1-2. ?From wanem yumi sud intres bigwan long laef bakegen blong olgeta we oli go long heven?

PLANTE man tede we oli mekem wok blong Jehova oli gat hop blong laef foreva long wol ya. Be sam Kristin we tabu spirit i makemaot olgeta, oli gat hop blong laef bakegen long heven. Olgeta ya oli intres bigwan blong save se long fiuja, laef blong olgeta bambae i olsem wanem. ?Be olsem wanem long olgeta we oli gat hop blong laef long wol ya? Bambae yumi lanem se laef bakegen blong olgeta we oli go long heven, i save karem plante blesing long olgeta we oli gat hop blong laef foreva long wol. Taswe, nomata se hop blong yumi i blong laef long heven o long wol, yumi sud intres bigwan long laef bakegen blong olgeta we oli go long heven.

² God i pulum sam disaepol blong Jisas blong oli tokbaot hop blong laef bakegen long heven. Aposol Jon i eksplenem se: “Naoia yumi ol pikinini blong God, be i no klia yet se bambae yumi olsem wanem. Yumi save nomo se taem hem i kam long klia ples, bambae yumi olsem hem.” (1 Jon 3:2) Taswe ol tabu Kristin oli no save se bambae i olsem wanem taem oli laef wetem wan spirit bodi long heven. Nating se i olsem, bambae oli luk Jehova taem oli kasem pei blong olgeta. Baebol i no tokbaot evri samting long saed blong laef bakegen long heven, be aposol Pol i givim sam infomesen long saed ya. Ol tabu Kristin bambae oli stap wetem Kraes taem i “spolem gud olgeta gavman, olgeta haeman, mo olgeta we oli  gat paoa.” Mo hemia i minim tu “laswan enemi, hemia ded.” Biaen, Jisas wetem olgeta we oli rul wetem hem bambae oli putum olgeta samting mo olgeta wan, aninit long paoa blong Jehova. (1 Kor. 15:24-28) !Hemia bambae i wan nambawan taem! *

3. Folem 1 Korin 15:30-32, ?bilif blong Pol long laef bakegen i halpem hem blong mekem wanem?

³ Bilif blong Pol long laef bakegen i halpem hem blong stanap strong long plante defren traem. (Ridim 1 Korin 15:30-32.) Hem i talem long ol man Korin se: “Evri dei, mi . . . fesem ded.” Pol i raetem tu se: “Mi bin faet agensem ol wael animol long Efesas.” Ating hem i stap tokbaot se hem i faet wetem ol ril animol long stadium blong Efesas. (2 Kor. 1:8; 4:10; 11:23) O maet hem i stap tokbaot ol rabis man Jiu mo ol narafala we oli olsem “ol wael animol.” (Wok 19:26-34; 1 Kor. 16:9) Nomata se i olsem wanem, Pol i gotru long plante denja. Be yet hem i gat wan positif lukluk long saed blong fiuja.—2 Kor. 4:16-18.

4. ?Olsem wanem hop blong laef bakegen i mekem bilif blong ol Kristin tede i strong? (Yu luk pija long fran pej.)

⁴ Yumi stap laef long wan taem we i nogud tumas. Sam long ol brata blong yumi, ol man oli mekem i nogud long olgeta. Sam narafala oli laef long ol ples we i no sef from i gat wo. Mo sam narafala bakegen oli putum laef blong olgeta long denja from we oli prij long ol ples we gavman i putum strong rul o tabu long hem. Ol brata mo sista ya we oli gohed blong mekem wosip long Jehova, oli ol gudfala eksampol blong yumi. Oli no fraet nating, from oli save se sipos oli lusum laef blong olgeta naoia, Jehova bambae i givim wan we i gud moa long fiuja.

5. ?Wanem rong tingting we i save spolem bilif blong yumi long laef bakegen?

⁵ Pol i wonem ol brata blong hem se oli mas lukaot long rong tingting we samfala oli gat, se: “Sipos ol dedman oli no save laef bakegen . . . ‘I gud yumi gohed, yumi kakae, yumi dring, from we tumoro bambae yumi ded.’” Tingting ya i stap finis bifo long taem blong Pol. Maet Pol i yusum ol tok blong Aesea 22:13, we i tokbaot fasin blong ol man Isrel. Insted we oli kam klosap long God, oli girap oli stap ronem ol lafet. Rong tingting ya i olsem tingting blong ol man tede se, “janis hemia nomo, tumoro i no moa gat.” Be Baebol i tokbaot nogud frut we i kamaot from rong tingting ya blong ol man Isrel.—2 Kron. 36:15-20.

6. ?From wanem hop blong laef bakegen i mas gat paoa long yumi taem yumi jusum ol fren?

