fiuja?

6. ?Olsem wanem Sam 118 i kamtru long Jisas?

⁶ Fastaem, bambae yumi yusum Sam 118, we maet Deved i raetem, blong tokbaot wan man we i laef bakegen plante handred yia afta we oli talemaot. Sam ya i talem se: “Hae God. Plis yu sevem mifala,” mo yu “blesem man ya we i kam” long nem blong yu. Ol man oli mekem profet tok ya i kamtru long Nisan 9, sam dei nomo bifo we Jisas i ded. Oli talem ol tok ya long Jisas taem hem i raed i kam long Jerusalem long wan dongki. (Ol Sam 118:25, 26; Matiu 21:7-9) ?Be olsem wanem Sam 118 i joen wetem wan man we i laef bakegen plante yia biaen? Sam ya i gohed, i se: “Ston we ol man blong wokem haos oli sakem, hem i kam nambawan ston long kona blong haos.”—Ol Sam 118:22, NW.

7. ?Olsem wanem ol lida blong ol man Jiu oli sakemaot Jisas?

⁷ “Ol man blong wokem haos” we oli sakemaot Mesaea, hemia ol lida blong ol man Jiu. Oli no wantem save long Jisas mo oli no wantem bilif se hem i Kraes. Be oli go moa, oli talem long Paelat se Jisas i mas ded. (Luk 23:18-23) Yes, olgeta nao oli givhan blong kilim Jisas i ded.

8. ?Olsem wanem Jisas i save kam “nambawan ston long kona blong haos”?

 ⁸ Taem oli sakemaot Jisas mo kilim hem i ded, ?olsem wanem hem i save kam “nambawan ston long kona blong haos?” Hem i mas laef bakegen. Jisas i soemaot samting ya long stori blong wan masta we i sanem sam slef blong hem oli go luk ol fama we oli lisim plantesen blong hem. Be ol fama oli mekem i nogud long ol slef ya. Biaen, masta i sanem stret pikinini blong hem, from we i hop se bambae oli lesin long hem. Be oli girap, oli kilim hem i ded. Taem Jisas i finisim stori ya, hem i talem ol tok blong Ol Sam 118:22. (Luk 20:9-17) Aposol Pita tu i yusum vas ya taem hem i toktok long ‘ol lida blong ol man Jiu, mo ol elda, mo ol tija blong Loa, we oli kam wanples long Jerusalem.’ Hem i tokbaot “man Nasaret ya Jisas Kraes, we yufala i kilim hem i ded long pos, mo we God i mekem hem i laef bakegen.” Afta, hem i talem se: “Jisas ya, hem i ‘ston ya we yufala, ol man blong wokem haos, yufala i ting nating long hem. Be hem i kam nambawan ston long kona blong haos.’”—Ol Wok 3:15; 4:5-11; 1 Pita 2:5-7.

9. ?Wanem nambawan samting we Ol Sam 118:22 i talemaot?

⁹ I klia se profet tok ya blong Ol Sam 118:22 i stap tokbaot wan man we bambae i laef bakegen plante handred yia biaen. Hemia Mesaea, we ol man oli sakemaot hem mo kilim hem i ded. Be hem i laef bakegen blong kam nambawan ston blong kona blong haos. Jisas nomo we i laef bakegen i save sevem yumi, from we ‘God i no givim nem blong wan narafala man we hem i stap yusum blong sevem yumi.’—Ol Wok 4:12; Efesas 1:20.

10. (1) ?Ol Sam 16:10 i talem wanem? (2) ?From wanem yumi save se vas ya i no stap tokbaot Deved?

¹⁰ I gud yumi lukluk wan narafala vas we i tokbaot laef bakegen. Ol tok long vas ya i kamtru bitim wan taosen yia afta we oli talemaot. Hemia i save mekem bilif blong yumi i strong se man i save laef bakegen longtaem afta we oli talemaot promes blong hem. Long Sam 16, yumi ridim tok blong Deved se: ‘Yu no save letem mi mi go long beregraon. Oltaem mi mi stap strong long wok blong yu, taswe yu no save livim mi mi stap olwe long ples ya.’ (Ol Sam 16:10)  Deved i no stap talem se bambae hem i neva ded mo i neva go long beregraon. Baebol i talem klia se Deved i kam olfala, i ded, mo “oli berem hem long haf blong Jerusalem we nem blong hem ‘Taon blong King Deved.’” (1 King 2:1, 10) ?Taswe, vas ya i stap tokbaot hu?

11. ?Wetaem Pita i eksplenem Ol Sam 16:10?

