▪ Nogat, Baebol mo histri i no soem se samting olsem i hapen.

Long plante Baebol, wei we ol man oli transletem vas ya i mekem sam man oli ting se long taem blong Pol, ol man oli stap baptaes long wota, long bihaf blong ol man we oli ded finis. Eksampol, wan Baebol i transletem vas ya i se: “Nao sipos i no gat laef bakegen, ?olgeta ya we oli baptaes long bihaf blong ol dedman, bambae oli mekem wanem?”—New International Version.

Be makem tok blong tu Baebol skola: Dr. Gregory Lockwood i talem we tingting ya se ol man oli baptaes “long bihaf blong olgeta we oli ded finis,” i “wan kaen baptaes we i no gat pruf blong hem nating long Baebol mo long histri blong man.” Long sem fasin, Profesa Gordon D. Fee i raetem se: “I no gat wan stori blong kaen baptaes olsem long histri blong man mo long Baebol. Niutesteman i no talem wan samting long saed ya, mo i no gat pruf se ol fas Kristin, mo ol nara jos we oli kamaot afta long olgeta, oli mekem kaen baptaes ya.”

Baebol i talem se ol man blong Jisas oli ‘mas go long ol man long olgeta nesen, oli pulum olgeta oli kam disaepol blong hem, baptaesem olgeta, mo tijim olgeta blong oli folem olgeta tok’ we hem i talem. (Mat. 28:19, 20) Bifo we wan man i kam disaepol we i baptaes, hem i mas lanem trutok long saed blong Jehova mo Pikinini blong Hem, i mas bilif long tufala, mo obei long tufala. Wan man we i ded finis mo i stap long gref, hem i no save mekem samting ya; mo wan Kristin we i laef i no save mekem samting ya long bihaf blong hem.—Pri. 9:5, 10; Jon 4:1; 1 Kor. 1:14-16.

?Be Pol i stap tokbaot wanem?

Sam man Korin oli talem se ol dedman oli no save laef bakegen. (1 Kor. 15:12) Pol i soemaot se tingting ya i rong. Hem i talem se ‘evri dei, hem i fesem ded.’ Be i tru se hem i no ded yet long taem ya. Mo nating se hem i fesem ol denja, hem i gat strong tingting se sipos hem i ded, bambae hem i laef bakegen olsem wan spirit man we i gat paoa, olsem we i hapen long Jisas.—1 Kor. 15:30-32, 42-44.

Ol Kristin long Korin oli mas kasemsave se from we tabu spirit i makemaot olgeta, oli mas fesem hadtaem evri dei mo oli mas ded, bifo we oli laef bakegen. From we oli “baptaes long Kraes Jisas,” hemia i min se oli “baptaes tu long ded blong hem.” (Rom 6:3) Baptaes ya i mekem se bambae oli ded mo oli laef bakegen, blong go laef long heven.

Bitim tu yia afta we Jisas i baptaes long wota, hem i talem long ol aposol blong hem se: “Baptaes ya we bambae mi mi baptaes long hem, bambae yutufala tu i baptaes long hem.” (Mak 10:38, 39) Stret long taem ya, Jisas i no baptaes long wota. Taswe hem i minim se hem i gohed blong stap tru long God, be bambae hem i ded from. Pol i raetem se ol tabu Kristin bambae oli “safa wetem hem, blong bambae [oli] kasem haenem wetem hem.” (Rom 8:16, 17; 2 Kor. 4:17) Taswe olgeta tu oli mas ded blong oli save laef bakegen long heven.

Taswe, i stret nomo blong transletem tok blong Pol se: “Sipos i tru se ol dedman oli no save laef bakegen, ?olsem wanem long olgeta ya we oli baptaes long ded? ?From wanem oli baptaes long baptaes ya?”