⁶ Jehova i save mekem ol dedman oli laef bakegen, taswe i klia se yumi mas lukaot long ol man we yumi joen wetem olgeta. Ol brata long Korin oli mas lukaot blong no kampani wetem ol man we oli no bilif long laef bakegen. Lesen blong yumi tede: I no gat wan gudfala samting i save kamaot taem yumi joen wetem ol man we oli wantem gat gud taem nomo, mo oli no tingbaot fiuja. Sipos wan Kristin i spenem plante taem wetem ol man olsem, hemia i save spolem bilif mo gudfala fasin blong hem. Mo tu, maet hemia i save lidim hem blong gat wan laef we i no klin. Taswe, Pol i talem strong se: “Tingting blong yufala i mas wekap, yufala i mas mekem samting we i stret, mo yufala i no mekem sin.”—1 Kor. 15:33, 34.

7. ?Folem 1 Korin 15:35-38 maet sam man bambae oli askem wanem?

⁷ Ridim 1 Korin 15:35-38. Wan man we i  wantem mekem ol narafala oli gat tu tingting long laef bakegen, maet bambae i askem se: “?Ol dedman bambae oli laef bakegen olsem wanem?” I gud yumi tingbaot ansa blong Pol, from we plante man tede oli gat prapa bilif blong olgeta long saed blong laef afta ded. ?Be Baebol i tijim wanem?

8. ?Wanem pijatok i save halpem yumi blong kasemsave laef bakegen long heven?

⁸ Taem wan man i ded, bodi blong hem i kam graon bakegen. Be God ya we i krietem yunives aot long nating nomo, hem i save mekem man ya i laef bakegen, mo i givim bodi we i stret long hem. (Jen. 1:1; 2:7) Pol i yusum wan pijatok blong soem se God i no nidim blong givimbak semfala bodi long wan man. Tingbaot “sid blong wit” o blong wan plant. Wan sid we man i planem long graon, i gru mo i kam wan niufala plant. Niufala plant ya we i gru i defren olgeta long smol sid we man i planem. Pol i yusum pijatok ya blong soem se Krieta blong yumi i save givim wan “niufala bodi” long man “olsem we [Hem] i wantem.”

9. ?Olsem wanem 1 Korin 15:39-41 i soem se i gat plante defdefren kaen bodi?

⁹ Ridim 1 Korin 15:39-41. Pol i tokbaot se olgeta bodi oli no sem mak. Eksampol, i gat plante defren bodi, olsem bodi blong buluk, pijin, mo fis. Hem i tokbaot se long skae, yumi luksave samting we i defren long san mo mun. Mo hem i talem tu se “glori blong ol sta wanwan i defdefren.” Yes i tru, nating we yumi no luksave se oli defren olsem wanem, be ol saentis oli talem se i gat plante defdefren sta, olsem bigfala red sta, waet sta, mo yelo sta we i olsem san. Pol i tokbaot tu se “i gat ol bodi we oli blong heven, mo i gat ol bodi we oli blong wol.” ?Hem i stap minim wanem? Long wol ya yumi gat bodi we i mit mo blad, be long heven i gat ol spirit bodi olsem bodi blong ol enjel.

10. ?Olgeta we i blong go long heven bambae oli laef bakegen long wanem kaen bodi?

¹⁰ Makem nekiswan samting we Pol i talem, i se: “Taem man i laef bakegen long ded, bambae  i sem mak. Bodi blong hem we oli putum long graon i kam roten, be taem hem i laef bakegen, bodi blong hem i no moa save roten.” Yumi save se taem man i ded, bodi blong hem i roten mo i kam graon bakegen. (Jen. 3:19) ?Taswe i minim wanem se “bodi blong hem i no moa save roten”? Pol i no stap tokbaot wan man we i laef bakegen long wol ya, olsem olgeta ya we Elaejah, Elisa, mo Jisas oli mekem oli laef bakegen long taem blong olgeta. Be, hem i stap tokbaot wan man we i laef bakegen long wan bodi we i blong go long heven, hemia wan “bodi we i spirit.”—1 Kor. 15:42-44.

11-12. ?Jisas i laef bakegen olsem wanem, mo olsem wanem sem samting bambae i hapen long tabu man?

¹¹ Taem Jisas i stap long wol ya, hem i gat bodi we i mit mo blad. Be taem hem i laef bakegen, “hem i kam wan spirit we i save givim laef” mo i gobak long heven. Pol i eksplenem se: “Olsem we yumi sem mak long man ya we i kamaot long das, bambae yumi sem mak tu long man ya we i blong heven.”—1 Kor. 15:45-49.