¹¹ Bitim wan taosen yia afta we Deved i raetem Ol Sam 16:10, Pita i talem se Sam ya i tokbaot hu. Hemia sam wik afta we Jisas i ded mo i laef bakegen. Pita i stap toktok long plante taosen man Jiu mo proselaet. (Ridim Ol Wok 2:29-32.) Hem i talem long olgeta se Deved i ded finis mo oli berem hem. Mo hem i talem tu se Deved i ‘luksave mo i tokbaot bifo finis we Kraes bambae i laef bakegen.’ Baebol i no talem se wan man i agensem tok ya blong hem.

12. ?Olsem wanem Ol Sam 16:10 i kamtru? ?Hemia i soemaot wanem long saed blong promes blong laef bakegen?

¹² Pita i talem ol tok blong Deved long Ol Sam 110:1 blong sapotem poen ya. (Ridim Ol Wok 2:33-36.) Hem i yusum ol tok blong Baebol blong pruvum long bigfala hip blong man ya se Jisas nao i “Masta mo i Kraes.” Nao oli kasem save se Ol Sam 16:10 i kamtru taem Jisas i laef bakegen. Biaen, aposol Pol i yusum sem pruf ya taem i stap storian wetem ol man Jiu long taon ya Antiok long Pisidia. Ol man ya oli laekem samting we oli harem, nao oli wantem save moa. (Ridim Ol Wok 13:32-37, 42.) Ol samting ya i mas mekem se yumi tu yumi trastem ol profet tok ya blong Baebol, nating se oli talemaot plante handred yia bifo we oli kamtru.

13. ?Wanem tufala kwestin we maet yumi askem?

¹³ Yumi glad blong save se man i save laef bakegen plante handred yia afta we ol profet tok oli talemaot. Be maet samfala oli askem se: ‘?Hemia i min se mi mas wet longtaem yet blong luk famle blong mi we i ded? ?Wetaem ol dedman bambae oli laef bakegen?’ Jisas i talem long ol aposol se i gat sam samting we oli no save, mo oli no save faenemaot. I gat ‘ol dei mo ol taem we Papa nomo i gat raet blong jusumaot.’ (Ol Wok 1:6, 7; Jon 16:12) Nating se i olsem, yumi gat sam save long saed blong taem ya we ol dedman bambae oli laef bakegen.

14. ?Olsem wanem Jisas i defren long ol man we oli laef bakegen bifo long hem?

¹⁴ Long olgeta man we Baebol i talem se oli laef bakegen, Jisas nao we i impoten moa. Sipos hem i no laef bakegen, bambae i no gat wan man we i save luk bakegen ol famle blong hem we oli ded finis. Olgeta we oli laef bakegen bifo long Jisas, olsem olgeta long taem blong Elaeja mo Elisa, oli no laef olwe. Oli ded bakegen, mo oli gobak long graon. Be taem Jisas “i laef bakegen long ded, hem i no moa save ded. Ded i no moa gat paoa long hem.” Bambae hem i laef long heven “gogo i no save finis.”—Rom 6:9; Revelesen 1:5, 18; Kolosi 1:18; 1 Pita 3:18.

15. ?From wanem Pol i talem se Jisas i “fasfrut” blong garen?

¹⁵ Jisas i faswan we i laef bakegen olsem wan spirit man blong go long heven, mo i impoten tumas we hem i laef bakegen olsem. (Ol Wok 26:23) Be i no  hem nomo we i go long heven. Hem i promes long ol gudfala aposol blong hem se bambae oli rul wetem hem long heven. (Luk 22:28-30) Bambae oli kasem presen ya taem oli ded mo oli laef bakegen long spirit bodi, olsem Jisas. Pol i talem se: “Kraes ya i laef bakegen finis. Long olgeta we oli stap slip long ded, hem i faswan blong laef bakegen, hem i olsem fasfrut blong garen.” Afta, Pol i tokbaot sam narafala tu we bambae oli go long heven, i se: “Olgeta wanwan bambae oli laef bakegen, be long oda: Faswan, hemia Kraes we i olsem fasfrut blong garen, mo biaen, olgeta man blong Kraes bambae oli laef bakegen long taem we hem i stap.”—1 Korin 15:20, 23.

16. ?Pol i talem se ol man blong go long heven bambae oli laef bakegen wetaem?

¹⁶ Pol i talem se ol man blong go long heven bambae oli laef bakegen long spirit bodi, long taem we Kraes i stap. Plante yia finis ol Witnes blong Jehova oli stadi Baebol, mo oli faenemaot se yia 1914 nao i stat blong ‘taem ya we Kraes i stap.’ Yumi stap yet long taem ya, mo en blong rabis wol ya i klosap.

