Nogat. Setan i no stap talem se sipos Iv i kakae frut blong tri ya, bambae hem i ded mo spirit blong hem (olsem bilif blong sam man tede se sol i no save ded) i gohed blong laef samples. Taem Setan i yusum snek blong toktok long Iv, hem i talem se sipos Iv i kakae frut blong tri ya, ‘bambae hem i no save ded.’ Hem wantem minim se Iv bambae i gohed blong laef, bambae hem i gat wan gudfala laef long wol, mo hem i no nidim God blong i rulum hem.—Jen. 2:17; 3:3-5.

Sipos giaman tijing ya se sol i no save ded i no kamaot long garen blong Iden, ?olsem wanem nao i stat? Yumi no save stret. Be yumi save se taem bigfala wota i ron long taem blong Noa, olgeta giaman wosip oli lus long taem ya. From we Noa nomo mo famle blong hem oli laef long taem ya, mo olgeta evriwan oli wosipim Jehova, mo i no gat wan tijing blong ol giaman skul we i stap long taem ya.

Taswe tijing we plante man tede oli stap tijim se sol i no save ded, i kamaot afta we bigfala wota i ron. Hemia taem God i mekem ol lanwis oli paspas long Babel mo ol man oli ronwe oli “go stap olbaot long evri ples long wol.” I sua se taem oli aot, oli karem giaman tingting ya se sol i no save ded i go wetem olgeta. (Jen. 11:8, 9) Nating se yumi no save wetaem giaman tijing ya i stat, be yumi sua se Devel Setan, we hem i “papa blong ol giaman toktok,” i stamba blong ol samting ya mo hem i glad blong luk se giaman tijing ya i stap goaot moa.—Jon 8:44.