¹² Pol i stap kam long lastok blong hem long saed blong laef bakegen. I impoten blong makem se Jisas i no laef bakegen wetem bodi we i mit mo blad. Pol i talem stret se: “Bodi we hem i mit mo blad i no save go long Kingdom blong God” long heven. (1 Kor. 15:50) Ol aposol mo ol nara tabu man bambae oli no laef bakegen wetem wan bodi we i mit mo blad we i save roten, blong go long heven. ?Bambae oli laef bakegen wetaem? Pol i talem se bambae oli laef bakegen samtaem long fiuja, be i no stret afta we oli ded. Taem Pol i raetem 1 Korin, sam disaepol “oli slip finis long ded,” olsem aposol Jemes. (Wok 12:1, 2) Mo ol narafala aposol mo tabu man oli no slip yet long ded.—1 Kor. 15:6.

13. ?Wanem bambae i hapen long taem ya we Jisas i stap?

¹³ Jisas mo Pol i tokbaot wan spesel  samting we bambae i hapen blong soemaot se Kraes i stap. Long taem ya bambae i gat wo, etkwek, ol strong sik, mo ol nogud samting long wol ya. Yumi luk profet tok ya i kamtru stat long 1914. Be i gat wan narafala impoten haf blong saen ya tu. Jisas i talem se gud nius blong Kingdom blong God we i stap rul finis, bambae ol man oli talemaot “long olgeta ples long wol, blong oli witnes long olgeta nesen, nao biaen bambae en i kam.” (Mat. 24:3, 7-14) Mo tu, Pol i talem se “taem Masta i stap,” hemia taem ya tu we olgeta tabu Kristin we “oli ded finis” bambae oli laef bakegen.—1 Tes. 4:14-16; 1 Kor. 15:23.

14. ?Wanem bambae i hapen long ol tabu man taem oli ded long taem ya we Kraes i stap?

¹⁴ Tede, taem ol tabu man oli ded, kwiktaem nomo oli laef bakegen blong go long heven. Hemia i olsem tok we Pol i talem long 1 Korin 15:51, 52: “I no yumi evriwan we bambae yumi slip long ded, be yumi evriwan bambae yumi jenis, wantaem nomo, olsem we yu satem ae, hemia long taem we saon blong laswan trampet i kamaot.” !Ol tok ya blong Pol oli stap kamtru finis tede! Taem ol brata ya blong Kraes oli laef bakegen bambae oli kasem bigfala glad, bambae oli “stap olwe wetem Masta.”—1 Tes. 4:17.

15. ?Olgeta ya we oli jenis olsem we “yu satem ae,” bambae oli mekem wanem wok?

¹⁵ Baebol i tokbaot wok we olgeta ya we oli jenis olsem we “yu satem ae” oli mekem taem oli go long heven. Jisas i talem long olgeta se: “Man we i winim faet mo i folem ol tok blong mi gogo kasem en, mi bambae mi givim paoa long hem blong hem i rul long ol nesen. Mi mi kasem sem paoa ya long Papa blong mi. Mo man ya bambae i yusum wan aean stik blong rulum ol man. Hem bambae i smasem gud  ol man ya olsem we hem i smasem graonpot gogo i brobrok olgeta.”(Rev. 2:26, 27) Bambae olgeta ya oli folem Komanda blong olgeta mo oli yusum wan aean stik blong rulum ol man.—Rev. 19:11-15.

16. ?Olsem wanem ded bambae i no moa gat paoa long plante man?

¹⁶ Yes, bambae ded i no moa gat paoa long ol tabu man ya. (1 Kor. 15:54-57) Laef bakegen blong olgeta i mekem se oli save joen long bigfala faet ya Amagedon, blong finisim olgeta nogud samting. Plante milian narafala Kristin man mo woman, bambae “oli pastru long bigfala trabol” mo oli go insaed long niufala wol. (Rev. 7:14) Mo long taem ya, olgeta we oli pastru i go long niufala wol, bambae oli luk we ded i no moa gat paoa long plante bilian man we oli laef bakegen. !Tingbaot bigfala glad we bambae yumi kasem long taem ya! (Wok 24:15) Be tu, ded we i kamaot from sin blong Adam, bambae i no moa gat paoa long olgeta ya we oli holemstrong long Jehova. Nao bambae oli save laef foreva.

17. ?Fas Korin 15:58 i enkarejem yumi blong mekem wanem naoia?

¹⁷ Evri Kristin we oli stap laef naoia, oli sud haremgud long ol tok ya blong Pol long saed blong laef bakegen. Yumi gat plante risen blong obei long advaes ya blong stap bisi long “wok blong Masta.” (Ridim 1 Korin 15:58.) Sipos yumi holemstrong mo yumi gohed blong mekem wok ya, bambae yumi save haremgud long gudfala laef ya blong fiuja. Laef ya bambae i gud moa i bitim wanem we yumi save tingbaot. Hemia bambae i pruvum se ol wok blong yumi oli no blong nating nomo, from we oli wok blong Masta.