17, 18. ?Wanem bambae i hapen long sam tabu man long taem we Kraes i stap?

¹⁷ Baebol i eksplenem moa long saed blong olgeta we oli go long heven, i se: ‘Mifala i wantem we yufala i save se ol man ya we oli stap slip long ded oli stap olsem wanem. Sipos yumi bilif se Jisas i ded mo i laef bakegen, yumi save bilif tu se God bambae i givim laef long olgeta ya we oli stap folem Jisas gogo oli slip long ded. Yumi ya we yumi laef yet taem masta i stap, bambae yumi go antap long heven. Be olgeta we oli ded finis, bambae oli go antap fastaem, from we Masta bambae i aot long heven i kamdaon, mo i singaot bigwan, nao olgeta we oli joen long Kraes gogo oli ded, bambae oli laef fastaem. Ale biaen, yumi ya we yumi stap laef yet kasem dei ya, bambae yumi go antap long klaod blong stap wetem olgeta ya, mo blong mitim Masta long skae. Nao bambae yumi stap olwe wetem Masta.’—1 Tesalonaeka 4:13-17.

¹⁸ Olgeta we oli go long heven fastaem, bambae oli laef bakegen samtaem afta long stat blong taem ya we Kraes i stap. Ol tabu man we oli stap laef go kasem taem blong bigfala trabol, bambae oli “go antap long klaod” long taem ya. ?Hemia i minim wanem? I min se bambae oli no “slip long ded.” Bambae oli no stap ded longtaem, be oli “jenis wantaem nomo, olsem we yu satem ae, hemia long taem we saon blong laswan trampet i kamaot.”—1 Korin 15:51, 52; Matiu 24:31.

19. ?Wanem ‘laef bakegen ya we i gud moa’?

¹⁹ Tede, bighaf blong ol man blong Kraes, tabu spirit i no makemaot olgeta blong oli go rul wetem hem long heven. Be oli stap wet nomo long “dei blong Jehova,” we bambae i spolem rabis wol ya. I no gat wan man we i save stret taem blong samting ya, be i gat plante pruf blong soemaot se i klosap tumas. (1 Tesalonaeka 5:1-3) Afta, bambae ol dedman oli laef bakegen long niufala wol. Bambae oli gat janis blong kam stret olgeta we oli no moa ded bakegen. Taswe, ‘laef bakegen ya i gud moa’ i bitim  laef bakegen blong ol man bifo, we oli ded bakegen sam taem biaen.—Hibrus 11:35.

20. ?From wanem yumi sua se ol man bambae oli laef bakegen long fasin we i gat oda?

²⁰ Baebol i tokbaot olgeta we oli go long heven se: “Olgeta wanwan bambae oli laef bakegen, be long oda.” (1 Korin 15:23) Taswe long wol tu, yumi save sua se taem ol man oli laef bakegen, bambae i gat oda. Maet yu askem se: ?Olgeta we oli ded laswan, bambae oli faswan blong laef bakegen, blong famle blong olgeta we oli stap oli save welkamem olgeta? ?Ol man we oli lidim gud ol man blong God bifo, bambae oli laef bakegen kwiktaem blong givhan blong lidim wok long niufala wol? ?Olsem wanem long olgeta we oli neva mekem wok blong Jehova? ?Wetaem bambae oli laef bakegen mo long weples? I gat plante kwestin we yumi save askem. Be i no nid blong wari tumas long ol samting ya. I moagud yumi wet, nao yumi save luk wanem bambae i hapen. Yumi save se bambae yumi glad tumas long fasin blong Jehova blong mekem evri samting.

21. ?Wanem hop blong yu?

²¹ Go kasem taem ya, yumi mas mekem bilif blong yumi i kam strong moa. Jisas i talemaot promes blong Jehova se hem i stap tingbaot ol dedman, mo bambae i mekem olgeta oli laef bakegen. (Jon 5:28, 29; 11:23) Mo tu, Jisas i givim moa pruf se Jehova bambae i mekem ol dedman oli laef bakegen, taem hem i talem se long tingting blong Jehova, Ebraham, Aesak, mo Jekob, “oli laef nomo.” (Luk 20:37, 38) I klia se yumi gat plante risen blong talem olsem aposol Pol se: “Hop blong mi i stap long God, se ol man . . . bambae oli laef bakegen.”—Ol Wok 24:15.